San Mateo 4
4
Che huij Jesús lo reyubijdz
(Mr. 1:12‑13; Lc. 4:1‑13)
1Dxejc bejn Sprit Dxan xten Dios huij Jesús nez lo reyubijdz te nejzga nuhuaḻ beṉdxab Jesús.
2Che gulujx bacua'n Jesús tiuu gubijdx, tiuu guxhijṉ, gulaanni. 3Sas biääd beṉdxab lojni, räjpni:
―Palga guliilu Xi'n Dioslu, gunibee gac reguijre yätxtiil.
4Badzu' Jesús diidxre lojni, räjpni:
―Loj reguijtz xten Dios caj scree: “Xhet ganaxdi yäḻtxtiil guibajṉ rebejṉ; sibajṉzani con guiraa diidx nani rnii Dios.”
5Dxejcti huinä beṉdxab Jesús guedx Jerusalén. Gulä'pnini jiaa yejc xques guidoro. Dxejcru räjp beṉdxab lojni:
6―Palga Xi'n Dios luj, bitiäjs lo yujli, sa'csi scree caj loj rexquijtz Dios:
Sinibee Dios rexanglni ga'preni luj;
siliäsreni luj con ṉaareni didi gacnaj ni'lu lo reguijga.
7Badzu' Jesús diidxre lojni, räjpni:
―Caj loj rexquijtz Dios: “Na'c faḻlu Dad ni najc Xtioslu.”
8Stee huält huinä beṉdxab Jesús yejc te danro. Dxejcti baluiini lojni guiraa reguejdx, reguedxro ni tre' lo guedxliuj näj guiraa xcäḻnasa'creni. 9Dxejcti räjpni loj Jesús:
―Guiraa redee sunidxä lojlu palga guzuxhijblu nez loä te gaṉlu narä.
10Dxejcti räjp Jesús lojni:
―¡Huij nez rec beṉdxab! Scree caj loj rexquijtz Dios: “Dad Xtiostislu gaṉlu; lojtisni chulu.”
11Dxejcti gubicaj beṉdxab loj Jesús. Dxejc biääd rexangl Dios biädhuiireni Jesús.
Gusloj Jesús cayujn xtzuunni
(Mr. 1:14‑15; Lc. 4:14‑15)
12Che biejn diajg Jesús yu' Juan neṉ ladzguiib, huijni nez Galilee. 13Dxejcti gudejdni guedx Nasare't, huiläjzni guedx Capernaum ni tre' gajxh nez ro' nis, nez reguejdx Zabulón con Neftalí. 14Si'c gujc te guzojb diidx ni bacuaa Isaías ni gunii xtidx Dios:
15Lajdx Zabulón, lajdx Neftalí, nezyuj ni rij nez ro' nisdoo, stelaad gueu Jordán,
Galilee cadro rbäjz rebejṉ nani di gac rexpeṉ Israel.
16Rebejṉ nani rbäjz neṉ te yäḻcäjy abahuiireni te bajlga,
luxh bajlga basanij xcäriejn renani nabajṉ lo xcäḻrdxejb, lo xpalaa yäḻgujt.
17Dxejcli gusloj cagulijdx Jesús, räjpni:
―Coḻgusiejchlajztu, coḻguxhobdojḻ te guibaṉsa'ctu sa'csi abidzuṉgajxh xcäḻrnibee Dios.
Che gurejdx Jesús tajp xpejṉni
(Mr. 1:16‑20; Lc. 5:1‑11)
18Sasaj Jesús nez ro' nisdoo xten Galilee che bahuiini lo tio'p niguii. Tejni laa Simón, ni laaza Pedr. Steeni najc lagajc bejtzni, ni laa Andrés. Dzuun ni rujnreni najc rniaazreni bäjl, ni'c cacuaareni guijxh lo nisdoo. 19Dxejcti räjp Jesús lojreni:
―Coḻtanajl narä. N̲aj riniaaztu bäjl, niluxh narä gunä cueedxtu rebejṉ.
20Lagajc dxejc basa'nreni xquijxhreni te sanajlreni laani.
21Che gudejdreni ro'c, bahuiini loj stio'p niguii, Jacoob con bejtzni Juan. Yu'reni neṉ te barcw con xtadreni, ni laa Zebedeo cayunsa'creni guijxh. Dxejc gurejdx Jesúsreni. 22Lagajc dxejc basa'nreni barcw näjza xtadreni te sanajlreni Jesús.
Caguluii Jesús xhidajl bejṉ
(Lc. 6:17‑19)
23Sasajti Jesús guideb nez región xten Galilee, caguluiini neṉ tejga rexquidooreni. Cagusule'ni redidxcoob xten xcäḻrnibee Dios. Cagusiajczani guiraa yäḻracxhuu ni rajc rebejṉ guejdxga, guiraa yäḻguijdx. 24Biejn diajg rebeṉ Siria diidx xcuent ni cayujn Jesús. Sas biädnäreni guiraa rebeṉracxhuu ni cayajc guiraloj yäḻguijdx, yäḻnayan; guiraa reni rajc yejcreni, guiraa reni rajc malyäḻguijdx, reni rajc yäḻguidxbej, guiraareni abixu'ṉ tiejxhreni. Dxejcti basiajc Jesús rebejṉga. 25Xhidalduxh beṉ Galilee huinajlni, näj rebeṉ reguedx Decápolis, näjza rebeṉ guedx Jerusalén, näjza rebeṉ Judea näjza rebejṉ ni tre' stelaad gueu Jordán.
Kasalukuyang Napili:
San Mateo 4: zaw
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2006, Wycliffe Bible Translators, Inc. All rights reserved.
