Markus 12
12
Byelə səɗe a nə ji-hawtə
(Matta 21.33-46; Luka 20.9-19)
1Nda tiya ɗatə ɗarən byelə səɗe. Nda sarən atɨ, “Ama a nggop kade a ka kaanda a takadərən. Nda ra gwe a vor gaashingɨn gə mye ta pedə haɓi inabite dɨ janga dɨ kade gaashingɨn. Nda kangdə rɨgɨmtə a gaashingɨn gə gɨratə. Nda və i ji-hawti gaashingɨn a nə moona tən ɓawa mbwan. Beetɨ angɨn, nda muɗə omotə. 2Ite nda kana ɓətɨ gaashe wula, kadengɨn a mbwo, a kən zɨmti, nda lyen hiɗə dɨ vor kɨse dan a haka ji-hawtɨngɨn gə nda luwan mbwotɨ kadengɨn. 3Təna kɨr kɨsangɨn a lyebə a omrən nda pwal tyefingɨn a muɗə dɨ payya. 4Nda mɨna lyen ama dɨ vor kɨse dan a hakarən, təna lyebə nəngɨn a vən sopye. 5Baa ɓəgəng nda mɨna lyen ama a hakarən, təna kɨt mangɨn a ɓɨlə. Kɨse dan furi-furi 'ye nda lyentɨrən, imi təna lyebə, imi mgban təna ɓələ.
6“Sɨne ka ama mbiɗi hiɗə, nzəngɨn nə a nda dɨ mworən. Sɨnə a nda kpawan a lyenə atɨ, ‘Tən ɓa kwa naa fukatɨ nze de.’
7“Ite ji-hawtɨngɨn a nan, təna sasə atɨ, ‘Manə nə ɓa mɨnə gaashi kadengɨn. Wam, a mya ɓɨləmrən gələ mya mɨnə gaashi kadengɨn təna gəə hɨnggəm nə.’ 8Sə mgban təna kɨttən a ɓɨlə a ngguro a ɗongdən a beetɨ kaanda.
9“Ɓə ya həmɨ gaashi kadengɨn ɓa ɗa? Ndi ɓa shi a ɓəl ji-hawtɨngɨn nda və imi gaashi kadengɨn.
10“Hwunaa bəl shee mya doro vor Malɨmtɨ Ɗəmɗəmtə ma? Atɨ,
“ ‘Faraa ji-nwoshe a kwo,
sɨnə a mya shea kwak mgba-vɨne kan.
11Həmɨmiye nə ɗa angɨn sə,
hɨm naa ləngɨn,
hɨm nə dɨ ndəli kan.’#12.11 Naasə: Dyemshe 118.22,23. ”
12Mi kpan-kpaningɨn a ɨl kwatɨfe gə təna kɨttən, gə tən leyə atɨ a nəngrən nda ɗa lə səɗəngɨn. Kala a gərən gəkɨlə ɓwaaree ləki takadə Yesu, təna ɗakan a muɗə.
Mbwa Kaisar taa shemtə
(Matta 22.15-22; Luka 20.20-26)
13Dɨ bee təna lyana imi dɨ vor Farise ka myee da həmɨn Hiridus a haka Yesu gəkɨlə təna kanarən a kɨttən ka kuta a vor byele. 14Təna shi hakan, a sa, “Nzə-kəndəshe, hin leyə atɨ hye ma tikɨsə, teewa koddə hɨnggə ɓwaara, hye dɨ kənə ɓwaare tɨfe da Həmɨnpwa ka diyale. Ɓashitɨ dam sa atɨ ɓə kana mya mbwa Kaisar həmə kpanə Roma taa shemtə ma? 15Naasə mgban hye boyenə.”
Shezə Yesu lee wule kwakpeye darən. Nda ɗiyərən atɨ, “Ɓə mɨnə ɗa hwuna dɨ ngaari ka byele? Wemi ka taangɨn da mi Roma a na nan pe.” 16Təna shikan ka taangɨn. Nda ɗiyərən, “Fyemi wonə a nə taangɨn? Kwakɨ wonə mya doro də mgban?”
Təna san atɨ, “Kaisar nə.”
17Yesu a sarən, “Vəmə Kaisar sa hɨnggə Kaisar nə. Sa hɨnggə Həmɨnpwa nə mgban hwuna və Həmɨnpwa.”
Təna ndələ ka Yesu.
Ɗi le a nə maggə taane ka nzaa hwoɗye
(Matta 22.23-33; Luka 20.27-40)
18Beetɨ angɨn Saduke a myee sa atɨ ɓwaara kana mbɨrə ndaa diyə ga maggə we ka myentə, təna shi haka Yesu mgban gə təna kanarən a vor byele. 19Təna san, “Nzə-kəndəshe, Musa a dorenə a vor ɓashitɨ dan atɨ, jibiyə ma kana mbɨrə a ɗaka mesən taa ji-kan, a mufəngɨn a ɗɨm nggamsatɨngɨn a nza kaarə meti gə nda mwasa jibiyəngɨn je. 20Sɨne ka mwafengɨn i morye tukolukpe. Ma kwamətə a ɗɨm metɨngɨn a nzaa hwoɗye kaarə nda mbɨrə a ɗakarə taa ji də. 21Kpeyətə a mɨnə nggamsatɨngɨn a nza kaarə, ndi mgban nda mbɨrə tənaa mwasa je kaarə. Mwaakɨnə mufe mgban sə a bəngrən. 22Tən kat tukolukpe jibiye ka mwafengɨn nza ka metɨngɨn mbərə taa ji də. A kpawtə kat metɨngɨn a mbɨrə. 23Fərə maggə taane metɨngɨn ɓa gəə metɨ wonə? Aɓə tən kat tukolukpe tən nza kaarə?”
24Yesu a sarən atɨ, “Aa sa ɗa hwuna ɓə ɗwangashe nee? Hwunaa lee kpəshi ləməgyee mya boyə vor Malɨmtɨ Ɗəmɗəmta, hwunaa lee gəta Həmɨnpwa mgban? 25Myee mbəri kana maggə taane ka myentə, tənaa diyə nzaa hwoɗye ka sə, gəkɨlə a itɨngɨn taayə ɗɨmsəti də, tənə ɓa gə ɓətɨ malyenye gaarə a vor pwa. 26Ɓətɨ lə mattə gə taane ka myenta, hwunaa bəl ləməgyee mya doro vor malɨmta Musa ma? A nə nzɨ kadate dɨ ləwi ka ɗiye a vorsən, Həmɨnpwa a sa Musa atɨ, ‘Hɨnə Həmɨnpwata Ibɨraim, Həmɨnpwata Ishaku, Həmɨnpwata Yakubu.’#12.26 Naasə: Dɨmatə 3.6. 27Həmɨnpwatɨngɨn, aa hɨnggə wogi, ndi hɨnggə myee ka myentə nə. Sa ɗa hwuna ɓə ɗwangashe kɨr-kɨr nee!”
Gɨrahaa pɨri ka fukatə kat
(Matta 22.34-40; Luka 10.25-28)
28Hiɗə dɨ vor ji-lee kəndə ɓashita Musa a shi asɨ kɨlarən dɨ nggələsə le, nda kɨla la Yesu a boyo nda leyə atɨ diyalə, nda pɨra ɗiyə Yesu le atɨ, “A vor ɓashita Həmɨnpwa, ndo gɨraha nə pɨri kat ka fukatə?”
29Yesu a luwa a san atɨ, “Ite pɨri kat ka fukatə, kotɨnə yang: ‘Kɨli kwe Israila, ndi Həmɨmiye Həmɨnpwatɨ dam, sɨnə Həmɨmiye hiɗə kal-kal. 30Hye mwo Həmɨmiye Həmɨnpwatɨ dəw ka hubosa kat, ka myensa kat, ka ɗyangale dəw kat, ka nyerəsa kat.’#12.30 Naasə: Gɨraha 6.4,5. 31Kpeyə ɓashitə nə itɨnə: ‘Hye mwo nzə-vɨnəgu ɓətɨ hye dɨ mwo nanga.’#12.31 Naasə: Livitikus 19.18. Taayə itɨ ɓashiti də pɨrgə ingɨn dɨ kpeyə.”
32Mangɨn a luwa a sa Yesu atɨ, “Nzə-kəndəshe, la hye boyo nee twa, sə gən atɨ, Həmɨnpwa nə hiɗə taa a Həmɨnpwati də sɨnə ɓəmbə. 33Ma a mworən ka hubosən kat ka leetɨ dan kat ka nyerətə kat. Ma a mwo nzə-vɨnəgən ɓətɨ nda dɨ mwo nəngɨn. Angɨn nə pɨrgə həmte mya və Həmɨnpwa kat ka sɨgɨrte mya dɨ ɓələ a hyanarən, a hama Həmɨnpwa kaarən.”
34Ite Yesu a niyə mangɨn byelə pepe ka lele, nda san atɨ, “Hye tam ɓong-ɓong ka həmne da Həmɨnpwa.” Beetɨ lanə kat, ama aa yə mɨna mwamdiya a ɗiyən alə ɓə.
Ma Həmɨnpwa a Yaɓwarən nə nze da wonə?
(Matta 22.41–23.36; Luka 20.41-47)
35Yesu nee pɨrə humwa ka kəndəshe a Kwa-Shafe, nda ɗi le atɨ, “Ɓə ya ji-lee kəndə ɓashita Musa a sa atɨ Ma Həmɨnpwa a Yaɓwarən nə nze da Dawuda? 36Aɓə ndi Dawuda ka nənəngɨn, Pitɨ Ɗəmɗəmtə a ɗɨkdən nda byelə a sa atɨ,
“ ‘Həmɨmiye Baatə a sa Həmɨmiye de atɨ,
“Zə nza tɨfə zɨməngi
baa a dɨmə fəra na ɗɨkdə ji-nyaagu
təna fokə njiya
hye mwagərən ka mbwayinga.” ’#12.36 Naasə: Dyemshe 110.1.
37Dawuda ka nənəngɨn nda warən atɨ sɨnə ‘Həmɨmiye.’ Ɓə ya ma Dawuda a warən atɨ Həmɨmiye ɓa mɨna gəə sɨnə nze da Dawuda?”
Hanɨngə furo ɓwaarengɨn ite təna kɨltən.
38Ite Yesu nee a vor kəntə dɨ kəndəshe, nda sarən atɨ, “Hwuna bəə myensəwnə ka ji-lee kəndə ɓashita Musa. Gəkɨlə təne dɨ mwo kala rokoti kpan-kpanye təna woyo kaarən a waka ɓwaare gə ɓwaare ta wanakarən a vor lumotə. 39Təna dɨ mwo nzatə a humwa ɓwaare a vor vəni kəndəshe da Yawude. Sə mgban təna dɨ mwo hee nzatɨ fukatə a hee ɓwaare ɓa peyə də gə sɨlangsətə. 40Tənə myee dɨ tɨmbɨr nggamse mandye, mbɨrtɨrən lugərən shee kat ka gɨnətɨ darən. Təna shea kangə ta ɗa hiwtə gɨrə-gɨrə gə təna gbiyadə səhase darən. Həmɨnpwa ɓa ɗa wule mingɨn sɨgbəɗye kɨr-kɨr.”
Həmte nggamsatə a vədə
(Luka 21.1-4)
41Yesu a nza vor Shafe a humwa kpaa luu həmtə. Nda nza a nidə furo ɓwaaree dɨ shi ka taa dɨ ɗɨkə vor kpaangɨn. Ji-gɨnətə hananang a dɨ sɨ ɗɨkdə taa kaɓa kpan. 42Itɨ nggamsatɨ nji-poriti a shi ka penetə kpe a ɗɨkə vor kpaangɨn. 43Yesu a waga lagbe dan təna paya nda sarən atɨ, “Diyalə na dɨ boyownə, sa nggamsatɨ nji-porite a vədən pɨrgə, hɨnggə mbiɗitɨ ɓwaaree kat. 44Hɨnggərən təna nggɨla ɓyeləng dɨ vor gɨnəte təna gə kaarə a vədən, hɨnggə nggamsate, kat ka poritə darə, ngga nggura sa ngga gə kan kat gə nzaa vɨratə a vədən.”
Kasalukuyang Napili:
Markus 12: bcy
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
