मत्ति 21
21
यरुसलेमबेॽ येसु आदरनुङ ओहाक ले़ःॽपॽआ
(मरकुस ११:१-११; लुका १९:२८-४०; युहन्ना १२:१२-१९)
1येसुनुङ खोमि चोङ्साजि यरुसलेम खे़ॽमे़ॽसिडामे। खोजि यरुसलेममि के़क्पेॽ जैतुन टोक्टोक्मामि बेथफागे लुमे ठाउँबेॽ रुक्नुङ येसुडे़ॽ खोमि निप्पाङ चोङ्साजि इडोॽ लुनुङ पाक्सुजि, 2“हे़न्जिङ मो खाङ्मुये खिम्डेमबेॽ खडाजे, मोबेॽ रुक्माबेॽ हे़न्जिङेॽ गधामि इक्को नुनि माडाङ्नुङ हिःक्पॽआ चुप्मिन्जुए, मो हे़ङ्आप्टाजे। 3मो हे़ङ्आप्माबेॽ याॽमिजिडे़ॽ इमाङ लुमिहोङ्सो खोजि लुमे, ‘परभुमि लागि इगो पाप्मिटे़’ मोबा खोजिडे़ॽ मोडोक्पेॽनोॽ हे़न्जिङ लाघे़ॽमेम्मे।”
4अगमबक्ताडे़ॽ याक्लोएम्बाङ लुबॽआ इघा बचन पुरा लिमामि लागिनोॽ इडोॽ लिबॽआ ले़ये,
5“सियोनबेॽ पेङ्घुबाजि लुसाजे,
‘खाक्सानुमे, हे़निङ्मि हाङ्बा हे़निङ्बेॽ आप्मे़ॽनिङ्सिये,
ए़डे़म्मा लिनुङ गधा नुनिबेॽ साङ्नुङ आप्मे़ॽनिङ्सिये,
खो गधामि नुनिसोक्पेॽनोॽ साङ्नुङ आप्मे़ॽनिङ्सिये’#जकरिया ९:९।”
6मोबा मो निप्पाङ चोङ्साजि खे़ॽनुङ येसुडे़ॽ लुबॽआडोक्नोॽ ले़टुजि। 7चोङ्साजिडे़ॽ मो गधामि नुनि माडाङ्नुङ सोरि लाजे़ॽडुजि, मोसोक्पेॽ खोजिमि चेॽ रिॽएम्बेॽटुजि मोबा मोसोक्पेॽ येसु पेना। 8मोबेॽ सुम्बॽआ याॽमिजिडे़ॽ येसु आदर पिमामि टाङ्बामि ओप्ताङ रामबेॽ रिएम्बेॽटुजि। मोबा आढाजिडे़ॽ चाहिँ सिङ्बुमि सेउला एॽनुङ रामबेॽ रिएन्डुजि। 9येसुमि पोम्बेॽनुङ ए़ङ्गुवाबेॽ राम्खुबा याॽमिजि इडोॽ वोमानुङ ओहाङ ले़ःॽपुगामि,
“दाउदमि पसामि ओहाङ लिरो,
परमपरभुमि निङ्बेॽ लेङ्घुबा आसिस चुप्खुबा ले़ये,
चोप्पाङ मिन्डु थाङ्सिरिबेॽ पेङ्घुबा परमपरभुमि ओहाङ लिरो!#भजनसङ्ग्रह ११८:२६”
10येसु यरुसलेम सहरबेॽ पे़ए़ना, चोप सहरबेॽ इगो खा मुगा, याॽमिजिडे़ॽ सिम्बोगुजि, “इगो असाडे ?” 11माहा बेॽलोहा याॽमिजिडे़ॽ लुसुजि, “इगो गालिलबेॽए नासरतबाङ लेम्बॽआ अगमबक्ता येसु ले़ये।”
येसु यरुसलेम मन्दिरबेॽ खडा
(मरकुस ११:१५-१९; लुका १९:४५-४८; युहन्ना २:१३-२२)
12येसु मन्दिरबेॽ खडा मोबा मन्दिरमि सोॽलुङ्बेॽ इमा इमा इन्जाखुबाजि चोप यिक्सेडुजि, याङ लेङ्घुबाजिमि पेक्चेमनुङ सिरिॽवा इन्जाखुबाजि पेन्ढाम काङ्एम्बेॽटुजि। 13येसुडे़ॽ माहाजि लुसुजि, “धारमिक नेॽचिराबेॽ इडोॽ साप्पॽआ ले़ये, ‘काङ्मि खिम पारथना ले़ःॽठाम खिम लिमा खे़ये’ तर हे़निङे़ॽको इगो खुसुबाङ्जि पेन्ढाम रुम्मुक टोक्सानुमे।”
14मिक मे़ए़खुबानुङ सोॽलोङ्गे़जि येसुबाङ नुबोक्सिॽ मन्दिरबेॽ लेस्सामि। खोसे़ॽ माहाजि नुबोगुजि। 15तर एप्पा याडाङ्बाजिनुङ यहुदि धारमिक नियम इःॽखुबाजिडे़ॽ चाहिँ येसुडे़ॽ ले़ःॽपॽआ खरिहा योम्बोक खाक्सुजि, मोबा पिच्छाजिडे़ॽ मन्दिरबेॽ “दाउदमि पसा होसन्ना!” कासाङ वोबॽआ खेप्सुजि, मोबा खोजि सुरकडामि। 16मोबा माहाजिडे़ॽ येसु लुसुजि, “खेप्सुए, इघाजिडे़ॽ इमाङ लुमे़ॽनिङ्सिन्डुजे ?” येसुडे़ॽ माहाजि लुसुजि, “इँहिॽ खेम्मे़ॽनिङ्सिनुङे। इमाङ हे़निङे़ॽ मे़नेडानुमे ? ‘पिच्छाजिनुङ डुडु उङ्खुबा ओङे़कजिमि याबुकबाङ, हे़ने़ॽ ओहाङ ले़ःॽमेन्डुजे।’” 17मोबा माहाजि याःॽयानुङ येसु मो सहरबाङ बेथानिया खिम्डेमबेॽ खे़ॽनुङ मो सेन्डा मोबेॽनोॽ पेना।
चा मे़ॽनिङ्मा वेॽलाभुमि डाङ
(मरकुस ११:१२-१४,२०-२४)
18येसु खोमि चोङ्साजिनुङ वागियाराम माक्मिॽ बेथानियाबाङ यरुसलेम सहरलाम टेमाबेॽ खो सगे़ॽ सिसु। 19राम के़क्पेॽ इक्को वेॽलाभुमि डाङ खाङ्डोक्नुङ चा किङ्इटाहाडे लुनुङ वाबु, तर मोबेॽ आॽवारेॽनोॽ टुसा। मोबा येसुडे़ॽ मो डाङ चापहिसाङ इडोॽ लुसु, “आयुएम्बाङ ए़क्साङ हे़नबेॽ इन्डोक्पेॽसो चा मे़ङ्किङ्रो।” मोडोॽ लुमासोरोॽ मो वेॽलाभुमि डाङ हेघडा।
20इडोक्मा खा खाङ्नुङ येसुमि चोङ्साजि खरि मिङ्साङ कासामि, “इगो वेॽलाभुमि डाङ इन्डोक्टे इडोॽ चान्डोनोॽ हेघडे़ ?” 21येसुडे़ॽ माहाजि लुसुजि, “चइबानोॽ हे़निङ लुनिम्ने़, हे़निङे़ॽ ए़डे़ॽवासो सङ्क मे़ले़ःॽलेॽ बिस्वास ले़टानुमहोङ, के़ॽ इगो वेॽलाभुमि डाङ ले़टिडोॽरेॽ ने़ॽनि, इगो टोक्टोक्मानोॽ ‘रोङ्घे़ॽनुङ माहोङ्माबेॽ हेॽयुसे’ लुसानुमहोङ्सो मोडोक्नोॽ लिये। 22हे़निङे़ॽ बिस्वास ले़ःॽनुङ पारथनाबेॽ इमाङ ङाइन्डानुमे, मो चुप्मिन्डानुमे।”
येसुमि अधिकारबेॽ सङ्क
(मरकुस ११:२७-३३; लुका २०:१-८)
23येसु मन्दिरबेॽ पे़खे़ॽनुङ याॽमिजि सिक्छे पिसुजि, एप्पा याडाङ्बाजिनुङ यहुदि डायोङ्बाजि मोबेॽ लेन्नुङ येसु सिप्सुजि, “हाम्बे अधिकारडे़ॽ हे़ने़ॽ इघा योम्बोक ले़न्डुहा, असे़ॽ इगो अधिकार हे़न पिसे़ ?” 24येसुडे़ॽ माहाजि लुसुजि, “के़ॽसो हे़निङ इक्को खा सिम्इनिम्ने़, मो खा लुसानुमहोङ, के़ॽ हाम्बाङ अधिकार चुप्नुङ इघा योम्बोक ले़ःॽमे़ॽनिङ्सिनुङे मो हे़निङ लुनिम्ने़। 25लो का लुमाजे, युहन्नाडे़ॽ बप्तिस्मा पिमे अधिकार हाम्बाङ चुप्टुए ? निवाहाङ्बाङ्डे याॽमिबाङ ?” इगो खा खे़म्नुङ खोजिदाङ्बा इडोॽ काबोगामि, “हागो कानिङे़ॽ निवाहाङ्बाङ लुमाहोङ, हे़निङे़ॽ इन्ढोङ बिस्वास मे़ले़टानुमे लुनुङ खोसे़ॽ लुये। 26याॽमिजिबाङ लुमाहोङ, याॽमिजि कानिङ्सोक्पेॽ पे़आप्इम्मे, इन्ढोङ्होङ चोप याॽमिजिडे़ॽ युहन्ना अगमबक्ता मिॽइन्डुजे।”
27मोडोगे़ॽ माहाजिडे़ॽ येसु लुसुजि, “खोइ, कानिङे़ॽ लेसुङ्मानि।” मोबा येसुडे़ॽसो माहाजि लुसुजि, “मोडोक्होङ के़ॽसो हाम्बाङ इगो अधिकार चुप्नुङ इघा योम्बोक ले़ःॽमे़ॽनिङ्सिनुङे, हे़निङ लुनिम्नानि।”
निप्पाङ पसामि पारलेम
28 “हे़निङ इमाङ मिङ्इन्डानिङे लुमाजे ? इक्को याॽमिमि निप्पाङ पसाजि टुसाजे, खोजिमि पाबे़ॽ खे़ॽनुङ टुम्मि पसा लुसु, ‘नानि, खे़ॽनुङ आयु रोपाबेॽ योम्बोक ले़टो।’ 29मो पसे़ॽ लुसु, ‘का खे़ॽङानि’, तर इॽछोॽ ए़क्साङ खोमि निवा फेन्नुङ रोपाबेॽ योम्बोक ले़ःॽसिॽ खडा। 30मोबा हाइको पसाबेॽ खे़ॽनुङ मोडोक्नोॽ लुसु, मो पसे़ॽ लुसु, ‘नुउ का खे़ए़ङे’, तर खो मे़ङ्खडा। 31हागो इगो निप्पाङ पसाजिबेॽ हाम्बेसे़ॽ चाहिँ खोम्बामि खा खेप्सुए ?” माहाजिडे़ॽ लुसुजि, “याक्लोए पसाडे़ॽ।” येसुडे़ॽ माहाजि लुसुजि, “चइबानोॽ, के़ॽ हे़निङ लुनिम्ने़, मे़क्चेन लाघुबाजिनुङ बेस्याजि हे़निङ्बाङ्सो याक्लो निवाहाङ्मि राज्यबेॽ रुॽइम्मे। 32इन्ढोङ्होङ युहन्ना हे़निङ्बेॽ धारमिक राम लेमेॽसिॽ लेम्बॽआ ले़टे़, तर हे़निङे़ॽ खोमि खाबेॽ बिस्वास मे़ले़टानुम। तर मे़क्चेन लाघुबाजिनुङ बेस्याजिडे़ॽ मो खाबेॽ बिस्वास ले़टुजि। हे़निङे़ॽ इडोक्हा खा खाङ्नुङ्सो निवाहाङ्बेॽ मे़न्टेसानिङ्नुङ मोबा खोमि खाबेॽ बिस्वास मे़ले़टानुम।”
अङ्गुर सोङ्रानुङ मोहिजि
(मरकुस १२:१-१२; लुका २०:९-१९)
33 “हाइको इक्को खानवा खेप्सानुमे, याक्लो इक्को सोङ्रादाङ्बा टुसा। मोसे़ॽ इक्को अङ्गुर सोङ्रा टिसु, मो सोङ्रामि खिरिरि इजुप्सु, अङ्गुर यिम्ढाम कोलसो टोक्सु, इक्को यक्सासो टोक्सु, मोबा मोहिजि ठेक्काबेॽ पिआनुङ खो हाइको देस खडा। 34अङ्गुर एॽमा बेला लिसा, खोमि सेउतेजि माहा मोहिजिबेॽ टाङ्बामि भाग लासिॽ पाक्सुजि। 35तर माहा मोहिजिडे़ॽ खोमि सेउतेजि राःप्नुङ इक्को मोगुजि, इक्को सेॽनेसुजि, इक्को चाहिँ रुङ्गोॽवाडे़ॽ फे़ङ्नेसुजि। 36फेरि मो सोङ्रादाङ्बाडे़ॽ याक्लोहाबाङ्सो बेॽलो सेउतेजि पाक्सुजि, माहा मोहिजिडे़ॽ माहाजिनुङ्सो याक्लोहाजिनुङ ले़टिडोक्नोॽ ले़टुजि।
37 “चोप्पाङ ए़क्साङ सोङ्रादाङ्बे़ॽ, ‘के़ए़ पसागो खोजिडे़ॽ आदर ले़न्डुजि होला’ मिॽनुङ, खोमिनोॽ पसा माहा मोहिजिबेॽ टाङ्बामि भागा लासिॽ पाक्सु। 38तर माहा मोहिजिडे़ॽ मो सोङ्रादाङ्बामि पसा खाङ्डोक्नुङ कासामि, ‘इगोगो सोङ्रादाङ्बामि पसा ले़ये। आबानिङे, आक्को सेॽनेमा मोबा आक्कोमि हक कानिङ्मि लिये।’ 39मोबा माहा मोहिजिडे़ॽ खो राःप्नुङ सोङ्राबाङ पाखे़ॽयु लाघे़ॽनुङ सेॽनेसुजि।
40 “येसुडे़ॽ सिप्सुजि, लो लुसानुमे, मो सोङ्रादाङ्बा लेन्नुङ, माहा मोहिजि इमाङ ले़न्डुजे ?” 41माहाजिडे़ॽ येसु लुसुजि, “खोसे़ॽ माहा दुस्ट मोहिजि सेॽनेन्डुजे, मोबा असे़ॽ सोङ्रादाङ्बामि भागा नुरोॽ हाबेन्डुए, मोडोक्मा मोहिनोॽ अङ्गुरमि सोङ्रा पिन्डुए।” 42येसुडे़ॽ माहाजि लुसुजि, “इमा हे़निङे़ॽ इन्डोक्पेॽसो धारमिक नेॽचिराबेॽ साप्पॽआ इगो खा मे़नेडानुमे ? खिम आङ्खुबाजिडे़ॽ फे़न्निबा लुनुङ राप्पेबॽआ रुङ्गोॽवानोॽ, सुर टिढाम रुङ्गोॽवा लिसा। इगो परभु निवाहाङ्बाङ लिबॽआ ले़ये मोबा कानिङ्मि लागि इगो खरिमा योम्बोक लिटे़।
43 “मोडोगे़ॽ हे़निङ लुनिम्ने़, निवाहाङ्मि राज्य हे़निङ्बाङ नाप्खे़ॽनुङ इक्को इडोक्मा जाति पिन्डुजे, असे़ॽ निवाहाङ्डे़ॽ लुडिडोॽ ले़न्डुए। 44मो रुङ्गोॽवासोक्पेॽ हेक्खुबा पिजिक्टोॽ लिम्मे, मोबा असासोक्पेॽ मो रुङ्गोॽवा हेॽएये, मोसो पिजिक्टोॽ लिये।”
45येसुडे़ॽ लुबॽआ खानवा एप्पा याडाङ्बाजिनुङ फरिसिजिडे़ॽ खेम्नुङ इगो खा चाहिँ कानिङ्मि टुम्बेॽनोॽ लुबॽआ लुनुङ लेसुजि। 46माहाजिडे़ॽ येसु राःप्मा योगुजि, तर हाइखा याॽमिजिनुङ किस्सिडामि, इन्ढोङ्होङ माहा याॽमिजिडे़ॽ येसु अगमबक्ता मिडुजे।
Kasalukuyang Napili:
मत्ति 21: YAMP
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© 2023, Wycliffe Bible Translators, Inc. and Nepal Bible Society
