SOERA JOBI FAZA 42.

FAZA 42.

I. Mangaloeloe Jobi; mangesa dõdõnia ba gamoeatania mege. II. Itegoe zi fahoewoe chõ Jobi si datõloe andrõ Lowalangi; iw̃aʼõ chõra, alacha mangandrõ Jobi, salahira. III. Ifoeli ohahaoe dõdõ Jobi.

1I. Ba itema li Jehowa Jobi, imane:

2”Oeʼila, wa lõ hadia ia, si tebai ndraʼoegõ, awõ wa lõ tõdõoe, si tebai õfaloea.

3’Ha niha zombaloegõ tõdõ [Lowalangi], niha sambõ tõdõ andrõ’? Andrõ oew̃aʼõ, ba wa lõ tõdõ andrõ, ngawalõ si tebai aboto ba dõdõgoe, si lõ oeʼila watahõgõ. (F. 38, 2. Amaed. 28, 13. Joh. I. 1, 9).

4’Ba fondrondrongo, alacha jaʼodo zihede; daʼoesofoe chõoe, ba õfahaõ ndraʼo.’ (F. 38, 3).

5Ha toeriamõ nirongogoe mege, ba ijaʼe, ba no iʼilaʼõ hõrõgoe!

6Andrõ oefoeli ligoe, ba mangesa dõdõgoe, ba gawoegawoe tooe ba ba nawoe!”

7II. Ba me no iʼoʼozoei hoehoeonia andrõ chõ Jobi Jehowa, ba imane chõ Gelifasi, banoea Dema: ”No tesao wõnoegoe chõoe ba ba zi fahoewoe chõoe andrõ, si daroea, me no tenga satoelõ hoehoeomi andrõ, wamatooe jaʼo, no tenga si mane hoehoeo genonigoe Jobi. 8Ba mihalõ nono zaw̃i, fitoe rozi, ba biribiri si matoea, fitoe ngaʼeoe, ba miʼae chõ genonigoe Jobi ba mibeʼe zoemange nitoenoe, tána chõmi, ba acha mangandrõ genonigoe Jobi, salahimi, me no ha sambalõ famaigigoe jaʼia, wa oetaha na dõdõgoe, ba wolaoe chõmi, me no tenga satoelõ hoehoeomi andrõ, wamatooe jaʼo, no tenga si mane chõ genonigoe Jobi. (Hez. 14, 14).

9Ba mõi ndra Elifasi, banoea Dema, Bilidado, banoea Zoea, Sofari, banoea Naʼama, laʼoʼõ niw̃aʼõ Jehowa chõra; ba ifondrondrongo chõ Jobi Jehowa.

10III. Ba ifadõhõ wamakao Jobi andrõ Jehowa, me mangandrõ ia salahi zi fahoewoe chõnia andrõ; ifabali saʼae chõ Jobi fefoe zi so chõnia fõna. (F. 8, 7). 11Ba mõi chõnia dalifoesõnia fefoe, matoea ba alawe, awõ zi no faʼila li chõnia mege, fefoe, manga ira chõnia, ba nomonia, lafaʼeleʼõ waʼahachõ dõdõra, ba larara dõdõnia ba wamakao andrõ fefoe, nifatõrõ Jehowa chõnia; ba mamoeala ira chõnia, sagõrõ hoea balaki ba samboea laedoeroe anaʼa zamõsa. 12Ba abõlõ ifahowoeʼõ Jobi Jehowa ba zi tosai noso Jobi, moroi me fõna; faloecha ia mbiribiri, 14,000 ngaʼeoe, ba ondra, 6000 ngaʼeoe, ba saw̃i, 1000 fasa, ba kalide si alawe, 1000 ngaʼeoe. 13Ba toemboe chõnia ndraono, 7 nono matoea ba 3 nono alawe; 14ba tõi zi samboea chõnia, ba Jemima ba si samboea, ba Kasia, ba si achi, ba Kerene-Hafoecha. 15Ba ba danõra maʼasagõrõ, ba lõ ira alawe si manõ faʼasõchi bawa, si mane ono Jobi; ba ifanema ira ondrõita amara, ba ngai dalifoesõra matoea. (Moz. IV. 27, 8—11). 16Ba aefa daʼõ, ba 140 fache tõ noso Jobi, ba tõloe ngaʼõtõ iʼila maʼoewoenia. 17Ba mate Jobi, me no atoea sibai ia ba me no afõli ia waʼaoeri. (Moz. I. 25, 8).

Seçili Olanlar:

SOERA JOBI FAZA 42.: NIA

Vurgu

Paylaş

Kopyala

Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın

Soera Ni’amoni’ö Hakkında Daha Fazlasını Öğrenin

SOERA JOBI FAZA 42.