URA TIN AYRA 6
6
Lona min a ba suu kay ndaŋgarana kiyo
1Hu li ma suuna gijaŋ zul kay ndaŋgara cocona, gorɓiina zuli kosi lay.#Job 1.6; 2.1 2Goryoŋ Lonana wi gorɓii asina na ni irisi jivi cocoo, asi gijaŋ ŋgaɓasi a ɗumba. 3Yawe ɓak tam ɗaŋŋi ana, «An ka ndak a hin Musuk manda ŋgom suuna kay ndaŋgara na gak gakgi, kay asi ka li cora, asi miɗ ki ni miɗiya, basa masira kay ndaŋgara ka li su kis duk dok-mba'ɗi.»
4Ni hu coki mayara suu wuli fiyeki coco kay ndaŋgarana. Suu asina hin li dagan gak lay. Ay hu njaf suu jewna ni suu asina saɓak cocoo, sesi tii coco lay. Vuɗusini u taɓpa vi goryoŋ Lonana u gorɓii suu kay ndaŋgarana.#Ndu. 13.33
5Yawe wi ana suuna tuɗ fok a li cora kay ndaŋgara li na ɗow ɗow, hu buuna tew tew ni saa masira tini ni kay dla cora.#Mat. 24.37; Luk 17.26; 1 Piy. 3.20 6Yawe mbuɗ yoo tam ana nam cuk suu warna kay ndaŋgara na herekŋi amege? 7Nam di tam ɗaŋi ana, «Suu an cukusi kay ndaŋgarana an min baasi kiyo. Mburi suu ŋgolona u suu gorina u layagina lay, hurun haɗ kay cukka an cukusira.» 8Nowa ni sa fi oora vi Yawera.
Lona min suɗ Nowa kiyo
9Gola ni dlara vi Nowara. Nowa ni sa ma ɗegee ii Lonna. Hu coki ndaɗta ŋgul ka egembi. Nam poy u voɗta vi Lonara, hum um jivi lay.#2 Piy. 2.5 10Nam vuɗ gor njufiina hindi, Sem, Kam u Jafet. 11Ii Lona ni suu hu ndaŋgarana halaŋ mbuɗ ki coo, suuna halaŋ mbuɗ halni dlara ci maɗna.
12Lona gol dlara hu ndaŋgarara na halaŋi, ndaɗ mbuɗ ki coo, tlesuu kay ndaŋgarana halaŋ poy masira mbuɗ ki coo. 13Nam di Nowa ana, «An min ba suu war suu kay ndaŋgarana kiyo. Dla coosira asi laɗta kay ndaŋgara halaŋ mbuɗ ki coo, an min baasi ki u ndaŋgara halaŋ.
14«Aŋ ceɗ lumba ŋgolla u gu ma yam ana sipre, ɓorowoɗ iriɗ hu kurufu zeɗ zeɗ bolowo. Aŋ hooroɗ huruɗ ki u bitumma#6.14 bitumma Ni va ma dabaŋ ma suuna mbu voɗ bulna u namma., ŋgoroɗ lay. 15Ni aŋ miniɗ ni ko wanda na, fiyekeɗ ŋga meter kis duk dok-vadl, hayaɗ ŋga meter dok-mba' yam vadl, wuluɗ ma kolona meter doogo yam vadl. 16Aŋ tokoɗ yaɗ kolo zira dew, duk ɦoŋoɗ u lumba ŋga nus meter dew. Hin vunna kalla keŋeɗu. Aŋ ɓorow ii lumba kolo kay taɗ hindi.
17«An min a tli yo ŋgolna kay ndaŋgara, kay a ba tlesuu iirina ki halaŋ. Tlesuu iiri suu kay ndaŋgarana halaŋ hin miɗ kiyo. 18Na may an min vi galamba u aŋu a suɗuŋ kiyo, aŋ hin kal hu lumba u caaŋga, goryoŋu u boyogosiya. 19Tlesuu iirina halaŋ aŋ yowosi hu lumba mba' mba', ma njufna u caamba, ma njufna u caamba, kay a suɗsi ki uŋu. 20Njaf tlesuu iirina halaŋ, mburi suu ŋgolona u tlesuu gorina halaŋ, u layagi suu pii kolona mba' mba', aŋ yowosi mba' mba' egeŋ a suɗusi kiyo. 21Yow njaf tlesuu tira uŋ halaŋ, magisina u suu fi yoorinana lay, ŋgomosi ugiya kay a agi suu hu lumbana halaŋ fi tina.»
22Ni dlara Nowa laɗta, nam li u boy ma Lona dammana halaŋ.#Heb. 11.7
Seçili Olanlar:
URA TIN AYRA 6: BMS
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bible Moussey © Bible Society of Chad, 2002.