Maatiyee 8
8
Yesu laba nɛ canaɣ nakɛyɛ yɔɔ cɛ
(Mrk 1.40-45; Luk 5.12-16)
1Pʋwayɩ lɛ, Yesu lɩɩnɩ pʋʋ taa nɛ etiki nɛ ɛyáa sakɩyɛ tɩŋɩɣ ɛ-wayɩ. 2Pɩkɛdaa lɛ, canaɣ nakɛyɛ wolo ɛ-cɔlɔ nɛ koluŋ ɛ-ɛsɩndaa nɛ kɔtɔ se: «Kɩpaɣlʋ! Yee ŋtisiɣ yɔ, ŋla nɛ mɔ-yɔɔ cɛ nɛ manpɩsɩ ɛyʋ weyi ɛmʋnaa yɔ.» 3Peeɖe Yesu posi e-nesi nɛ etukuni-kɛ nɛ eheyi-kɛ se: «Mentisaa! Pɩsɩ ɛyʋ weyi ɛmʋnaa yɔ.» Ɛyɔɔdɩ ḿbʋ́ lɛ, kɔ-yɔɔ tɩcɛbʋ. 4Ɛlɛ́, Yesu heyi-i se: «Taaheyi-tʋ nɔɔyʋ. Ɛlɛ́, wolo cɔjɔ cɔlɔ nɛ ɛna se ñɔ-yɔɔ cɛba, nɛ ŋwoni kileku ɛzɩ Mooyiizi kaɖʋʋ yɔ nɛ pɩwɩlɩ ɛyáa tɩŋa se ñɔ-yɔɔ cɛba.»
Yesu wazɩ Room sɔɔja sɔsɔ nɔɔyʋ tʋmlaɖʋ kʋdɔŋ
(Luk 7.1-10)
5Pʋwayɩ lɛ, Yesu kʋyɩ se ewoki Kapɛrnayum. Ɛsʋwaɣ tɛtʋ ńdʋ́ tɩ-taa lɛ, Room sɔɔja sɔsɔ nɔɔyʋ wolo ɛ-cɔlɔ nɛ etendi-i se: 6«Hayɩ Kɩpaɣlʋ! Man-tʋmlaɖʋ pɩsɩ kalɩkalaɣ nɛ ɛwɛɛ ñalʋʋ yɔɔ ɖɩɣa nɛ ɛlakɩ kʋñɔŋ siŋŋ.» 7Peeɖe Yesu cosi-i se: «Mowoki mala nɛ ɛ-yɔɔ cɛ.» 8Ɛlɛ́, sɔɔja sɔsɔ ɛnʋ eheyi Yesu se: «Kɩpaɣlʋ! Mantamʋna se ŋsʋʋ man-ɖɩɣa taa. Pʋ-yɔɔ lɛ, mentendiɣ-ŋ se ŋyɔɔdɩ tɔm kʋɖʋmtʋ koŋ nɛ man-tʋmlaɖʋ yɔɔ cɛ. 9Ma lɛ, ma-ñʋʋ yɔɔ ñɩma wɛɛ nɛ mañaŋ-wɛ. Ɛlɛ́, mɛn-tɛɛ ñɩma wɛɛ ɖɔɖɔ. Meheyi pa-taa nɔɔyʋ se ewolo peeɖe yɔ yɔ, ewoki. Maya lɛlʋ se ɛkɔɔ yɔ, ɛkɔŋ ɖɔɖɔ. Meheyi man-tʋmlaɖʋ se ɛla nabʋyʋ yɔ, ɛ́lɛ́ ñalakɩ-pʋ ɖɔɖɔ.»
10Yesu nɩ sɔɔja ɛnʋ ɛyɔɔdɩ ḿbʋ́ lɛ, ɛyɩɣyɩ-ɩ nɛ ɛkɛzɩ ɛ-tɩ nɛ ɛyáa mbá patɩŋaɣ-ɩ yɔ pɔ-yɔɔ nɛ ɛtɔ se: «Toovenim lɛ, meheyiɣ-mɩ se paa Izrɛɛlɩ ɛjaɖɛ taa maɣmaɣ yɔ, mantanada weyi ɛwɛnɩ lidaʋ nɛ pɩtalɩ-ɩ yɔ. 11Mankaɖɩɣ-mɩ se ɛyáa sakɩyɛ kɔŋ lɩnaʋ wɩsɩ ɖɩlɩyɛ nɛ sɩ-ɖɩɖʋyɛ nɛ powolo pa nɛ ɖɔ-cɔzɔnaa Abraham nɛ Izaakɩ nɛ Yakɔɔbʋ pɛkpɛndɩ pacaɣ Ɛsɔ Kewiyaɣ taa nɛ pɔtɔkɩ kpɛdɛlɛɛ. 12Ɛlɛ́, mbá pɩɩwɛɛ se pɛkɛ Ɛsɔ Kewiyaɣ taa ñɩma yɔ, pɔlɔʋ-wɛ nɛ awayɩ cɩkpɛndʋʋ taa. Peeɖe pewiliɣ nɛ pasalɩ pe-kela.»
13Peeɖe eheyi sɔɔja sɔsɔ ɛnʋ se: «Wolo ŋkpe. Ɛzɩma mbʋ́ ŋwɛnɩ lidaʋ mɔ-yɔɔ yɔ, malakɩ-ŋ mbʋ́ ŋpɔzɩ-m yɔ.» Ɛtɩyɔɔdɩ ḿbʋ́ lɛ, tʋmlaɖʋ ɛnʋ ɛ-yɔɔ cɛ.
Yesu wazɩ Pɩyɛ yɔsɔ nɛ kʋdɔndɩnaa lɛlaa pa-kʋdɔmɩŋ
(Mrk 1.29-34; Luk 4.38-41)
14Pʋwayɩ lɛ, Yesu wolo Pɩyɛ tɛ nɛ ɛmaɣnɩ kɩnamɩyɛ kpa Pɩyɛ yɔsɔ nɛ ɛhɛnɩ. 15Peeɖe ewobi ɛ-cɔlɔ nɛ etukuni e-nesi nɛ ɛ-yɔɔ cɛ nɛ ɛkʋyɩ ɛha-wɛ lɩm.
16Đanaɣ ɖanaa lɛ, ɛyáa kpaɣ eliikenaa sakɩyɛ nɛ powoni Yesu cɔlɔ nɛ ɛyɔɔdɩ nɛ aleewaa se pa-wayɩ nɛ ɛla nɛ kʋdɔndɩnaa tɩŋa payɩ yɔɔ cɛ ɖɔɖɔ.
17Pɩlaba ḿbʋ́ se pɩla ɛzɩ náyʋ Ezaayii yɔɔdʋʋ se: «Ɛmʋ-ɖʋ ɖɛ-ɛjandʋ nɛ ɖa-kʋdɔmɩŋ» yɔ.
Ɛyáa nabɛyɛ caɣ se patɩŋ Yesu wayɩ
(Luk 9.57-62)
18Kɩyakʋ nakʋyʋ Yesu wɛ Galilee teŋgu nɔɔ nɛ ɛyáa samaɣ woki ɛ-cɔlɔ. Peeɖe eheyi ɛ-tɔmkpɛlɩkɩyaa se ɛ nɛ wɛ pɛtɛzɩ teŋgu kidiiliŋ lɛɛkʋ yɔɔ. 19Ɛlɛ́, paɣtʋ wɩlɩyaa taa nɔɔyʋ wolo ɛ-cɔlɔ nɛ eheyiɣ-i se: «Wɩlɩyʋ! Paa le ŋwoki yɔ, mantɩŋɩɣ-ŋ.» 20Yesu cosi-i se: «Kpayaa ñɛwɛnɩ pɔŋ nɛ sumasɩ ñɛwɛnɩ ɖandʋ. Ɛlɛ́, Ɛyʋ Pɩyalʋ ma mɛnfɛyɩnɩ ñʋʋ ɖɩɖʋyɛ.» 21Peeɖe ɛ-tɔmkpɛlɩkɩyaa taa lɛlʋ heyi-i ɖɔɖɔ se: «Kɩpaɣlʋ! Yele mowolo menpi man-caa nɛ pʋcɔ mɔnkɔɔ mantɩŋ-ŋ.» 22Yesu cosi-i se: «Kɔɔ ŋtɩŋ-m, yele sɩɖaa nɛ pepi pa-sɩɖaa.»
Yesu hɛzɩ heɣlim sɔsɔm nabʋyʋ
(Mrk 4.35-41; Luk 8.22-25)
23Yesu kpa kpɩyʋʋ taa lɛ, ɛ-tɔmkpɛlɩkɩyaa tɩŋ ɛ-wayɩ. 24Pɛɖɛɣaɣ lɛ, heɣlim sɔsɔm nabʋyʋ pazɩ mabʋ ɖoŋ nɛ lɩm sʋʋ kpɩyʋʋ taa. Ɛlɛ́, Yesu ɖowaɣ. 25Peeɖe ɛ-tɔmkpɛlɩkɩyaa woba ɛ-cɔlɔ nɛ pefezi-i se: «Hayɩ Kɩpaɣlʋ! Ya ɖa-ñʋʋ! Đɩtɛŋɛlɩɣ cɩnɛ!» 26Ɛlɛ́, ɛkʋyɩ nɛ ɛpɔzɩ-wɛ se: «Pɩlabɩ ɛzɩma nɛ sɔɔndʋ kpaɣ-mɩ ḿbʋ́? Mi-lidaʋ wɛ kpaagbaa ñɩɩɩ!» Ɛlɛ́, eholini heɣlim nɛ lɩm nɛ pɩhɛɛ pɩtɩŋa niɣ niɣ. 27Peeɖe ɛ-tɔmkpɛlɩkɩyaa ḿbá payɩɣyɩ-ɩ siŋŋ nɛ pɔpɔzʋʋ pa-tɩ se: «Ɛbɛ ɛnɛ ɛkɛnaa kpem nɛ pɩkpɛndɩnɩ heɣlim nɛ lɩm nɛ pañaŋ-ɩ?»
Yesu kɔlɩ eliikenaa naalɛ pa-aleewaa
(Mrk 5.1-20; Luk 8.26-39)
28Pʋwayɩ lɛ, patalɩnɩ pa-kpɩyʋʋ Gadaraa ɛjaɖɛ taa kidiiliŋ lɛɛkʋ yɔɔ nɛ petii. Peeɖe ɛyáa naalɛ nabɛyɛ lɩnɩ pɩlaŋ taa nɛ pakatɩɣ Yesu. Pekem aleewaa. Nɔɔyʋ takatɩɣ se ɛtɩŋnɩ pɔ-cɔlɔ, mbʋ́ pʋyɔɔ yɔ, paawɛ kañatʋ siŋŋ. 29Pakatɩ-ɩ ḿbʋ́ lɛ, pamakɩ kubusi se: «Ɛsɔ Pɩyalʋ! Đa nɛ ŋ se we? Ŋkɔm se ŋɖʋ-ɖʋ kʋñɔŋ nɛ pʋcɔ alɩwaatʋ ndʋ́ Ɛsɔ ɖʋwa se ɛhʋʋnɩ-ɖʋ yɔ tɩtalɩ yaa we?» 30Afanaa tikaɣ sɔsɔɔ nakɛyɛ kɛwɛ peeɖe alɩwaatʋ ńdʋ́ nɛ kacazɩɣ tɔɔnaɣ. Kaaposini-wɛ pazɩ. 31Peeɖe aleewaa ḿbá petendi-i se: «Yee ŋɖɔɔnʋʋ-ɖʋ ɛyáa panɛ pa-wayɩ lɛ, ŋha-ɖʋ nʋmɔʋ nɛ ɖiwolo ɖɩsʋʋ afanaa tikaɣ ŋ́gá yɔ ka-taa.» 32Ɛlɛ́, eheyi-wɛ se: «Ise ɩɖɛɛ!» Peeɖe pesewa nɛ powolo pasʋʋ afanaa ḿbá pa-taa nɛ paba kpaɣ seya nɛ pʋʋ yɔɔ nɛ pɛkpɛndɩnɩ-wɛ petii pafalɩ teŋgu taa nɛ pɔñɔɔ lɩm nɛ pasɩ patɩŋa payɩ. 33Mbá pɔcɔŋaɣnɩ afanaa ḿbá pɔ-yɔɔ yɔ, paba se nɛ powolo tɛtʋ taa nɛ pɛkɛdɩ ɛyáa mbʋ́ pɩtɩŋa payɩ pɩlaba yɔ. 34Peeɖe tɛtʋ taa ɛyáa kpɛzaa nɛ powolo Yesu cɔlɔ nɛ petendiɣ-i se ɛkʋyɩ pɛ-ɛjaɖɛ taa nɛ ɛɖɛɛ.
Kasalukuyang Napili:
Maatiyee 8: KABI
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
