लुका 5
5
सुरुको चेलाहान
(मति ४:१८-२२; मर्कुस १:१६-२०)
1एक दिन येसु गनेसरेत तालको#५:१ गनेसरेत ताल गालिल तालको आर्को नाउँ हो। छेउमा ठेढाइधार्लो रहिक्। धेरे मानिसहान परमेस्वरको बचन सुने धेक्लाधेक्लि गर्तिहि रहाइ।#मति १३:१,२; मर्कुस ३:९,१०; ४:१ 2ओइ तालको छेउमा दुइटा डोङो देखिक्। मछेउर्याहान डोङो टड्याकनि जाल धोइधार्लो रहाइ। 3एउटा डोङो सिमोनको रहिक्। येसु सिमोनको डोङोमा चढिकनि डोङोके पाखाभि गइरोपट्टि लेगे सिमोनके कहिक्। अनि बिसिकनि मानिसहान्के सिखाए लागिक्।
4ओइ सिखाइ सक्लो पाछु, सिमोनके कहिक्, “डोङो गइरोमा लेगिकनि जाल खेपहइ।”
5सिमोनइ येसुके कहिक्, “गुरु, हामिइ रातभरि जाल खेपहुँ, एउटा पनि माछो नाबझिक। तर तइ कनिसिन मइ जाल खेपतिन।”#युहन्ना २१:३ 6जाल खेपते धेरे माछोहान बझिक र उनहान्को जाल च्याथे लागिक्।#युहन्ना २१:६ 7उनहान्इ आर्को डोङोको साखाहान्के इसारा गरिकनि सघाए बोलावाइ। उनहान आइकनि डोङोमा माछो घाले लाग्वाइ दोहइ डोङो माछोइ भरिकनि डोङो बुडे लागिक्।
8इ देखिकनि सिमोन पतरुसइ येसुको गोडमा घोप्टो परिकनि कहिक्, “हे पर्भु! मोरोठुँ भइ दुस्सि जा, मइ पापि बाटिन्!” 9क्यारेकनिसिन धेरे माछो बझ्लो कारनइ सिमोन र ओख्रो साखाहान छक्क पर्वाइ। 10सिमोनसिन धन्दा गर्लार जब्दियाको छउनाहान याकुब र युहन्ना पनि छक्क पर्लो रहाइ। सिमोनके येसुइ कहिक्, “झिनडरा, आबभि तइ माछो नाहो, मानिसहान्के बझाइकनि मोरोठुँ आनलाहार बनातिन।”
11इ सुनिकनि उनहान्इ डोङोके पाखामा टड्यावाइ, अनि सभइ चिज छाडिकनि, येसुको पाछु लाग्वाइ।
येसुइ कुस्टरोगिके सन्चो बनालो
(मति ८:१-४; मर्कुस १:४०-४५)
12येसु एउटा सहरमा रतेखेरि ओइ सहरमा जिउभरि कुस्टरोग लाग्लो एक जना मानिस रहिक्। येसुके देखिकनि ओख्रो गोड ढोग्तिहि बिन्ति गरिक्, “पर्भु, तइ चाहानेसिन मराइ सन्चो बनाए सक्तेर।”#५:१२ कुस्टरोग छाला, नसा गल्तिहि र सेराइले गेलार एक माहा रोग हो। इ रोग लाग्लो मानिसहान यहुदि धर्म नियम अनुसार मन्दिरमा जाए नापाउतराइ र अरु मानिसके पनि छोए नापाउतराइ क्यारेकनिसिन उनहान असुद्द मानेतरहिक्।
13येसुइ ओख्रो उप्रो हात धर्तिहि कहिक्, “मइ चाहातिन! तइ सन्चो होखिघाल!” अनि तुरुन्ते उ कुस्टरोगभि सन्चो होखिक्। 14तब येसुइ ओख्राइ अर्हाइकनि कहिक्, “चाहि, इ बोलि कख्राइ पनि झिनकहेस्, तर पुजारिठुँ जाइकनि आफिके जाँच गराहेस, र मोसाइ अर्हालो जस्ने भोग दिहिकनि आफि सन्चो होख्लो कहि सभइके सबुत दिहि।”#लेबि १४:१-३२
15ओइ दिनभि येसुको बारेमा हल्लाहान सभइपट्टि फइलले जाइक् अनि धेरे मानिसहान ओख्रो बचन सुने र रोगहान्भि सन्चो होखे आए लाग्वाइ। 16तर येसु चाहि सुनसान ठउँरिहान्मा जाइकनि पर्थना गर्तरहिक्।
येसुइ कुजोके सन्चो बनालो
(मति ९:१-८; मर्कुस २:१-१२)
17एक दिन येसुइ मानिसहान्के सिखाइ धार्लो रहिक्। ओख्रो छेउमा धर्म गुरुहान र फरिसिहान#५:१७ फरिसिहान यहुदिहान्को समाजमा धर्मको अगुवाहान बिसिधार्लो रहाइ। उनहान गालिल र यहुदिया ठउँरिको गाउँहान्भि र येरुसलेम सहरभइ आउलो रहाइ। मदाइलोहान्के सन्चो बनालार येसुसिन पर्भुको सक्ति रहिक्। 18मानिसहान्इ एक जना कुजो मानिसके खाटमा बोकिकनि येसु होख्लोठुँ आन्वाइ। उनहान्इ ओख्राइ भित्र येसुको आघु लेगे खोज्वाइ। 19तर मानिसहान्को हुलइ गर्ते येसुठुँ लेगे बाट नापावाइ। उसिगर्ते उनहान्इ मदाइलो मानिसके टख्ठासिन छानिमा लेगिकनि, छानि उजारिकनि मदाइलो मानिसके येसुको आघु टख्ठासिन बिस्तारे ओघ्रावाइ। 20येसुइ मानिसहान्को एस्नो बिस्वास गर्लो देखिकनि मदाइलो मानिसके कहिक्, “तोरो पाप माफ होख्लाटि।”
21येसुइ कलो बोलि सुनिकनि धर्म गुरु र फरिसिहान आफि आफि कहे लाग्वाइ, “परमेस्वरको खिसिगर्लार इ कुनको हो? परमेस्वरइ पो पाप माफ गरे सक्ताइ। मानिसइ पनि पाप माफ गरे सक्ताइ र?”
22उनहान्को मनको कुरा बुझिकनि येसुइ कहिक्, “ताहान्इ क्यारे यस्नो सोच्ताओ? 23उ कुजो मानिसके ‘तोरो पाप माफ होखिक्’ कहे कि ‘उठिकनि भोहइ’ कहेमा कुन सझिलो होख्ताइ? 24चाहो, धर्तिमा मानिसको छउनाके, मानिसहान्को पाप माफ गर्लार हक बाटि कहि, मइ ताहान्के सबुत देतिन।” अनि येसुइ कुजो मानिसके कहिक्, “मइ तोर्हाइ कतिन, उठइ, आफ्ने टख्ठा बोक्हइ र घर जा।”
25उ मानिस जुरुके उठिक, आफ्ने टख्ठा बोकिकनि परमेस्वरको पर्सम्सा गर्ले घर जाइक्। 26इ देखिकनि उनहान छक्क पर्वाइ! परमेस्वरको सक्ति देखिकनि डरावाइ, उनहान्इ परमेस्वरको पर्सम्सा गर्तिहि कहवाइ, “आज हामिइ कस्नो छक्क बनालार कुरा देख्हुँ!”
येसुइ लेबिके बोलालो
(मति ९:९-१३; मर्कुस २:१३-१७)
27उथिभि येसु जितिहि गर्ते लेबि#५:२७ एख्राइ मति कहिकनि पनि चिन्हेत रहिक्। कलाहार एक जना कर उठालाहार मानिसके भन्सारमा बिसिधार्लो देखिक्। येसुइ ओख्राइ कहिक्, “मोरो पाछु लाग्हइ।” 28अनि लेबिइ सभइ चिज छाडिकनि, ओख्रो पाछु लागिक्।
29ओख्रो पाछु लेबिइ येसुके लागि आफ्ने घरमा भोज खाए बोलाइक। ओइ भोजमा कर उठालाहार धेरे कर्मचारिहान र अरु धेरे मानिसहान रहाइ। 30येसुको चेलाहान्के फरिसि र उनहान्को धर्म गुरुहान्इ गनगनाइले कहे लाग्वाइ, “ताहान्इ क्यारे कर उठालाहार र पापिहान्सिन बिसिकनि खइताओ?”#५:३० यहुदि धर्मि अगुवाहान्इ येसुसिन बिसिकनि खाइधार्लो मानिसहान्के असुद्द पापिहान कहि सोच्तरहाइ। ओसिगर्ते ओख्रोसिन बिसिकनि खइलो मानिसहान्के पनि उनहान्इ ओस्ने सोच्तात्।#लुका १५:१,२
31येसुइ उनहान्के जबाफ दिहिक्, “डाक्टर त निरोगि मानिसके नाहो, रोगिके पो चाहेताइ। 32उसिगर्ते मइ धर्मिहान्के नाहो, तर पापिहान्के आफ्ने पाप मानिकनि परमेस्वरपट्टि मन फर्काए कहि बोलाए आउलाटिन।”
उपास नाबिस्ते पर्स्न
(मति ९:१४-१७; मर्कुस २:१८-२२)
33मानिसहान्इ येसुके कहिक्, “युहन्नाको चेलाहान धेरे जस्ने उपास बिस्तात् र पर्थना गर्तात्, फरिसिको चेलाहान पनि ओस्ने गर्तात् तर तोरो चेलाहान चाहि खइलाहार र पिउलाहार मात्रे गर्तात्।”
34येसुइ जबाफ दिहिक्, “बिहाको भोजमा दुलाहा जन्तिहान्सिन होखुनज्याल सम्म, क्या जन्तिहान्के उपास बिसाए सक्ताओ? 35तर एस्नो दिन पनि आउताइ जब दुलाहाके उनहान्ठुँभि छुटाएबि, तब पो उनहान उपास बिस्बाइ।”
36येसुइ उनहान्के आर्को पनि उखान कहिक्, “कुनुहि पनि लउठा लुगा च्याथिकनि पुरानो लुगामा नाटाल्तात्। टालि घाल्नु पनि लउठा लुगा बिगर्ताइ, र लउठा टाला पुरानो लुगासिन नास्वाहेताइ। 37कुनुहि पनि ताजा अङ्गुरको जाँड पुरानो छालाको थइलिमा नाधार्ताइ, यदि धरिघाल्नि पनि थइलिके ताजा जाँडइ फुटाताइ, र जाँड पनि फाल्लेताइ। 38ताजा अङ्गुरको जाँड लउठा छालाको थइलिमा ज धरेपर्ताइ! 39अनि कुनुहि पनि पइलिहिको अङ्गुरको जाँड खाइकनि लउठा अङ्गुरको जाँड खाए नारुचातात्। ओइ कताइ, ‘पइलिहिको ज मिठो बाटि।’”
Kasalukuyang Napili:
लुका 5: BOTE
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
