मर्कुस 11
11
येरुसलेममा येसुके राजाको आदर
(मति २१:१-११; लुका १९:२८-४०; युहन्ना १२:१२-१९)
1जब उनहान येरुसलेमको नजिक जइतुन डाडाको छेउमा बेथफागे र बेथानिया कलार गाउँमा आइपुग्वाइ, तब येसुइ आफ्नो चेलाहानमध्ये दुइ जनाके एस्के कहिकनि पठाइक्, 2“ताहान्को आघुको गाउँमा जाओ, गाउँ पिस्ले बितिके ताहान्इ आन्हा सम्म कुन्हुँ मानिस नाचढ्लो एउटा गधाको बाछाके बाधिधार्लो भेटाताओ, ओख्राइ फुकालिकनि इथि आन्हेउ। 3यदि कुनुहि ताहान्के ‘इ क्या गर्लो?’ कहि सुध्यानि, ‘पर्भुके एख्रो खाचो बाटि र ओइ छिट्टे फर्काइदेताइ’ कहेउ।”
4तब उनहान जावाइ र गधाको बाछाके बाटको नजिके एउटा घरको दइल आघु बाधिधार्लो भेटावाइ। ओख्राइ फुकाले लाग्ते 5उथि ठेडाइलार मानिसहानमध्ये कुन्हुँ कुनुहि सुध्यावाइ, “गधाको बाछाके फुकालिकनि ताहान्इ क्या गर्तिहि बाटो?”
6येसुइ अर्हालोजस्ने उनहान्इ कहाइ र ठेडाइलार मानिसहान्इ उनहान्के लेगे देहाइ। 7उनहान्इ गधाको बाछाके येसुठुँ आन्वाइ। अनि आफ्नो च्यादरहान गधाको कन्ढमा ओच्छ्यावाइ र येसु ओख्रोउप्रो चढिक। 8धेरे मानिसहान्इ आफ्नो च्यादरहान बाटमा ओच्छ्यावाइ र अरुहान्इ खेतभि पात होख्लो डालाहान काटिकनि बाटमा ओच्छ्यावाइ। 9अनि येसुको आघु आघु र पाछु पाछु आउलार मानिसहान्इ एस्के कतिहिँ जय जयकार गरे लाग्वाइ,
“परमेस्वरको जय जयकार होखुस्!
जुन्को परमपर्भुको नाउँमा आउताइ उ चाहिँ आसिस पाउलो होखुस्!#भजनसङग्रह ११८:२५-२६
10हाम्रो पुर्खा दाउद राजाको आए लाग्लो राज्ये आसिस पाउलो होखुस्।
स्वर्गमा रलो परमेस्वरको जय जयकार होखुस्!”
11येसु येरुसलेममा आइकनि मन्दिरको अङनमा पिसिक। अनि ओइ चारेउपट्टिको सभइ थोकउप्रो चाहिक। ब्यारो होखे लाग्लोइ उ बार जना चेलाहान्सिन बेथानिया गाउँमा फर्किकनि जाइक्।
येसुइ नेभाराको रुखके सराप देलो
(मति २१:१८-१९)
12अर्कना दिन उनहान बेथानिया गाउँभि येरुसलेम जितिहि गर्ते येसु भुखाइक्। 13अनि दुसिभि झ्याम्म पर्लो नेभाराको रुख देखिकनि ओख्रोमा केइ फर पाउतिन कि कहिकनि येसु उथि जाइक्। तर उथि पुग्लोपाछु उ रुखमा पात बाहेक केइ नापाइक्, क्यारेकनिसिन ओइबेला नेभाराको फर फर्लार समय नाहोख्लो रहिक्। 14तब येसुइ उ रुखके कहिक्, “आबभि कुन्हुँइ पनि तइभि फर झिनखाउस्।”
इ कलो कुरा ओख्रो चेलाहान्इ सुन्वाइ।
येसुइ किनमेल गर्लारहान्के मन्दिरको अङनभि बाइर निस्कालो
(मति २१:१२-१७; लुका १९:४५-४८; युहन्ना २:१३-२२)
15अनि उनहान येरुसलेममा पुग्लोपाछु येसु मन्दिरको अङनमा पिसिक। उथि किनबेच गर्लारहान्के बाहिर लघारिक् र पइसा साट्लारको टेबुलहान र परेवा बेच्लारको बिस्लार ठउँहान पल्टाइदिहिक्। 16र ओइ कुनुहुँके पनि केइ चिज मन्दिरभि लेगे नादिहिक। 17अनि ओइ सिखातिहि कहिक्, “क्या एस्के नालेखेलाटि, ‘मोरो घर सभइ जातहान्को लागि पर्थनाको घर कहलाएताइ? तर ताहान्इ त एख्राइ गुन्डाको अड्डा बनालाटो।’”#यसइया ५६:७; यर्मिया ७:११
18इ कुरा मुख्य पुजारिहान र धर्म गुरुहान्इ सुन्वाइ र ओख्राइ कस्के मारे सकेताइ कहि मउका खोजे लाग्वाइ। तर उनहान ओख्रोसिन डराइतरहाइ, क्यारेकनिसिन पुरे भिडइ ओइ सिखालो कुरामा अचम्म मान्लो रहाइ।
19ब्यारो होख्लोपाछु येसु र चेलाहान सहरभि बाहिर निस्किकनि जावाइ।
बिस्वासको सक्ति
(मति २१:१८-२२)
20अर्कना दिन बेहानि फेरि ओइ बाटभि जितिहि गर्ते उनहान्इ ओइ नेभाराको रुखके जराभि ज सुखाइलो देख्वाइ। 21येसुइ कलो कुरा पतरुसइ सम्झितिहि ओख्राइ कहिक्, “गुरु, चाहि त, तइ सराप देलो नेभाराको रुख त सुखाइक्।”
22येसुइ उनहान्के कहिक्, “परमेस्वरमा बिस्वास गर्हेउ। 23साच्चि मइ ताहान्के कतिन, यदि कुन्हुँइ आफ्नो मनमा सङखा नागर्ताइ तर आफि कलो कुरा पुरा होख्ताइ कहि बिस्वास गरिकनि इ पाहाडके ‘तइ उख्रिकनि समुन्द्रमा खसइ’ कताइ कनि ओख्रो लागि ओस्ने होख्ताइ।#मति १७:२०; १ कोरिन्थि १३:२ 24उसिगर्ते मइ ताहान्के कतिन, ताहान्इ पर्थनामा ज्या माग्ताओ उ पाउलाटाहुँ कहि बिस्वास गर्हेउ र उ ताहान्को होख्ताइ। 25जब ताहान पर्थना गर्ताओ, तब कुन्हुँको बिरुधमा ताहान्को मनमा केइ बिरोध बाटि कनि ओख्राइ माफ गर्देहेउ। अनि ताहान्को स्वर्गमा होख्लो परमेस्वर बुबाइ पनि ताहान्को पाप माफ गर्देताइ। 26[तर ताहान्इ माफ नागर्नि, ताहान्को स्वर्गमा होख्लो परमेस्वर बुबाइ पनि ताहान्को पाप माफ नागर्देताइ।”#मति ६:१४-१५]
येसुको अधिकारमा पर्स्न
(मति २१:२३-२७; लुका २०:१-८)
27येसु आफ्नो चेलाहान्सिन फेरि येरुसलेममा आइपुग्वाइ। अनि येसु मन्दिरको अङनमा इतेउते भोइधार्ते मुख्य पुजारिहान, धर्म गुरुहान र अगुवाहान ओख्रोठुँ आवाइ। 28र उनहान्इ येसुके सुध्यावाइ, “कुन अधिकारइ तइ इ धन्दाहान गर्तेर? इ धन्दाहान गर्लार अधिकार तोर्हाइ कुनि दिहिक्?”
29येसुइ उनहान्के कहिक्, “मइ पनि ताहान्के एउटा पर्स्न सुध्यातिन, मर्हाइ ओख्रो जबाफ देहो, अनि मइ कुन अधिकारइ इ धन्दा गर्तिन, उ मइ ताहान्के कतिन। 30लउ कहो त, युहन्नाइ देलो बप्तिस्मा परमेस्वरभि रहिक् कि मानिसभि, मर्हाइ जबाफ देओ!”
31तब उनहान एक आर्कोसिन बोले लाग्वाइ, “आब हामिइ क्या कहे? परमेस्वरभि कहुँ कनि ‘ताहान्इ क्यारे युहन्नाके बिस्वास नागरो त?’ कहिकनि ओइ सुध्याइघाल्ताइ। 32तर ‘मानिसहान्भि’ कहे पनि कस्के कहे?” यस्के कहे डरावाइ, क्यारेकनि इ मानिसहान्इ युहन्नाके अगमबक्ता हो कहि मान्तात्। 33अनि उनहान्इ येसुके जबाफ देहाइ, “हाम्राइ थाहा नाटि।”
येसुइ उनहान्के कहिक्, “मइ पनि कुन अधिकारइ इ धन्दा गर्तिन, ताहान्के नाकतिन।”
Kasalukuyang Napili:
मर्कुस 11: BOTE
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
