मत्ति 8
8
सुक्टुबाङ्डे़ॽ सुक्पॽआ याॽमि नुबोक्पॽआ
(मरकुस १:४०-४५; लुका ५:१२-१६)
1येसु टोक्टोक्माबाङ मिम्मु उङ्नुङ ए़क्साङ बेॽलो याॽमिजि खोमि ए़ङ्गुवा ए़ङ्गुवा खडामि। 2मोडोक्पेॽ सुक्टुबाङ्डे़ॽ सुक्पॽआ इक्को याॽमिडे़ॽ येसुमि पोम्बेॽ टुम्रुक ठोःक्नुङ इडोॽ लुसु, “हे परभु, हे़ने़ए़ मिॽटुहोङ का नुबोक्नुङ चोखो टोङ्हेङे।” 3मोबा येसुडे़ॽ खोसोक्पेॽ हुक युङ्नुङ लुसु, “के़ॽ हे़न चोखो लिसे लुनुङ मिॽइन्ने।” मोडोक्पेॽनोॽ सुक्टुबाङ्डे़ॽ सुक्पॽआ मो याॽमि नुबुगा। 4मोबा येसुडे़ॽ मो याॽमि लुसु, “खेप्से, इगो खा असासो ए़ॽलुमे। तर याडाङ्बाजिबेॽ खे़ॽनुङ खाङ्जिमुसे। मोबा मोसाडे़ॽ लुडिडोॽ भेटि चेॽटिनुङ हे़न चोखो लिबॽआ खा चोप याॽमिजि परमान पिसाजे।”
रोमि कप्तानमि सेउते नुबुक्पॽआ खा
(लुका ७:१-१०)
5येसु कफरनहुम सहरबेॽ रुक्माबेॽ इक्को रोमि कप्तान खोबेॽ लेन्नुङ इडोॽ बिन्ति ले़ःॽसाङ लुसु, 6“हे परभु, के़ए़ सेउते सोगुबा लिनुङ थलोबेॽ टुये।” 7येसुडे़ॽ मो याॽमि लुसु, “का लेन्नुङ खो नुबोक्इनुङे।” 8तर मो कप्तानडे़ॽ लुसु, “परभु, हे़न काङ्मि खिमबेॽ चिॽखे़ॽमारोमा का ले़ःॽङानि, हे़ने़ॽ इगोबाङ्नोॽ नुबुगे लुबेॽमा के़ए़ सेउते नुघे़ये। 9इन्ढोङ्होङ काङ्दाङ्बासो मायोङ्बाजिमि अधिनबेॽ टुङे, मोबा के़ए़ अधिनबेॽसो तिरिङ्गाजि टुम्मे। माहाजि के़ॽ इक्को ‘खडे’ लुनुङे, खो खे़ॽए़ये, हाइको ‘आबे’ लुनुङे खो आप्मिये। काङ्मि सेउते ‘इडोॽ ले़टे’ लुनुङे, मोबा मोसे़ॽ ले़न्डुए।”
10मो याॽमिमि खा खेम्नुङ येसु खरि मिना मोबा खोमि ए़ङ्गुवा ए़ङ्गुवा राम्खुबा याॽमिजि लुसुजि, “चइबानोॽ, के़ॽ हे़निङ लुनिम्ने़, इडोॽ बेॽए बिस्वास काप्खुबा याॽमि इस्राएलिजिमि रुम्बेॽसो मे़न्चुप्टिॽ। 11के़ॽ हे़निङ लुनिम्ने़, नमगेतनुङ नमथाराजिबाङ बेॽलो याॽमिजि लेङ्इम्मेनुङ अब्राहाम, इसहाक, याकुबनुङ थाङ्सिरि राज्यमि भत्तेरबेॽ सोरि पेङ्इम्मे। 12तर निवाहाङ्मि राज्यबेॽ टुमा खे़हा इस्राएलिजि चाहिँ पाखे़ॽयु सेन्जिगुप्पेॽ राप्खे़म्मे। मोबेॽ याॽमिजि हाःप्मिइम्मेनुङ के़ङ इॽइम्मे।”
13मोबा येसुडे़ॽ कप्तान लुसु, “खडे, हे़ने़ॽ बिस्वास ले़ःॽपॽआडोक्नोॽ लिये।” मोबा मो कप्तानमि सेउते मोडोक्पेॽनोॽ नुबुगा।
बेॽलो याॽमिजि नुबुक्पॽआ
(मरकुस १:२९-३४; लुका ४:३८-४१)
14मोबा येसु पत्रुसमि खिमबेॽ लेम्माबेॽ पत्रुसमि खोमनाम्मा ए़चे़ॽमे़ॽ थलोबेॽ ङेगिङ्बॽआ चुप्टु। 15येसुडे़ॽ पत्रुसमि खोमनाम्मामि हुकपेॽ के़गु, मोबा ए़चे़ॽमा नुघडा। मोबा खो पुके़ॽनुङ येसुमि सेवा सत्कार ले़टु।
16मोबा नम आघे़ॽनुङ ए़क्साङ, याॽमिजिडे़ॽ मङे़हा चाबे़ॽ राःप्पॽआ बेॽलो याॽमिजि येसुबेॽ चिक्चे़डुजि। येसुडे़ॽ मङे़हा चापजि आग्या ले़ःॽनुङ यिगुजि, मोबा चोप टुक्खुबाजि नुबोगुजि 17इडोॽ यसैया अगमबक्ताडे़ॽ लुबॽआ खा पुरा लिसा,
“खोसे़ॽ कानिङ्मि कमजोरिनुङ कानिङ्मि टुक्मा खेः आक्सु।”#यसैया ५३:४
येसुमि चोङ्सा लिमा सारो छॽइये
(लुका ९:५७-६२)
18येसुडे़ॽ खोमि किॽयु मिॽयु बेॽलो याॽमिजि सुम्बॽआ खाङ्नुङ खोसे़ॽ टोम्लिवामि मे़ॽए़रेङ खडानिङे लुनुङ आग्या पिसुजि। 19इक्को यहुदि धारमिक नियम इःॽखुबा याॽमि येसुबेॽ लेन्नुङ लुसु, “गुरुज्यु, हे़न हाम्बेॽ हाम्बेॽ खे़ॽए़ये, कासो हे़न्नुङ्नोॽ खे़ॽए़ङे।” 20येसुडे़ॽ मो लुसु, “खेप्से, स्यालाजिमि पेन्ढाम रुम्उक टुहा, नान्द्रुङ्माबेॽ पेघुबा सोङाजिमि हाप टुहा, तर का याॽमिमि पसामिगो निन्डवाँ युङ्ढाम ठाउँसो माॽआये।”
21मोबा येसुमि चोङ्साजिबेॽ इक्कोसे़ॽ लुसु, “परभु, याक्लो का काङ्मि पाबामि सिगुयाक येःॽमाबेॽ युङ्सिॽ खे़ॽमेॽमाना।” 22तर येसुडे़ॽ मो चोङ्सा लुसु, “हे़न चाहिँ कानुङ राप्से, सिगुयाकजिनोॽ मो सिगुयाक येःॽमाबेॽ युङ्मेॽटाजे।”
येसुडे़ॽ वाडुम योप्नुङ योङ उःक्मेपॽआ
(मरकुस ४:३५-४१; लुका ८:२२-२५)
23मोबा येसु नाउबेॽ सक्सा खोनुङ्सोरि खोमि चोङ्साजिसो खडामि। 24खे़ॽमे़ॽनिङ्सिमाबेॽ हाक्चोक्टोॽ मो माहोङ्माबेॽ किस्सिमारोमा फुइक्सुमानुङ फे़ङ्ले़ॽवा लेस्सा। नाउ योङाडे़ॽ चिप्खे़ॽनुङ हुम्घे़ॽसिॽ पोरोगा। मोडोक्पेॽ येसु चाहिँ इम्डिखे़ॽपॽआ ले़टे़। 25खोमि चोङ्साजि येसुमि के़क्पेॽ खे़ॽनुङ इडोॽ लुसाङ हुम्बोगुजि, “परभु, कानिङ जोगा ले़ःॽमा! कानिङ सिसिॽपोरोगिङ्मा।” 26येसुडे़ॽ माहाजि इडोॽ लुसुजि, “हे़निङ इन्ढोङ किस्सिन्डानिङे, खोइ हे़निङ्मि बिस्वास ?” मोबा येसु येपोक्नुङ मो फुइक्सुमानुङ फे़ङ्ले़ॽवा योबु। योप्मासोरोॽ फुइक्सुमानुङ फे़ङ्ले़ॽवासो योङ उगा। 27इडोॽ लिबॽआ खाङ्नुङ चोप खरि मिङ्साङ काबोगामि, “इगो याॽमि इन्डोक्माडे ? इगोसे़ॽ योप्माबेॽको वाडुमनुङ फुइक्सुमे़ॽसो खेम्इन्डु।”
मङे़ॽमा चाबे़ॽ राःप्पॽआ निप्पाङ याॽमि नुबुक्पॽआ
(मरकुस ५:१-२०; लुका ८:२६-३९)
28येसु गदरिनिजिमि मुलुकबेॽ लेम्माबेॽ मङे़ॽमा चाबे़ॽ राःप्पॽआ निप्पाङ याॽमिजि येःॽमाघामि रुम्उकबाङ आप्मे़ॽनिङ्सिमाबेॽ येसु चुप्टाजु। मोजि सारो किस्सिमारो ले़टाजे मोडोगे़ॽ मो रामबाङ असासो मे़राम्हेसामे। 29मोबा मोजि इडोॽ कासाङ वोबुगाजि, “हे निवाहाङ्मि पसा, हे़ने़ए़ कानिङ्नुङ इमा योम्बोक्टे ? कानिङ्मि न्याय लिमा बेला लेम्मा याक्लोनोॽ हे़न कानिङ कस्ट पिसिॽ इगोबेॽ लेङ्इटे़ ?”
30माहाजिबाङ ए़डे़ॽ मेॽयोङ आक्मामि इक्को हुल चरबा लिमे़ॽसिडामि। 31मङे़ॽमा चापजिडे़ॽ येसु इडोॽ लुसाङ बिन्ति ले़टुजि, “कानिङ इगोबाङ यिॽइयेहोङ, अक्खा आक्माजिबेॽ पे़खे़ॽमेॽमा।” 32मोबा येसुडे़ॽ लुसुजि, “खडानिङे।” मोबा माहा मङे़ॽमा चापजि निप्पाङ याॽमिजिबाङ पे़आप्नुङ आक्माजिबेॽ पे़खडामि। माहा चोप आक्माजि याक्टोङ्बाङ नाङ्साङ खे़ॽनुङ माहोङ्माबेॽ हुम्सिघडामि।
33माहा आक्मा गोठ्लाजि मो ठाउँबाङ चिःॽखडामि। खोजिडे़ॽ सहरबेॽ खे़ॽनुङ मोबेॽ लिबॽआ चोप खा, मङे़ॽमा चाबे़ॽ राःप्पॽआ निप्पाङ याॽमिजिबेॽ लिबॽआ खरिमा खासो लुबेॽटुजि। 34मोबा सहरबेॽहा चोप याॽमिजि येसु चुप्सिॽ सुम्जासामि। माहाजिडे़ॽ येसु खाङ्डोक्नुङ कानिङ्मि मुलुकबाङ खे़ॽपेसे लुसाङ बिन्ति ले़टुजि।
Kasalukuyang Napili:
मत्ति 8: YAMP
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2023, Wycliffe Bible Translators, Inc. and Nepal Bible Society
