ኻወርየታኒዙ ሰቭ 21
21
ፈወነ 21
ባውሎስ እየሩሳልየም ፊረጘ
1ጛጊስም ቲትነት ግረ ሚርክቭል ጥውን ቀጥተ፦ «ቈስ» የነይ ደስየትሸን ትጐ ፊርኑን፤ ጛምርሲዝም፦ «ሩድ» የነይ ደስየትሸንትል ችጝኑን፤ ጝጊስም ባጥራ የነይ ኻትመየንትጐ ፊርኑን። 2ጝጊስም ፊንቅየ ትጐ ፊረው ሚርክቭ ችጝናንስቅ ጝዝ ተሳፍርሽን ይናጒደነድ ቃጥልኑን። 3ቈብረውስትም ቓልናንድ ጝርት ፃግቭይዝጐቱ በርን፣ ሰውርየ ትጐ ፊርኑን፤ ሚርክቭድ ጝጭነትድ ጢረውስት ወደቪል ኣርግፈው ዊናንስቅ፣ ይንም ጝግል ችጝናንድ ጊምኑን። 4ጝጊስም ምመናንድ ችጝን ጛጅቅ ላጝጠ ግርቅ ጐይኑን፤ ጛይም መንፈስ ቅዱስዝ ሚሪሽጝ ባውሎስት እየሩሳልየም ፊራየጘ ድቍ። 5ጝግል ሳብጥነቍ ግርቅድ ኣቢትጛንድም፣ ጛጊስ ቲትን ይናጒደነድ ቃጥልኑን፤ እጝቅቅም ጝታቍኒዝመ ጝታቝሪዝጅቅ ኣቕጝ ኻትመይዝ ደዪል ኣሽ ስቭዝ፤ ባኽሪዝ ደዪልም ኣቕን ግርቨቭሽን ፃልይኑን። 6እንዝ ግረ ሲነቫቭትሽን ሚርክቪል ጥውኑን፤ ጛይም ጝታይታጝን ዋጥር።
7ጢረውስስም ጕን ባኽር ጒደነድ ኻትናንድ፣ በጠሊማይስ ችጝኑን፤ ጝጊስም ምመናን ችጝን ድምቅሽነት ግረ ጛጅቅ ላው ግርየ ግሪኑን። 8ጛምርሲዝም ጝጊስ ጕን ቂሳርየ ችጝኑን፤ ጝጊስም ላጝጠ ዘቝንጢስ ላውድ ኣቐው ፊልበውስት ጝን ጥውን ጝጅቅ ጐይኑን።#ኻወ. 6፡5፤ 8፡5። 9ጝጭስም ትንቪት ዊግተቍ ድጝግላን ሲዘ እቍን ጝቝር ዊን። 10ንቕፀቍ ግርቅ ጝግል ጐይነት ግረ ኣጋቨውስ ይሽተው ላው ነቭይ እጅር ይዅዳስ ተሩ። 11ይናጐም ኣልት ባውሎስት ቅናትድየንት ጒ ጝቕምት ልኵጣኒዝመ ናንጣኒዝ እፅቍ በር፦ «መንፈስ ቅዱስ፦ ‹እኒን ቅናቲዝ ወነድየንት ኣይዅዳንድ እየሩሳልየምስ እነሽጝ እፅቍጝ በርጝ ኣኽዛቫኒዝ ዲቍስጝ ይውጥቍ› የኵ» ዩ። 12ይናስመ ጝግል ዊነቍ እቂዝም ባውሎስት፦ «ኣለቀይ እየሩሳልየም ፊርተ» ይን ጨውኑን። 13ባውሎስ ግን፦ «ወረጘ የጝ እነይርን ሊዝርና ይጊዝውድ ብርቝ ብርቝ ሽርነውድ? ያን ኣቕሽ ይኣደረ እየሱስት ሽዝ እየሩሳልየምስ እፁሸነው ጭቝ ኣዪጝቀ ክረነውዝም ኣስልጭኩን» ዩ። 14ይናምኽርድም ለምጠቅ ያንድ፦ «ነስየ ኣደረት ፍቃድ ኣነ» ይን በርኑን።
ባውሎስ እየሩሳልየም ችጘጘ
15እንዝ ግረ ይናጐዝድ ኣስልን እየሩሳልየም ፍኑን። 16ቂሳርየ ዊነቍ ላው ላው ምመናንም ይናጅቅ ተር፤ ጛይም ጥውን ጐይነ ማጥን ምናሰንት ጝን ሚርይ፤ ምናሰን ቀደም ይጝ ኣምነቍ ምመናኒስ ዊነው ጝእዅርሽንድ ቈብረውስቱ ኣቐው እጅር ዊኑ።
17እየሩሳልየም ችጝናንድም ምመናንድ ዲስተዝ ለምር። 18ጛምርሲዝም ባውሎስ ይናጅቅ ኣቕ ላብጠ ያይቈቭት ዲምቅሽነ ፊርኑን፤ ምከን ቃወጥድም እጝቅቅ ጝግል ዊን። 19ባውሎስም እጝቅዝቅ ዲግተ ይው በር እደረ ጝኣግልግለውቲዝ ኣኽዛቫኒዝ ማኽሊል ፃቨውድየንትቅ ላውዝ ላው ፃቭ ድቁ። 20ጛይም እኒንት ወሽጛንድ እደረት ሚዝየንዝ፤ ባውሎስትም እንት ይ፦ «ይናዝንወ! ንቕፀቍ ሽኽዝ እጊተቍ ኣይዅዳን ኣምንጘጘ፣ እጝቅቅም ወሪትት ኽጊዝ ቀንየቍ ኣጘጘ ኣርቕረኵ። 21ክት ኣኽዛቫኒል ፅበቍ ኣይዅዳንድዛት፦ ‹ክታቝርድዛት ጊርዝትርነ፤ ዊነው ልምድድም ፋፅምትርነ› ይራ ወሪትት ኽግድ ሸርስረጘ ፃቭሽት ጅጚተውድየንት ወሽጝኵ።#11፡28። 22ነስየ ውር ፃቭናን ቺዝጡ? ክት ተትረጘ ቈሽ ወሺጝቀ እዳቓቍም። 23እንዝ ማጥን ይን ድቍነውድየንት ፃቭ፤ ይናማኽሊስ ስለት ፃየቍ ሲዘ እቅ እኵ።#ዘዅ. 6፡13-21። 24ጛት ፃይር ጛጅቅ ኣቕር ዊር የነዊዝ ስረትድ ፋፅም፤ ጝታኣውርድም ላፅጥጘ ማጥን መቅደስ ጝኒዝ ይወነቍ ሚቨድ ጝታማጥን ኪፍል፤ እኒንት ፃቭረውዝየ ክማጥን ጅጚተውድቅ ኻሽት ኣቐጘ፣ ክት ክቕምም ወሪትት ኽግድ ፋፅምረር ኣረጘ ኣርቕጥቍ። 25ኣኽዛቫን ዊነቍ ምመናኒዝ ግን፦ ‹ጣወትዝ ምላሰን ኣርክሽተው ዅረ ዅትርነ፣ ጝብርድ ቅብሪጝቀ ኻንቕሽ ክረው እንሰሰይዙ ስየዝመ ብርዝ ዅትርነ፣ ሻርሙጥትርነ› ይን ዊስነው ውሳኒዙ ደብዳቢድ በርስንኵኑን» ይ።#ኻወ. 15፡29።
ባውሎስ መቅደስ ጝኒስ ፃይሽጘ
26ባውሎስም ጛምርሲስ እቅድዛት ፃይ ፊር ጛጅቅ ኣቕ ዊር የነዊዙ ስረትድ ፋፅሙ፤ እግረም ዊር የነዊዙ ስረትድ ኻትሸነ ግርየይዝመ ጝታይታምስዋይትድ ኣልስጘው ግርየድየይዝ ኣርቕስጠ መቅደስ ጝኒል ጥዉ። 27ላጝጠ ግርቅድም ኻትሽጥጘ ጕጛንድ እስየስ ተረቍ ኣይዅዳንድ ባውሎስት መቅደስ ጝኒስ ቓልጛንድ ኽዝቭድ ኣድምስጝ ፃይ። 28«እስራየልት እቅ ክታትርነ! ላቝጥን ከቭስጥን፤ ይናኽዝቪዝመ ይናኽጊዝ፣ እኒን ቅዱስ ስፍረድየንትም ዛሻ ችጘው ኻግሪል ፅበው ኽዝቭድየንትቅ ክንሰው እጅርድ እኒን የጝ፤ እንም ኣቐቅ የው ቈሽ ኣኽዛቫንድዛት መቅደስ ጝኒል ድው እኒን ቅዱስ ስፍረድየንት ኣርክስኩ» ይጛ ቓፅጥጘ ኪርም። 29እንት ይጘውድም እንዝ በውገ እፊሰውንቱ ጥረፊመስት ጝጅቅ ኻትመይስ ቓልጝ ዊንጛንስቅ ባውሎስ መቅደስ ጝኒል ጝት ፃይ ጥወው ተኩዝ የጝ።#ኻወ. 20፡4።
30ኻትመድም ምሉዝ ኻሚቱ፤ ኽዝቭድም ጝፅበው ፅበው ስፍረይስቅ ውጥያ ተሩ፤ ባውሎስትም ጒዝጛ መቅደስ ጝኒስ ፊስ፤ በውዝም መቅደስ ጝኒዝ ሚልድ ዲብሽት። 31ኽዝቭድም ባውሎስት ቍውጠ በን ፅባ ኣይንድ በውዝ፦ «እየሩሳልየም ኻትመየን ኻሚትርኵች» የው እፃ ረውማነ ጠውር ኣዘተይዝ ችጙ። 32ጘጝም ኣይንድ በውዝ ላዝ ኻልቀዝመ ዊተድርዝ ፃይ ውጥያⶖ ኽዝቪል ጊሙ፤ ጛይም ኣዘተይዝመ ዊተድሪዝ ቓልጛንድ ባውሎስት ድድበነውድ በር። 33ኣዘተድም ኣልት ባውሎስት ፃይ ሊጘ ሰንሰለታንዝ እፁሽጠ ማጥን ኣዙ፤ እግረም፦ «ክት ኣው የጝ፤ ፃቭረው ዊገድስ ወረጘ የጝ?» የው ዋቕሩ። 34ኽዝቭድም ላውድ ላው ዊገ ዊግታንድ፣ ላየድ ቈሽ ላየ ዊገ ዊግታ ቓፃ ዊናንስቅ፣ ኣዘተድ ውረውረ ዊገቀ ወሽጠ ቸሊየውም፤ ኣቓንስቅም ባውሎስት ዊተድሪዝ ስፍረይል ፊስጥጘ ማጥን ኣዙ። 35ኽዝቭድም ኻሚት ትክቭክቭሻ ዊናንስቅ ባውሎስ ደረጀይል ችጛንድ ዊተድርድ መውርጝ ፊስጥጘ ግድ ኣቑ። 36ኽዝቭድም፦ «እለ ቁጥን!» ያ እግርገ እግርገይል ቲክና ዊኑ።
ባውሎስ ጝተከላክልሸነ ዊገ ኣልሰጘ
37ዊተድርድም ባውሎስት ጝታኻፅሪል ድውጥጘ ኣልስጛንድ ባውሎስ ዊተድሪዝ ኣዘተድየንት፦ «ላው ዊገ ድቍጨ ማጥን ፊቅድትርመ?» ዩ፤ ጘጝም፦ «ግሪክ ቋቈ ኣርቕረኵመ? 38ኣየውጚ? ክት እንዝ ሚቅ ኽምዘ ጕይስር ሲዘ ሽኽ እቅ ሺፍትዝር በራኸ ጥውር ዊንደር እጅርድ ኣይረርቀ» ዩ። 39ባውሎስም፦ «ያንስ ኪልቅየትወ ጠርሲስ የነይ ጭቕጘ ኣርቕሽረይ ኻትመትል ፅበር ኣይዅዳነው እጅር የጝ» ዩ። 40ዊተድሪዝ ኣዘተድም ፊቅዳንድ ባውሎስ ደረጀይል ችብር ኽዝቭድ ዝም ይጠ ማጥን ጝናኒዝ ጣቅሱ፤ ኽዝቭድም ዝም ያንድ እቭራይስጥ ቋቈይዝ ዊግተነው ኪርሙ።
Kasalukuyang Napili:
ኻወርየታኒዙ ሰቭ 21: ኽምጣኣኪ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in