Markus 11
11
Mi Urshelima a wayadə Yesu
(Matta 21.1-11; Luka 19.28-40; Yohana 12.12-19)
1Tən ta waya a shi gbyel ka Urshelima, təna tɨla a i ji-vɨree mya dɨ wa atɨ Betafaji ka Betani gbyel ka mbwara Motɨ Kade Zetun. Yesu a lyen kpe dɨ vor lagbe dan, 2nda sarən atɨ, “Zəmə vɨrate a humwasəwnə, hwun kana pɨrə hangɨn, hwun ɓa naa nzə-mbɨrse myaa ndaga liyən. Hwuna paran a shikan ga. 3Ama kana ɗiyəwnə le atɨ, ‘Ɓə ya hwuna dɨ para mbɨrse?’, boyəmən atɨ, ‘Həmɨmiye nə dɨ mwi, aa dɨ ɓwanga ndi ɓa lyanashe kan.’ ”
4Lagbengɨn a muɗə a dɨ pa mbɨrsəngɨn nee kangə kwaamɨ i hwoɗi gbyel ka nə tɨfe, mya ɓoyə kwatɨfe. Təne dɨ paran, 5myee kangə hangɨn a ɗiyərən le atɨ, “Ɓə ya hwuna dɨ para nzə-mbɨrsəngɨn?” 6Təna boyə mingɨn la Yesu a boyərən, mingɨn mgban a ɗakarən təna para mbɨrse. 7Ite təna shi ka mbɨrsəngɨn a haka Yesu, təna pukdə rokotye darən a nə mbɨrsəngɨn, Yesu a nggɨrə a nza nəngɨn. 8Ɓwaare hananang a pyala sɨɓwetɨ darən a nə tɨfe, imi mgban a ɓaya jibe kade dɨ kaake a pukə nə tɨfe. 9Myee luu kwamətə ka myee dɨ koɗə beesərən kat ta gəə dyemshe ta sa atɨ,
“Hosana!#11.9 Naarə Hosana nə “Mbədenə.””
“Həmɨnpwa a fukadən
ndi ma dɨ shi
a vor kwakɨ Həmɨmiye.”#11.9 Naasə: Dyemshe 118.25,26.
10“Həmɨnpwa a fukadə
həmne da baagəm
Dawuda a ɓaga shi.”
“Hosana!
Ɓondiyəm Həmɨnpwa
ndi ma gaarə a vor pwa.”
11Yesu a pɨrə vor Urshelima, dɨ hangɨn nda pɨrə vor Shafe a woyo a nidə haa kat. Itɨngɨn haa rika, gə ləngɨn nda dɨma a mɨnə dɨ vor Betani ka lagbe dan kat bəw a mbiɗi-kpe.
Yesu a ya kadatɨ nggwaltə
(Matta 21.18-19)
12Ka haa kɨɗatə təna dɨmgə vor vɨra Betani a nggur tɨfe ta muɗi, myatə mgban nee dɨ gə Yesu. 13Dɨ haa ɓonge nda naa kadatɨ nggwaltə nggi jiyə ka jibe a sɨsə kat, nda zə mgban ɓa ɨl mbwotɨ nggwaltə a tuulo. Ite nda tɨlə hangɨn, ndaa ɗɨm asə, jibe nggwaltɨngɨnə ɓəmbə, gəkɨlə aa nda kən mbwotɨ nggwale. 14Yesu a sa nggwaltɨngɨn atɨ, “Ama aa diyə ga tuul mbwosa.” Lagbe dan a kɨl la nda boyə nggwaltɨngɨn.
Yesu fegə Shafe
(Matta 21.12-17; Luka 19.45-48; Yohana 2.13-22)
15Tɨla sərən a Urshelima ɗəng, Yesu a pɨrə vor Kwa-Shafe a tiya om myee dɨ zɨm lumotə a hangɨn. Nda ləkədə tebɨlye da myee nza dɨ nggəddə taa, ka ramye da myee dɨ ɗərdə ji-gulye gɨrtə, 16ndaa yə ɗaka ɓwaare təna pɨrə ka shiɗəre a vor Shafəngɨn. 17Ite nda dɨ kənərənshe, nda kangə ta kənərənshe ta sarən atɨ, “A mya doro vor Malɨmtə atɨ,
“ ‘Mya wa hwode atɨ
hwoɗi hiwtə gə le da
nagi ndo kwaamə ma’?#11.17 Naasə: Ishaya 56.7.
Shezə tənə ɓəgəng hwuna kɨsə a gərən ‘haa ɓota mahəryi.’#11.17 Naasə: Jerimaya 7.11.”
18Kɨsehəmi kpan-kpanye ka ji-lee kəndə ɓashitə ta kɨl la Yesu a dɨ boyo, təna tiya ɨl kwatɨfa tən ɓa koɗən gə təna ɓɨltən ka kuta gəkɨlə təne dɨ gəə kala Yesu gəkɨlə ɓwaare kat a dɨ ɗa hɨmnə kəndəshe dan ka ndəle.
19Ka kaade Yesu ka lagbe dan a dɨmgə vor Urshelima.
Kadatɨ nggwalte kpami
(Matta 21.20-22)
20Ka hakpite təne a nə tɨfe dɨ muɗi, təna naa kada nggwaltɨngɨn kpamə baa kworyingrə. 21Bitrus a ɗyanga ka ləngɨn, nda sa Yesu atɨ, “Nzə-kəndəshe, zə niyi, kada nggwalte hye yatɨrə kpamə!”
22Yesu a luwa a san, “Mwamdiyale ka Həmɨnpwa. 23Diyalə na dɨ səwnə, nagi ndo ma kat boyə mote atɨ ngga maɗə a dɨ kangə vor gbɨnuwtɨ sɨkorən, mangɨn aa ɗa ndəle ka ləngɨn a vor hubosən, nda mwadiyale ka la nda boyo atɨ ləngɨn ɓa ɗaasə, sə mgban la nda boyə ɓa nzasə. 24Gəkɨlə ləngɨn na dɨ səwnə atɨ, sa kat hwuna nyisə a vor hiwtə, mwamdiyale atɨ mye vəwnə, hwun luwo ɓə gə hɨnggəwnə nə. 25Nagi goɗi hwuna kangə ɓa ɗa hiwtə, anda hwun kɨt ama ka le a vor hubosəwnə, nggurəmə mangɨn gən, gə Baagəwnə arə a vor pwa a nggurəwnəgə səhase dəwnə mgban.#11.25 I dorshi kada 26 a sa atɨ, “Anda hwun aa nggurən gən, Baagəwnə arə a vor pwa mgban aa dɨ nggurəwnəgə səhase dəwnə.””
Mya ɗa ndəle ka haa Yesu a ɗɨm gətɨ dan də
(Matta 21.23-27; Luka 20.1-8)
27Təna mɨna a Urshelima. Ite Yesu nee dɨ woyo vor Kwa-Shafe, kɨsehəmi kpan-kpanye ka ji-lee kəndə ɓashita Musa, ɗɨkənə mi kpan-kpanye da Yawude a shi hakan. 28Təna ɗiyə Yesu le atɨ, “Ka ndo gəti hye dɨ ɗa wule shee hye dɨ ɗa ɗate? Wonə ɓoyu mgba gə hye ɗa shingɨn?”
29Yesu a sarən atɨ, “Hɨn mgban hɨnə ɓa ɗiyəwnə le hiɗə pee. Boyi mi, hɨn mgban na boyownə wule gəte na dɨ ɗa lyentə kaarə ka ma ɓoyi mgba. 30Ɓətɨ gəte Yohana a dɨ ɗa batisɨmatə kaarə ɓwa, dɨ pwa naasə mgban dɨ haka ɓwaare ganə vɨratə nda ɗɨma? Boyi mi pe.”
31Təna nidə ləngɨn a wakasərən, təna boyəsə atɨ, “Hɨm kana san atɨ, ‘Dɨ pwa,’ ndi ɓa ɗiyəm atɨ, ‘Ɓə mɨnə ɗa hɨm aa ɓə mwakan?’ 32Mye kana san mgban atɨ, ɓwaare ɓoyə Yohana mgba, ‘Ɓə ya hɨm ɓa ɗam.’ ” (Gələ kalaa ɓwaare nee gərən ka sate atɨ nagi ndo ma mwa atɨ Yohana kpalə diyalə dɨ haka Həmɨnpwa.) 33Gə-angɨn təna sa Yesu atɨ, “Hinaa leyə.”
Ndi mgban nda sarən atɨ, “Hɨn mgban taa dɨ boyownə ma vi gəte na dɨ ɗa lyentɨnə kaarə.”
Kasalukuyang Napili:
Markus 11: bcy
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
