Maatiyee 11
11
1Yesu tɛm ɛ-tɔmkpɛlɩkɩyaa hiu nɛ naalɛ kɛdʋʋ mbʋ́ etiyiɣ-wɛ se pala yɔ lɛ, ɛɖɛɛ nɛ ɛcɔʋ tɛtʋ ndɩ ndɩ ndʋ́ tɩwɛ egeetiye ńɖɩ́ ɖɩ-taa yɔ tɩ-taa nɛ ɛwɩlɩɣ nɛ esusuu ɛyáa Ɛsɔtɔm.
Lɩm Sɔʋ Sɔnzɩ Laɖʋ Yohanɛɛsɩ tɔm pɔzʋʋ
(Luk 7.18-35)
2Alɩwaatʋ ńdʋ́ lɛ, Lɩm Sɔʋ Sɔnzɩ Laɖʋ Yohanɛɛsɩ kɛwɛ salaka taa. Peeɖe ɛnɩ tʋmɩyɛ nɖɩ́ Krɩstʋ lakaɣ yɔ ɖɩ-taŋ nɛ ɛkʋsɩ ɛ-tɔmkpɛlɩkɩyaa taa lɛlaa nɛ etiyi-wɛ se powolo 3pɔpɔzɩ-ɩ nɛ pana se ɛnʋ lɛ weyi ɛ-tɔm paayɔɔdaa se ɛkaɣ kɔm yɔ yaa nɔɔyʋ wɛnɩ wayɩ?
4Peeɖe Yesu cosi-wɛ se: «Iwolo iheyi-i mbʋ́ ɩnawa nɛ ndʋ́ ɩnɩwa yɔ: 5yʋlʋmaa naɣ, tala tɩnaa ɖɔŋ camɩyɛ, canasɩ yɔɔ cɛkɩ, ndamaa nɩɣ, sɩɖaa feŋ nɛ posusuu kʋñɔndɩnaa Laŋhɛzɩyɛ Tɔm. 6Weyi eelesiɣ e-lidaʋ mɔ-yɔɔ yɔ, ehiɣ ɛ-tɩ!»
Yesu yɔɔdʋʋ Lɩm Sɔʋ Sɔnzɩ Laɖʋ Yohanɛɛsɩ tɔm
7Eheyi Yohanɛɛsɩ tɔmkpɛlɩkɩyaa ḿbʋ́ lɛ, pacaŋ pɛɖɛɛ. Peeɖe ɛpazɩ ɛyáa samaɣ kɛdʋʋ Yohanɛɛsɩ ɛnʋ ɛ-tɔm nɛ ɛpɔzɩ-wɛ se: «Ɛbɛ iwobi naʋ lakʋ taa? Kañɩŋ́gbayaɣ́ ŋgá heɣlim ciɣdaɣ yɔ yaa we? 8Ɛlɛ́, ɛbɛ iwobi naʋ kpem? Nɔɔyʋ suni ñɩɣlɩ́m wondu nɛ ɛwɛɛ peeɖe naa wɛ? Ŋgʋ́, mbá posuu ñɩɣlɩ́m wondu yɔ, pɛwɛɣ awiya ɖɩsɩ taa. 9Ɛbɛ kpem iiwobi naʋ? Náyʋ nɔɔyʋ yaa we? Toovenim lɛ, meheyiɣ-mɩ se ɩna weyi yɔ, ɛkɩlɩ náyʋ. 10Mbʋ́ pʋyɔɔ yɔ, Yohanɛɛsɩ tɔm Ɛsɔ yɔɔdaa nɛ pama Ɛsɔtɔm Takayaɣ taa se:
‹Na, mancalɩɣ men-tiyiyu tiyuu nɛ ɛñɔɔzɩ ña-nʋmɔʋ.› »
11Yesu tasɩ yɔɔdʋʋ se: «Toovenim lɛ, mankaɖɩɣ-mɩ se ɖooo yɔ, patalʋlɩdɩ nɔɔyʋ nɛ ɛkɩlɩ Lɩm Sɔʋ Sɔnzɩ Laɖʋ Yohanɛɛsɩ. Paa ḿbʋ́ yɔ, weyi ɛwɛ Ɛsɔ Kewiyaɣ taa nɛ patakpaɣ-ɩ payaa pʋyʋ yɔ, ɛ́lɛ́ kɩlɩ-ɩ. 12Pɩkpaɣʋnɩ alɩwaatʋ ndʋ́ Yohanɛɛsɩ ɛnʋ esusi tɔm nɛ pʋkɔɔ pɩsɩɩnɩ lɛɛlɛɛyɔ yɔ, ɛyáa wɛɛ pɛtɛzɩɣ kʋyʋʋ Ɛsɔ Kewiyaɣ yɔɔ nɛ pañɩnɩɣnɩ ɖoŋ se pehiɣ-kɛ. 13Náyaa tɩŋa nɛ Mooyiizi pɔyɔɔdɩ Ɛsɔ Kewiyaɣ ŋ́gá kɔ-tɔm nɛ pʋkɔɔ pɩsɩɩnɩ alɩwaatʋ ndʋ́ Yohanɛɛsɩ ɛnʋ ɛkɔma yɔ. 14Yee mi-liu ɛwɛɛ se itisiɣ mɔn-tɔm yɔ, Yohanɛɛsɩ ɛnʋ lɛ Elii weyi paayɔɔdaa se ɛkɔŋ yɔ. 15Weyi ɛwɛnɩ nɩŋgbaaŋ lɛ, ɛnɩɩ!
16«Ɛbɛ mɛnkɛdɩɣnɩ lɛɛlɛɛyɔ ɛyáa panɛ lee? Pɛwɛ ɛzɩ piya nzɩ́ sɩcaɣ mʋzʋʋ taa ɛyáa samaɣ ɖikpeɣliye nɛ sikou ɖama yɔɔ se: 17‹Đɩhʋlɩ-mɩ hɩsɩ se ɩpaa nɛ ikizi. Đitee kʋñɔŋ hendu nɛ itewii.› 18Toovenim lɛ, Yohanɛɛsɩ kɔma, ɛɛtɔkɩ tɔɔnaɣ, ɛɛñɔʋ sʋlʋm. Ɛlɛ́, ɩtɔŋ se ekem aleewaa. 19Ɛyʋ Pɩyalʋ ñɔkɔma nɛ ɛtɔkɩ nɛ ɛñɔʋ lɛ, ɩɖaɣnɩɣ yɔɔdʋʋ se: ‹Ɩnaɣʋ ɛyʋ ɛnɛ yɔ, tɔkɩyɛ nɛ ñɔtʋ pɔ-yɔɔ ɖeke ɛmaɣzɩɣ. Ɛkɛ ɖɔɖɔ tikee mʋyaa nɛ kɩwɛɛkɩm laɖaa lɛlaa pa-taabalʋ.› Ɛlɛ́, pasɩŋ Ɛsɔ lɔŋsɩnɖɛ nɛ ɛ-lakasɩ kɩbanzɩ.»
Tɛtʋ ndʋ́ tɩ-taa ñɩma kizi Yesu tɔm yɔ 11:19:
(Luk 10.13-15)
20Pʋwayɩ lɛ, Yesu pazɩ kalʋʋ tɛtʋ ndɩ ndɩ ndʋ́ tɩ-taa ɛɛkɩlɩ labʋ hama lakasɩ yɔ tɩ-taa ñɩma. Mbʋ́ pʋyɔɔ yɔ, pɛtɛlɛɣzɩ wɛtʋ, ɛkalɩ-wɛ se: 21«Koraazɛɛ nɛ Bɛtsayɩda ñɩma mɩ! Pʋtɔɔ-mɩ! Mbʋ́ pʋyɔɔ yɔ, palabɩ Ɛsɔ hama lakasɩ nzɩ́ mɩ-hɛkʋ taa yɔ, yee paalabɩ-sɩ Tiiri nɛ Sidɔɔ ñɩma pɔ-cɔlɔ yɔ, paatɛm caɣʋ tɔlɩma taa nɛ posuu kutokiŋ nɛ pɩwɩlɩ se pɛlɛɣzɩ wɛtʋ. 22Pʋ-yɔɔ mankaɖɩɣ-mɩ se Tiiri nɛ Sidɔɔ pɛ-tɛtʋ taa ñɩma kʋñɔŋ ɛɛtalɩɣ mɩ-ñɩŋgʋ kɩyakʋ ŋgʋ́ Ɛsɔ hʋʋnɩ ɛyáa yɔ. 23Mɩ Kapɛrnayum ñɩma lɛ, ɩmaɣzɩɣ se ɩkpaɣ ɛsɔdaa yaa we? Meheyiɣ-mɩ se ɩɩkpaɣ kaʋ. Ɛlɛ́, itiki tɛtɛɛ ɖenɖe kʋñɔŋ maatɛŋ wɛɛ yɔ. Mbʋ́ pʋyɔɔ yɔ, yee Ɛsɔ hama lakasɩ nzɩ́ palabɩ mɩ-tɛ yɔ, paalabɩ-sɩ Sodom yɔ, tɛtʋ ńdʋ́ tɩɩwɛ halɩ nɛ sɔnɔ. 24Ḿbʋ́ mankaɖɩɣ-mɩ se kɩyakʋ ŋgʋ́ Ɛsɔ hʋʋnɩ ɛyáa tɔm yɔ, Sodom ñɩma kʋñɔŋ ɛɛtalɩɣ mɩ-ñɩŋgʋ.»
Yesu lɩzɩ ɛ-caa nɛ ɛwɩlɩ piya ajamaa
(Luk 10.21-22)
25Alɩwaatʋ ńdʋ́ tɩ-taa Yesu tɔm se: «Man-Caa! Ɛsɔdaa nɛ tataa Kɩpaɣlʋ! Mansaŋ-ŋ. Mbʋ́ pʋyɔɔ yɔ, ŋkuli tɔm ndʋ́ ŋmɛsɩ lɔŋsɩnɖaa nɛ lɛɣsɩnɖaa yɔ tɩ-yɔɔ nɛ piya ajamaa nɩɩ tɩ-tɔbʋʋ. 26Man-Caa! Ñɔsɔɔlɩna se pɩla ḿbʋ́ nɛ pɩla ɖɔɖɔ.» 27Pʋwayɩ lɛ, Yesu heyi ɛyáa se: «Pɩtɩŋa payɩ lɛ, man-Caa cɛlɩnɩ-m. Nɔɔyʋ tasɩ mbʋ́ mɛnkɛnaa yɔ nɛ pɩtasɩnɩ man-Caa. Đɔɖɔ lɛ, nɔɔyʋ tasɩm-ɩ nɛ pɩtasɩnɩ ɛ-Pɩyalʋ ma nɛ mbá mɔnsɔɔlaa nɛ mawɩlɩ-ɩ-wɛ yɔ.
Ɩkɔɔ Yesu cɔlɔ nɛ ihiɣ hɛzʋʋ
28«Mbá mɩ mɩtɩŋa payɩ pasʋʋ-mɩ sʋʋtʋ nɛ pɩnɩɩ-mɩ yɔ, ɩkɔɔ mɔn-cɔlɔ nɛ mansʋʋ-mɩ nɛ ɩhɛzɩ. 29Peeɖe ɩkpakɩɣ mbʋ́ mawɩlɩɣ-mɩ yɔ se pɩkɛ mɩ-sʋʋtʋ nɛ ɩhɛzɩnɩ-pʋ. Mbʋ́ pʋyɔɔ yɔ, mɛwɛ leleŋ, mɔn-tɔm fɛyɩ kaɖɛ. 30Sʋʋtʋ ndʋ́ mansʋkɩ-mɩ yɔ, tɩ-sɩɣlʋʋ fɛyɩ kaɖɛ, tɩfɛyɩ yuŋ.»
Kasalukuyang Napili:
Maatiyee 11: KABI
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
