MATEU 1
1
Pëbuka Yeesu Këristu
(Lúk 3.23-38)
1Ulibëru un piban wi pëbuka Yeesu Këristu, nul nan cii abuk Dawid, a Dawid ci abuk Abraam: 2Abraam buk un Isaak, Isaak buk un Jakob, Jakob buk un Juda ni ban tsaar biki ni nul, 3Juda buk un Peres ni Sera, a Tamar ci-un anin bukul; Peres buk un Esrom, Esrom buk un Aram, 4Aram buk un Aminadabi, Aminadabi buk un Naason, Naason buk un Salëmon, 5Salëmon buk un Boas, Raab ci-un anin Boas; a Boas buk un Obed, Ruuti ci-un anin Obed; a Obed buk un Jese, 6#2Bas 24.14,15; 2Bën 36.10; Jer 27.20Jese buk un Dawid nasien. A Dawid buk un Salomon; anin Salomondo un ci aar Urias; 7Salomon buk un Reoboan, Reoboan buk un Abia, Abia buk un Asa, 8Asa buk un Josafat, Josafat buk un Joram, Joram buk un Osias, 9Osias buk un Jotam, Jotam buk un Akaas, Akaas buk un Esekiyas, 10Esekiyas buk un Manase, Manase buk un Amon, Amon buk un Josias, 11Josias buk un Jekonias ni ban tsaar biki ni nul; bu bëka tsi uwal wi bañaan-ucaak Israel moba wi a ba tsëpanda ucaak Babiloonia. 12Bi ba tsëpanda bi Babiloonia, a Jekonias bi buk Salatiel; a Salatiel buk un Sorobabel, 13Sorobabel buk un Abiuud, Abiuud buk un Eliakim, Eliakim buk un Asor, 14Asor buk un Sadoki, Sadoki buk un Akim, Akim buk un Eliuud, 15Eliuud buk un Eleasar, Eleasar buk un Matan, Matan buk un Jakob, 16Jakob buk un Juse, ayën Maaria nan buki Yeesu, nul ni ka n jakee Këristu. 17Unk a u ci bëlieng ijër untaaja ni ibaakër, pëkur tsi Abraam te tsi Dawid. A pëkur tsi Dawid te utsëpanda bukul Babiloonia, a u ci buts ijër untaaja ni ibaakër. A pëkur tsi utsëpanda bukul Babiloonia te tsi Këristu, a u kaka ci buts ijër untaaja ni ibaakër.
Ubukara Yeesu Këristu
(Lúk 2.1-7)
18 #
Lúk 1.27
Ubukara Yeesu, iink di u ci run: Maaria aninul aci nampëli Juse; maa bë netse ka tsoar a na mob pëpës tsi pëyëlan Uwejats-ujënts. 19Juse ayënul aci niints na mabi, ŋalats pëkawaranul, na wejats pëgar ni nul te ñaan di ka me ko un ka wi.
20Maa bi nu wejats bi përo ko wan, a u ka uwaanju Ajug un cili wi tsi nul tsi utsaafi, a u jaul: “Juse abuk Dawid! Tsë lënk pëyank Maaria, aaru. Par amob pëpës maa aci ko un biini wi tsi Uwejats-ujënts. 21#Lúk 1.31Ka buk napäts niints, kë tsuul katim, Yeesu. Par nul ka bueran un bañaanul tsi ngëjuban bukul.” 22A ko wan bëlieng ci, pa pëpibanaan u ci wun wi Ajug ro wi ja nayëlia na ja; iink di na ja run: 23#Isa 7.14“Teenan-e! Ŋaats na meetsi niints kee mob pëpës, në buk napäts niints, nuu jaka, Emanuel,” un ci wi, Nasien-batsi ni nja uci pa colësiaara.
24Bi Juse teeni bi, a na ro ko wi uwaanju Ajug jaul wi, a na yank aarul; 25#Lúk 2.21maa meets ruetsul, te aarul tsënkëne buk napäts niints. A Juse tsuul katim, Yeesu.
Kasalukuyang Napili:
MATEU 1: KPKNT
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Le Nouveau Testament en langue Manjaku © Alliance Biblique du Sénégal, 2020.
