Mat 3
3
Jon Babataito idima.
(Mak 1:1-8; Luk 3:1-18; Jon 1:19-28)
1Nani marasiyai Jon Babataito inae ku Judiya ma warere kamonai dima ivi karei. 2Ma ivonavona bo, “Ami bera beroberosi kovinimayei ma komiirikupukuputei, iyamna wekarakava na God ina vikiivavona enenekiibau.”#Mat 4:17; Mak 1:15 3Peroveta Aisaya ina giruma kamonai Jon ivi sisiyei. Ivona bo,
“Wawaya sago warereyai ekwatukwatu bo,
‘Bada ina keta kovovunaghi,
Keta maninina koberai ma ina pisi.’ ”#Isa 40:3
4Ma Jon kana gara na kamel vunivuninai iyamoni ma kana boriwaya na ghamoghamo bekana. Ma kana vavai na madi da manigewa.#2Kgs 1:8 5Wawaya Jerusalem kamonai ma Judiya dobuna kamonai ma bade dobu kudubisi Jodan okowina ririnai na peyarisi inae Jon kurina. 6Ma i berabero debiiyai ivivi mamatarei ma Jon ibababataitosi Jodan okowina kamonai.
7Perisi ma Sadusi damsi ipisi Jon kurina da ita babataito na Jon ikitisi ma ivonesi bo, “Tami mota natunatusi! Iyi ivonemi da God ina kovogha epipisi na kona veruvuvurei?#Mat 12:34, 23:33 8Kovonavona da ami berabero komiirikupukuputei na ami yawasa iti mamatara da vonavaghata. 9Ma ke kona nota meyemi da tami Abraham tupurereghina kubiine na God ina kovogha kona veruvuvurei. Avonavonemi, God kovokovoghina da weni wakimisi ina berisi da ini wawaya da ti na Abraham tupurereghina.#Jon 8:33 10Wawaya ere karuwakoyina namada kii kunukunusiyai emiimiiri ma meni kiina amena ke biibiina na ina taratawei ma ku keyama karakaratina ina tawei.#Mat 7:19 11Ma taku okowai abababataitomi, tuna ivi matakira da ami berabero komiirikupukuputei. Ma murikuwai wawaya sago rewapana kirakiina ina nekiibau na taku ke wawaya kiimataniku da ata tawopika da kaena kana terepapara uravina ata rupamatawei. Ma tuna wawayina na Kanuma Vovokaravinai ma keyama karakaratinai ina babataitomi. 12Mara sago ini tupavirevireta ma ina rereghita da biibiita ma beroberota. Biibiisi ina rutinisi ku kunuma ma ina koyagha bubunisi. Ti nakanani ma whiti vavina da wayowa wawayina ina maghara, numa kweta kamonai ina terei. Ma beroberosi ti nakanani ma whiti muguna. Wayowa wawayina ina yuna da ina tawei ku keyama karata makamakii nonowina da ina karai.”
Yesu ibabataito.
(Mak 1:9-11; Luk 3:21-22)
13Ma Yesu Gaririyai ivomiiri ku Jodan okowina da Jon gwabinai ita babataito. 14Ma Jon ikayowei da Yesu ina nota ita virai, tuna kubiine ivona bo, “Taku ke wawaya kiimataniku da ana babataitom. Ma tam na taku kuta babataitoku.”
15Ma Yesu ivonapotei bo, “Kegha vaghina, tam kuna babataitoku. Weni nakanani taberai, iyamna bera maninina ma God ina kayowana.” Ma Jon ivi vaghinei.
16Yesu ibabataito ma okowai igheghetawei na kunuma itamotate ma ikita da God ina Kanuma Vovokaravina nakanani ma gabubu iororu kurina da tepanai itowa. 17Ma nani kamonai kunumai God gamona ivona bo, “Weni tuna na natuku vaghata. Tuna na nuwanuwaku, ainuwabiibiiyei.”#Gen 22:2; Psa 2:7; Isa 42:1; Mat 12:18, 17:5; Mak 1:11; Luk 9:35
Seçili Olanlar:
Mat 3: pwgB
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2009, Wycliffe Bible Translators, Inc. All rights reserved.
