ZEKHARIAH 8
8
Jerusalem Din Sal Dingah Bawipa Thukamnak
1Cungnungbik Bawipa ih thu cu Zekhariah hnenah hiti in a ra thleng: 2“Jerusalem mi pawl ka duhdawtnak cu a thuk ih Jerusalem khawpi bawm ding cu ka caakzet; ka thiik ruangah a ral pawl parah ka thin a heng a si. 3Ka ra kir sal ding ih ka khawpi thianghlim Jerusalem ah ka ra um ding. Rintlak khawpi tiin theih a si ding ih Cungnungbik Bawipa ih tlang cu tlang thianghlim tiin kawh a si ding. 4Kianghrol hrol in a fehtu nutar le patar pawl khal khawpi sung mi zapi ton awknak hmunah an to huahho sal ding. 5Khawpi lamzin tluanah nauhak tualleng pawl cu nunau siseh mipa siseh lungawi aipuang in an lek ciamco sal ding.
6“Cutiih ka timi cu hi miphun sung ihsin a taangmi pawl hrangah cun thil cang thei lo a bang ding, sihmansehla ka hrangah cun thil cang thei lo a si lo. 7Ka minung pawl an hruaihlonak ram pawl ah ka hum ding ih 8nisuahnak lam le nitlaknak lam ihsin ka hruai kir sal ding ih Jerusalem ah an um sal ding. Annih cu ka minung an si ding ih keimah cu an Pathian ka si ding; rintlakzet le dingzet in ka uk ding.
9Ralṭhatnak nei uh! Biakinn dinsal dingah a hram an rak thok lai ih profet pawl in an rak simmi ṭongkam cu atu-ah nan thei sal a si. 10Cuih hlanah cun zohman in minung siseh, ṭilva siseh hnaṭuan dingah an lak thei lo, an sang thei lo; ral an nei ih humhimnak an um hrimhrim lo. Mi pakhat le pakhat ral aw dingin keimah in ka tokhrok. 11Sikhalsehla atu-ah cun hi ramsung ih a taangsun mi pawl ka zohnak cu a phundang a si. 12Hnangam in an thlaici an tuh thei thlang ding. An sabit hri in rah an rah ding, leilung in rawl a suah ding ih ruah tampi in a sur ding a si. Ka miphun sung ihsin a taangsun mi pawl parah hi bangtuk thlawsuahnak ka pek ding. 13Judah mi le Israel mi pawl! Tuih hlanah cun ramdangmi pawl pakhat le pakhat an cam awk tikah ‘Judah le Israel pawl parih a thlengmi siatralnak hi na parah thleng ve seh,’ an ti aw. Sikhalsehla keimah in ka lo runsuak ding ih cu tikah ramdangmi pawl cun ‘Judah le Israel mi pawl ih comi thlawsuahnak co ve hram aw,’ tiah pakhat le pakhat an ti aw ding. Curuangah nan ral ṭha uhla zianghman ṭih hlah uh,” tiah a ti.
14Cungnungbik Bawipa in, “Nan pu le nan pa pawl in ka thin in hengter tikah anmah siatralnak cu ka tum ih zianghman thinlung thlengnak um loin ka tum vek cun ka tuah suak a si. 15Sikhalsehla atu-ah cun Jerusalem le Judah mi pawl thlawsuah dingah ka tum a si. Curuangah phannak zianghman nei hlah uh! 16Hitiin tuah sawn uh: Pakhat le pakhat nan biak awk tikah thudik sim uh. Thuṭhennak hmunah thudik suakter uh; daihnak le remnak suaktertu thudik cu! 17Midang siatnak ding thu ngaihtuah hlah uh. A dik lomi tetti in siatcam hlah uh. Thuphan pernak, dinglonak le thazaang thawn midang siatnak tuah cu ka hua a si,” tiah a ti.
18Cungnungbik Bawipa ih thu cu Zekhariah hnenah hiti in a ra thleng: 19“Thla linak, thla nganak, thla sarihnak le thla hranak ih tuah ṭheumi rawl ulhnak cu Judah mi pawl hrangah lungawi aipuannak puai ah a cang thlang ding. Thudik le daihnak cu nan duh pei,” tiah a ti.
20Cungnungbik Bawipa in, “Khua tampi ihsin mi tampi Jerusalem ih an ratnak tikcu a ra thleng zik thlang. 21Khawpi pakhat ihsin a rami pawl in khawpi dang ihsin a rami pawl hnenah, ‘Cungnungbik Bawipa kan biak ding ih a thlawsuahnak kan dil ding. Kan hnenah ra tel ve uh,’ an ti ding. 22Minung tamzet le miphun cakzetzet pawl Jerusalem ah an ra ding ih Cungnungbik Bawipa an ra biak ding, a thlawsuahnak dil in thla an cam ding. 23Cutikah Judah mi pakhat hnenah ramdangmi pahra an ra ding ih, ‘Na nun khawsaknak ah um ve le tel ve kan duh, ziangahtile Pathian cu na hnenah a um, ti kan thei zo,’ an ti ding,” tiah a ti.
Kasalukuyang Napili:
ZEKHARIAH 8: FCL
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Falam Bible Revision © Bible Society of Myanmar, 2002.