Maatiyee 3
3
Yohanɛɛsɩ heyi ɛyáa se: «Ɩlɛɣzɩ mɩ-laŋa!»
(Mrk 1.1-8; Luk 3.1-18; Yoh 1.19-28)
1Alɩwaatʋ ńdʋ́ʋ́ Lɩm Sɔʋ Sɔnzɩ Laɖʋ Yohanɛɛsɩ pazɩ susuu Ɛsɔtɔm Yudee lakʋ taa. 2Eheyaɣ ɛyáa se: «Ɩlɛɣzɩ wɛtʋ, mbʋ́ pʋyɔɔ yɔ, Ɛsɔ Kewiyaɣ wɩzɩ talʋʋ.»
3Yohanɛɛsɩ tɔm náyʋ Ezaayii yɔɔdaa se:
«Nɔɔyʋ susuu lakʋ taa se
pɔñɔɔzɩ Kɩpaɣlʋ nʋmɔʋ nɛ
pala nɛ kʋtʋʋzɩ camɩyɛ.»
4Yohanɛɛsɩ ɛnʋ, esuwaɣ toko ŋgʋ́ palʋnɩ kpaŋnɔ siɣá naalɛ tʋ hʋndʋ yɔ nɛ ɛtɔɔlʋʋ tambaɖɛ nɖɩ́ palabɩnɩ tɔnɛ yɔ. Kutoloŋ nɛ tʋŋ num ɛtɔkaɣ.
5Yohanɛɛsɩ susaɣ tɔm lakʋ taa ḿbʋ́ lɛ, Yeruusalɛm ñɩma nɛ Yudee hɔɔlɩŋ tɩŋa taa ñɩma nɛ hɔɔlɩŋ weyi ɩtɩŋa payɩ ɩñɔtɩnɩ Yɔɔrdaŋ pɔɔ yɔ ɩ-taa ñɩma, palɩɣ powoki ɛ-cɔlɔ 6nɛ paa weyi ɛyɔɔdʋʋ ɛ-kɩwɛɛkɩm mbʋ́ ɛlaba yɔ nɛ Yohanɛɛsɩ ɛnʋ ɛlakɩ-wɛ lɩm sɔʋ sɔnzɩ Yɔɔrdaŋ pɔɔ taa.
7Yohanɛɛsɩ nawa se Farɩsɩ ŋgbɛyɛ taa ñɩma nɛ Saduki ŋgbɛyɛ taa ñɩma mbá powoki ɛ-cɔlɔ se ɛlabɩ-wɛ lɩm sɔʋ sɔnzɩ yɔ, pɔɖɔwa siŋŋ. Peeɖe eheyi-wɛ se: «Ɛyáa azaɣ́a mɩ! Acɩba-mɩ cɩkpalʋʋ se Ɛsɔ pana kɔŋ-mɩ kpanaʋ yɔ? 8Ɩla lakasɩ nzɩ́ sɩwɩlɩɣ se ɩlɛɣzɩ wɛtʋ yɔ. 9Ɩtaamaɣzɩ se mɩ-cɔzɔ lɛ Abraham yɔ, pɩtɛma. Mbʋ́ pʋyɔɔ yɔ, meheyiɣ-mɩ se Ɛsɔ pɩzɩɣ ɛla nɛ pɛɛ anɛ apɩsɩ Abraham liɖe taa ñɩma.» 10Peeɖe etuu-wɛ eduuye se: «Halɩ pɛtɛm kpaɣʋ laɖɩyɛ se pɛsɛtɩɣ tɩŋ nɛ ɩ-tɛɛ: tɩʋ ŋgʋ́ kɩɩlʋlʋʋ pee kɩbana yɔ, pɛsɛtɩɣ-kʋ nɛ paɖʋ miŋ taa.» 11Meheyiɣ-mɩ se: «Ma lɛ, malakɩ-mɩ lɩm sɔʋ sɔnzɩ nɛ pɩwɩlɩ se ɩlɛɣzɩ wɛtʋ. Ma-wayɩ lɛ, weyi ɛkɔŋ yɔ, ɛkɩlɩ-m. Halɩ mantatɩɩmʋna se mankpaɣ ɛ-naataŋgbala nɛ mɔnɖɔkɩ. Ɛkɔŋ-mɩ labʋ sɔnzɩ nɛ Fezuu Kiɖeɖeu ɖoŋ nɛ miŋ. 12Ɛwɛ ɛzɩ falɩyʋ ɖɔkʋʋ ɖaakuɖe nɛ ɛfalɩɣ nɛ esuu pee kpou taa nɛ piyele ɛɖʋʋ lɔtʋ miŋ weyi eeɖeŋ wiɖiyi kaʋ yɔ ɛ-taa yɔ.»
Yesu lɩm sɔʋ sɔnzɩ tɔm
(Mrk 1.9-11; Luk 3.21-22)
13Yohanɛɛsɩ lakaɣ ɛyáa lɩm sɔʋ sɔnzɩ Yɔɔrdaŋ pɔɔ taa ḿbʋ́ lɛ, Yesu lɩɩnɩ Galilee egeetiye taa nɛ ewolo ɛ-cɔlɔ peeɖe se ɛlabɩ-ɩ-sɩ. 14Peeɖe Yohanɛɛsɩ tacaɣ tisuu nɛ ekitini Yesu se: «Ma pʋmʋnaa se mɔnkɔɔ ñɔ-cɔlɔ nɛ ŋlabɩ-m-sɩ nɛ ña ñakʋyɩ ŋkɔŋ mɔn-cɔlɔ tuluŋa na!» 15Ɛlɛ́, Yesu cosi-i se: «Yele pɩla ḿbʋ́ lɛɛlɛɛyɔ. Ḿbʋ́ pʋmʋnaa se ɖɩla mbʋ́ pɩtɩŋa payɩ pʋtʋʋzaa yɔ.» Eheyi Yohanɛɛsɩ ḿbʋ́ lɛ, ɛ́lɛ́ tisi nɛ ɛlabɩ-ɩ lɩm sɔʋ sɔnzɩ. 16Yohanɛɛsɩ tɩtɛm Yesu labʋ sɔnzɩ ńzɩ́ lɛ, Yesu lɩɣnɩ lɩm taa. Peeɖe ɛsɔdaa tʋlaa nɛ ɛna Fezuu Kiɖeɖeu lɩ ɛzɩ halikuku yɔ nɛ kitiki Yesu ɛnʋ ɛ-yɔɔ 17nɛ pʋyɔɔdʋʋnɩ ɛsɔdaa se: «Ɛnɛ lɛ man-Pɩyalʋ kʋsɔɔlʋ, maahʋʋ ɛ-yɔɔ kaʋ.»
Kasalukuyang Napili:
Maatiyee 3: KABI
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
