मर्कुस 15
15
बड्को हाकिम पिलातसको आघु येसु
(मति २७:११-३१; लुका २३:२-३,१८-२५; युहन्ना १८:२८-४०; १९:१-१६)
1एक्का बेहानि मुख्य पुजारिहान, अगुवाहान, धर्म गुरुहान र सभइ माहासभाइ सल्लाहा गरि येसुके बाधिकनि लेग्वाइ, र बड्को हाकिम पिलातसठुँ जिम्मा लगाइदेहाइ। 2पिलातसइ ओख्राइ सुध्याइक्, “क्या तइ यहुदिहान्को राजा हो?”
येसुइ ओख्राइ जबाफ दिहिक्, “तइ ज ओस्ने कतेर।”
3मुख्य पुजारिहान्इ ओख्राइ धेरे कुरामा दोस लगावाइ। 4पिलातसइ फेरि ओख्राइ सुध्याइक्, “क्या तोरोसिन केइ जबाफ नाटि? चाहइ, तोरो बिरुधमा उनहान्इ कत्हेक कुरामा दोस लगाइधार्लाटइ।”
5तर येसुइ फेरि केइ जबाफ नादिहिक, अनि पिलातस छक्क परिक।
येसुके मार्लार फइसला गर्लो
(मति २७:१५-२६; लुका २३:१३-२५; युहन्ना १८:३९—१९:१६)
6बर्सेपिच्छे छुटकारा चाडको बेरामा मानिसहान्इ माग्लो एक जना कइदिके उनहान्को लागि पिलातसइ छाड्देलाहार चलन रहिक्। 7ओइबेलामा हुलदङ्गा मचालारहान्सिन बारब्बा नाउँ होख्लो एक जना मानिस पनि झ्यालखानामा थुनेलो रहिक्। ओइ हुलदङ्गा मचालाहारसिन मिलिकनि मानिसहान्के मार्लो रहिक्। 8र मानिसको भिड आवाइ र पिलातसके बर्से पिच्छे गर्तिहि आउलो जस्ने हाम्राइ गरि दे कहि बिन्ति गर्वाइ। 9पिलातसइ उनहान्के एस्के कहिकनि सुध्याइक्, “क्या मइ ताहान्को लागि यहुदिहान्को राजाके छाडिदिउ कहि ताहान्इ खोज्लाटो?” 10क्यारेकनि डाहाइ गर्ते ज मुख्य पुजारिहान्इ येसुके उनहान्ठुँ सुम्पलो हो कलार पिलातसके थाहा रहिक्।
11तर मुख्य पुजारिहान्इ भिडको मानिसहान्के “बारब्बाके छाडिदेहे” कहे कहिकनि सुर्यावाइ। 12पिलातसइ फेरि उनहान्के सुध्याइक्, “उसिकनि यहुदिहान्को राजा कलो मानिसके चाहिँ मइ क्या गरु त?”
13उनहान चिच्यावाइ, “ओख्राइ कुरुसमा झुन्ड्याहइ।”
14पिलातसइ उनहान्के कहिक्, “क्यारे? एइ क्या ननाम्रो गर्लाटि र?”
तर झन बेस्के चिच्याइकनि उनहान्इ कहाइ, “ओख्राइ कुरुसमा झुन्ड्याहइ।”
15तब पिलातसइ भिडको मानिसहान्के खुसि बनालाहार बिचारइ उनहान्को लागि बारब्बाके छाडिदिहिक, र येसुके कोर्राइ पिटिकनि कुरुसमा झुन्ड्याए सिपाहिहान्के सुम्पिदिहिक।
सिपाहिहान्इ येसुको गिल्ला गर्लो
(मति २७:२७-३१; युहन्ना १९:२-३)
16सिपाहिहान्इ येसुके पेरेटोरियाम कहेलार महलभित्र लिहिकनि गेहाइ, र सभइ पल्टनके उथिन बट्यावाइ। 17अनि उनहान्इ येसुके राजाइ लगालार जस्ने भाटा रङ्को लुगा लगाइ देहाइ, र काटोहान्को मुकुट उनिकनि ओख्रो कपारमा लगाइदेहाइ, 18अनि “यहुदिहान्को राजाको जय जयकार” कतिहिँ उनहान्इ येसुके सलाम गरे लाग्वाइ। 19अनि उनहान्इ ओख्रो कपारमा लट्ठिइ हिर्कातिहि ओख्राइ थुक्वाइ र घुडा टेकिकनि ओख्राइ ढोग गर्वाइ। 20अनि येसुको गिल्ला गरिसक्लोपाछु उनहान्इ भाटा रङको लुगा फुकालिदेहाइ, र ओख्रो आफ्ने लुगा लगाइ देहाइ। र उनहान्इ ओख्राइ कुरुसमा झुन्ड्याएके बाइर लेग्वाइ।
येसुके कुरुसमा झुन्ड्यालो
(मति २७:३२-४४; लुका २३:३३-४३; युहन्ना १९:१७-२७)
21अनि बाटमा जितिहि गर्ते कुरेनि सहरमा बिस्लाहार सिमोन गाउँभि सहरपट्टि आइधार्लो सिपाहिहान्इ भेटावाइ, (उ चाहिँ अलेक्जेन्डर र रुफसको बुबा रहिक्) र सिपाहिहान्इ जबरजस्ति येसुको कुरुस बोके लगावाइ।#रोमि १६:१३ 22र उनहान्इ येसुके गलगथा कलार ठउँमा आन्वाइ (गलगथाको अर्थ “खप्परेको ठउँ” हो)। 23अनि उनहान्इ ओख्राइ मुर्र कलार बिरुङ मिसालो अङ्गुरको आमिलो जाड खाए देहाइ। तर ओंइ उ नाखाइक। 24तब उनहान्इ येसुके कुरुसमा झुन्ड्यावाइ। अनि कुन्इ क्या पाहेताइ कहि पक्का गरे चिट्ठा घालिकनि उनहान्इ ओख्रो लुगाहान एकआर्कासिन बाट्वाइ।#भजनसङग्रह २२:१८ 25उनहान्इ ओख्राइ कुरुसमा झुन्ड्याते बेहानोको नउ बज्लो रहिक्। 26ओख्रो दोसको पाटिमा “यहुदिहान्को राजा” कलार लेखेलो रहिक्। 27उनहान्इ ओख्रोसिन दुइ जना डाकुहान्के छुट्टे छुट्टे कुरुसमा झुन्ड्यावाइ—एउटाके ओख्रो दाहिन्यापट्टि र आर्कोके ओख्रो देब्र्यापट्टि। 28[यस्के “उनहान्इ येसुके अपराधिमा गन्वाइ।”]#यसइया ५३:१२
29उथिभि गेलाहार मानिसहान्इ आफ्नो कपार हल्लातिहि एस्के कहिकनि ओख्राइ गिल्ला गर्वाइ, “वाह! तइ मन्दिर भत्काइकनि तिन दिनमा बनालाहार,#भजनसङग्रह २२:७; १०९:२५; मर्कुस १४:५८; युहन्ना २:१९ 30आब कुरुसभि ओघ्रि आइ र आफिके बचाहइ।”
31ओस्ने गरि मुख्य पुजारिहान्इ पनि धर्म गुरुहान्सिन एस्के कतिहिँ एकआर्कामा ओख्रो खिसि गर्वाइ, “एइ अरुके बचाइक, तर आफिके चाहि बचाए नासक्ताइ। 32यदि उ इजराएलको राजा खिरिस्ट हो कनि, आब कुरुसभि ओघ्रिकनि तरआउस्। र हामि देख्बुहुँ र बिस्वास गर्बुहुँ।”
ओख्रोसिन कुरुसमा झुन्डेलोहान्इ पनि ओख्रो गिल्ला गर्वाइ।
येसु मर्लो
(मति २७:४५-४६; लुका २३:४४-४९; युहन्ना १९:२८-३०)
33लगभग बार बजेभि तिन बजेसम्म देसभरि अन्धार होखिक। 34तिन बजेपट्टि एस्के कहिकनि येसुइ बड्को सोरइ चिच्याइक्, “इलोइ, इलोइ, लामा सबखथनि?”#१५:३४ “इलोइ, इलोइ, लामा सबखथनि?” इ सब्द येसुको आफ्ने आरामिक भासा हो। जख्रो अर्थ हो, “हे मोरो परमेस्वर, हे मोरो परमेस्वर, तइ मर्हाइ क्यारे छाडेर?”#भजनसङग्रह २२:१
35छेउमा ठेढाइलारहानमध्ये कुन्हु कुन्हुँइ इ सुन्वाइ र कहाइ, “सुनो, एइ एलियाके बोलातिहि बाटि।” 36अनि एक जना दुगर्ले जाइ एउटा थाङ्ना अङ्गुरको आमिलो जाडमा बुडाइ एउटा ढेङो लट्ठिमा अड्काइकनि एस्के कहि ओख्राइ चुसाइक, “चाहुँ, कतहुँ एलियाइ एख्राइ ओघ्राए आउताइ कि।”
37तब येसुइ बड्को सोर निस्काइकनि परान त्यागिक।
38अनि मन्दिरको पर्दा टुप्पाभि फेद्रासम्म दुइ भाग होखिकनि च्यातिहिक।#प्रस्थान २६:३१-३३ 39येसुइ एस्के परान त्याग्लो देखिकनि ओख्रो आघु ठेढाइलो कप्तानइ कहिक्, “साच्चि ज इ मानिस परमेस्वरको छउना होछ।”
40उथि दुस्सिभि चाहिधार्लो केइ बेटिहान पनि रहाइ। उनहानमध्ये मरियम मग्दलिनि अनि बिर्झिन याकुब र योसेफको आमा मरियम र सलोमि रहाइ। 41येसु गालिल इलाकामा रतेखेरि, इनहान्इ येसुके पछ्यातरहाइ, र ओख्रो सेवा गर्तरहाइ। येसु साङ्हे येरुसलेममा आउलो अझि धेरे बेटिहान पनि उथि रहाइ।#लुका ८:२-३
येसुको लासके ओडारमा धार्लो
(मति २७:५७-६१; लुका २३:५०-५६; युहन्ना १९:३८-४२)
42उ दिनचाहिँ तयारिको दिन रहिक्, मतलब बार्ना दिनको आघुको दिन। ब्यारो होख्तिहि रहिक्। 43अरिमाथियाको सहरमा बिस्लार योसेफइ आट गरिकनि येसुको लास मागिक्। उ चाहिँ माहासभाको एउटा इज्जतदार सदस्य रहिक्। ओइ परमेस्वरको राज्येको बाट चाहिधार्लो रहिक्। 44येसु मरिसक्लो कुरा सुनिकनि पिलातस छक्क परिक। अनि कप्तानके आफिठुँ बोलाइकनि उ मर्लो हो कि नाहो कहि सुध्याइक्। 45जब येसु पक्का मर्लो कुरा कप्तानभि थाहा होखिक तब पिलातसइ येसुको लास योसेफके लेगे अनुमति दिहिक्। 46अनि योसेफइ सुतिको लुगा किनिक, र लास तर झारिकनि सुतिको लुगाइ मेरिक अनि पाथरमा खोपिकनि बनाहेलो एउटा ओडारमा धारिक। र ओडारको मुखमा ओइ एउटा पाथरइ दाबि दिहिक्। 47मरियम मग्दलिनि र योसेफको आमा मरियमइ ओख्राइ धार्लो ठउँ चाहिधार्लो रहाइ।
Kasalukuyang Napili:
मर्कुस 15: BOTE
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
