maṯa 5

asa 5

ḏuməḏo gi lɩrgwom elo

1gwune nuaŋu liji lutu, nuabo gi lɩrgwom elo, na gwune nujiga na calɩmis juŋun wila lugwun, 2nuiḏi linyn luŋun, nulalɩmi nuleicɩno,

ḏimoreḏa

lk. 6:20-23

3ḏimoreḏa ḏaje lagin lun lɩtieno kwuɽɩwə, gi gwune naləṯi ŋelɩnya ŋeḏi kanyin.

4ḏimoreḏa ḏaje lagin lun laṯɩrone, na laje ləṯi ḏɩmoɽa ganu.

5ḏimoreḏa ḏaje lagin lun lɩtieno gi lulo lagin, gi gwune laɽenyeḏa kɩḏilio.

6ḏimoreḏa ḏaje lagin lun liṯɩlo jaŋu na oudo lɩbunyu ŋuɽuna ŋiŋir, gi gwune lape.

7ḏimoreḏa ḏaje lagin lun liro lino, gi gwune nalbuje ŋino.

8ḏimoreḏa ḏaje lagin lun ləṯi dugwor diŋir gworki, gi gwune laje laŋu eloŋu.

9ḏimoreḏa ḏaje lagin lun laṯɩgele ḏouwɩɽida, gi gwune laṯɩleico nyaɽe nyeḏi elo.

10ḏimoreḏa ḏaje lagin lun laṯilɩnḏagɩɽini gwan ŋuɽun ŋun ŋiŋir, gi gwune ləṯi ŋelinya ŋeḏi kanyin.

11ḏimoreḏa ḏaje lagalo da lɩmajilo nalmajɩnḏagɩɽini, nalmajɩnugɩḏi ŋuɽun ŋe ŋun ŋiro kajakaja gwan nyi. 12diliḏil ganu gworki, gi gwune nyaləṯi gala giŋir gworki kanyin, na ŋiro dino nalḏagɩɽini ḏi nebɩŋa lun lɩwiḏi gwerre lagalo.

ḏalɩmia ḏan ŋwuco na lambə

mks. 9:50; 4:21, lk. 14:34-35; 8:16; 11:33

13nyalro ŋwuco ŋweḏi gɩḏilio, namɩni ḏa ŋwuco ŋumaicɩwe na galakwe ŋanyaləjɩco mɩna alaɽuwe alḏɩnye? na ŋate ŋiŋir ŋɩru ŋədi no, namɩni ŋalɩdoije ga kwɩnyəm ŋani liji wewelelo. 14nyalro bure gweḏi gɩḏilio. amɩrɩgen ye yuṯinu gi lɩrgwom elo ŋate yəṯi ŋɩma, yalbiḏɩni no. 15na gwiji gwate gwoudeije lambə nuəḏɩje kɩḏi ganu ŋun ŋiro amen no, namɩni lugele kalo ge ḏoɽəḏa ga, kani ŋwuloɽa ga wei lun lɩjo gidəno. 16ouwɩricil bure gwalo ŋwoɽa ga dino gi jei ganu jeḏi liji, kani alaŋu ŋɩru ŋalo ŋun ŋiŋir albuḏi babaŋ gwalo gwun gwaṯɩje kanyin.

ŋuɽun ŋun ŋigelijilo elo musay, na ŋuɽun ŋeḏi yecu

17aṯanyanuməḏɩno nyalanarno, nyi gwuwiḏi gwaki ŋuɽuna ŋun ŋigelijɩlo elo musaŋ i nebɩŋa no; nyi gwate gwuwiḏi ŋilki no, namɩni ŋilṯɩmi. 18gi gwune gwerkwe ganu nyi gweiceijɩno, kəbe na kanyin na gɩḏilio ete, namɩni ŋuɽun ŋate ŋanete ŋetɩdo ŋɩti ŋun ŋigelijɩlo elo musaŋ no kəbe nalṯɩmi wei. 19na dino gwiji gwun gwɩmaki ŋuɽuna ŋun ŋɩti ŋeno ŋun ŋigelijɩlo elo musaŋ, nulalɩmi liji dino, na gwaṯɩleico gwɩtieno ŋele ŋeḏi kanyin, namɩni gwun gwaṯɩlduji naṯualɩmiḏe, na gwaṯɩleico gwubuḏo ŋele ŋeḏi kanyin; 20gi gwune nyi gweiceijɩno, ḏa ŋuɽun ŋalo ŋun ŋiŋir ŋate ŋɩmabaḏate kworo gweḏi jalgaṯɩm na lɩbarɩsi no, nya late ləḏi ŋele ŋeḏi kanyin no.

ḏiɽeḏa ganu na ḏiɽinyɩḏa

lk. 12:57-59

21ŋidiŋɩnanyalo ŋarɩline luŋa leḏi uro kili, aṯaɽinyɩḏa no, na gwun gwijinyɩḏo gwɩdeleḏo gwakɩmini. 22namɩni nyi gweiceijɩno, gwun gwaṯɩɽe ganu kwu megin ga jai gwɩdeleḏo gwakɩmini; namɩni gwun gwaṯeico megin no, ŋa gwɩki, gwɩdeleḏo gwalgwuloḏa kəcərɩo yɩbuḏo yeḏi liju; namɩni gwun gwaṯarno, ŋa gwun gwiro ḏiŋerom, gwɩdeleḏo gwalgwuwini kigo yeḏi jenam. 23na ŋiro dino ḏa ŋa mapa ŋɩdio ŋuŋa kalo geḏi lobo leḏi dunu gweḏi elo, na ŋɩnəwei ŋamaḏɩŋane magalo gwəṯəḏenya gwe ŋuɽuna, 24walano ŋɩdi ŋuŋa ŋɩnəwei kalo geḏi lobo, ŋawele gwerre nyouwɩɽiḏa magalo gwe ki ŋa ḏaɽuwa ŋaḏəḏə ŋɩdio ŋuŋa. 25əmɩnyu nyagwouwɩɽiḏe cou gwun gwicɩgiaŋa gi gwune nyalore gi ṯaṯ, kani ŋate ŋaŋagwuloḏa ḏi gaḏi na ŋa gaḏi ḏəḏə mamurŋ na ŋa gwagelini kɩrkon no. 26gwerkwe ganu nyi gweicaŋa no, ŋa gwate gwanduḏo ŋɩnəwei no kəbə ŋa gwagele milima gwun gwiro gɩdo.

ŋɩrleḏ

mṯ. 18:8-9, mks. 9:43-48, mṯ. 19:9, mks. 10:11-12, lk. 16:18

27nyaldiŋɩnu ŋarɩline, aṯaura no. 28namɩni nyi gweiceijɩno, gwun gwaṯaŋalaḏe kwa kəbe nubunyi gworki mure wɽɩ gi ḏugwor ganu ḏuŋun. 29na ḏa gei guŋa ŋun ŋiro ḏiŋir ŋɩmaŋobɩlkejo, weləḏi ga ŋaguwini lugwuŋa, gi gwune gwiŋir lugwuŋa nuai getɩdo gi gwune aŋan aŋɩnu yuŋa wei wini jenam. 30na ḏa ḏi ḏuŋa ḏun ḏiro ḏiŋir ḏiməŋobɩlkejo, uɽəḏi ga ŋaḏuwɩni lugwuŋa, gi gwune gwiŋir lugwuŋa nuai ḏetɩdo gi gwune aŋan aŋɩnu yuŋa wei wini jenam.

31na ŋarɩline, gwun gwədi gwa gwuŋun, ouwɩricil nuḏəḏə gɩḏam geḏi dio. 32namɩni nyi gweiceijɩno, gwun gwədi gwa gwuŋun ŋuɽun ŋədi, ŋun ŋate ŋiro ŋe ḏuriḏa no, nuduji gweḏor, na gwun gwago gwa gwun gwidɩnu gwuru.

dərɩmio na ŋuɽun ŋun ŋiro gwerkwe

33na mɩna, nyaldiŋɩnu ŋarɩline luŋa leḏi uro kili, aṯamɩɽiḏo gɩḏam ŋɩwɩɽigala no, namɩni aṯaduji ḏərɩmiə ḏalo kwele gwun gwiro elo. 34namɩni nyi gweiceijɩno, aṯanyərɩmio ḏuṯ no, kanyin gwe no gi gwune gwiro gɩḏoɽ geḏi elo, 35i gwɩnyəm gwe no gi gwune gwiro galo geḏi ŋwara ŋwuŋun, i urucəlim gwe no gi gwune gwiro amɩrɩgen yeḏi gwele gwun gwubuḏo gwun gwiro elo; 36i ŋərɩmi lɽa le luŋa no gi gwune ŋa gwate gwəṯi ŋɩma ŋa gwaduji əɽu yetɩdo gi loro kɩɽe i yumɩni no. 37nyamɩni ouwɩrico ŋuɽuna ŋalo alro i i, na awe awe. na ŋun ŋalbaḏaice ŋeno ŋeḏi ŋu gwun gwɩki.

dɩwəɽio ŋuɽuna ŋun ŋɩki

lk. 6:29-30

38nyaldiŋɩnu ŋarɩline, wəɽeico nanu gei gei, na lɩŋaḏ lɩŋaḏ. 39namɩni nyi gweiceijɩno, aṯanyagwiɽəḏiḏia ganu gwun gwɩki no, namɩni gwun gwaŋamɩɽi kɩrel guŋa ŋun ŋiro diŋir, wɩrlijo gun gɩṯanu dino. 40na ḏa gwiji maŋacɩgi kəcərio gwar gwaɽe panila gwuŋa ouwɩrɩcijo ŋwape luŋa luŋa dino. 41na gwun gwaŋaremeṯeḏeice nyagwuwele mil gwetɩdo, baḏəṯɩjo ŋwuro gwuttən. 42na gwun gwaŋaɽoṯəḏɩjo ḏəḏi, na gwun gwubunyu gwaɽe nanu gəmɩju ge lugwuŋa ŋadonyɩḏa no.

ḏəmɩnyo na ḏiŋirɩḏa muma

lk. 6:27-28,32-36

43nyaldiŋɩnu ŋarɩline, aṯanyəmɩnyi gwun gwijaḏanyagwe ga, ŋamɩni donye gwun gwɩkiḏiḏianyagwe. 44namɩni nyi gweiceijɩno, aṯanyaləmɩnyi lun lɩkiḏiḏianyale, nyuməḏəṯɩjo eloŋu gwan luŋa lun laṯajɩnḏagɩɽini, 45kani nyaro nyaɽe nyeḏi baba gwalo gwun gwaṯɩje kanyin, gi gwune gwaṯoɽa anyin yuŋun gi liji lun lɩki na lun liŋir, nanuni ŋaua gi lun liŋir na lun lɩki dino. 46gi gwune ḏa lɩmaṯanyaləmɩnyi lun laṯajəmɩnyi, namɩni ŋɩrṯa ŋiro ŋanyaləṯi? luŋa lun laṯɩmeje ṯulba lədu laṯɩduji dino na? 47na ḏa nyalməmɩɽənyə lɩmagalo kuwei, namɩni ŋɩrṯa ŋiro ŋɩmanyalduji ŋutəno gi loro? liji lun liro ga dino lədu ŋɩdujilo dino na? 48na ŋiro dino duḏɩl nyaŋa muma, gi gwune baba gwalo gwun gwaṯɩje kanyin gwiro muma.

Kasalukuyang Napili:

maṯa 5: OTR1966

Haylayt

Ibahagi

Kopyahin