MATAYO 4
4
1Yuka Nakiyena druga zonga Yesu i diŋo yu i luluka na lepe ku kasosoyini lo kulialo. 2’Bo lepe akuga nyosu luŋa meria iŋmani tupara ku tukaze‚ i bo ŋanina lepe druga leŋa ku mago. 3Druga kalulukanilo yeŋundra ku lepeni‚ druga takindra lepe adi‚ “Ku do laga a Ŋiro lo Ŋun, taki kine ŋoropo de ti ko yeŋundri a ’diloto.” 4Yesu druga teyitokindro lepe adi, “Awuro adi, ‘Ŋutulo ani gbo’da zoru ku nyosu ka’delo‚ ’bo gele ’du ku kulie gele gele lo lupundro ku Ŋun i kutunilo.’ ” 5Kasosoyini lo kulialo druga zonga lepe i kezi nakiyena kata yu‚ druga toliraki ndra lepe i ’dongole na kadi na Ŋun ina ki yu‚ 6druga takindra lepe adi‚ “Ku do laga a Ŋiro lo Ŋun‚ gupara mugu inide ka yu, igbonaga awuro adi‚ ‘Lepe ititikindra malaika kanye kilo i tizu na do‚’ ’bo‚ ‘Ko ikokomu do ku kenisi kase kilo ki yu i piri‚ ka’bi do ku zulokindro moko lolu i ŋurupi ki.’ ” 7Yesu druga teyitokindro lepe adi‚ “Awuro ’do adi‚ ‘Ku momoru Mata Ŋun lolu ilo. ’ ” 8Kasosoyini lo kulialo druga zonga Yesu ’do i mere laga lozo korulo ki yu‚ i kpekindra na lepe tumataki naga i kani kine giri‚ ku ’bu’busi nasikona itro. 9Lepe druga takindra lepe adi‚ “Kilo ŋo de giri na ititikindra do‚ ku do aruguŋo ka i teminizo na na.” 10Yesu druga teyitokindro lepe adi‚ “Lele Satani! igbonaga awuro adi‚ ‘Teminine Mata Ŋun lolu ilo‚ ’bo kuke lepe ’du‚’ ina.” 11I bo ŋanina kasosoyini lo kulialo druga kokoloki lepe, ’bo malaika kilo druga yeyeŋundra i konakindra na lepe kita. 12Kugbo Yesu laga ayinga adi Yoane amokazi‚ lepe druga ’dotodru mugu Galili yu‚ 13druga ŋiyoro Nazareta yu‚ druga utu ku saka Kaperinauma yu suburi i kutu yu‚ i dridriŋi na Zebuluna ku na Nafatalina, 14i torumokindro na kulia na ta kakeyoni Isaya adi‚ 15“Ka na Zebulunana, ku ka na Nafatalina, i kiko lo utuniki suburi yulo‚ i lu lozo lo Yorodani, i Galili na Monyazi kilo nu, 16ŋutulu lo saka kazu i mude kilo amedra parara naga a druma. Ŋutulu lo saka i piri naga ku tuwa i laga yu kilo‚ pararana alupundro kasikoni.” 17Ŋiyu i luŋa ŋani lu Yesu druga sulukindra trugo na kulia adi‚ “Lopuketa teiliko, igbonaga tumata na ’dikona gbo’di nyogoŋa ina.” 18Nyenaga ma Yesu worozini i suburi lo Galililo i kutu yuna‚ lepe amedra luŋaseri mure‚ Simona lo luŋu a Petero‚ ku luŋase lo lepe laga Anderia, ti kulu i biriŋodru na bira na somo suburi kata yu‚ igbonaga ko a kareka ti somo ina. 19Yesu druga takindra ko adi‚ “Keporota na‚ ma na ku toyeŋundra ta a katuna ti ŋutulu.” 20Wuleŋa gele ko druga kolokindro birazi kase kine‚ druga kepodru lepe. 21Lepe druga mizoro ŋero yu‚ druga medra ku’de luŋaseri mure‚ Yakobo‚ ŋiro lo Zebedayolo, ku Yoane laga a luŋase lo lepelo i ki’bo kata yu kasi Zebedayo laga a monye lasikolo kugele‚ ti ko kulu i trutrugu na birazi kase kine‚ ’bo lepe druga lungu ko. 22Wuleŋa gele ko druga kolokindro ki’bona‚ ku monye laselo‚ druga kepodru Yesu. 23Yesu druga worozi Galili kata yu giri i trukodru na kulia i kadizi kasiko naga a momoreta kine kata yu‚ i togo’yu na ŋutulu ku kuu na’bu na tumata na Ŋun ina‚ i toruzo na tatuwa ka’de ka’de giri‚ ku ’beri na mimiye ka’de ka’de i dridriŋi na ŋutulu yu. 24Nyenaga kuu na lepena akuworo i dridriŋi na Suria giri‚ ’bo ko azondra ku lepeni ŋutulu laga ku tuwanezi kilo‚ ku laga ku tatuwa ka’de ka’de giri ku ’beri na mimiye kilo‚ laga ku dreria loro kilo‚ ŋutulu laga ku kpekpiya kilo‚ ku laga aliwa kilo‚ lepe druga toruzo ko. 25’Bo mongoyo ti ŋutulu rodri kulu aŋiyoro Galili yu‚ ku Dekapoli, ku Yerusalema, ku Yudaya‚ ku ka naga i lu lozo lo Yorodani luna kata yu i kepodru na lepe.
Kasalukuyang Napili:
MATAYO 4: KNT77
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Kakwa New Testament © Bible Society of Uganda, 1974, 1977.
