MATTHAI 2
2
Nisuahnak Lam Mifim Pawl An Ra
1Jesuh cu Herod in Judea ram ah siangpahrang a ṭuan laiah, Judea ram Bethlehem khua ah a suak. A rei hlanah nisuahnak lam ihsin arsi zohthiam pawl Jerusalem khawpi ah an ra ih, 2“Judah mi pawl ih Siangpahrang dingah a suakmi naute khuiah so a um? Nisuahnak lamah a arsi kan hmu ih amah biak dingah kan ra a si,” tiah an ti.
3Cuih thu cu siangpahrang Herod in a theih tikah a thin a har ngaingai. Jerusalem khua ih a ummi midang hmuahhmuah khal an thin a har ve. 4Curuangah Herod in puithiam upa pawl le Daanthiam pawl a kokhawm ih, “Messiah cu khuiah so a suah ding?” tiah a sut.
5Cutikah annih in, “Judea ram Bethlehem khua ah a suak ding,” tiah an let.
Profet ih ngantami cu:#Profet timi hi profet Mikah a si (Mik 5.2)
6“Judah ram sungih a ummi
Bethlehem,
Judah ram khawpi pawl lakah hin
a fate bik cu na si hrimhrim lo.
Ziangahtile na sung ihsin
hruaitu pakhat a suak ding ih,
Ka minung Israel mi pawl
a hruai ding,” ti a si.
7Curuangah Herod in nisuahnak lamih mifim pawl cu a thupte in a ko ih, ziangtik teu-ah arsi a suak, ti kha feltein a sut.
8Cule Bethlehem khua ah a thlah ih, “Va feh uhla naute cu ṭhatein va hawl uh; nan hmuh asile kei khal i sim uhla amah biak dingah ka feh ve ding,” tiah thu a cah hai.
9-10Herod ih sim vek cun an feh ih nisuahnak lamih an hmuhmi arsi cu an hmu sal. Cuih arsi an hmuh sal tikah an lung a awi ngaingai. An hmaiah a feh vivo ih naute umnak tlunah cun a cawl. 11Inn sungah an vung lut ih naute cu a nu Mari thawn an vung hmuh tikah khukbil in an biak. An laksawng kenmi sui, frankincense rimhmui le mura zihmui an suah ih an pek.
12Cule mifim pawl cu Pathian in an mang ah Herod hnenih kir sal nawn lo dingin a sim ruangah lamzin dangin an ram ah an tlung.
Izipt Ram ah An Tlan
13Nisuah lam mifim pawl an feh hnuah Bawipa ih vancungmi pakhat cu Josef ih mangah a lang ih, “Hi naute hi Herod in thah dingah a hawl ding. Curuangah tho awla naute le a nu thawn Izipt ramah tlan uh. Kir sal ding i ka lo sim hlan lo cutawkah nan um pei,” tiah a ti.
14A ti bangtuk in Josef cu a tho ih naute le a nu thawn a zanzan in Izipt ram ah an tlan. 15Herod ih thih tiang cutawkah an um. Hi bangtuk ih a sinak cu Bawipa in profet#Hi profet hi profet Hosea a si (Hosea 11.1) kaa in, “Ka Fapa cu Izipt ram ihsin ka ko suak,” tiah a rak timi kha kimternak dingah a si.
Herod In Nauhak Pawl A That
16Nisuah lam mifim pawl in in bum ngah ti kha Herod in a theih tikah a thin a heng ngaingai. Cule mifim pawl ih simmi arsi suah caan thawn a vun tuat ih Bethlehem le a kiangkap khua ih a ummi mipa nauhak kum hnih le a hnuailam hmuahhmuah that ṭheh dingin thu a pek.
17Cuticun profet Jeremiah ih a rak sim ciami kha a kim. A rak sim ciami cu:
18“Ramah khawsung in aw a thang,
ṭahnak le aihramnak aw a si.
Rachel in a faate pawl a ṭah;
An thih ṭheh ruangah a ṭap ih,
Leem khal a theih nawn lo,”#Jer. 31.15
ti a si.
Izipt Ram Ihsin An Kir
19Herod a thih hnuah Izipt ramah cun Bawipa ih vancungmi pakhat Josef ih mangah a lang ih, 20“Tho awla naute le a nu kha Israel ram ah kirpi aw, ziangahtile naute thah a tumtu pawl an thi zo a si,” tiah a ti. 21A ti bangtuk in Josef cu a tho ih naute le a nu cu a hruai ih Israel ram ah kir dingin an feh.
22Asinain Arkhelaus in a pa Herod ih can-ai ah Judea siangpahrang a ṭuan ti Josef in a theih tikah cutawkah cun a feh ngam lo. A mangih thu an sim bet vekin Galilee peng ah a feh ih, 23Nazareth timi khua ah a um. Cuticun profet pawl ih an rak sim ciami, “Amah cu Nazareth mi ti a si ding,”#Mar 1.24; Luk 2.39; Joh 1.45 timi cu a kim a si.
Kasalukuyang Napili:
MATTHAI 2: FCL
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Falam Bible Revision © Bible Society of Myanmar, 2002.
