maṯa 11

asa 11

1gwune na yecu ṯɩmi ŋuɽuna ŋun ŋuməḏɩjulo calɩmis juŋun jun jiro di na gwuttən ŋɩru ŋe ŋagin, nuwalane kalo kono nuar gwalɩmi liji naṯuluməḏɩjo gi jɩmɩrɩgen jagin.

yuwana mamadan

lk. 7:18-35

2na yuwana diŋɩni kɩrkon ŋɩru ŋe ŋeḏi kɩrisṯo, nuwəjo calɩmis juŋun jɩttən, 3naleicɩno, ŋa gwiro gwun gwara gwila i anaḏuḏɩnɩjo gwiro kaja? 4nal yecu wɩrlijo ŋuɽuna nuleicɩno, wiḏɩl nyuməḏɩjo yuwanaŋ ŋuɽuna ŋun ŋanyaldiŋɩni na ŋun ŋanyalaŋu: 5liji lun lɩrimə gi jei laḏaŋa ga, na jɩbɩjo jawewele, na lun litɩlo ŋilo liŋir nanu, na lun lɩrimə gi nani ladiŋɩni, na lun laiyo ləḏiɽi na lun late ləṯi ŋɩdio no na ŋuɽun ŋiŋir ŋeḏi elo ŋuməḏɩni lagin; 6na ḏimoreḏa ḏaje lugwun gwun gwate gwobɩlkəḏɩni lugwi nə.

7na kaja gun giwiḏɩlge na yecu eico liji gwan yuwana no, nyaltuḏi kiḏɩwer nyalar lanaŋaḏa aŋe? iṯa yun yaṯi ḏɩron əri a? 8namɩni nyaltuḏi nyalar lanaŋaḏa aŋe? gwiji gwun gwikanu giria gun gɩmɩḏe ganu a? lono lun laṯɩkani jiria jun jɩmɩde ganu iatɩje gi lɩḏunu leḏi lele. 9namɩni nyalḏudi nyalar lanaŋada aŋe? nebɩŋ a? i, nyi gweiceijɩnə, kweno gwubuṯano ḏi nebi. 10gi gwune gwiro kweno gwun ŋulinu ŋan ŋu,

eʼe, nyi gwuwəjo ḏuwəjo ḏinyi ḏadara kɩɽelo lugwuŋa

gwun gwagele ṯaṯ ḏuŋa muma kɩɽelo lugwuŋa.

11gwerkwe ganu nyi gweiceijɩno, gi wei lun lilɩŋinu gi la gwate madiɽo gwete gwun gwubuṯano di yuwana mamadan no, namɩni gwun gwɩtieno ŋele ŋeḏi kanyin gwubuṯano lugwun. 12na uro ŋwamon ŋweḏi yuwana mamadan kəbe gwunne na lun lɩbɩɽe nanu nalar ləḏi ŋele ŋeḏi kanyin ŋɩma ŋe ŋe ḏikeja ga. 13gi gwune nebɩga wei na ŋuɽun ŋun ŋigelijilo elo musaŋ ŋaṯaŋɩḏi ŋuɽuna kəbe na yuwana; 14na ḏa nyaləmɩnyi ŋuɽuna ŋeno, na kweno gwan iliya gwun gwara gwila. 15gwun gwəṯi nəni neḏi diŋɩna, ŋwudiŋɩni.

16na liji leḏi gwunne nuarno liro gi aŋe? liro gi nyaɽe nyun nyijiga gi cu naṯɩlorniḏe gworo ŋɩmaga, nanyarno,

17anaŋa lərijəje nyuda namɩni nya late lariṯe no;

anərijəje gwula namɩni nya late lɩməri gwula no.

18gi gwune yuwana gwuwiḏi nate nunʼe i nuyu no, nanaṯɩlmɩni arno gwəṯi ḏiŋeroma. 19na ŋaɽe ŋeḏi liji ŋɩmila gaʼe na ŋeyu, nalmɩni arno, eʼe, gwiji gwun gwiro gəḏou, na gwaṯɩnyu ŋɩmidiə ŋutu, na gwaṯəmɩnyi liji lun laṯɩmeje ṯulba na lun lɩki. na ḏilɩŋeḏena ḏɩmədə ga nyaɽe nye nyuŋun.

ŋɩki gi jɩmɩrɩgen jun jate jəmɩnyu eloŋu no

lk. 10:13-15

20nugireṯɩnya jɩmɩrɩgena jun japine ŋɩru ŋuŋun ŋun ŋɩbuḏo ŋutəno gi gwune late lɩwɩrla ga ŋuɽun ŋun ŋɩki no:

21nueicɩno, ŋɩki lugwuŋa, ŋa korasin, ŋɩki lugwuŋa, ŋa beṯsaiḏa, gi gwune na ḏa ŋɩru ŋɩbuḏo gun ŋɩgelɩnu lagalo ŋagelini sur na saida, nalwɩrla galo ŋuɽun ŋun ŋɩki uro kili nalkani jirla jun jijogɩnya nanu nalpini gi jaro. 22namɩni nyi gweiceijɩno, sur na saida nalɩtieno ḏakɩmino gworo gwalo gi lamon le ḏakɩmiḏa. 23namɩni ga kabranaum, ŋa gwabəḏəṯɩni elo kanyin a? ŋa gwagwuli kalo geḏi liji lun laiyo. gi gwune da ŋɩru ŋun ŋɩbuḏo ŋun ŋɩgelɩnu lugwuŋa, ŋagelini sadum nalmajiga kəbe gwunnɩno. 24namɩni nyi gweiceijɩno, amɩrɩgen yeḏi sadum yɩtieno ḏakɩmino kworo gwuŋa gi lamon le ḏakɩmiḏa.

yadɩgɩɽe ŋeḏi ŋaɽe ŋun ŋoga

lk. 10:21

25na kaja kono na yecu wɩrlijo ŋuɽuna nueicɩno, nyi gweicaŋa sukran, baba gwun gwiro gwele gweḏi kanyin na gweḏi gɩḏilio, gi gwune ŋamalbɩji ŋɩdio ŋeno gi liji lun lilɩŋidi ŋuɽuna ŋutu na lun ləṯi ŋadɩgɩɽenya, ŋalmɩni aŋiɽo nyaɽe nyun nyitinyiti. 26i dino baba, gi gwune ŋamar dino ŋiŋir gi jei ganu lugwuŋa,

ŋɩru yeḏi yecu

lk. 10:22

27ŋɩdi wei ŋɩmiŋil baba gwiḏəḏə; na gwate gwetɩdo gwun gwilɩŋiḏi ŋaɽe no namɩni baba, na gwate gwete gwun gwilɩŋiḏi babaŋ no namɩni ŋaɽe, na ŋu gwun gwaje gwa ŋaɽe aŋijo. 28wilal lugwi, nyaŋa wei lun laṯape ŋɩru nyupini ŋɩdio gun ŋɩni, na nyi gwəjouwɩrico nyalobe uwə gwe. 29upinɩl luɽi linyi lagalo nanyalɩmini lugwi, gi gwune nyi gwɩtieno kwulo na gwəṯi dugwor ḏorɩwa, na nyalabuje ḏimula gi dugwor ganu dalo; 30gi gwune luɽi linyi lɩmɩde nanu na ḏube ḏinyi ḏouwɩrio ganu.

Kasalukuyang Napili:

maṯa 11: OTR1966

Haylayt

Ibahagi

Kopyahin