Joaancha Laenai 2

Nisirihatiha cachane beseta

1Nii baihate nichata janohi catiariin Calileea batane que nenaa Canaau neein curajaain nenaa neseu ne nisirihatiha cachana jaan beseta.

Nii jaunte, cuu nii beseta bitoaa cue Cana Coaunera Calaohi Jesoso neba.

2Nii janate Cana Coaunera Calaohi Jesoso netonai cotihacure nii beseta que, aina nerelanacauru aina cuhane coina.

3Nitohaneein inae nii beseta que neeuru jana jetaote, inae saa binone jana: “Inae nihei binota”, naain Jesoso rai biha nebane jaun:

4“Saan. Chanuna niriitoohi caraite oma. Inasiina jaiti turuha canu amihaneeon nunuhetihanune jaan cojoinaca que ne coalanaala”, naa neba raine janate:

5“Chajaaincha naitoonjoaacha ichacuchera”, nae nii cuu bino chaluurera rai Jesoso neba.

6-7Nii janate cuu ne Jorioocuru rai saotaneein baichaje tabaanain atane caje ichanohineein, Cana Coaunera notaracaae biji culejeein itolere acaauru lenonecuru culejeein ratirihuruhane jaanu que esinaaeca teeuruhane jaan.

Nii jaunte: “Caa cuhane acau raain teeuche nainecolijiaanaaincha”, nae Jesoso nii bino chaluurera rai.

Nii le baichajete baichaje seeonjoa cuhane coroata baichajihanaai curujuae.

Inae nii baichaje nainecolijiaanaain acau raain, teein beeuruhane janate: 8“Soriin amaain, taa beseta erora cocoanihura”, naa Jesosone jaun, soriin amaain nii beseta erora cocoae nii acau chaluurera.

9Nii janate Cana Coaunera Calaohi Jesosohacha rotoi nihane coitucuelanaala coe nii beseta erora. Acaihanejein nii acau raureraachate coitucuure.

Nii jaunte nii bino cohin aonaain: 10“Raotoha caa bino”, naain, “Chajataauraa”, naain, nii ene ranaa jerera cotijiaain: “Raotoha caa ii bino. Aihuruha leeochaaurune rijijieein, bino caohacha que nunuheteein cana cocoaerate lanaalate aaita. Taonii nunueniha canaacha coi amuritoeriinte raaotera”, nae nii beseta erora, nii ene ranaa jerera rai.

11Nitohaneeinte Calileea batane que nenaa nese Canaau, binoneein esinaaeca rotoe Jesoso, esinae Cana Coaunera letononeein nihane coitucuuruha cachaaurune coina.

Nii coaraaina, esenetaacaanu aina nerelanaa nichaanune.

Nitohaneein nunuheteeinte, itolere cunaitenacaauru rautaain, itolere ichae Cana Coaunera Calaohi Jesoso.

12Nii baihane Caferenaaon cuha Jesosone jana, corianiha cuhacaanu, nejeraauru, neba, aina nerelanaa nichaanune naaonjoaain, cuu neeorihacaanu inata janojoeine coina.

Jerosaleen nenaa Teenforo caje necoretenacaauru sitaa Cana Coaunera Calaohi Jesosone

(Mt 21.12-13; Mr 11.15-18; Lc 19.45-46)

13Nii janate Jorioocuru beseta Fasocoa que turuelalajihane jaun, turuha cue Cana Coaunera Calaohi Jesoso.

(Fasocoa besetate bitohaure Jorioocuru ajelanaala, nii Teenforo asaae. Cairichaaerinajaain niha Egipto curaanaane caje jianacoon mitanajaa Cana Coaunera najaan cojoanonaaniha nii Fasocoa besetana jaunte, nitohaneein Fasocoa beseta cojoanonaa bana Teenforo asaae itataojiain Cana Coaunera coroajeein bajaaure Jorioocuru.)

14Nii janate Jerosaleeun nenaa Cana Coaunera rai ita taojiaauruhana jaan loreri inoaesi Teenforo asaae necoretiha neeure Jorioocuru, itolere baca, carenero, serori naaonjoain que. Nii janate ecu jelai teein ne cachaauru rai coriqui coreeurera. Niite acaauru coriqui choae laurujua laurujuauruhane jana, 15sicho coinori que rajirajinajaain, nii acaauru rai bacaauru, carenerocuru, naaonjoain aina curuataain, acaauru sitaain, nii coriqui coreeurera rai coriqui riariae atane choae. Acaauru coriqui rori raatiin siheitiin, 16chujuhecoha nii serori que necoretenaane jana: “Naain caa serorichuru amaauchera. Coa caa Ofa Cana Coaunera loreri asaae necoretihachera”, naain sitanajae Cana Coaunera Calaohi Jesoso.

17Nii jaunte, “Jataain ii loreri beraihanunete ne”, naain aitosihalu Cana Coaunera Quiricha Inoaesi cuhane nii canacaanuhacha cohajeine jaun, “Aca caara”, naain canacaanu suujua cuhane Jesoso coarajiacaanu aina nerelanaa nichaanune.

18Nii jaunte sitanajaa Jesosone jaun: “Chatoanai jana ichaain canacaanu notaareei jana, esinae Cana Coaunera letononeeine coitucuhacaanune coinata”, naain Jesoso caje bajaauruha Jorioocurune janate:

19“Caa Cana Coaunera loreri chamuhintiin jaohichenena, nichata janojoeincha cuhane michureeunni nacoaauneeincha”, naane janate:

20“Inasiinte jenachoonca saota jaanacaain ichacuruhalu jetao natiin, iicha nichata janojoeeincha cuhane michureeita”, naaure Jorioocuru Jesoso rai.

21Rai jaberocohacha quete aite, nii Cana Coaunera loreri que ujuaiteein. Nii jaunte nichata janojoeein ichanae Jesoso oo caje. 22Nii jaunte nichata janojoeein ichanaane coaracaanune jaun, inae jauriaa aitosihane jaun, canacaanu suujua neeoritohane jaun, nii aitoha Jesosone esenetaacaanu, Cana Coaunera Quiricha Inoaesi cuhane aitohane jaun.

Satiin cacha suujua coitucuha Jesosone

23Fasocoa bana cuu Jerosaleeun neein, bacosacuru, maosacuru, urichosae, naaojoanunri rautaane coaraainte, Cana Coaunera Calaohi Jesoso esenetaacoaaure arajiin cachaauru. 24Nete, “Naaojoaainte chuhisi, esinae rauhijiriin quesenetacurureeincha”, naene Jesoso, acaauru suujua coitucuhane jaun. 25“Naaonjoaauruha caa cachaaurura”, naain biha chuneine que airijiin, cacha suujua coitucuhane jaun, saneein esenetanajaene Cana Coaunera Calaohi Jesoso.

Kasalukuyang Napili:

Joaancha Laenai 2: URA

Haylayt

Ibahagi

Kopyahin