Génesis 4
4
Abelta Caín wanutsinqan
1Tsëpitanam Adánqa warmin Evawan punuriyarqan. Evanam qeshyaqyärirqan y ollqu wawan yurikuptinnam nirqan: <<Teyta Dios munaptinmi kë ollqu wawä yurishqa>>.
Tsëmi wawanpa shutin churarqan Caínta.#4.1 Caín ninanqa tarishqa ninanmi.
2Tsëpitanam yapë qeshyaqyärir qeshpikurirqan ollqu wamrata. Tsë wawanpa shutinnam churarqan Abelta. Winarkurnam Abelqa üshata y chiwata wätakuq karqan. Caínnam chakrachö uryaq karqan.
3Tsëpita watakuna pasariptinnam Caínqa chakrapa wayïninta ofrendata Teyta Diospaq aparqan. 4Tsënömi jina Abelpis Teyta Diospaq aparqan üshankunapa y chiwakunapa punta yuriq wawankunata. Apashqanta pishtarirmi wirankunata Diospaq kayarqan. Tsëtam Teyta Dios kushishqa chaskirqan.#Heb. 11.4. 5Caín apanqan ofrendataqa manam chaskirqantsu. Tsënö mana chaskiptinmi Caínqa alläpa piñakur pukayëkacharqan.
6Tsëmi Caínta Teyta Dios nirqan: <<¿Imanirtaq piñakur pukayëkachanki? 7Allita rurarqa manam tsënötsu këkankiman. Mana allita ruraptikim jutsa rurë shuyarëkäshunki munëninchö katsishunëkipaq. Tsënö kaptinpis alli käyikurqa manam jutsa rurëman ishkinkitsu>>.
8Tsëpita juk junaqnam Caínqa wawqin Abelta nirqan: <<Jirkapa aku ëwashun>>.
Jirkachö ishkan këkarnam Abelta wanuratsirqan.#Mat. 23.35; Luc. 11.51; 1Juan 3.12.
9Tsëpitanam Caínta Teyta Dios tapurqan: <<¿Mëtaq wawqiki Abelqa?>>
Tsënö tapuptinnam yaskirqan: <<Manam musyätsu. ¿Acäsu wawqï täpaqku kä?>>
10Niptinnam Teyta Dios nirqan: <<¿Imatataq rurarqunki? Wawqikipa yawarninta ramanqëkim qayëkäman.#Heb. 12.24. 11Tsëmi kë patsachö maldisishqa kar qarqushqa kanki. Wawqikipa yawarninta ramanqëkipitam 12murunqëkipis wayunqatsu. Tsënöllam jamëta mana tarir jinantinpa purikunki>>.
13Tsënö niptinnam Caín nirqan: <<Kë alläpa jatun castïgu qomanqëkitaqa manam awantalläshaqtsu, Teyta. 14Këpita qarqamarqa nöpëkipita karumanmi qarqaramanki. Tsënö karqa jinantinpachi mana jamashpa purikulläshaq. Tsënö purikaqtachi pipis wanïkatsimanqa>>.
15Tsënam Teyta Dios nirqan: <<Pipis wanutsishuqnikiqa qanchis kutim alläpa castigashqa kanqa>>.
Tsënö nirmi Caínman señalta churarqan pipis mana wanutsiyänanpaq. 16Tsëpitanam Teyta Diospa nöpanpita Nod#4.16 Nod ninanqa purikuq ninanmi. lädupa Caín ewkurqan tsëchö täränanpaq. Tsëqa karqan Edén huertaman inti yarqamunan läduchömi.
Caínpita miraqkuna
17Tsëpitanam Caínpa warmin qeshyaqyärir ollqu wamrata qeshpikurirqan. Tsë wamrapa shutinnam churarqan Enocta. Tsëpitanam Caínqa juk markata sharkaratsir tsë markapa shutin churarqan tsurinpa shutinllata. 18Enoc karqan Iradpa tëtanmi. Irad karqan Mehujaelpa tëtanmi. Mehujael karqan Metusaelpa tëtanmi. Metusaelqa karqan Lamecpa tëtanmi.
19Lamecqa karqan ishkë warmiyuqmi. Juk kaq warminpa shutinmi karqan Ada y juk kaqpanam Zila. 20Adanam qeshpikurir wawanpa shutin churarqan Jabalta. Jabalmi wakin nunakunapitapis mas puntata tolduchö tärarnin wätakunata wätarqan. 21Jabalpa wawqinnam karqan Jubal. Jubalmi puntataqa arpata y kënata toquëta yachakurqan.
22Zilanam qeshpikurqan Tubal-caínta. Tubal-caínqa herrëru karmi broncipita y fiërrupita imëkatapis ruraq. Paninpa shutinnam karqan Naama.
23Juk kutinam Lamecqa ishkan warminta Adatawan Zilata nirqan: <<¡Wiyayämë niyanqaqta! Maqamaq nunatam wanutsirqü. Jövin kaptinpis maqamaptinmi wanutsirqü. 24Caínta pipis wanutsir qanchis kuti castigashqa kananpaq kaptinqa noqata yatamaq kaqqa qanchis chunka qanchis (77) kuti masmi castigashqa kanqa>>.
Adánpa tsurin Set yurinqan
25Adánpa warmin yapë qeshyaqyärirnam qeshpikurirqan ollqu wamrata. Yurikuriptinnam nirqan: <<Wawä Abelta Caín wanutsishqa kaptinmi Teyta Dios munashqa pëpa rantin juk wawä kananta. Tsëmi pëpa shutin kanqa Set>>.#4.25 Set ninanqa rantinta qoshqa ninanmi.
26Setnam tsurin yurikuptin shutin churarqan Enósta. Enós kanqanpitaran nunakuna Teyta Diosta adorar qallayarqan.
Kasalukuyang Napili:
Génesis 4: qwhB
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2018, Wycliffe Bible Translators, Inc. All rights reserved.