बुतोंग 9
9
शावुल प्रबु येसुन मिलेमान्तोर
(बुतोंग २२:६-१६; २६:१२-१८)
1शावुल इदेकवनाह प्रबुना चेलालोरकुन धमकि हियाना अनि हव्काना बुतो किसोर मतोर। ओर हजोर याजकना हेरे हन्जुन 2मसि विस्वास येतितोर बोरे मानेय या आसकिन हापळेमायनुंग ते ओरकुन दोहच येरुसलेम तरीर इन्जोर ओन दमासकस सहेरता यहुदि लोकुरा समाज मन्डिलि साटि येरुसलेमता मुक्य याजकना कयदाल अदिकारता चिटिंग तलकतुर। 3शावुल मुक्य याजकना कयदाल ओद अदिकारता चिटिंग येचुन हुचुलोर लोकुरासंग हनेक हनेक दमासकस सहेरता हेरे अवतुर असके हुरहायने आबारताल ओना नालुंगास बासा उन्दि हजोर ज्योति मान्जतु। 4अनि ओर जागातिगा अरतुर, “हे शावुल, हे शावुल, निमा नाकुन बाक्या सतेह किन्तोन?” इदाम ओन इन्ताना उन्दि लेंग ओर केन्जतुर। 5“हे प्रबु, निमा बोर आन्दि?” इन्जोर शावुल पुच्चेमातुर। “निमा पकाय तकलिप हिन्तोन ओर येसु नना आन्दान। 6मति इदेक निमा तेदस सहेरतिगा हन; अनि अगा निमा बाताल कियाला पहाजे इन्जोर निकुन वेहानुर” इदाम इतुर। 7ओनासंग मतोरक ओद पोल्लोते केन्जिन्दुरक मति बोने हुळोर आन्दुरक इन्जोर ओरक वरियस कमेक मतोरक। 8असके शावुल जागातिगाडाल तेदितुर अनि कोन्डांग तरियतुर असके ओन बाराय दिसो आतु, अनि ओनासंगे मतोरक ओना कय पयस दमासकस सहेरतिगा ओतुरक। 9ओर मून्ड दियांगवनाह हूळ परोर आतुर, अनि बाताले तिनोर अनि उन्नोर आतुर।
शावुल बपतिस्मा येतिन्तोर
10दमासकस सहेरतिगा हनन्याह पोरोयतोर मसिना वरोर चेलाल मतोर, ओन प्रबु दर्शन हिस “हे हनन्याह!” इन्जोर केयतुर। “हा, प्रबु नना इगा मन्तोना!” इन्जोर ओर उत्तर हितुर। 11असके प्रबु ओन इतुर, “निमा तेदचुन ‘सिदो हरि’ पोरोयता गलितिगा हन्जुन यहुदाना लोतिगा तुरतुस सहेरतोर वरोर शावुल पोरोयतोर मानेयतुन पुच्चेमाम, हुळा! ओर यहुदाना लोतिगा इदेक प्रार्थना कियाला आतोर, 12अनि शावुल उन्दि दर्शन हुळतुर: हनन्याह पोरोयतोर वरोर मानेय आपुना हेरे वास आपुना पोरो ओना कय इरतुर असके असा हूळ परतुर” इन्जोर इतुर। 13अनि हनन्याह उत्तर हितुर: “हे प्रबु, येर मानेय येरुसलेमतिगा निया पवित्र लोकुरासंग हजो-हजोह खराब बुतो कितोर इन्जोर पकाय लोकुरकनिकेडाल नना येर मानेयना बारेते केन्जतोना। 14इदेक ओन दमासकसनिकेडाल वने वातुर। निया पोरोय येतितोरक सबोयलोरकुन दोहिर इन्जोर मुक्याल याजक लोकुरकनिकेडाल अदिकार पत्र ओना हेरे मन्ता” इन्जोर हनन्या उत्तर हितुर। 15मति प्रबु ओन इतुर, “निमा हन, बाक्याकि ओर ते यहुदि आयोर लोकुरकुन अनि राजाहकुन अनि इस्रायेल लोकुरा मुने नावा पोरोय तोहान साटि नना आचतोर सेवक मन्तोर। 16अनि नावा पोरोय साटि ओन बदाम-बदाम पकाय तकलिप लागार इन्जोर नना ओन वेहका” इन्जोर इतुर। 17असके हनन्याह तेदचुन ओद लोतिगा हन्जुन शावुलना पोरो आपुना कय इरस इतुर, “हे तमो शावुल, निमा असा हुळिला पहाजे अनि पवित्र आत्माता पुरा नियत्रणते आयिला पहाजे इन्जोर निमा वायानपा हरिते दिस मतोर ओर प्रबु येसु नाकुन मिया हेरे लोहतोर” इन्जोर इतुर। 18अनि सान्डेय ओना कोन्डांग लोपाडाल मिळतेंग लेहका अरतुंग अनि ओर हुळिला लागस तेदचुन बपतिस्मा येतितुर। 19पजा जेवनकिस लाव पुटहितुर। अनि ओर दमासकस सहेरतिगा मतोर चेलाह लोकुरासंग ओर हुचुक दियांग मतोर।
दमासकस सहेरतिगा शावुल येसुना सोबाता पोल्लो वेहान्तोर
20अनि शावुल सान्डेय यहुदि लोकुरा समाज मन्डिलिंगतिगा हन्जुन येसुये परमेस्वरनोर मरि आन्दुर इन्जोर येसुना बारेते वेहिला लागतुर! 21असके सबोय केन्जवालोर चकेमास इन्दिला लागतुरक, “येरुसलेमतिगा येसुना पोरो विस्वास किन्तोर लोकुरकुन नाश किन्तोर बाताल येर ओरे आयोर बहे? अनि इगा वने येसुनिगा विस्वास किन्तोर लोकुरकुन पयस ओरकुन दोहच मुक्या याजक लोकुरा हेरे ओयिर इन्जोर ओर वातुर” इन्जोर इतुरक। 22मति शावुलना वळकाना असा असा पकाय लाववाले आसोर येसु येरे मसि आन्दुर इदाम तोहचुन ओर दमासकस सहेरतिगा मन्वालोर सबोयि यहुदि लोकुरा टोडितुन बन्द किसोर मतोर।
शावुलिन हव्कान साटि यहुदि लोकुरा योजना
23पकाय दियांग आतुंग असके यहुदिलोकुरक मिलेमास शावुलिन हव्काना योजना कितुर#२ कुरि ११:३२,३३। 24मति ओरा योजनातुन शावुल पुतुर; ओरक ते ओन हव्कान साटि नरकापलिंग सहेरता पाटकतिगा केपालोरकुन इरतुरक। 25मति नरका ओनोर चेलालोर ओन बूटितिगा उपिहतुरक अनि सहेरता गुटता बुकाताल वळहिच ओन अडिय रेहचितुरक।
येरुसलेमतिगा शावुल येसुना सोबाता पोल्लो वेहिन्तोर
26शावुल येरुसलेमतिगा अवतपा ओर चेलालोकुरासंग मिलेमास मन्दाना पकाय कोसिस कितुर, मति ओर वने येसुना चेलाल आन्दुर इदाम ओरकुन विस्वास आयो आन्दु इन्जोर सबोय चेलालोरक ओन वरियन्दुरक। 27मति बरनबास ओन येचुन येसुना खास चेला लोकुरा हेरे ओतुर। येर दमासकस हन्दानपा हरितिगा प्रबुन हुळतुर अनि प्रबु येनासंग पोल्लोंग कितुर अनि पजा दमासकस सहेरतिगा येसुना बारेते हिमतते वेहतुर इन्जोर बरनबास ओरकुन वेहतुर। 28अनि पजा शावुल येसुना खास चेला लोकुरासंग सबोय येरुसलेमतिगा हन्जोर-वासोर प्रबुना बारेते हिमते वेहचोर मतोर। 29अनि युनानि बोलि वळकवालोर यहुदिलोरासंग ओर वळकाना अनि वाद-विवाद किन्दुर, मति ओरक ओन हव्काना कोसिस कियाला लागतुर। 30दुसरो विस्वासि लोकुरक इद पुन्ज ओन कयसरिया सहेरतिगा ततुरक अनि अगडाल तरसुस सहेरतिगा लोहतुर।
31अनि पजा सबोय यहुदि अनि गलीलि अनि सामरि प्रदेशतिगा मसिलोकुरा सभातुन शान्ति पुटतु अनि विस्वासि लोकुर प्रबुना वरेते ताकसोर अनि पवित्र आत्माता मदतते आपुना विस्वासतिगा मजबुत आस विळसोर हतुर।
लुदा अनि याफा सहेरतिगा पतरसना द्वारा अत्भुत बुतो तोहिन्तोर।
32पजा पतरस सबोय जागातिगा वलियसोर लुदा सहेरतिगा मन्जोर मतोर पवित्र लोकुरा हेरे वने अवतुर। 33अगा ओन एनियास पोरोयतोर लकवा बिमारितोर वरोर मानेयिन मिलेमातुर, ओर आट वरसाताल कटुलतिगा अरस मतोर। 34पतरस ओन इतुर, “हे एनियास! येसु मसि निकुन सुदरे किन्तोर। तेदा, आपुना बोतरि ताहा” इन्जोर इतुर; असके ओर सान्डेय तेदस नितितुर। 35असके लुदा अनि शारोनतोर सबोय मन्वालोर अनियासिन हुळस प्रबुनिगा विस्वास कितुरक।
36याफातिगा तबिता पोरोयता उन्दि विस्वासि आळ मन्जोर मता। (अदेना पोरोयता अर्थ कोडराल इन्जोर मता)। ओद पकाय सोबाय बुतो अनि दान किसोर मता। 37अवे दियाते ओद बिमार आस हातु, अनि ओव अदेन एर तुंगस पोरोडा माळिता खोलितिगा इरतुंग। 38लुदा सहेर याफा सहेरता हेरे मता#९:३८ लुदा सहेर जोपा सहेरता दहा किलोमिटर दक्षिण-पूरव भागते मता।, इन्जोर पतरस अगा मन्तोर इदाम चेलालोर केन्जचुन, “मावा हेरे वायान साटि बेरा केमा” इन्जोर विनन्ति कियान साटि इवुर मानेयकुन ओना हेरे लोहतुर। 39असके पतरस ओरासंग हतुर, पतरस अगा अवतपा ओरक पतरसिन पोरोडा माळिता खोलितिगा ओतुर। अगा सबोय रान्डिह आसक किलसोर पतरसना हेरे वास नितितुंग, अनि तबिता ओरासंग मन्दानपा बनेकिता कुरतांग अनि सन्दरांग पतरसिन तोहिला लागतुंग। 40असके पतरस सबोय लोकुरकुन बाहरो लोहतुर अनि मिन्डांग टेकेकिस प्रार्थना कितुर अनि तबिताना मुरुदातिके हुळस इतुर, “हे तबिता, तेदा।” असके ओद आपुना कोन्डांग तरियतु, अनि पतरसिन हुळस तेदस उदित। 41ओर कय हिस अदेन तेहतुर, अनि पजा परमेस्वरना पवित्र लोकुरक अनि रान्डिह आसकुन लोपा केयस अदेन जिवित मन्ता इन्जोर तोहतुर। 42इद पोल्लो सबोय याफातिगा फयलेमातु अनि पकाय लोकुरक प्रबुनिगा विस्वास कितुरक। 43अनि पतरस याफा सहेरतिगा तोलांगता बुतो केवाल शिमोना लोतिगा पकाय दियांगवनाह मन्दुर।
Kasalukuyang Napili:
बुतोंग 9: fmu
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© (Active) Wycliffe Bible Translators, Inc. All rights reserved.