URA TIN AYRA 4
4
Kain u Abel
1Adam taɓ u caamba Eve, ndaɗ vi wiina, ndaɗ vuɗ goona, tinim sem ana Kain. Ndaɗ di ana, «An vuɗ go njufna kon wa, Yawe ɦanna ni namu.» 2Ndaɗ hin vuɗum wayamma, tinim sem ana Abel. Abel ni sa taa yoorina, Kainni sa horokŋa may.
3Fali taa dew ni Kain yow yam tlesuu jivi kay ndaŋgarana komu li ɓivunna maŋ Yawe. 4Abel may ni li ɓivunna maŋ Yawe u gor timigii mam suu vuɗ jewna, nam man tliw ma jivina maŋ Yawe. Yawe min Abel u ɓivun mamma.#Heb. 11.4 5Nam min Kain ka u ɓivun mammaɗi.
Ni kay ndaɗta Kain hurum ɓeŋ cocoo, mbuɗ ɗus irim na dum dum. 6Yawe dam ana, «Aŋ mbuɗ yara, ɗus iriŋ dum dummi kay mege? 7Lini aŋ li jiviya ni aŋ ka ɗus iriŋgi, lini aŋ li coo, ni cora ka juɓuŋ fun ziŋga, hal a su kaŋŋu, aŋ may ni su kaɗna ɗow.»
8Kain di wayamma ana, asi tuɗ ki ŋgoo bagiya, hu li ma asi tew hu senena may ni Kain vi wayamma, Abel, cam kiyo.#Mat. 23.35; Luk 11.51; 1 Jaŋ 3.12 9Yawe joɓ Kain ana, «Wayaŋŋa, Abel, arage?» Kain hoŋom dira ana, «An wiɗi, anni sa a gol wayanna su?» 10Yawe dam ana, «Aŋ li na ni amege? Dla busu wayaŋŋa tew ha ki egen kolo u tiina a saam sukulumba.#Heb. 12.24 11Lona gaŋ vuna wa, ndaŋga mayra aŋ vo busu wayaŋŋa ki kaɗta mbuɗ vunuɗ ki kaŋ wa. 12Aŋ hin horok kaɗ lay ni, ndaɗ hin ka jiv vaɗi, sariyaŋ hin kini paɗi koloo, aŋ hinni a sa ma tuɗ kolo cow cowna.»
13Kain di Yawe ana, «Las manda kal ki saɓakiya ka zii konɗi. 14Cecemi aŋ dikin ki kay ndaŋgara wa, an hin tuɗ ŋgay tan ha ki egeŋŋa day, an hinni a sa ma tuɗ kolo cow cowna, sariyan ka kaŋga oloɗi. Sa ma fan fina can ki gaw.» 15Yawe hoŋom dira anaba, «Sa ma ci Kain cina, saam sukulum yamma kiɗisiya.» Yawe tin dla mayra tak ki kay Kain ana sa ŋgafam wa, cambira egemu. 16Kain tuɗ kak ha ki day hu mbassa Nod u maɗiina vi sene Edenna, ki day eg Yawe.
Njafna vi Kain
17Kain taɓ u caamba, ndaɗ vi wiina vuɗ goona, tinim sem ana Henok. Kain min ɦoŋzi ŋgolna, tinim sem u goromma, Henok. 18Henok vuɗ Irad, Irad vuɗ Mehuyael, Mehuyael vuɗ Metukael, Metukael vuɗ Lemek.
19Lemek ɗum boyogina mba', ta ŋgolla yaɗ ana Ada, ta goora yaɗ ana Silla. 20Ada vuɗ goona yam ana Yabal, nammi bu ŋgolo suu buu hu mbutluɓma, suu ta yoorina. 21Yabal wayamma yam ana Yubal, nammi bu ŋgolo suu bu diŋŋa u suu bu diffa. 22Silla vuɗ goona yam ana Tubal-Kain, nammi sa dli caffa, nam dli kawi ma siina. Wayaŋ Tubal-Kainda yaɗ ana Naama.
23Lemek di boyogom ana,
«Ada u Silla, humun ki vunun haa.
Boyogi suu vi Lemekŋa, humugi jiviya.
Lini sa waɗan wa ni an ci sa ki dew.
Lini sa dagan wa ni an ci goozoŋ ki dew.
24Lini a ci suu ki kiɗisiya a sa sukul Kainni
hin ci suu dok-kiɗisiya yam kiɗisiya
a saan sugulunda may.»#Mat. 18.22
25Adam taɓ u caamba vuɗ goo ma daŋŋa olo, Eve tinim sem ana Set, ndaɗ di ana, «Lona ɦan goo ma daŋ balam Abel ma Kain cam kina wa.» 26Set hin vuɗ goona tinim sem ana Enos. Ni hu li ma suuna gijaŋ cen Lona yam ana Yawena.
Seçili Olanlar:
URA TIN AYRA 4: BMS
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bible Moussey © Bible Society of Chad, 2002.