Luk 24

Belé go Jésu koiang cindi a duro ga maré

(Matié 28:1–10; Mark 16:1–8; Jâ 20:1–10)

1Kara wolé go jurgum a duro wolé go tumu dang joguddu coalala na, kandu lé sai ’yé ca kemgané dang suang go ddowa tuna go ké ba nyani. 2Ké wai keddang go gumuang hengddé waldong a kebu umbung lé. 3Ké andong duroiné, ama ké wa Bagulong Jésu gusi ’eno. 4Kiddin ga ké wa ’eremé dé na, ké sol kalang sua dang ’eré tumoigé, kang badigé ga poiang biddid biddid. 5Kandu lé aserong tumoigé dugo dang muro bbani ’eno, kalang lé yégé wa: Keng dar kema goang cindi a duro kalang ga mara cawa ga? 6Ddi wo ’eno ba, ddi belang cindi a duro ga maré. Ga ’eremegeng ca kual go ddi kené ba yegeng, kiddin ga ddi wo a Galali go ddi ba yé wa: 7Na gad ké bu Kema Kurondi kuaba kalang ga isindong ca kandia bbobeli ca sia go adegelé, wolé subu ddia belang cindi a duro ga maré.

8Ké ’erem ca kual go Jésu koi lé. 9Ké boi caigé a ca kemgané lé, ké yégé anjama ga moac ca pena dang kalang kané kual lé mam. 10Kandu ga oré yogé pajerong gai ga gié kual lé na, na Maram do Magdala, dang Jani, dang Maram do Jak ’yoi, dang kandu ga pena daiang nagé bu’. 11Ama pajerong gai ga gié bu cindi ca kual gogé lé ’eno, ké ’erem ca na kual go kalin. 12Ama Piér sai ger ’yé ca kemgané, ddi ddingé, ddi sola badigé ga ’embé temai mera. Kardené ddi boi cai jogu ’yé tai, ddi sol kagelokemo ca henga ga ba lé.

A duro giyong go oré Emés

(Mark 16:12–13)

13A duro wolé lé na, kané sua a duroigé sai ca oré gulong go pena go ké ba tei Emés, duroigé suguddong dang Jorsalem na, bbal oré boié pena. 14Ké wa togé kualang gusugé ca henga mam ga ba lé. 15Kiddin ga ké wa togé kualang gusugé, dang mainyé kual lé na, Jésu bang ’yé gusugé ’yoab, ddi ’yang nagé duro giyong. 16Ké soliang cindegé, ama ké selai na kondi ’eno. 17Jésu ’engergé wa: Keng mainda kual wa duroigengang oré ga? Ké ’eré dugo dang kederé homé. 18Go pena go ké ba tei Kilobas yei wa: Na ji pena kiddi kiddi go a Jorsalem go basé solé henga ga ba lé a duro wolé lé kua ga? 19Ddi ’engergé wa: Na wa ga, Ké jogu yei wa: Henga ga ba lé Jésu go Nasarat. Ddia go cogelé kebu go Kumu koi goang dono duro gié, dang kual go yo tumu Kumu dang kalang mam bu’. 20Gemdong gani ga tibé Kumu, dang kalang gani ga ddo ca, ké bi ca kandia kaida kual go maré cai bua, kandia bbobeli ca sia go adegelé bu’. 21Ni tugoia ca kondia ddainya go toré ga Israél, ama henga ga ddo wal na, labega wolé subu go henga lé ba lé. 22Cindi, kandu gani ga pena a duroiné bini kagelokemo, labegang joguddu coalala ké ba ca kemgané. 23Ama ké wa Jésu gusi ’eno, ké jiga yéni wa: Ka sol kangiyong ga Kumu kai, kandia yégé wa: Kondia dang cindi. 24Kalang ga pena a duroini ’yé ca kemgané lé, ké wai henga mam main kandu lé ba yéniang kain bu’, ama ké selai ’eno.

25Kardené Jésu yégé wa: Ai, keng kalang ga basé narua, keng kalang ga basé bo cindi gusu kual go ga cogelé kebu go Kumu koi kogé kala ’eno. 26Na gad Krist gel cin jua ma, ddi sai andong duro hormo doi dé ’eno ga? 27Kardené ddi poderégé kual go ké ba pasi duro cidab do Kumu toi cai mam, ddi usumga a duro cidab do Mois toi, dang cidab do ga cogelé kebu go Kumu koi togé mam.

28Kiddin ga ké ba ’erga to gulong go ké wa oré kené lé na, Jésu lé main go colé tumu kain. 29Ama ké nari, ké yei wa: Jimang nani, cawa teba belé borndo ’enda, kiddin hal. Ddi ’yé gulong ca jomang nagé. 30Ddi jom kebu do kang ga nagé, ddi ai wo, ddi lei Kumu désé kardené ddi bbodelé dugo, ddi bigé. 31Kardené cindegé hangdong, ké soli, ama ddi kaiyong cong a cindegé. 32Ké yé gusugé wa: Kiddin ga ddi wasé wa yoana kual go ddi ba poderana, go a duro cidab do Kumu toi toa a duro giyong na, ddaindena solna main tua kain ’eno ga?

33Ké sai dang kobegépadda, ké jogu ’yé Jorsalem. Ké wai anjama ga moac ca penang yaué daiang kalang kané. 34Ké yégé wa: Cindi Bagulong belang cindi a duro ga maré, Simon soli. 35Ké gang yégé kual go ba waigé a duro giyong, dang solé go ké ba sol Jésu kiddin ga ddi ba bbodelé wo.

Jésu gel gusi gusu anjama gai

(Matié 28:16–20; Mark 16:14–18; Jâ 20:19–23; Gié 1:6–8)

36Kiddin ga ké wa yo kual dé na, Jésu bang andong ’eré duroigé, ddi yégé wa: Waigi, logeng muro ’eno. 37Ké yor muro bbani ’eno, ké ’erem wa: Ka sola tiddin. 38Ama Jésu yégé wa: Keng sol kegero kainya cawa ga? Keng ’erem kual sua sua duro ddaindegeng kainya cawa ga? 39Ga selageng kalndeng dang guandang dé, na ’enung bang, ga samageng gusung, keng sol dé, cawa tiddin dang gusu dang ’isé main keng wa soalang kua kain ’eno. 40Kiddin ga ddi ba yégé kual lé na, kardené ddi gelgé kalndiang gondi. 41Ké bu cindi ’eno dé, ama kanga gusu mowa dang kagelokemo, ddi ’engergé wa: Henga ga do wo kené ga? 42Ké bi gusa go paié go jingdé. 43Ddi ai gusa lé, ddi di cindegé. 44Kardené ddi yégé wa: Selageng kua, kiddin ga ’enung kenang nageng na, ’enung yegeng kual lé waldong wang, na gad kual mam go ké ba pasi cang a duro so go Mois koi, dang cidab do ga cogelé kebu go Kumu koi togé, dang cidab do kera na, da ser toiné. 45Kardené ddi hangu ’eremé gogé ca kandia sela cidab do Kumu toi toa ka. 46Ddi yégé wa: Ga selageng kual go ké ba pasi, na gad Krist da gel cin, a duro wolé go subu na, ddia belang cindi a duro ga maré. 47Ka dor nô dang gusondi duro delinya mam, ca kalang bega kebegé ca ké buraga isinwa dogé, ka usumga a Jorsalem jua. 48Kenga kalang ga hendé do kual lé toi. 49Ama ’enung bang da gigigeng kalin do Bang ba dor kebu ca. Ama ga jimageng a Jorsalem bera dono do dang lé gesingu caigeng jua.

Jésu jogu tol dang

(Mark 16:19–20; Gié 1:9–11)

50Kardené Jésu golgé ’yang nagé to gulong go Bétani, ddi nyim kalndi dang, ddi si busu caigé. 51Kiddin ga ddi wa so busu caigé dé na, Kumu aii ni dang, Jésu ddégé. 52Ké melaui, ké jogu Jorsalem dang gusu mowa nain. 53Ké yau duro kulu go yaué go Kumu koi waindi waindo ca debainyé Kumu.

Kasalukuyang Napili:

Luk 24: TNG1978

Haylayt

Ibahagi

Kopyahin