Matsiyù 11

Yùxanà yè e re kàràndzin neè swey kau Yesù rè min niì

(Lukì 7.18-35)

1Àyìwà, Yesù nàu twɛy goo rèè dè do e re kàràndzin teeŋ fii rèè rà waatsi riì bwèy, è bo mɔn, è bè mòdzian kàr'na, è waajibia faa è re wɔ̀ rèè doùn. 2È Mòdzìn Jààràfoobaa Yùxanà to kàsoò doùn, à toro yè ji Ŋaablà Jaara Moo Yesù rè goo fakɔɔn reè goomaa ɲàn. Tɔ̀un, è re kàràndzin neè swey ka, 3yè bè Yesù tey ci: «À dèu ci mòò riì nà nà, tɔ wo rìì làà, tàà mùn mòò kpɛr'lì màshua ?» 4Yesù yè dzin è ra ci: «Ye nìi myɛ̀ɛn, ko ye nìi jàa, ye bè tɔ̀ lakɛɛ̀y Yùxanà nà.» 5#Ekk 35.5,6; Ekk 61.1.Ye bè dzin à ra ci:

«Jaana reè jɛ̀y faa, mùrùku reè jìɛ, byèèma reè cɛrɛmabeè, yè fɛnɛbe,

torokper'neè myɛ̀yn faa, fùn nèè sèè kpunaàn,

Kùnàgoo Dziɔ̀ yè bà dèe gbakɔɔn reè rà.

6Àwà mun ma dzi ba mòò o moò sàn nà baan kpàà fyeu, tɔ̀ tsìfa raà wùbeu.»

Yesù nìi dèu Yùxanà tsɛ

7Àyìwà, Yùxanà rè kɛɛra reè dɔ̀n bèuma shɔ̀ùn, Yesù yè e maa è dziàn jàmaà nà Yùxanà raa goò tsɛ ci: «Ye bèumaà nà jènjàà kor'nà doùn, ye bèu fee rìì jà jènjàà kor'nà doùn, ye bèu fee rìì jà ? Ye bèu vun maana ni jà fyɛɛn y'à flɛ̀flɛɛra ɔ ? 8Ye to bou ye bè fee rìì jà ? Ye bèu mòò rìì jà nìi vya wùù jiunà e ma ɔ̀n ? Nìì reè vya wùù reè wɔɔ̀, twɛy ni màsà gba rèè rìì doùn. 9Ye to bou ye bè fee soo rii jà ? Ŋaablà re kɛɛra gbɛ ? Ɔ̀ɔn mun nì ci e ra, è bà gereon Ŋaablà re kɛɛra sa tsɛ. 10#Mak 3.1.À sɛbɛɔ̀n tɔ̀ raa goò rìì tsɛ Ŋaablà re goomaa doùn ci:

"À siin, min n ne kɛɛradzian ka bèe wo jɔun, è bè wo dɔ̀n shià lamɔnɔ̀n tsùù wo jɔun."

11Sààben na, mun nì ci e ra, tàan pɛn na dzin kere jà ŋe, nìi blà Mòdzìn Jààràfoobaa Yùxanà mà waa. Tɔ̀ to y'à tàrà, mòò riì dzyɛ̀n mòdzian sapɛ ma Jìrànxɔɔ̀ Màsàbee doùn, tɔ̀ sa blà à mà. 12#Luk 16.16.Àwà, è sen fɔ mòdzìn Jààràfoobaa Yùxanà raa waatsia rà, è nà suu fɔ dòònuùn dzu, Jìrànxɔɔ̀ Màsàbee ko ɲinmaxɔbeè ni e si ra, ɲinmaxɔ reè rìì to y'à gaa, y'a tàrà ba e raa. 13Àwà, è bè suu fɔ Yùxanà raa waatsia dzu, kɛɛra reè ko sàrìyaa gooma reè sapɛ Ŋaablà re màsàbee gooma deu. 14#Mak 3.23; Mat 17.10-13; Mar 9.11-13.Àwà ye ba nà e tsiì ye ɲɛn à ra, Ŋaablà re kɛɛra Àliì rìi goo na deò ci à nà sèè na, nèe wò rii. 15Toro ì ye ba ni mòò riì rè è bà è ka myɛ̀yn faa, è toro wɔu'n kuru wube dɛ !

16Mùn yɛ waatsi riì ɲàn ci she, mun nà tɔ̀ mòdzian ko tsi ì rìì gɔ̀n ? È ni a ci dziinkòòmɛ̀yn ì, nìì reè tsùuŋnà siikpaa ɲan, yè bà e vu boò e koòsi rèè rà ci: 17"Ɲe gwɛ̀ɛn fyɛu ye re, ye na ɲɔun ji waa. Ɲe yè shì ye ì cèè ye re, ye taama to na ŋununbe waa." 18Àwà Yùxanà nàu, à na ɲwɛyn cèreoma ɲɔɔ̀n, à to na mììnge ɲaùn mìan. È ci à kweykɔɔn. 19Adamà dziàn nàu, tɔ ɲwɛɛ̀n ɲɔɔ̀n, è bà mìɛn faa. È ci: "À nwɛ̀yn ɲan, à mììnfabaa, è bà xɔnsɔɔn tsi reè ko mòdzin faadzii ɲaan neè dzunwɛynsi. Ŋà, à re goo fakɔɔn reè dzi sìan Ŋaablà re akiriblabeè rà."»

Yesù dziun ci nìi nà Galile mar'la wɔ̀ swey tàrà

(Lukì 10.12-15)

20Àyìwà Yesù kabagoo goo giri fau wɔ̀ nìì reè doùn, è wɔ̀ùndzin neè to na e tsiì yè e re jaamabee fau'n kur'la lakere yè e tsiì Ŋaablà ra waa, Yesù yè e maa, è ɲinìnma dèe twɛy wɔ̀ùndzin neè rà. 21#Ekk 23.1-18; Ezk 26.1–28.26; Ywk 4.4-8; Akk 1.9,10; Jkk 9.2-4.À ci: «Ye Korazɛnka reè, byɛnbe ye nìn ! Bɛtsisayidaka reè, byɛnbe ye nìn ! Byɛnbe ye nìn, kàtsu kabagoo goo niì reè fau ye re wɔ̀ rèè doùn, twɛy ye ba na fau Tsiirì wɔ̀ɔ̀ ko Sidɔ̀n wɔ̀ rèè rìì doùn, twɛy wɔ̀ùndzin neè na bɔ̀tɛ ko shi jiu e ma nòn, y'à kpàdè, ci ye yè e re jaamabee fau'n kur'la lakereò. 22Tɔ̀ kamà, mun nì ci e ra, tsìɛ̀ sii sèè, Tsiirì ko Sidɔ̀n wɔ̀ùndzin neè kuun'n kur'la nà fyanbe, è geren ye wɔ̀ fii rèe mòdzin neè raà tsɛ. 23#Ekk 14.13-15; Gok 19.24-28.Wo Kapɛrinaxumùn wɔ̀ɔ̀, wo yè bà à siɛ̀n ci wo ɲan nà sen fɔ jìrànxɔɔ̀ rà rìì gbɛ ? Fyeu ! Wo ma nà jàà rii fɔ jààndamaan doùn ! Tɔ nà fa, kàtsu, kabagoo goo niì reè fau Kapɛrinaxumùn, twɛy yè bà na fau Sodomùn wɔ̀ɔ̀ rìì doùn, arì she Sodomùn na nà bà ni ŋe. 24#Mat 10.15; Luk 10.12.Tɔ̀ kamà, mun nì ci e ra, tsìɛ̀ sii sèè, Sodomùn wɔ̀ùndzin neè kuun'n kur'la nà fyanbe, è geren ye Kapɛrinaxumùn wɔ̀ùndzin neè raà tsɛ.»

Yesù tsoo dzi ɲɛun Ŋaablà tsɛ min niì

(Lukì 10.21-22)

25Tɔ̀ waatsia ɲàn, Yesù yè dzin ci: «Mun Fà Ŋaablà, ŋaablaxɔɔ̀ ko dzɔ̀nxɔɔ̀ sa Tsifaà, mun tsoo dzi ɲɛɛn wo tsɛ, kàtsu wo nèe goo rèe rèè mɛnɛun mòdzin akiribla reè ko akiridzi reè mà, wo y'à kpàdè dziinkòòmɛ̀yn neè rà. 26Ɔ̀ɔn mun Fàà, kàtsu tɔ̀ rii dzibeu wo ra.»

Yesù ci wò rii làànfyɛ sìan mòò rà

27 # Yux 3.35; Yux 1.18; 10.15. Yesù yè dzin kɔn ci: «Mun Fàà gè sapɛ wɔu mun suun. Àwà Fàà soo boshɔ̀ùn, mòò pɛn na à tɔ̀ Dzin Kpirimaa mòò riì waa. Mòò pɛn tsu to na Fàà tɔ̀ à mòò riì waa, Dzin Kpirimaa soo boshɔ̀ùn, ko Dzin Kpirimaa sào ni, à y'à kpàdè mòò riì rà. 28Ye gè o ge byɛɔ̀n, seyn vuɔn yè bà ni ye kùùn, ye nà mun na, mun nà làànfyɛ sìn ye ra. 29#Ykk 6.16.Ye mun seen seen sen, y'a to min karàn, kàtsu mun vunun ma dzi, min bà mòdzin majàaŋma. Tà tsuru, ye xɔɔn nà làànfyɛ tàrà. 30Àwà, mun ne seen seyn fyɛyn, à sen yeè bà dzi.»

Kasalukuyang Napili:

Matsiyù 11: BDZU

Haylayt

Ibahagi

Kopyahin

Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in

Matuto nang Higit Pa Tungkol sa Bible Dzùùngoo Unicode

Mga Popular na Bersikulo sa Biblia mula sa
Matsiyù 11

Video para sa Matsiyù 11

Mateo 11:1-24

Lumo Project

Mateo 11:25-30

Lumo Project

Matsiyù 11

Mga Popular na Bersikulo sa Biblia mula sa
Matsiyù 11

Video para sa Matsiyù 11

Mateo 11:1-24

Mateo 11:25-30

Biblia:

Dzùùngoo

Salin: Bible Dzùùngoo Unicode - BDZU

Matsiyù 11

Matsiyù 11

Mga Popular na Bersikulo sa Biblia mula sa Matsiyù 11

Video para sa Matsiyù 11

Mateo 11:1-24

Mateo 11:25-30

Biblia:

Dzùùngoo

Salin: Bible Dzùùngoo Unicode - BDZU

Matsiyù 11

Mga Popular na Bersikulo sa Biblia mula sa
Matsiyù 11