युहनाल 10

बेळांग अनि मेहवाल

1पजा येसु इतुर “बोने कोळका लोपा हन्दाना मतेक ओर टाटरा तरियस लोपा हन्दिला पहाजे इन्जोर नना मिकुन खरोय इन्तोना मति बोरायि दुसरो हरिते लोपा दान्तोर ओर कलेर अनि ओन्डकाल आन्दुर। 2मति टाटराताल लोपा दान्तोर ओरेय बेळानांग मेहवाल मन्तोर। 3अनि कोळकाता टाटराता केपवाल ओना साटि टाटरातुन तरियान्तोर। अनि ओर आपुना बेळानुंग पोरोय येतस येतस केयान्तोर अनि बेळांग ओना लेंग पुन्तांग अनि ओर बेळानुंग मेहान साटि बाहरो ओन्तोर। 4बसके ओर आपुना बेळाना गोहडितुन बाहरो पसहान्तोर असके ओर गोहडिता मुने मुने दान्तोर अनि बेळांग ओना लेंग पुन्जुन ओना परके परके दान्तांग। 5मति अव दुसरो मानेयना परके हनोंग आयनुंग, अव दुसरोना लेंगदुंग पुनोंग इन्जोर ओनाताल लक वितानुंग।” 6बसके येसु ओरकुन इद उदाहरनते इतुर, मति इव पोल्लोंग ओर माकुन इन्दिला आतोर इन्जोर अदेना अर्थ ओरकुन समजेमायो।

येसु बेस मेहवाल मन्तोर

7अनि अदेना अर्थ ओरकुन समजेमायो इन्जोर असके येसु असा ओरकुन इतुर, “नना मिकुन खरोय खरोय इन्तोना कोळकाता टाटरा ननाय आन्दान। 8अनि नावा मुने बचोक मेहवालोर वातुर ओर सबोय कलेर अनि ओन्डकाल मतोरक इन्जोर नावांग बेळांग ओरा लेंगदुन केन्जोंग आतुंग#यहेज ३४:१-२४। 9अनि टाटरा ननाय आन्दान। बोरायि नावा द्वारा लोपा दायनुर ओन पिसानुर अनि ओर लोपा वाय परान्तोर अनि बाहरो हन्दिला परान्तोर। अनि बारायि ओना जरुरि मन्ता ओन ओद पुटार। 10अनि कलेर वान्तोर ते केवल बेळानुंग कलिला अनि हव्कसुन नाश कियान साटि वान्तोर मति नना अवेकुन जिवन हियान साटि वातोना अनि नना हिन्तोना ओद जिवन पकाय अनि सोबाय मन्ता। 11बेस मेहवाल ननाय आन्दान। अनि बेस मेहवाल ओना बेळानुंग पिसहान साटि आपुना जिवा वने हिन्तोर। 12अनि रोजिते बेळांग मेहवाल ओर खरोय बेळांगना मेहवाल लेहका आयोर। अनि ओर बेळांगना मालकाल वने आयोर, ओर लाडंगाहकुन वायानपा हुळसुन बेळानुंग विळिचि वितान्तोर। अनि लाडंगाह अवेकुन पयान्ता अनि हिके होके किस वाटिन्ता। 13बाक्याकि रोजिते बेळांग मेहवाल ओर केवल रोजिसाटि बुतो किन्तोर अनि ओर ओना बेळांगना बारेते बारायि विचार हिले। 14-15मति बेळांगना बेस मेहवाल ननाय आन्दान। बदाम नावोर बाबो नाकुन पुन्तोर अनि नना बाबोन पुन्तोना अदामे नना आपुना बेळानुंग पुन्तोना अनि नावा बेळांग नाकुन पुन्तांग अनि नावा बेळानुंग पिसहान साटि नना आपुना जिवा वने हिन्तोना#मत्ति ११:२७; लूका १०:२२ । 16अनि इद कोळकाता आयोंग दुसरोवने बेळांग नाकुन मन्तांग, नाकुन अवेकुन वने तताना जरुरि मन्ता, अव नावा पोल्लोंग केन्जानुंग असके उन्दिय गोहडि अनि वरोरे मेहवाल आयनुर। 17अनि नना असा जिवेमायान साटि आपुना जिवा हिन्तोना इन्जोर नावोर बाबो नाकुन मया किन्तोर। 18अनि बोरायि अदेन नावाताल उन्च ओयोर, नना आपुने अदेन हिन्तोना, नाकुन अदेन हियानाता अदिकार मन्ता अनि अदेन असा वापस येताना वने अदिकार मन्ता। अनि इद आग्या नाकुन नावोर बाबोनिकेडाल पुटता।”

19अनि इव पोल्लोंगना कारणते यहुदि अदिकारि लोकुरकनिगा फुट आतुरक। 20अनि “ओनागा दुष्टात्मा मन्ता अनि ओर बयहाल मन्तोर इन्जोर ओनांग केन्जमाट?” इन्जोर हुचुक लोकुरक इन्दिला लागतुरक। 21अनि दुसरो हुचुलोरक, “इव पोल्लोंग दुष्टात्मा मन्वाल मानेय किया परोर बाक्याकि दुष्टात्मा आन्दराल लोकुरा कोन्डांग सुदरे किया परोर” इदाम इतुरक।

यहुदि अदिकारि लोकुरक येसुन विरोद किन्तोरक

22अनि येरुसलेमतिगा स्थापनता हनुम किन्दुरक। अनि ओद पिनिता बेरा मता, 23अनि येसु मन्दिरता डुवारतिगा सुलेयमान पोरोयता टाटरा हेरे वलियन्दुर। 24असके यहुदि अदिकारि लोकुरक वास ओन नोवच्तुर अनि “निमा माकुन बचोक दियांग मकिहच इरकि। बाताल निमा मसिहा आन्दि ते माकुन खरोय वेहा इन्जोर पुच्चेमातुरक।” 25अनि येसु ओरकुन उत्तर हितुर, “नना ओरे आन्दान इन्जोर नना मुनेय मिकुन इतोना मति निमाट नावा इन्दानातुन विस्वासेय केविट। अनि नावोर बाबो हिता अदिकारते बोद चमत्कारता बुतो नना किन्तोना अद वने नना ओरेय आन्दान इन्जोर गवाहि हिन्तांग। 26मति निमाट नावा बेळांगनिगडाल आयविट इन्जोर विस्वास केविट। 27अनि नावा बेळांग नावा पोल्लोंग मानेमातांग। अनि नना अवेहकुन पुन्तोना अनि अव नावा परके परके ताकान्तांग। 28अनि नना अवेहकुन अनन्त जिवन हिन्तोना, अनि अव बसकेय नाश आयो आयनुंग। अनि बोरायि अवेहकुन मेहान साटि नावाताल उन्दोर आयनुर। 29अनि अवेहकुन नाकुन हितोर नावोर बाबो सबोयताल हजोर मन्तोर अनि बोरायि बाबोना कयदाल उन्च परोर। 30नना अनि नावोर बाबो उन्दिय मन्तोम।” 31असके यहुदि अदिकारि लोकुरक येसुन हियान साटि कल्क ताहतुरक। 32येसु ओरकुन पुच्चेमातुर, “बाबोना लावदे नना पकाय सोबाय सोबाय बुतो कितोना। अनि निमाट हुळतोरिट ते पजा अगडाल बोद बुतो साटि नाकुन कल्क ताहतोरिट?” 33अनि यहुदि अदिकारि लोकुरक ओन इतुर, “बोदायि सोबाय बुतो साटि माक निकुन कलदे हेवोम, मति निमा बोद इन्तोन अदेनते निमा परमेस्वरना अपमान किन्तोन! निमा केवल वरोर मानेय मन्ज आपुनतुन परमेस्वर बनेहकिन्तोन इन्जोर माक निकुन कल्क हिस हव्कस वाटकोम।” 34अनि येसु ओरकुन उत्तर हितुर “‘नना मिकुन परमेस्वरक इन्तोना’#भज ८२:६ इदाम मिया नियमता पुस्तकतिगा कोटता मन्ता#१०:३४ भजन संहिता ८२:६ तिगा परमेस्वर हुचुक न्याय केवालोरकुन परमेस्वर इन्जोर इतोर।। 35अनि परमेस्वरना पोल्लो बोना हेरे वाता ओरकुन परमेस्वरक इन्जोर ओर इतुर ते परमेस्वरना पोल्लो बसकेय नाश आय परोंग। 36ते बाबो अलग किसुन दुनियातिगा लोहतोर नाकुन ‘नना परमेस्वरनोर मरि आन्दान’ इदाम नना इतोना इन्जोर नना परमेस्वरना अपमान किन्तोन इदाम निमाट बाक्या वळकान्तोरिट? 37अनि नना आपुना बाबोना बुतोंग केवोन ते नावा विस्वास केमाट। 38मति नना नावा बाबोना बुतोंग किन्तोना ते निमाट नावागा विस्वास केविट ते वने नना बोद चमत्कारता बुतो किन्तोना अदेनिगा निमाट विस्वास किम्ट, असके बाबो नावागा मन्तोर अनि नना बाबोनिगा मन्तोना इन्जोर निमाट पुन्किट अनि ओद समजेमायनातिगा निमाट मनकिट।” 39असके ओर लोकुरक येसुन असा पयान साटि कोसिस कितुरक, मति ओन पय परोर आतुरक अनि ओर ओरा कयदाल पसिस हतुर।

40अनि पजा ओर यरदन नदिता ओद पकाड बगा बपतिस्मा हेवाल युहन्नाल पहले बपतिस्मा हिन्दुर ओद जागातिगा हतुर अनि अगाय मतोर#युह १:२८। 41अनि पकाय लोकुरक येसुना हेरे वास आपसते इदाम वळकिन्दुरक, “बपतिस्मा हेवाल युहन्नाल बसकेय चमत्कारता बुतोंग किस तोहोर मति येर मानेयना बारेते युहन्नाल बोदायि इन्ज मतोर ओद सबोय खरोय मता।” 42अनि अगा पकाय लोकुरक येसुनिगा विस्वास कितुरक।

Kasalukuyang Napili:

युहनाल 10: fmu

Haylayt

Ibahagi

Kopyahin