Logo ng YouVersion
Hanapin ang Icon

مارکوس 15

15
حضرت عیسیٰ پیلاطُس یودسا کھیرس۔
1نگاتوگ ما نگامونے اِمام کُنی چھونمو گون، یہُودی پے اُسکیونگون، شریعتی عالِم گون تانگ یہُودی پے ژوکسپے تھوسمی گانگپوے حضرت عیسیٰ مسیح سادچیسلا تھاگچادس۔ کھونگونی کھونگی چھاگ لدامستے کالون پیلاطُسی لاگا ستادا کھیرس۔
2پیلاطُسی حضرت عیسیٰ سی ٹیس، ” کھیرانگ یہُودی پے گیالپو اینّا؟“
حضرت عیسیٰ سی لانسالس، ”این، نیرانگی زیرکھانبو این۔“
3تینے اِمام کُنی چھونمو گونی کھونگی گیابگالّا نیادگال مانگپو کالس۔ 4پیلاطُسی یانگسکیار کھونّگا ٹیس، ” کھیرانگی کھونگونلا لانتانّگا میدّا؟ ستوسّانگ؛ کھیرانگی گیابگالّا کھونگونی تسامشیگی سکیون رجود چوروگ؟“ 5اِین نانگ حضرت عیسیٰ سی چانگ لان ماسالپا، پیلاطُس ہالاس۔
6لوگثول نانگجین پیساگی توسچھینّی توسلا، کالونّی میگونّی جُووا نانگجین تسونپا چیگ پھودّادپین۔ 7تیتوسلا رومی ژونگی گیابگالّا نگولوگ چوستے می سادکھان برابّاتانگ کھوے ٹوپاگون تسونکھانگی نانّگا یودپین۔ 8میتشوگس پیلاطُس یودسا یونگستے کھوا توسگیون تسوگسلا تسونپاجیگ پھودچیسّی پھیا زیرس۔
9پیلاطُسی ٹیس، ”کھیوجے پھیا نگے یہُودی پے گیالپوبو پھودّا؟“ 10(اِمام کُنی چھونمو گون حضرت عیسیٰ سی یکا تشیگچیسپوے، کھونگ کھوے لاگا ستادکھانبو پیلاطُس لا گیوسّونگ۔) 11اِین نانگ اِمام کُنی چھونمو گونی میتشوگسلا لچے کولتے حضرت عیسیٰ سی تشابسلا برابّاپھودچیسّی پھیا پیلاطُس لا جُووا پھولچوگس۔ 12پیلاطُسی کھونگونلا ٹیس، ”تینے نگے کھیوجاگونّی یہُودی گیالپو زیرکھانّی میبوا چی چو؟“
13کھونگونی کُوچو تانگین لانتانگس، ”کھو کیانگشینگا کیونگ۔“
14پیلاطُسی ٹیس، ”چیپھیا، کھوے شریعتی گیابگال چی چوستوگ؟“
اِین نانگ میتشوگسّی کُوچو ثانٹے تانگین زیرس، ”کھو کیانگشینگیکا کیونگ۔“
15میتشوگسپو تھادچوگستے پیلاطُسی کھونگونی پھیا برابّاتسونکھانگنے پھودچوگس یانگ حضرت عیسیٰ سی ستالچاگ گیابتے کیانگشینگیکا کیانگچیسلا ماگمی گُونلا ستادس۔
ماگمیگونّی حضرت عیسیٰ سی تشیگپا ثاگس۔
16ماگمیگونّی کالونّی کھار (کابوا راتوریوم زیرّاد) تے نانّگا حضرت عیسیٰ مسیح کھیرتے ماگتشوگس گانگپوا دزومچیسلا بودس۔ 17کھونگونی کھونّگا گیالپو گونکھان تسوگسّی نامزا مارپوجیگ سکونس، یانگ تشیرمانگی تھورشوگ لاستے کھونگی اوا سکونس۔ 18کھونگونی کھونّگا تشیگپا ثاگاین زیرس، ”یہُودی پے گیالپوا سیوا۔“ 19کھونگونی کھونگی اوا بیرگا نیامپو لان مانگپو ردونگستے کھونّگا چھیلماگ گیابس، یانگ حضرت عیسیٰ سی لدُونلا پِیکمویکا گییلتے کھونّگا چھاگپھول زونتانگس۔ 20تشیگپا ثاگستے ستینگنے کھونگونی گیالپوے نامزا مارپوبو پھودتے، حضرت عیسیٰ سی کھونگرانگی نامزابو سکونس۔ تینے کھونگ کیانگشینگیکا کیانگچیسلا کھیرس۔
کیانگشینگیکا کیانگس۔
21حضرت عیسیٰ مسیح ٹھیدتے کھیر زانے اسکندریہ تانگ روپھوسّی ابا، کیرین پا شمعُوؔن گامیولنے گیالسے نانّگا یونّگادپین یانگ ماگمیگونّی کھوا وانگ تانگستے حضرت عیسیٰ سی کیانگشینگ کھورچوگس۔ 22کھونگونی حضرت عیسیٰ سی گُلگُتا (کابوے تونتاگپو گوی روسپے ساکیاد) زیرکھانّی ناسّیکا کھیرس۔ 23تینے کھونگونی حضرت عیسیٰ سی میر زیرکھانّی سمان ثیسکھانّی رگونچھانگ تانگس، اِین نانگ کھونگی تیبو دونّا مازادس۔ 24کھونگونی حضرت عیسیٰ سی کیانگشینگیکا کیانگس یانگ کھونگی نامزا گوستے سُوا تھوبدوگ ستاچیسلا گیان گیابس۔
25حضرت عیسیٰ سی کیانگشینگیکا کیانگ زانے، نگاتوگی چھوتشود گُوپا چھادپین۔ 26کھونّگا نیادگال کالکھانّی ستاگس پویکا یہُودی پے گیالپو ڈِیستے یودپین۔ 27چاگپا نیس کھونگ نیامپو کیانگشینگیکا کیانگس، چیگپو کھونگی یاسپا یانگ چیگپو یوما۔ 28”یبوے ہلژخمہ شوقبُو بوے نانّگا ڈِیا زادکھانبو ’کھونگ دِیگپاچانگون ٹوا سیاین‘ زیرکھانبو ڈانڈا ڈوبتے اینوگ“
29تے ناسّا گیُودتے ڈولکھانگونّی گو یوگتے سمادرا تانگین زیرس، ”بیت المقدِس شیگستے جاگ سومی نانّگا سیگاین زیرکھان کھیود، 30کیانگشینگی کانے یوگا بابستے رانگ سکیوبّانگ۔“
31تینّا تسوگسلا اِمام کُنی چھونمو گون، شریعتی عالِم گون تانگ یہُودی پے اُسکیونگونیانگ کھونّگا تشیگپا ثاگاین زیرس، ”کھوے جانماگون سکیوبس، اِین نانگ کھورانگ سکیوبنیانّا میدوگ۔ 32ای لدامّا زادکھانّی مسیحا، بنی اِسرائیل پے گیالپو، کیانگشینگی کانے داگسا بابستے یونگنا، نگاجے تھونگتے ایمان چوین۔“ حضرت عیسیٰ سی نیامپو کیانگشینگیکا کیانگسکھانگونّیانگ کھونّگا تشیگ تانگس۔
حضرت عیسیٰ مسیح ڈونگس۔
33نیینگّونگنے چھوتشود سومپا تشوگپا یول گانگپو مونڈیگ سونگ۔ 34تینے چھوتشود سومپیکا حضرت عیسیٰ سی سونگسکاد چھینموے نانّگا بودّا زادس، ”ایلوی، ایلوی، لیما ساباچتھانی؟“ کابوے تونتاگپو ”نگے خُدے نگے خُدے نیرانگی نگا چیا پھانّگا زادتے این؟“ مولتے اینوگ۔
35تیکا یودکھانگونّی نانگنے کھاچیگی تیبو تشورّاچیگ زیرس، ”نیونشیگّانگ کھوے پیغمبر حضرت اِلیاس بودّاراگ۔“ 36کھونگونی ٹونے چیگ بانگتانگستے سونگ یانگ راسبالجیگ رگونچھانگ سکیورموے نانّگا چوگستے بیرگیکا سکیونتے حضرت عیسیٰ سی دونچیسلا تانگس۔ ژانچیگی زیرس، ”دوگچوگّانگ۔ پیغمبر حضرت اِلیاس کھو سکیوبالا سکیودّوگّا ستینبا۔“
37تینے حضرت عیسیٰ سی سکاد چھینمو نیامپو کُوچو سالتے ستینگجوگی اوگسپو نینّا زادس یانگ ڈونگس۔ 38تینّا توسلا بیت المقدِس سی یولّا تھوگموبو#15‏:38 ای یولابو بیت المقدِس سی نانّگا تشانگمیسانگ ہلژخمہ ناسّا تانگ لوسکھانّی ناسّے نانّگا پار پھیچیسلا تانگستے یودپین۔ گونّے جوگ تشوگپا کھاگنییسّی نانّگا چھاد۔
39حضرت عیسیٰ سی لدُونلا یودکھانّی ماگیے سپونبوے کھونگ ڈونگستشولبو تھونگتے زیرس، ”ای می خُدےبوژا اینکھانبو تانتان اینوگ۔“
40تھاگرینگجیگنے بومو کھاچیگی حضرت عیسیٰ سی ٹونگشیسپو ستین یودپین۔ کھونگونی ٹوا ماگدالّینما مریم، یوسیس تانگ کھوے نو یعقُوبؔ ی اما حضرت مریم تانگ سالومی گُون یودپین۔ 41گلِیلی نانّگا کھونگون حضرت عیسیٰ سی گیابنے ڈولتے کھونگی گھوسدومگون ریگستے جابشی چوادپین ۔ کھونگ نیامپو یروشالیمّا یونگکھانّی بومو مانگپوجیگّانگ تیرو یودپین۔
حضرت عیسیٰ سی جنازہ قبرستانی نانّگا بورّا زادس۔
42زاپاسانگی جاگ (یانگنا شابّادّی آرام چوچیسی جاگی سانگ سنگونمے جاگپو)، ڈالڈیگی جاگ اینپین، مونچوروبکییس یود زانے، 43یہُودی پے ژوکسپے تھوسمی کھاگچان اینکھان ارمتیہ پا حضرت یُوسفؔ ، کا بو خُدے گیالثید لیبچیسلا ثونگستے یودپین، کھوے ہامپا چوستے پیلاطُسی کا سونگتے کھوا حضرت عیسیٰ مسیح جنازہ سال زیرتے جُووا پھولس۔ 44حضرت عیسیٰ سی ڈونگتشارکھانبو تشورتے پیلاطُس ہالاس، یانگ ماگیے سپونبو بودتے حضرت عیسیٰ سی ٹونگستشارتوگّا زیرتے ٹیس۔ 45کھوے کانے حضرت عیسیٰ سی ڈونگستشارکھانبو تشورتے ستینگنے، پیلاطُسی حضرت یُوسفؔ ا کھونگی جنازہ بو کھیرچیسلا گونگسپا تانگس۔ 46تینے حضرت یُوسفؔ بی راس کوسپو کھیونگس یانگ حضرت عیسیٰ سی جنازہ بو کیانگشینگی کانے پھابستے تینانّگا تومس، یانگ ڈاگی نانّگا سکوستے یودکھانّی قبرستان چیگی نانّگا بورس۔ تینے کھوے قبرستانی کھیکا ردوا لیب لیب چھینموجیگ ریلتے کابس۔ 47ماگدالّینما مریم تانگ یوسیسی اما حضرت مریم می حضرت عیسیٰ سی جنازہ بورّا زادکھانّی ناسّابو تھونگ۔

Kasalukuyang Napili:

مارکوس 15: LBJNT

Haylayt

Ibahagi

Kopyahin

None

Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in