Jenesis 1
1
O Del cherda
1Mai anglal o Del cherda o miloso ta e phuv. 2Ta e phuv saia rispime ta chuchi, ta o truniariko saia upral pe bari jar, ta o duo e Devleko miskolape upral pe paia.
3Ondaka o Del phenda:
¡Te avel o villelo!#2 Kor 4.6. ta o villelo avilo.
4Ta o Del dikhla kai o villelo saia lacho, ta fulada o villelo katar o truniariko. 5Ta thoda o anav katar o villelo llive, ta o anav katar o truniariko ikharda le riat. Ta peli e riat ta llivosaila. Gua saia o purvo llive.
6Mapalal phenda o Del:
Te avel iek putardipe te fulavel e paia katar e paia.
7Ta o Del cherda iek putardipe te fulavel e paia kai sea telal tala o putardipe katar e paia kai sea upral katar o putardipe, ta gia avilape. 8Ta o putardipe o Del ikharda le miloso.#2 P 3.5. Ta peli e riat ta llivosaila. Gua saia o duito llive.
9Ondaka o Del phenda:
O pai kai si telal tala o miloso, te chidiniaol samo pe iek rig te sai dikhol o sukipe. Ta gia avilape.
10Ta e rig suki o Del ikharda la phuv, ta o pai kai chidinailo ikharda le mora. Ta o Del dikhla kai saia sukar.
11Ondaka o Del phenda:
Te likel katar e phuv suako patra zelene, patra te den simiche ta kasta te den septelie. Ta gia avilape.
12Ta e phuv dia kasta ta patra, e kasta die septelie a e patra die simiche. Ta o Del dikhla kai saia sukar. 13Ta peli e riat ta llivosaila. Gua saia o trito llive.
14Ondaka o Del phenda:
Te avel ando miloso villelura te fulaven o llive katar e riat, ta te sikaven o vreme katar e slave, katar e llivesa ta e bursa. 15Ta te kletosaren ando putardipe e milosoko ta i upral katar e phuv. Ta gia avilape.
16Ta o Del cherda e dui villelura bare:
O baro te kletosarel ollivesea, ta o minono te kletosarel orachaia. Ta i cherda e cheraia. 17Ta o Del thoda gala villelura ando miloso te kletosaren e phuv, 18ollivesea ta i orachaia, te sai fulavel o villelo katar o truniariko. Ta o Del dikhla kai saia sukar. 19Ta peli e riat, ta llivosaila. Gua saia o llive starto.
20Ondaka o Del phenda:
Te cherdon katar e paia suako zivirinie, ta i chiriklia te furian upral pe phuv, po putardipe e milosoko.
21Ta o Del cherda e bare azdave e morake. Ta cherda sa e zivirinie kai zivin ande mora ta sa e chiriklia e milosoke. Ta o Del dikhla kai saia sukar.
22Ta o Del blagosisarda len gale alavenchar:
Te avel len but minone ta te pheren e mora, ta e chiriklia te aven but ande phuv.
23Ta peli e riat ta llivosaila. Gua saia o llive o panchto.
24Ondaka o Del phenda:
Mangav te avel pe phuv suako zivirinia kai inai divi, ta i gola kai si dive, e sapa ta i e zivirinie e phuviake. Ta gia avilape.
25Ta o Del cherda sa gala zivirinie, ta dikhla kai sa saia sukar.
26Ondaka o Del phenda:
Chera e manuse prema amende#1 Kor 11.7. gia sar sam amen, te gazdaril pe mache e morake, pe chiriklia e milosoke, pe sa e zivirinie ta i pe gola kai terrinpe pe phuv.
27Kana o Del cherda e manuse,
cherda le prema pete,
murus ta diskinia cherda len,
28ta blagosisarda len
ta phenda lenge:
Te avel tumen but, but chaurre.
Pheren e phuv ta gazdarin pe late,
gazdarin pe mache ta pe chiriklia e milosoke,
ta i pe sa e zivirinie kai terrinpe.
29Mapalal o Del phenda lenge:
Dikhen, akana dav tumen sa e patra kai den simiche, ta sa e kasta kai den septelie te sai jan. 30A e zivirinie dive, ta golen kai terrinpe pe phuv, ta sa e chiriklien e milosoke, ka dav len te jan patra zelene. Ta gia avilape.
31Ta o Del dikhla kai sa so cherda saia but sukar. Ta peli e riat ta llivosaila. Gua saia o sovto llive.
Kasalukuyang Napili:
Jenesis 1: BACHRO
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Biblia ande chib Romani © Sociedad Bíblica Chilena, 2018.