Mateus 5
5
Jesus tỹ ag kanhrãn
(Lc 6.20-23)
1Ũn e ag tỹ Jesus venh kãmũ kỹ tóg, ag mré krĩ ra tãpry mũ. Tá tóg nĩ mũ, kỹ ti mré mũ tĩ ag tóg, ti mré nĩgnĩ mũ, ti rã hã. 2Kỹ tóg ag kanhrãn kỹ ag mỹ:
3“Topẽ vỹ ãjag ve há han mũ, ãjag tỹ: “kórég inh nĩ,” hen kỹ. “Sỹ Topẽ kuprĩg tỹ jagrẽn kỹ nĩ tũ nĩ ra sóg tỹ, ũn kórég nĩnh mũ vẽ,” hem nĩ. Kỹ ãjag tóg, ti tỹ tỹ ẽg pã'i nĩ venh ke mũ, kanhkã tá,” he tóg.
4“Topẽ vỹ ãjag ve há han mũ, ãjag fỹn kỹ. Kỹ tóg ãjag fỹ ẽn tỹ tũ' henh ke mũ,” he tóg.
5“Topẽ vỹ ãjag ve há han mũ, ãjag tỹ vẽnh kar mỹ komẽr hã vĩn kỹ. Kỹ ãjag tóg ga kar kri tỹ pã'i nỹtĩnh ke mũ,” he tóg.
6“Topẽ vỹ ãjag ve há han mũ, ãjag tỹ vẽjykre kuryj ve sór nỹtĩn kỹ, ti tỹ ãjag mỹ ãjag kókĩr ri ke nĩn kỹ. Kỹ ãjag tóg venh ke mũ,” he tóg.
7“Topẽ vỹ ãjag ve há han mũ, ãjag tỹ jagnẽ jagãgtãn kỹ. Kỹ Topẽ vỹ ãjag jagãgtãn ke mũ gé,” he tóg.
8“Topẽ vỹ ãjag ve há han mũ, ãjag jãnhkri nỹtĩn kỹ. Kỹ ãjag tóg Topẽ venh mũ,” he tóg.
9“Topẽ vỹ ãjag ve há han mũ, ãjag tỹ jagnẽ krĩ tỹ kãnhvy' hen kỹ. Kỹ Topẽ tóg ãjag to: “inh krẽ ag vẽ,” henh ke mũ,” he tóg.
10“Topẽ vỹ ãjag ve há han mũ, ag tỹ vẽjykre kuryj to ãjag vóg kónãn mũ ra. Kỹ ãjag tóg kanhkã tá jun ke mũ,” he tóg.
11“Topẽ vỹ ãjag ve há han mũ, ag tỹ isugrĩn ãjag mỹ vĩ kónãn mũ ra, ag tỹ ãjag vóg kónãn mũ ra. Ag tỹ ón kỹ ãjag to vĩ vĩ he kỹ tóg há tĩ, ag tỹ ón kỹ: “jykre pãno ag nỹtĩ,” he mũ ra. 12Mỹ sér nỹtĩm nĩ, krĩ kuprã nỹtĩm nĩ. Kanhkã tá ãjag tóg nén há kar venh ke mũ, vẽnh kato. Ge ja ag tóg nĩgtĩ gé vãsỹ, Topẽ vĩ tó tĩ ag mỹ, ãjag jo ke ag mỹ. Ag ri kén ãjag tóg tag venh ke mũ,” he tóg, Jesus ti.
Ti tovãnh ke tũ kãme
(Mc 9.50; Lc 14.34-35)
13“Sa ri ke ãjag nỹtĩ, ãjag tỹ ga kri mũn kỹ. Sa kãhór nĩn kỹ ẽg tóg tỹ sa há han mãn ki kagtĩg nỹtĩ. Kórég ti nĩgtĩ, ti kãhór nĩn kỹ. Kỹ ẽg tóg ti vãm tĩ sir, kỹ tóg tũ' he tĩ sir,” he tóg, Jesus ti.
Ẽg tỹ ẽg jykre há ven ke kãme
(Mc 4.21-23; Lc 8.16-17)
14“Ga kri mũn kỹ ãjag tóg, jẽngrẽ ri ke nỹtĩ, ãjag tỹ vẽjykre há han kỹ, ag tỹ ãjag ki Topẽ jykre há ve jé. Ẽmã mág tỹ pãnónh kri nỹn kỹ tóg kuvar há tá ve há nĩgtĩ. Ti pijé vẽnh péju kỹ nỹ'. 15Ri ke ti nĩ, néj gru ti. Ẽg tỹ grug kỹ ẽg pijé lata krẽm fẽg tĩ'. Ti fẽg jafã hã kri ẽg tóg fẽg tĩ. Kỹ ĩn kã tá nỹtĩ kar tóg ẽn vég tĩ sir. 16Gem nĩ, néj gru ri ke nỹtĩm nĩ. Topẽ jykre han nĩ, vẽnh kar tỹ ãjag jykre há ve jé. Kỹ ag tóg, Topẽ mỹ vĩ há han ke mũ, ẽg jóg tỹ kanhkã tá nĩ ẽn mỹ,” he tóg, Jesus ti.
Topẽ tỹ Moisés mỹ vẽjykre nĩm ja
17“Ãjag hỹn iso: “Moisés tỹ ẽg mỹ nén tó ja ẽn tỹ tóg, tũ' he sór mũ',” he mũ. “Hã tũ vẽ. Sỹ ki króm kãn sór vẽ,” he tóg. 18“Topẽ vỹ, ti jykre ẽn tỹ tũ' henh ke tũ nĩ, ga tỹ ver tũ' he tũ nĩn kỹ. Sỹ ki króm kãn ke vẽ, kỹ tóg ki krov kãn kỹ nỹnh mũ, mỹr, ha mẽ,” he tóg. 19“Kỹ ãjag tỹ ti vĩ pir tỹ tũ' hen kỹ tóg kórég nĩ. Vẽnh kar krẽm ke vỹ tỹ ãjag nỹtĩnh mũ, gen kỹ. Ãjag tỹ hã ra han kãn kỹ ãjag tóg tỹ, ũn mág nỹtĩnh mũ,” he tóg.
20“Fariseu ag ri ke nỹtĩ sór tũg nĩ. Ón kỹ ag tóg Topẽ vĩ ki króm sór tĩ, hã ra ag tóg, ki króm há han tũ nĩgtĩ. Ag jykre pijé kuryj nỹ'. Ãjag tỹ kanhkã ve sór nỹtĩn kỹ vẽjykre kuryj han nĩ,” he tóg, Jesus ti.
Ẽg tỹ jagnẽ to há nỹtĩnh ke
21“Topẽ tỹ vãsỹ ẽg jo ke ag jyvẽn mẽ ãjag huri, hã vỹ: “ũ tén tũg nĩ,” he mũ. “Ã tỹ ũ tén kỹ ag tóg, ã senh ke mũ, ã tỹ ti mré ter jé,” he ja tóg nĩ, Topẽ vĩ tỹ rán kỹ nĩ ki. 22Sỹ ũri ãjag jyvẽn hã vẽ, ha mẽ. Ã tỹ ã régre to ã fe tỹ gỹm ke kỹ tóg ã tỹ ti tén ri ke nĩ, fi ke gé. Ag tỹ tag to ã se kỹ tóg inh mỹ há tĩnh mũ. Kỹ ã régre mỹ féfén tũg nĩ gé. Jãvo ã tóg, nũgme ki kutẽnh ke mũ, pĩ ẽn ki,” he tóg.
23“Ã tỹ Topẽ ĩn krẽm ti mỹ nén ũ pũn sór kỹ, vẽso jykrén vén nĩ. “Inh mỹ ũ to jũ tũ nĩ vỹ? Ũ mỹ iso jykrén kónãn tũ nĩ vỹ?” hem nĩ. 24Ã tỹ ũ to jũ nĩn kỹ ti venh tĩg nĩ ver. Ti mỹ: “inh mỹ vẽnh pãte fón nĩ,” hem nĩ ver, fi mỹ ke gé. Kar kỹ hã Topẽ mỹ nén ũ pũn nĩ sir,” he tóg.
25“Kejẽn ã tóg, ã mré ke ũ mỹ név jẽ, ã mré ke ũ fi mỹ ke gé. Kỹ fi tóg pã'i ag mỹ ã kãmén tĩg ke mũ. Fi tỹ tónh tĩg ke ẽn jo fi mré vĩm nĩ, ti mré ke gé. “Kajãm jé sóg ke mũ,” hem nĩ. Ke tũ nĩ mũ ra pã'i vỹ, ã jykre pãno venh ke mũ, kỹ tóg ti porisa mỹ: “ti se ra,” henh ke mũ. 26Ha mẽ, tá ã kãnhmar kãkutẽ mãn ke tũ nĩ. Ã tỹ kajãm kãn kar kỹ hã ã tóg, tá kãkutẽ mãn mũ sir, hẽn ri ke mũn,” he tóg, Jesus ti.
Ẽg prũ tũ fi mré nỹnh ke tũ
27“Topẽ tỹ vãsỹ ẽg jo ke ag jyvẽn ũ tag mẽ ãjag huri, ke gé, hã vỹ: “ã prũ tũ fi mré nỹ tũg nĩ,” he mũ. 28Sỹ ũri ãjag jyvẽn hã vẽ, ha mẽ: ã tỹ ũn tỹtá ũ fi ki vẽ'ĩ kỹ tóg, ã tỹ fi mré nỹ sĩ han ẽn ri ke nĩ sir, ã tỹ fi ki vẽ'ĩ mũ ti. Ã tỹ ũn tỹtá ũ fi mré nũr sór kỹ tóg, ã tỹ fi mré nũr ri ke nĩ sir, ã tỹ fi to én mũ ti. Ke tũg nĩ. 29Ã tỹ nén ũ ki vẽ'ĩ tugrĩn Topẽ vĩ mranh kỹ ã kanẽ tỹ nám kem nĩ, ã tỹ ki vẽ'ĩ mãn tũ nĩ jé. Ã kyvó nĩn kỹ tóg, ã mỹ jagy tĩ vẽ. Ã tỹ hã ra nũgme ki kutẽ kỹ tóg, ti jagy kãfór nĩ. Kỹ tag hã ve sór tũg nĩ. 30Ã tỹ ã nĩgé tỹ nén ũ kórég han kỹ ã nĩgnó kym nĩ gé, ã tỹ ke mãn tũ nĩ jé. Ã nĩgnó pir nĩn kỹ tóg, jagy tĩ vẽ. Ã tỹ hã ra nũgme ki kutẽ kỹ tóg, jagy kãfór nĩ sir, kỹ tag hã kamẽg nĩ,” he tóg, Jesus ti.
Ẽg prũ fón ke tũ
(Mt 19.9; Mc 10.11-12; Lc 16.18)
31“Topẽ tỹ vãsỹ ẽg jo ke ag jyvẽn ũ hã vỹ nỹ gé, hã vỹ: “ã tỹ ã prũ fi fón sór nĩn kỹ tóg há tũ nỹ,” he mũ. “Ã tỹ ge ra fi fón sór nĩn kỹ fi mỹ vẽnh rán kỹ nĩm nĩ, fi tỹ vẽnh rá ma tĩg jé,” he ja tóg nĩ. 32Sỹ ũri ãjag jyvẽn hã vẽ, ha mẽ: ãjag prũ fón tũg nĩ. Ã tỹ fi fón kỹ fi tỹ ũ tỹ mén mãn kỹ fi tóg, ã tugrĩn Topẽ vĩ mranh mũ sir, ã tỹ tỹ fi mén pẽ ra. Fi tỹ ã jãvo vẽsóg ki ũ mré nỹ ja nĩn kỹ tóg, há sĩ nỹ, ã tỹ fi mỹ: ha tĩg, hen kỹ. Kỹ fi mén tỹ fi fón kỹ fi tỹ prũg sór tũg nĩ gé. Ã prũ tũ fi vẽ, fi mén tỹ fi fón ja nĩn kỹ,” he tóg, Jesus ti.
Jagnẽ to ón ke tũ
33“Vãsỹ Topẽ tỹ ẽg jo ke ag jyvẽn ũ tag mẽ ãjag tóg huri ke gé, hã vỹ: “jagnẽ mỹ ón tũg nĩ,” he mũ. “Ã tỹ ũ mỹ: Topẽ vỹ ki kanhró nĩ, hen kỹ ti mỹ ón sór tũg nĩ. Ki hã tóm nĩ gé, ã tỹ Topẽ mỹ: tag hã han jé sóg ke mũ, hen kỹ. Ón kỹ vĩ tũg nĩ,” he ja tóg nĩ. 34Sỹ ũri ãjag jyvẽn hã vẽ, ha mẽ: Ón kỹ “Topẽ vỹ ki kanhró nĩ,” he sór tũg nĩ. Ón kỹ “ũ tỹ kanhkã tá nĩ ẽn vỹ, ki kanhró nĩ,” he sór tũg nĩ gé. Topẽ nĩgja vẽ, kanhkã tá, kỹ ón kỹ tag tó sór tũg nĩ. 35Kỹ ón kỹ: “ũ tỹ tỹ ga kri ke ẽn vỹ, ki kanhró nĩ,” he tũg nĩ gé. Topẽ tũ vẽ, ga ti. Kỹ ón kỹ: “ũ tỹ Jerusalém tá ke ag ki rĩr tĩ ẽn vỹ, ki kanhró nĩ,” he tũg nĩ gé. Ẽg pã'i mág tũ vẽ mỹr, Jerusalém ti. 36Kỹ ón kỹ: “ũ tỹ inh krĩ han mũ ẽn vỹ ki kanhró nĩ,” he tũg nĩ gé. Ã tỹ ã gãnh kuprig sór mũ ra ã tóg, ã tỹ nén tỹ ã gãnh kuprig ke mũ ẽn ki kagtĩg nĩ. Ã tỹ ã gãnh sán sór mũ ra ã tóg, ã tỹ nén tỹ sán ke mũ ẽn ki kagtĩg nĩ gé. 37Ki hã tóm nĩ, jagnẽ mỹ, ón sór tũg nĩ. Ũ tỹ ã mỹ ki hã tó kỹ: hỹ, hem nĩ. Ti tỹ ki hã ke tũ nĩ kỹ: vó, hem nĩ gé. Ã tỹ han ke nĩn kỹ: he, hem nĩ. Ã tỹ han ke tũ nĩ kỹ: nejé, hem nĩ. Ã tỹ ón sór kỹ ã tóg Nén-Kórég jykre hã han ke mũ,” he tóg, Jesus ti.
Ẽg tỹ vẽnh kajãm ke tũ
(Lc 6.29-30)
38“Topẽ tỹ vãsỹ ẽg jo ke ag jyvẽn ũ tag mẽ ãjag huri, hã vỹ: “ũ tỹ ã kanẽ pir ki tãnh kỹ vẽnh kato ti kanẽ pir ũ hã ki tãnh nĩ gé,” he ja tóg nĩ. “Ũ tỹ ã jã pir ki tãnh kỹ mranh kỹ vẽnh kato ti jã pir hã ki tãnh kỹ mranh nĩ gé. Pãtén tũg nĩ,” he ja tóg nĩ, Topẽ ti. 39Sỹ ũri ãjag jyvẽn mũn hã vẽ, ha mẽ: ũ tỹ ã to jũ mũ ra ti to jũ tũg nĩ, fi to jũ tũg nĩ gé. Ti tỹ ã jamẽ ki tãnh kỹ ti mỹ ã jamẽ ũ ven nĩ gé, ti tỹ ã mỹ ki tãnh jé gé, fi ke gé. 40Ti tỹ ã pãritó mãn sór kỹ ti mỹ ã camisa mré nĩm nĩ gé. 41Ti tỹ ã mỹ: “mũ nỹ, tag tá, kakó ja tá inh fón jé,” hen kỹ ti mré tĩg nĩ, kỹ ti mỹ: “kór há tá inh ã fón tĩg mũ ha,” hem nĩ. 42Ti tỹ ã mỹ nén ũ to: “inh mỹ nĩm,” hen kỹ ti mỹ nĩm nĩ, fi mỹ ke gé. Ũ tỹ ã mỹ: “inh mỹ prestar hem nĩ,” hen kỹ ti mỹ, fi mỹ: nejé, he tũg nĩ,” he tóg, Jesus ti.
Ẽg tỹ ẽg kato vãsãn mũ ag tó há nỹtĩnh ke
(Lc 6.27-28, 32-36)
43“Topẽ tỹ vãsỹ ẽg jo ke ag jyvẽn ũ mẽ ãjag huri, hã vỹ: ã mré ke ag to há nĩm nĩ, kỹ ũ tỹ ã kato vãsãnsãn mũ ag to jũ nĩm nĩ gé, he mũ. 44Isỹ ũri ãjag jyvẽn hã vẽ, ha mẽ: ũ tỹ ãjag kato vãsãnsãn mũ ag to há nỹtĩm nĩ, ũ tỹ ãjag vóg kónãn mũ ra ag to Topẽ mré vĩm nĩ, fag to ke gé. 45Kỹ ãjag tóg tỹ Topẽ krẽ nỹtĩ, ãjag tỹ ẽg jóg tỹ kanhkã tá nĩ ẽn ri ke han kỹ. Ti hã ne tóg rã han', ti tỹ vẽnh kar kri jẽngrẽg kỹ san jé, ũn jykre kuryj ag kri, ũn jykre pãno ag kri ke gé, fag kri ke gé. Ta han ti ke gé, ti tỹ vẽnh kar há han jé, ũn jykre kuryj ag, ũn jykre pãno ag ke gé, fag ke gé. Ver tóg vẽnh kar to há nĩ, Topẽ ti,” he tóg.
46“Ãjag mré ke ũ ag tóg, ãjag to há nỹtĩ. Ãjag tỹ tag ag hã to há nỹtĩn kỹ, fag hã to há nỹtĩn kỹ tóg, tỹ nén ũ tũ nĩ ver. Ũn jykre kórég ag vỹ ge nỹtĩgtĩ gé, governo mỹ jãnkamy mãg tĩ ag. Ũ tỹ ag to há nỹtĩ ẽn ag hã to ag tóg, há nỹtĩgtĩ, vẽnh kato. Há ti nĩ, hã ra tóg tỹ nén ũ tũ nĩ ver. 47Kỹ ãjag tỹ ãjag mré ke ag hã mỹ: “ã mỹ há?” hen kỹ tóg tỹ, nén ũ tũ nĩ gé ver. Ũ tỹ Topẽ vĩ ki kagtĩg ag vỹ, ge nỹtĩgtĩ gé. Ag mré ke ag hã mỹ ag tóg: “ã mỹ há?” he tĩ gé, hã ra tóg tỹ nén ũ tũ nĩ ver. 48Hã kỹ vẽnh kar to vẽjykre kuryj han kỹ nỹtĩm nĩ, ũ tỹ ãjag kato vãsãnsãn mũ ag mré hã, fag mré hã. Ẽg jóg tỹ kanhkã tá nĩ ẽn ri ke han nĩ. Ti hã ne tóg, vẽnh kar to vẽjykre kuryj han kỹ nĩ nĩ'. Ti ri ke han nĩ,” he tóg, Jesus ti.
Kasalukuyang Napili:
Mateus 5: kgp
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
