युहनाल 15
15
अंगुर टोन्डा मरा अनि अदेना कोहक
1अनि येसु इतुर, “खरोय अंगुर टोन्डा मरा नना आन्दान अनि नावोर बाबो कास्ताकार मन्तोर। 2अनि नावागा मन्तांग हादोंग ओद सबोय कोहकुन ओर कदिस वाटान्तोर, अनि बोद हादिन्तांग अदेन असा सोबाय कायांग हादिला पहाजे इन्जोर ओर पोरो पोरोडाल कदियान्तोर। 3अनि नना मिकुन वेहतोना ओद पोल्लो निमाट स्विकार कितिट इन्जोर निमाट मुनेटाले साप मन्तोरिट। 4अनि निमाट नावागा मन्ट अनि नना मियागा मनका। अनि कोहक टोन्डा मरातिगा मनोंग ते अव आपुने हादिला परोंग अदामे निमाट वने नावागा मन्वि आयकिट ते बाताले किया परवि आयकिट। 5अनि नना अंगुर टोन्डा मरा आन्दान अनि निमाट अदेना कोहक आन्दिट अनि बोर नावागा मन्तोर ते नना ओनागा मन्तोना। अनि ओर पकाय कायांग हादिंगतांग#१५:५ पकाय सोबाय बुतो किन्तोर; बाक्याकि नावाताल अलग आसुन निमाट बारायि कियाला परविट। 6अनि बोर आयि नावागा मनोर ते ओन उन्दि कोहक लेहका बाहरो हरचिन्तोरक अनि ओर कोहक लेहका वतानुर; अनि लोकुरक अदेन जमाकिस किसितिगा वाटस हिन्तोरक। अनि अव पोतिन्तांग। 7अनि निमाट नावागा मनकिट अनि नावा पोल्लो मियागा मन्दार ते बोदायि इच्चा किस तलकिकिट ते ओद मिकुन पुटार। 8अनि निमाट पकाय कायांग हादिहकिट ते नावोर बाबोन हजोर मान पुटान्ता, अदाम निमाट नावोर चेला ठहरे मायकिट। 9अनि नावोर बाबो बदाम नाकुन मया किन्तोर अदामे नना वने मिकुन मया किन्तोना, निमाट नावा मयाते मन्ट। 10अनि नना आपुनोर बाबोना आग्यातुन मानेमास दरोज ओना मयाते मन्तोना अदामे निमाट वने नावा आग्यातुन मानेमायकिट ते नावा मयाते मन्ट। 11अनि नावा गिरदा मियागा मनि अनि मिया गिरदा पुरा आयान साटि नना इव पोल्लोंग मिकुन इतोना।”
12अनि येसु असा इतुर, “नना मिकुन मया कितान अदामे निमाट वने वरोर दुसरोन मया किम्ट इन्जोर नावा आग्या मन्ता#युह १३:३४; १५:१७; १ युह ३:२३; २ युह १:५ । 13अनि बोरायि आपुनोर गोतियाह साटि आपुना जिवा हेविर इदेनताल हजोर मया बोनाय हिले। 14अनि नना मिकुन हिन्तोना ओद आग्या निमाट मानेमायकिट ते निमाट नावोर गोतियाह आन्दिट। 15अनि मालकाल बाताल किन्तोर इन्जोर दास पुनोर इन्जोर इदेकताल नना मिकुन दास इनोन आयका, मति नना मिकुन गोतियाह इतोना बाक्याकि नना बोद पोल्लोंग आपुनोर बाबोनिकेडाल केन्जतान अव सबोय मिकुन वेहतान। 16अनि निमाट नाकुन आचविट मति निमाट हन्जुन सोबाय बुतो किम्ट अनि मिया सोबाय बुतोता कायांग दरोज मियासंग मनि इन्जोर नना मिकुन आचतोना। इदाम कियाकिट ते निमाट नावा पोरोयते बारायि बाबोन तलकिकिट ते ओर मिकुन हियानुर। 17अनि निमाट वरोन दुसरोन मया इराट इदेना साटि नना इव पोल्लोता आग्या मिकुन हिन्तोना।”
दुनियातोर लोकुरक मिकुन दुश्मनि कियानुरक
18अनि येसु असा इतुर, “दुनियातोर लोकुरक मिकुन दुश्मनि किन्तोरक ते ओरक मिया पहले नाकुन दुश्मनि किन्तोरक इन्जोर निमाट पुन्तोरिट। 19अनि निमाट दुनियातोर मनेरिट ते दुनिया आपुना लोकुरकुन मया किन्ता। मति निमाट दुनियातोर आयमाट इन्जोर नना मिकुन दुनियाताल आचतोना, इन्जोर दुनिया मिकुन दुश्मनि किन्ता। 20अनि ‘दास आपुनोर मालकानताल हजोर मनोर’ इन्जोर नना मिकुन इन्ज मतोना ओद पोल्लो आलहाट। अनि ओरक नाकुन पकाय तकलिप हियानुरक ते मिकुन वने पकाय तकलिप हियानुरक। अदामे ओरक नावांग पोल्लोंग मानेमायनुरक ते मियांग वने पोल्लोंग मानेमायनुरक#मत्ति १०:२४; लूका ६:४०; युह १३:१६। 21मति ओरक नाकुन लोहवालतुन पुनोरक इन्जोर नावा पोरोयता कारणते इव सबोय पोल्लोंग ओरक मियासंग कियानुरक। 22अनि नना वायोन आस मनेना अनि ओरासंग वळकोन आस मनेना ते ओरक पापि ठहरे मायो आस मनेरक; मति इदेक ओरा पाप साटि बोदायि बहाना हिले। 23अनि नाकुन दुश्मनि किन्तोर ओर नावोर बाबोन वने दुश्मनि किन्तोर। 24अनि लोकुरकनिगा बोरे बसकेय केवोरक ओद चमत्कारता बुतो नना किस तोहतान। अनि नना ओद बुतो केवोन आस मनेना ते ओरा पाप साटि ओरकुन दोषि ठहरे केवोर आस मनेर। मति इदेक ओरक नावा द्वारा किता चमत्कारतुन हुळतोरक ते वने नाकुन अनि नावोर बाबो माक इवुरासकुन ओरक दुश्मनि किन्तोरक। 25मति ‘ओरक बिना कारणते नाकुन दुश्मनि किन्तोरक#भज ३५:१९; ६९:४’ इदाम परमेस्वरना पवित्र पुस्तकतिगा कोटता मन्ता ओद पोल्लो पुरा आयिला साटि इदामे आतु।”
26येसु ओरकुन असा इतुर, “मति नना बाबोनिकेडाल मिया हेरे लोहका ओर मदत केवाल, ओर बाबोनिकेडाल पसियान्ता खरोयता आत्मा मन्तोर, ओर वायनुर असके नावा गवाहि ओर हियानुर। 27अनि निमाट मुनेटाले नावासंग मतोरिट इन्जोर निमाट वने नावा गवाह हिम्ट।”
Kasalukuyang Napili:
युहनाल 15: fmu
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© (Active) Wycliffe Bible Translators, Inc. All rights reserved.
