Mat 4
4
Devil, Yesu iruyaghai.
(Mak 1:12-13; Luk 4:1-13)
1Nani murinai Kanuma Vovokaravina Yesu irutini ku warere da Devil ita pisi da Yesu ita ruyaghai.#Hib 2:18, 4:15 2Madeghai ma didibarai ivivi siya da mara 40 ikovi ma vitonara ikara kirakiiyei. 3Ma Devil ipisi ma ivona bo, “Tam God natuna, bo? Kevona da weni wakimisi ini parawa.”
4Yesu ivonapotei bo, “Giruma katamana evonavona bo, ‘Wawaya ke parawa kava tepanai ita makamakai ma God gwabinai vonana ekiikiibau na tuna tepanai ina makai.’ ”#Deut 8:3
5Nani murinai Devil, Yesu irutini ku Jerusalem, tuna na kwanatu vovokaravina. Ma ighae ku Taparoro Numana vovona. 6Ma Devil ivona bo, “Tam God natuna, bo? Ketawem kunoru. Giruma katamana evonavona bo,
‘God ina aneya ina vonesi da ina koyagha bubunim,
ma ina vokemim da kaem ke wakima ina takurei.’ ”#Psa 91:11-12
7Ma Yesu ivonapotei bo, “Giruma katamana bade evonavona bo,
‘Bada God ke kuna rubui.’ ”#Deut 6:16
8Nani murinai Devil, Yesu irutini da ku koya tepana ma dobu kudubina ina mura yavata ivi beyei. 9Ma Devil ivona bo, “Kuna runomeku ma kuna vokavakavariku na aviyavisina peyarina kekitakitai na ana verem da kuni badei.”
10Ma Yesu ivonapotei bo, “Seitan, kenetaweyana! Giruma katamana evonavona bo,
‘Am Bada God ina kina kava kevokavakavari ma kevotekatekei.’ ”#Deut 6:13
11Ma vaghina, Devil inae. Ma Bada ina aneya viya inekiibau ma Yesu ikoyagha bubuni.
Yesu ina biga ivi karei.
(Mak 1:14-15; Luk 4:14-15)
12Yesu sisiya ivi yanei da Jon gabura kamonai na ivovirame ku Gariri dobuna.#Mat 14:3; Mak 6:17; Luk 3:19-20 13Ma Nasaret kwanatuna ivoterei ma inae da Kapeniyam kwanatunai imakai. Nani kwanatuna na Gariri tokana baranai, Zebulun ma Napitali damsi i dobu kamonai.#Jon 2:12 14Nakanani iberai da aviyavisina peroveta Aisaya igirumi na itupuwa, ivona bo,
15“Gariri na Zebulun ma Napitali damsi i dobu.
Tuna kikirai, Jodan okowina nevanai,
ma kamonai na kupuna damsi peyarisi imakiiyana.
16Tuna dobunai wawaya nubakutuva kamonai imakamakai,
ma yasegana ghamana ina kitai.
Iyavo kava rabobo damina eviiviiya ma nubakutuvina kamonai emakamakai na
kurisi yasegana ina nekiibau.”#Isa 9:1-2
17Nani maranai Yesu dima ivi karei, ivonavona bo, “Ami bera beroberosi kovinimayei ma komiirikupukuputei, iyamna God ina vikiivavona enenekiibau kurimi.”#Mat 3:2
Yesu kana kivikivina ruwamaruwa ivinesi.
(Mak 1:16-20; Luk 5:1-11)
18Yesu Gariri tokana kikirinai ibababa ma tomotomowa ruwa ikitisi iwiwito. Ti i biga na iyana ikonakonisi ma ivivi gimara. Sago na Saimon (kana vava sago Pita) ma sago na tina kikei Anduru. 19Ma Yesu ivonesi bo, “Kopisi, kokiviniku. Ani beyebeyemi da wawaya kona konisi.” 20Ma yaghiyaghinai i wito ivoterei ma Yesu ikivini.
21Inae gisina ma tomotomowa ruwa ikitisi, ti na Zebedi natunatuna Jemes ma Jon. Waka kamonai i mamai yavata i wito iwuwurapotapotai ma Yesu ikwatusi 22na yaghiyaghinai i mamai ma i waka ikuyowei ma Yesu ikivini.
Yesu gubagubagisi ivi yawasisi.
(Luk 6:17-19)
23Yesu Gariri dobuna ine yavui ma kiki numasi kamosiyai ivivi beyebeyena, God ina vikiivavona idimadimei. Ma wawaya kii gubaga bogii ma bogiiyai na kudubisi ivivi yawasisi.#Mat 9:35; Mak 1:39 24Varana Siriya dobuna ine yavui, ma wawaya turaturasi gubagubagisi irutinisi kurina. Kii gubaga bogii ma bogiiyai. Viya na ininisi ivivi visivisiyana, viya na paroparorosi, viya na digadigasi ma bade viya kanuma beroberosi gwabisiyai irunuma. Ma Yesu peyarisi ivi yawasisi. 25Tuna kubiine koroto ghamaghamasi ivivi kiidaburana da Yesu ikivikivini. I dobu na Gariri, Dekapolis, Jerusalem, Judiya ma bade Jodan okowina nevanai.
Seçili Olanlar:
Mat 4: pwgB
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2009, Wycliffe Bible Translators, Inc. All rights reserved.
