Jâ 6

Jésu bigé kalang dubu bai do

(Matié 14:13–21; Mark 6:30–44; Luk 9:10–17)

1Kardené Jésu hadu tagu do Galali kuaba koné. (Na tagu lé do ké ba tei Taberiat bu’.) 2Kalang ga yaué combu kobi, cawa ké sola gié go dono go kagelokemo go ddi ba lei go bogé kalang ga hoamya labia. 3Jésu nai ca kubung, ddi jom dugo kang anjama gai. 4Soré go kederé cindi go Juib kogé ji ’yoab. 5Jésu ai cindi sol kalang combu wa orang gusi, ddi yei Pilip wa: Na da wai kiddin ga kelé do go bbalé kalang lé kua mam andi ga? 6(Ddi yé main kainya ca Pilip na da jogu yeia mena ga? Cawa ddi bang sol henga ga ddi da légé.) 7Pilip jogu yei wa: Na nia kel wo go laré aru sua, na cingdiegé bbani bbani kau go bbalegé ’eno. 8Anjama goi go pena go ké ba tei André go Simon Piér kermi yei wa: 9Kurong go pena wo kenang wo go maja bai, dang gusa sua, ama kua na henga ga bbalé ca kalang ga combu ga main kain ga? 10Kardené Jésu yégé wa: Ga sigé ddagé jima dugo mam. (A kiddin lé na hademé ga laddé wo kené combu.) Ké jom dugo, ké bbal main bainyong dubu bai kain. 11Jésu ai wo lé, ddi lei Kumu désé, kardené ddi gosindégé ké ga jomé dugo lé, ddi bigé gusa lé main kain bu’. Ké di, ké aidong. 12Kiddin ga ké ba di aidong na, Jésu yégé anjama gai wa: Ga nyimgeng to do jo, cawa ga ddoi toanyang cong ’eno. 13Ké nyim wo go maja go bai go ké ba di lé toi do jo wondé borong moac ca sua.

14Kalang ga solé gié go dono go kagelokemo go Jésu ba lei lé na, ké yé wa: Cindi kema lé na, na go cogelé kebu go Kumu koi go ba saga duro delinya. 15Jésu sol ca kandia wa orang ca ’yomoiang dono ca soi termalang dono, na ca ma ddi sai ’yé, ddi nai ca kubung dang kaindi pena.

Jésu ’yé ca kang ga tagu

(Matié 14:22–33; Mark 6:45–52)

16Kiddin ga teba ba ka na, anjama gai ’yé kebu tagu. 17Ké nai duro kuburo, ké haddu tagu oju Kapernom. Kiddin belé soindo ’enda, ama Jésu ’era gusugé ’eno dé. 18Kal ’yé ca tagu lé bbani ’eno, doiyé sai combu. 19Ké haddu tol duro tagu suguddong has, kardené ké sol Jésu wa oré ca kang dur kuburo gogé ’yoab, ké lé muro bbani ’eno. 20Ama Jésu yégé wa: Na ’enung, ddo keng lo muro ’eno. 21Ké dar ca ka aiei duro kuburo, ama kobegépadda kuburo geger ca gesong ga ké ba oju ca oré kené.

Kalang ga yaué combu dar Jésu

22Waindo kalang ga yaué combu ga ba ji tagu koné na, ké sol kuboroa pena mera. Ké sol ca Jésu naia duro kuburo kang anjama gai ’ya kaindigé. 23Kardené kuburo ga ddang saga a gulong go ké ba tei Taberiat, ké ’erga ’yoabang kiddin ga Bagulong ba lei Kumu désé ma, ké ba di wo kené. 24Kiddin ga kalang ga yaué combu ba sela Jésu kang anjama gai a kiddin lé ’eno na, ké nai duro kuburo, ké boi caigé jogu Kapernom ca darei.

Jésu na wo bogé kalang jomé goang cindegé

25Ké wai Jésu a tagu kuaba koné, ké yei wa: Bagulong, ji ’erga kua mini ga? 26Jésu jogu yégé wa: ’Enung wa yogenga cindi waldong wang: Keng wa daranga ca keng ba sol gié go dono go kagelokemo ’eno, ama keng wa daranga ca keng ba di wo aidong. 27Ga logeng gié ca wo go toanyang cong ’eno, ama ga lageng gia ca wo go bogé kalang jomé goang cindegé bera kuddum. Kema Kurondi go bogeng wo lé cawa Ba Kumu na soi genjer goi go dono cai. 28Kardené ké ’engeri wa: Nia la mena ma, nia lang gié go Kumu koi ga? 29Jésu jogu yégé wa: Gié go Kumu ba dar ca kenga lai na, ga begeng cindi ca ddi go ddi ba gigi. 30Ké yei wa: Jia lénia gié wa go dono go kagelokemo ca ni bu cindi gusin ga? Jia la gié wa ga? 31Moinderéni di wo go ké ba tei man a duro gada main ké ba pasuang duro cidab do Kumu toi kain. Ddi bigé wo go ba saga a dang, ké di. 32Jésu jogu yégé wa: ’Enung wa yogenga cindi waldong wang: Mois na bogeng wo go ba saga a dang lé ’eno, ama na Banga bogeng wo go cindi go ba saga a dang. 33Wo go Kumu ba bigi na, na ddi go ba gesingu a dang go bo kalang jomé goang cindegé bera kuddum. 34Kardené ké yei wa: Bagulong, ji bini wo lé waindo waindo. 35Jésu yégé wa: ’Enunga wo go bogé kalang jomé goang cindegé lé, kema goa ’erga gusung na, kurang go loi ’eno bu’. 36Ama main go ’enung ba yegengang kain: Keng solung ama keng bu cindi cang ’eno. 37Kema goni goni go Bang ba bungang nai na, ddia ’erga gusung, kema goa ’erga gusung na, ’enung go taiei cong ’eno bering. 38Cawa ’enung gesingu a dang ca loa henga ga ddi go ba gigeng kai ga kederei ba dargé, ama na ca lo henga ga kedereng ba dargé ’eno. 39Sela, kua na henga ga ddi go ba gigeng lé kai ga kederei ba dargé, na ca ’enunga kaié kema pena a duro ké ga ddi ba bung ’eno, ama na ca ’enunga belgé mam a duro ga maré wolé toi do karé. 40Cawa kua na henga ga Bang kederé ba dargé, kalang mam ga ba sol Kurong, ké bu cindi cai na, kanga cindegé bera kuddum. A duro wolé toi do karé na, ’enunga belegang cindegé a duro ga maré.

41Ga Juib kederégé homdégé ca Jésu, cawa ddi yé wa: ’Enunga wo go ba gesingu a dang. 42Ké yé wa: Kua, nia Jésu go Josép kurondi lé ’eno ga? Ni sol bai kang ’yoi, na mena ma ddi yé wa, ddia gesingu a dang ga? 43Jésu jogu yégé wa: Ddo kederegeng homdegeng ca gusugeng ’eno. 44Ba go ba gigeng nia serang kema ’eno na, kema pena bbal orang gusung ’eno, ama kema go nia ’erga gusung na, wolé toi do karé ’enunga belei dang cindi a duro ga maré. 45Ga cogelé kebu go Kumu koi pasu kual lé, ké yé wa: Kumu da gel kalang mam, kema goni goni goa jé kual go Ba koi, ddi ’yé gelé goi bu’ na, ddi da orang gusung. 46Kua na gelna ca kema pena sela Ba dang cindi ’eno, ddi go ba saga a gusu Kumu na, ddia solé Ba pena.

47’Enung wa yogenga cindi waldong wang: Kema goa bu cindi na, ddianga cindi bera kuddum. 48’Enunga wo goang cindi. 49Moinderegeng di wo go ké ba tei man a duro gada, ama ké ma. 50Ama kema goa di wo go ba gesingu a dang na, ddi go maré ’eno. 51’Enunga wo goang cindi go ba gesingu a dang, kema goni goni go nia di wo lé na, ddianga cindi bera kuddum. Wo go ’enung da bi lé na, na gusung, ’enung bu gusung ca delinya jimang cindo.

52Kardené ga Juib main kual duroigé bbani ’eno, ké ’enger gusugé wa: Na mena ma, kema lang dono ca buana gusi ca do ga? 53Jésu yégé wa: ’Enung wa yogenga cindi waldong wang, keng nia da Kema Kurondi gusi ’eno bua, keng sa kebardi ’eno bu’ na, keng dang cindegeng ’eno. 54Kema goa di gusung bua, ddi si kebardeng bu’ na, ddianga cindi bera kuddum, wolé toi do karé na, ’enung da beleiang cindi a duro ga maré. 55Cawa gusung na do go cindi, kebardeng na henga ga so ga cindi bu’. 56Kema goa di gusung bua, ddi si kebardeng bu’ na, ddia jom gusung, ’enung da jom gusi bu’. 57Ba go ba gigeng na, ddianga cindi, ’enung danga cindeng a gusi bu’. Kema goa di gusung na, ddianga cindi a gusung main kain bu’. 58Sela, kua na wo go ba gesingu a dang lé, ddi mainya wo go moinderegeng ba di ma, ké ba ma dang kain ’eno. Kema goa di wo lé na, ddianga cindi bera kuddum. 59Jésu gelgé kual la duro kulu go yaué go Juib kogé a Kapernom.

Kual goang cindi bera kuddum

60Kiddin ga anjama ga Jésu kai combu ba jé kual lé na, ké yé wa: Gelé lé kua na hom, na wanga bbalé ca ’yoi ga? 61Jésu sol ca anjama gai kederégé wa homdégé ca kual lé na, ddi yégé wa: Kual lé kua homdegeng kederegeng ga? 62Keng nia sol Kema Kurondi ca naié jogé oré a kiddin ga ddi ba saga a kené na, kenga da la mena ga? 63Na Haba ga boi cindi, ama gusu bbala lo henga pena ’eno. Kual go ’enung ba yegeng na, ddia Habé bua, ddia jomé goang cin bu’. 64Ama ga pena a duroigeng bu cindi ’eno. (Ké ga da bu cindi ’eno, dang kema go da ai Jésu gangeldi bu’ na, ddi solga danga to do so tumu din.) 65Ddi jogu yégé com: Na ca ma ’enung yegeng wa: Kumu nia serang kema ’eno na, kema pena dang dono do orang gusung ’eno.

66A kiddin lé na, anjama gai combu ddei, ké ’era dang nai ddang ’eno ’enda. 67Kardené Jésu ’enger anjama go moac ca sua, keng kau, Keng dar ca oré dduang bu’ ga? 68Simon Piér jogu yei wa: Bagulong ni da ’ya gusu wang ga? Jia goang kual go bogé kalang jomé goang cindegé bera kuddum. 69Cakcak kua ni bu cindi, ni sol ca jia go arin carara go ba saga a gusu Kumu. 70Jésu jogu yégé wa: Keng mam ga moac ca sua na, ’enunga paregeng ’eno ga? Ama go pena wo duroigeng, ddi Sidan go pena. 71Ddi yé kual la ca Judas go Simon Iskariot kurondi, cawa na Judas go duro anjama ga moac ca sua la aié Jésu gangeldi.

Kasalukuyang Napili:

Jâ 6: TNG1978

Haylayt

Ibahagi

Kopyahin