मर्कुस 8
8
येसुइ चार हजार मानिसहान्के ख्वाउलो
(मति १५:३२-३९)
1केइ दिनपाछु फेरि येसुठुँ मानिसको बड्को भिड बट्टेहाइ, उनहान्इ आन्लो खइलार चिज पनि सकिसक्लो रहाइ। अनि येसुइ चेलाहान्के आफिठुँ बोलाइकनि कहिक्, 2“इ मानिसहान मइसिन रलो पनि आज तिन दिन होखिसकिक्, अनि इनहान्सिन खइलार चिज केइ पनि नाटि, उसिगर्ते मर्हाइ दया लागिधार्लाटि। 3यदि मइ इनहान्के भुख भुखे घर पठानि इनहान बाटेमा छटपटाइतात्। कुन्हुँ कुन्हुँ त धेरे दुसिभि पनि आउलाटाइ।”
4ओख्रो चेलाहान्इ कहाइ, “खोइ, इ सुन्सान ठउँमा इ मानिसहान्को लागि खइलार चिज काहाँभि आने?”
5येसुइ उनहान्के सुध्याइक्, “ताहान्सिन कत्का रोटि बाटि?”
उनहान्इ कहाइ, “सात ओटा।”
6ओख्रोपाछु येसुइ भिडको मानिसहान्के भुइमा बिसे लगाइक् र सात ओटा रोटि लिहिकनि परमेस्वरके धन्येबाद दिहिकनि रोटि टुक्राइक, अनि मानिसहान्के बाटिदेहो कहि चेलाहान्के दिहिक्, र उनहान्इ मानिसहान्के बाटिदेहाइ। 7चेलाहान्सिन केइ मसिनो मसिनो माछोहान पनि रहिक्। येसुइ माछोको लागि पनि धन्येबाद दिहिक् र चेलाहान्के बाटे लगाइक्। 8अनि उथि होख्लो मानिसहान्इ खावाइ र टन्न अघावाइ। उबर्लो टुक्राहान उनहान्इ सात ढकियाभरि बट्यावाइ। 9उथि खइलार मानिसहान चार हजार जत्का रहाइ। ओख्रोपाछु येसुइ उनहान्के बिदा गरिकनि आफ्नो आफ्नो घर पठाइक्। 10अनि उ तुरुन्ते आफ्नो चेलाहान्सिन डोङोमा चढिकनि दलमनुथा इलाकामा जाइक्।
फरिसिहान्इ अचम्मको काम गर्लो चिन्ह देखाए कहाइ
(मति १६:१-४)
11कुन्हुँ कुन्हुँ फरिसिहान येसुठुँ आइकनि छलफल गरे लाग्वाइ, र उनहान्इ येसुको मन जाँचे यस्नो कहाइ, “स्वर्गभि आउलो हो कनि अचम्मको काम गरिकनि चिन्ह देखाहइ!”#मति १२:३८; लुका ११:१६ 12अनि येसुइ ढेङो सास फेर्तिहि कहिक्, “क्यारे इ पुस्ताको मानिसहान्इ अचम्मको काम गर्लो चिन्ह खोज्तात्? साच्चि, मइ ताहान्के कतिन, इ पुस्ताको मानिसहान्इ केइ देखे नापाउतात्।”#मति १२:३९; लुका ११:२९
13अनि उनहान्के छाडिकनि उ फेरि डोङोमा चढिकनि पारोपट्टि जाइक्।
फरिसिहान र हेरोद राजाइ सिखालो कुरामा होसियार रहेउ
(मति १६:५-१२)
14येसुको चेलाहान्इ खइलार कुरा बोके बिर्सालो रहाइ, र उनहान्सिन डोङोमा एउटे मात्रे रोटि रहिक्। 15येसुइ चेलाहान्के यस्के कहिकनि चेतावनि दिहिक्, “ताहान फरिसिहान र हेरोद राजाइ सिखालो कुरामा#८:१५सिखालो कुरामा मुल भासामा खमिर बाटि, तर खमिर कलो चाहिँ गलत सिखालो कुरा हो। होसियार रहेउ।”#लुका १२:१
16“हामिसिन रोटि नाहोख्लोइ ओइ हाम्राइ एस्के कलो हो कि” कहि एक आर्कोसिन छलफल गरे लाग्वाइ।
17इ थाहा पाइकनि येसुइ उनहान्के कहिक्, “ताहान्सिन रोटि नाटि कहि ताहान क्यारे छलफल गर्ताओ? क्या ताहान अझइ पनि नादेख्ताओ र नाबुझ्ताओ? क्या ताहान्को मन कठोर होख्लाटि? 18ताहान्सिन आँखि बाटि तरपनि नादेख्ताओ, कान बाटि तरपनि नासुन्ताओ? क्या ताहान्के याद नाटि?#यर्मिया ५:२१; इजकिएल १२:२; मर्कुस ४:१२ 19जब मइ पाच ओटा रोटिभि पाच हजारके टुक्राइकनि ख्वाउलो रिहिन, तब ताहान्इ कत्का ढकिया उठालो रहो?”
उनहान्इ कहाइ, “बार ढकिया।”
20“अनि सात ओटा रोटिभि चार हजारके टुक्राइकनि ख्वाउलो रिहिन, तब ताहान्इ कत्का ढकिया उठालो रहो?”
उनहान्इ कहाइ, “सात ढकिया।”
21येसुइ उनहान्के सुध्याइक्, “क्या ताहान अझइ पनि नाबुझ्ताओ?”
येसुइ अन्ध्रा मानिसके सन्चो बनालो
22ओख्रोपाछु येसु आफ्नो चेलाहान्सिन बेथसेदा गाउँमा आइपुगिक्। उथि केइ मानिसहान्इ एउटा अन्ध्राके ओख्रोठुँ आन्वाइ र एख्राइ सन्चो बनाएके लागि छोइदेहइ कहि बिन्ति गर्वाइ। 23अनि येसुइ अन्ध्राको हात छोपिकनि गाउँभि बाहिर लेगिक्, र ओख्रो आँखिमा आफ्नो थुक लगातिहि ओख्रोउप्रो हात धरिकनि कहिक्, “क्या तइ केइ देख्तिहिँ बाटेर्?”
24अनि ओइ चाहातिहि कहिक्, “मइ मानिसहान्के देख्तिहिँ बाटिन, उनहान रुखहान जस्ने बाटाइ तर भोइधार्लो देख्तिन।”
25येसुइ फेरि ओख्रो आँखिमा हात धारिक, र ओइ एकटक लगाइकनि चाहिक। अनि उ देख्लार होखिक र सभइ थोक छर्लङग देखे लागिक। 26तब येसुइ ओख्राइ गाउँपट्टि नापिसिकनि आफ्नो घर जाएस् कहि आग्या दिहिक्।
येसु कुन्को हो?
(मति १६:१३-१६; लुका ९:१८-२०)
27येसु र ओख्रो चेलाहान कइसरिया फिलिप्पि कलार सहरपट्टि रलो गाउँहानमा जावाइ। बाटमा जितिहिगर्ते ओइ आफ्नो चेलाहान्के सुध्याइक्, “मानिसहान्इ मर्हाइ कुन्को हो कहि कतात्?”
28अनि चेलाहान्इ कहाइ, “कुनिहि बप्तिस्मा देलाहार युहन्ना, अरुकहान्इ एलिया कतात् र कुन्हुँ कुनुहि अरु अगमबक्ताहानमध्ये एक जना हो कतात्।”#मर्कुस ६:१४-१५; लुका ९:७-८
29तब येसुइ उनहान्के सुध्याइक्, “तर ताहान्इचाहिँ मर्हाइ कुन्को हो कताओ?”
पतरुसइ कहिक्, “तइ मुक्ति देलार खिरिस्ट हो।”
30येसुइ उनहान्के इ कुरा कुन्हुँके पनि झिन कहेउ कहि आग्या दिहिक्।
येसुइ आफ्नो मर्लारको बारेमा कहिक्
(मति १६:२१-२८; लुका ९:२२-२७)
31तब येसुइ चेलाहान्के आफ्नो बारेमा कहिकनि यस्के सिखाए लागिक, “मइ, मानिसको छउनाइ धेरे दुख भोगे पर्ताइ, अगुवाहान्इ, धर्म गुरुहान्इ र मुख्य पुजारिहान्इ मर्हाइ असुइकार गर्तात् र मार्तात् अनि मइ तिन दिनमा फेरि जिउते होख्तिन।” 32ओइ एस्के इ कुरा नाम्रोसिन कहिदिहिक। इ कुरा सुनिकनि पतरुसइ ओख्राइ एक ठउँपट्टि लेगिकनि हप्काए लागिक 33तर येसु फर्किकनि चेलाहान्के चाहिक र पतरुसके हप्काइक, “ए सइतान, मइभि दुसि जा, क्यारेकनिसिन तोरो मन परमेस्वरपट्टि नाहो, तर मानिसपट्टि बाटि।”
34तब येसुइ भिडको मानिसहान्के र चेलाहान्के बोलाइकनि कहिक्, “कुनुहुँ मानिस मोरो पाछु आए खोज्ताइ कनि ओइ आफिके माया मारुस्, र आफ्नो कुरुस बोकिकनि मोरो पाछु लागुस्।#मति १०:३८; लुका १४:२७ 35क्यारेकनिसिन जुनइ आफ्नो परान बचाए खोज्ताइ, ओइ कन्हुँ नासक्हेलार जिबन गुमाताइ, तर जुनइ मोरो र नाम्रो खबरको लागि आफ्नो परान गुमाताइ, ओइ कन्हुँ नासक्हेलार जिबन पाउताइ।#मति १०:३९; लुका १७:३३; युहन्ना १२:२५ 36क्यारेकनिसिन मानिसइ सन्सारभरिको धन-सम्पति हत्याइकनि कन्हुँ नासक्हेलार जिबन गुमाताइ कनि क्या फाइदा होख्ताइ र? 37अथवा मानिसइ आफ्नो कन्हुँ नासक्हेलार जिबनको साटोमा क्या देहे सक्ताइ र? 38अनि बिस्वासिलो नाहोख्लो र पापि इ पुस्ताको मानिसहान मइ र मोरो बचनसिन लजाइतात् कनि मइ मानिसको छउना पनि परमेस्वर बुबाको महिमामा र पबित्र स्वर्गदुतहान्सिन आउते ओख्रोसिन लजाइतिन।”
Kasalukuyang Napili:
मर्कुस 8: BOTE
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
