KU̧U̧NAŊMƆ 8
8
Ɔ̧sa̧-yì
1Tɛ Sɔ̧ mbaŋa ɗoŋ Nɔe in o saɗi ká bá nɛ̀ o mɔ-dai lɛŋ nɛ a̧a̧ in a̧ sɛn kɔ̧ kombon. A̧ dee ha̧ ŋma búk mɛ yu zu yì, ɓɛɛ yì ku̧naŋ ɔ̧sa̧-a̧. 2O kpút-kpút mɛ ɗuka-fara in o woi yiwese lɛŋ kpea, kórò gɔna. 3Yì daka ɔ̧si nɛnɛ mɔktɛ mɔktɛ tɛ́ ɔɔ-zɛ gɔmŋmaa-nɛ-ɓu-mɔɔrɔ. 4Tɛ́ mɔɔrɔ-ɗoŋ-yiitoo fio-zɛ, tɛ̀ ɓu-zua-mɔɔrɔ-ɗoŋ-yiitoo ɔɔ-zɛ, kombon zira duk zu kaya Arara. 5Yì ɔ̧sa̧ nɛnɛ hegɔɔ hɔ tɛ́ fio-zɛ ɓu, nɛ ɔɔ-zɛ ɓu-zua-kpɔk, ɓɛɛ o zu kaya ku̧naŋ gboa-a.
6Ɗoŋ ɔɔ-zɛ ɓu-naar, Nɔe hu̧i̧a̧ woi gasa kombon n'aa dee so; 7a̧ pi̧i̧ gba-kɔra ɓɛɛ gba-kɔra duk bu̧i nɛnɛ pii ɗoŋ na, hɔ ŋgimbi nɛ yì ɔ̧sa̧ nɛnɛ zu nù lɛŋ. 8A̧ pi̧i̧ gbaku̧i ha̧ a̧ mɛ zɔk kà yì nɛ ɔ̧sa̧ zu nù. 9Gbaku̧i'i nɛa, ɓɛɛ a̧ kpa fara gua-a na, ɓɛɛ a̧ pii ɗoŋ tɛ Nɔe sɛn kɔ̧ gasa kombon wen zù nu lɛŋ hura nɛ yì; Nɔe nyɛi̧a er, ba a̧ woyo pii kɔ̧ gasa kombon. 10A̧ pɛma mɔ zɛ mɔɔrɔ-ɗoŋ-yiitoo, ɓɛɛ a̧ pi̧ gbaku̧i si zan woyo. 11Gbaku̧i'i pia ɗoŋ mɛ́ ga̧a̧mɔ nɛ be gbaa-er te-nɔ̧́ nú; hegɔ Nɔe iŋa'e yì ɔ̧sa̧ zu nù kaɗi. 12A̧ pɛma zɛ mɔɔrɔ-ɗoŋ-yiitoo woyo, ɓɛɛ a̧ e gbaku̧i yak, ɓɛɛ pii ɗoŋ ɓɔna.
13Tɛ kuti wese, tɛ kuti fio-zɛ nɛ Nɔe kpaa nɛ pɛ 601, yì ɔ̧sa̧ e nɛ zɔma nù. Nɔe hu̧i̧a̧ mɔɔ-kpe-zu gasa kombon, ɓɛɛ a̧ zɔka'e nù zɔma kaɗi. 14Tɛ yiitoo fio-zɛ, tɛ ɔɔ-zɛ ɓu-yiitoo-zua-mɔɔrɔ-ɗoŋ-yiitoo, nù kora lɛŋ.
15Sɔ̧ tɔ̧ɔ̧ ha̧ Nɔe: 16«Mɛ̀ gbó kɔ̧ kombon, mɛ́, kóò kɔ-mɛ, o bem kɔ-mɛ in o kóò kɔ-wa mbɛt. 17O saɗi lɛŋ nɛ a̧a̧ in mɛɛ, mɔ lɛŋ nɛ ɔm ɔm, mɔ nɛ tɔ̧a̧‘e nɔ̧́í̧, o mɔ-dai in o be saɗi lɛŋ nɛ yar zu nù, mɛ̀ káí wa gbonɛ, ɓɛɛ wa a̧ nyɛɓi sɛn zaŋnu, wa a̧ ko siti, ɓɛɛ wa a̧ dɔk zaŋnu.» 18Nɔe gboo in o bem kɔ‘i, koo kɔ̧-a̧ in o kóò ko o bem kɔ̧-a̧. 19O gasa saɗi, o be saɗi lɛŋ, o nɔ̧́í̧ in mɔ lɛŋ nɛ yar zu nù dam nɛ ɗoŋ zuduk-wa kpɔk kpɔk zira nɛ kɔ̧ kombon a nù.
Nɔe ɗafa Sɔ̧
20Nɔe mboo fara-ɗafi-sɔ̧ ha̧ GASA WAN. A̧ baa sa̧a̧ saɗi in sa̧a̧ nɔ̧́í̧ kpɔk kpɔk dam nɛ zuduk-wa lɛŋ dɔ ɗafi nɛ Sɔ̧. 21Pɛr dɔɔ-kpoo-sɔ̧ dee tɛ GASA WAN, ɓɛɛ a̧ tɔ̧: «Mi beka fom nù wen zu bíí ɓɔna. Nɛ mbetɛ see bíí a̧a̧ tɛ ɗaŋmɔ nɛ bem mɛ gasi nɛnɛ. Ɓɛɛ kóó hegɔ mbɛt, mi beka kum o mɔ lɛŋ nɛ ya kpasa hee mɔ'ɔ n'am dea’ɛ ga woyo ɓɔna. 22Ŋgimbi nɛ̀ nù tɛ duk nɛnɛ, guna nyɔnɔ in mɔi̧a-a, gɛ̧ɛ̧ in gbɛ̧ŋmɔ, bɛɛ in ɓar, wese in zɛ tɛ duk kpoo nɛ kpoo.»
Kasalukuyang Napili:
KU̧U̧NAŊMƆ 8: GB11
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.