बुतोंग 7
7
स्तिफानुस यहुदि लोकुरा हजोर सभाता मुने वळकान्तोर
1असके हजोर याजक पुच्चेमातुर: “बाताल इव पोल्लोंग खरोय मन्तांग बहे?”
2स्तिफानुस इतुर, “हे बाबा-दादालोरक केन्जाट। मावोर बाबो अब्रहाम हारान नाटेनिगा मन्दाना मुने मेसोपोटामिया प्रदेशतिगा मतोर असके सबोयताल हजोर परमेस्वर ओन दिसतुर#उत्प १२:१। 3अनि परमेस्वर ओन ‘निमा आपुना देश अनि आपुना परिवारतुन तासिस नना निकुन तोहका ओद देशतिगा हन’ इन्जोर इतुर। 4असके ओर कसदिया लोकुरा देशताल पसियस हारानतिगा हन्ज मतोर। ओना बाबोना हायानाता पजा परमेस्वर ओन हारानताल तचुन इदेक निमाट मन्तोरिट इद देशतिगा मन्दिला हितुर#उत्प ११:३१; उत्प १२:४। 5अनि ओन बाराय हक्क हेवोर आतुर, काल्क इरिला इतमेन्ड गला जागा वने हेवोर आतुर; अनि ओन बालक हिलेर आसि ते वने ‘इद देश निकुन अनि निया हातपा निया पेकोरा कयदे हियाका’#उत्प १२:७; १३:१५; १५:१८; १७:८; निर ३:१२ इदाम परमेस्वर ओन वाचा हितुर। 6अनि परमेस्वर ओन इदाम वने इतुर, ‘निया सन्ताननोर लोकुरक दुसरो देशतिगा परदेशि आयनुरक, अनि ओरक निया सन्ताननोर लोकुरकुन दास बनेहकियानुरक अनि नालुंग नुहक वरसांगवनाह ओरक मिया सन्ताननोर लोकुरक अगा पकायि तकलिप हियानुरक#उत्प १५:१३,१४ । 7अनि मिकुन दास कियानुरक ओर लोकुरकुन नना दन्ड हियाका, अनि पजा ओरक अगडाल पसियस इदे जागातिगा वासुन नावा आरादना कियानुरक#निर ३:१२’ इन्जोर परमेस्वर इतुर। 8अनि परमेस्वर अब्रहामनासंग उन्दि करार कितुर। ओद करारता चिन्ह कतना#७:८ यहुदि लोकुरा रिति रिवाच अनुसार हुळिला नुनालना उन्दि नसतुन कदिन्दोर। मता, अनि पजा अब्रहामिन इसहाक जनमा आतुर अनि आटवो दिया ओना कतना कितुर, अनि इसहाकताल याकुब अनि याकुबताल बारा पेकोरक जनमा आतुर ओरक मावोर यहुदि लोकुरा पुरकातोर मन्तोरक#उत्प १७:१०-१४; उत्प २१:२-४; उत्प २५:२६; उत्प २९:३१—३५:१८।”
9स्तिफानुस असा इतुर, “ओरक पुरकातोर लोकुरक यूसुफिन हेवा किस ओन मिस्रि देशतिगा हनवालोरा कयदे मोमसितुरक, मति परमेस्वर ओनासंग मतोर#उत्प ३७:११; उत्प ३७:२८; उत्प ३९:२,२१। 10अनि परमेस्वर ओना सबोय तकलिपताल पिसहिच मिस्रि देशतोर राजाल फिरोना मुने येताना योग्य अनि बुद्धिमान बने कितुर, अनि राजाल यूसुफिन मिस्रि देशतिगा अनि आपुना सबोय परिवारतिगा अदिकारि आस आचतुर#उत्प ४१:३९-४१। 11असके मिस्र अनि कनानता सबोय देशतिगा हाळोक अरतु, अदेनते पकाय तकलिप आतु, अनि मावोर आजि-दादिलोरकुन जेवन पुटो आन्दु#उत्प ४२:१,२। 12मति मिस्रि देशतिगा तिन्दान साटि नुकांग, गोहक मन्तांग इदाम केन्जुन याकुब आपुना पेकोरकुन मन्जे मावोर आजि-दादिलोरकुन पहले बेरा लोहतुर। 13दुसरो बेरा यूसुफ आपुना तमोलोरकुन आपुनास परिचय वेहतुर अनि यूसुफना परिवारता बारेते फिरोन वने समजेमातुर#उत्प ४५:१; उत्प ४५:१६ । 14असके यूसुफ आपुनोर बाबो याकुब अनि आपुना सबोय परिवारतुन केयिला लोहतुर ओरक सबलोर पन्चाहतर लोकुरक मतोरक#उत्प ४५:९,१०,१७,१८; उत्प ४६:२७ । 15इदाम याकुब मिस्रि देशतिगा हतुर अनि अगा ओर अनि मावोर आजि-दादिलोर हातुरक#उत्प ४६:१-७; उत्प ४९:३३। 16अनि ओरा मुरदांग शकेमतिगा ओतुर अनि शकेमतिगा हमोरना मरिताल अब्रहाम चान्दि हिस अस मतोर ओद बिजगुडितिगा ओरकुन मिसितुरक#उत्प २३:३-१६; ३३:१९; ५०:७-१३; यहेशु २४:३२।”
17स्तिफानुस असा इतुर, “परमेस्वर अब्रहामिन वाचा हिस मतोर ओद पोल्लो पुरा आयाना बेरा हेरे वातु असके मिस्रि देशतिगा मावोर यहुदि लोकुरा संख्या पकायि विळतुरक अनि पकाय आतुरक#निर १:७,८। 18असके यूसुफिन पुनोर दुसरो राजाल मिस्रि देशतिगा राज कितुर। 19ओर मावोर लोकुरकुन दोखा किस मावोर आजि-दादिलोरासंग पकाय खराब व्यवहार कितुर अनि ओरा बालक जितो मनमाकिर इन्जोर बाहरो हरचिहला लागतु#निर १:१०-११; निर १:२२। 20ओद बेरा मूसाना जनमा आतु। ओर परमेस्वरना मुने दिसान साटि पकाय सोबाय मतोर। मून्ड महिनांगवनाह ओना पालन-पोषण ओना बाबोना लोन आतु#निर २:२ । 21अनि पजा ओन बाहरो बाहरो हरचितुरक असके फिरोना पेडि ओन ताहतु अनि आपुना मरि लेहका पाले कितु#निर २:३-१०। 22मूसान मिस्रिलोरा सबोय शिक्षण करिहतुर अनि ओर वळकना अनि बुतो कियाना इव रन्डास पोल्लोतिगा पकाय लाववाले मतोर।”
23स्तिफानुस असा इतुर, “ओर च्याळिस वरसानोर आतुर असके नावोर इस्रायेल तमोलोरकुन मिले मायका इदाम ओना मन्दिगा विचार वातु#निर २:११-१५ । 24ओर वरोर मिस्रितोर मानेय इस्रायेलतोर मानेयनिगा खराब व्यवहार आयानपा हुळसुन इस्रायेलतोर मानयतुन मदत कियाला हतुर। अनि ओन मिस्रितोर मानेयतुन हव्कस ओना खराब व्यवहारता बदला येतितुर। 25परमेस्वर ओना कयदाल ओरकुन पिसानुर इन्जोर ओनोर तमोलोर समजेमायनुर इदाम मूसा विचार कितुर मति ओरक ओद पोल्लो समजेमायोर आतुरक। 26दुसरो दिया इवुर यहुदिलोकुरक वाहचन्दुरक असके मूसा ओरा हेरे वास, ‘हे मानेयकनिटा, निमाट ते तमो-तमोलोर मन्तोरिट, वरोन दुसरोन संग बाक्या खराब व्यवहार किन्तोरिट?’ इदाम वेहचुन ओरकुन शान्त कियाना कोसिस कितुर। 27मति आपुना हेरेटोरकुन खराब व्यवहार किन्दुर, ओर ‘निकुन बोर मावागा अदिकारि अनि न्याय केवाल ठहरे कितोर?’ इदाम इन्ज मूसान गुचिहतुर। 28‘निमा निने मिस्रितोर मानेयतुन हव्कति बाताल ओद रितिते नाकुन वने हव्काना इच्चा किन्तोन बहे?’ इन्जोर पुच्चेमातुर। 29इद पोल्लो केन्जचुन मूसाल वितितुर अनि मिध्यान देशतिगा परदेशि आस मन्दिला लागतुर, अनि अगा ओन इवुर पेकोरकुन उपजेह कितुर#निर १८:३,४।”
30स्तिफानुस असा इतुर, “च्याळिस वरसांग पुरा आतुंग असके सीने मटाता वारु पल्लातिगा ओन पोतियता जुडपि मराता किसतिगा उन्दि स्वरगदूत प्रगट आतुर#निर ३:१-१०। 31मूसान इद दर्शन हुळस आश्चरय आतु, अनि हुळान साटि ओर अदेना हेरे हतुर असके ओन प्रबुना इद पोल्लो केन्ज वातु। 32‘नना नियोर आजि-दादिलोर, अब्रहाम, इसहाक अनि याकुबनोर परमेस्वर आन्दान,’ असके मूसाल वरेते कसिंगसोर मराता किसितिगा हुळाना वने ओना हिमत आयो आत। 33असके प्रबु ओन इतुर: ‘निमा नितितोन ओद जागा पवित्र जागा मन्ता इन्जोर आपुना कल्कनिगाडाल जोळांग टन्डा। 34मिस्रतिगा मन्तोर नावोर इस्रायेल लोकुरा पकायि तकलिप नना खरोय हुळतोना, अनि ओरा किलाना केन्जतोना, इन्जोर ओरकुन पिसहान साटि रयतोना। इदेक निमा वाय, नना निकुन मिस्रि देशतिगा लोहका’ इन्जोर इतुर। 35‘निकुन मावागा अदिकारि अनि न्याय केवाल बोर ठहरे कितोर?’ इदाम इन्ज ओरक इन्कार किस मतोर येर मूसान परमेस्वर पोतिता मराता किसितिगा दर्शन हिस स्वरगदूतना द्वारा अदिकारि अनि पिसिहवाल ठहरे किस लोहतुर#निर २:१४। 36येरे मानेय मिस्रि देश अनि रेंगाल समुद्र अनि च्याळिस वरसांगवनाह वारु पल्लातिगा चमत्कारता बुतोंग अनि चिन्ह तोहच तोहच लोकुरकुन बाहरो पसिहच ततुर#निर ७:३; निर १४:२१; गिन १४:३३। 37‘परमेस्वर मिया तमोहनिगाडाल मिया साटि नावोर लेहका वरोर परमेस्वरना पोल्लो वेहवालिन लोहनुर’ इन्जोर इस्रायेल लोरकुन इतुर ओर येर मूसा आन्दुर#व्यव १८:१५,१८। 38अनि सिनाय मटा पोरो आपुनासंग वळकतुर ओर स्वरगदूतसंग अनि मावोर आजि-दादिलोरासंग वारु पल्लातिगा इस्रयेल लोकुरा सभातिगा मतोर अनि माकुन हियान साटि परमेस्वरताल जिवित पोल्लोंग पुटतुंग ओर येर मूसाय आन्दुर#निर १९:१—२०:१७; व्यव ५:१-३३ । 39मावोर आजि-दादिलोरा ओनांग केन्जाना इच्चा हिले आसि इन्जोर ओरक ओन इन्कार कितुरक अनि आपुना मन्दे ओरक असा मिस्रि देशतिके मलस हतुरक। 40मावोर आजि-दादिलोरक हारुनिन इतुर, ‘माकुन मिस्रि देशताल बाहरो पसिहस ततुर ओर मूसान बाताल आतु इन्जोर माक पुनोम। इन्जोर माकुन हरि तोहान साटि पेनक बनेहकिम’ इदाम ओरक हारुनिन इतुरक#निर ३२:१। 41अवे दियांगते ओरक पया पिलाता उन्दि मूरति बनेहकितुरक। अनि ओद मूरतितुन बलि हितुरक। अनि ओरक आपुना कयदे बनेहकिस मतोर पया पिलाता ओद मूरतितिगा गिरदा कियाला लागतुरक#निर ३२:२-६। 42मति परमेस्वर ओराताल होंग आस ओरकुन आबारता खोटाल पेनकना आरादना कियान साटि तासिस मतोर। परमेस्वरना पोल्लो वेहवालोरा पुस्तकतिगा इदाम कोटता मन्ता:
‘हे इस्रायेलना परिवारतोर लोकुरक, निमाट वारु पल्लातिगा च्याळिस वरसांगवनाह
जानवरकना बलि अनि दुसरो बलिंग बाताल नाकुने हिसोर मतिट?
43निमाट आरादना कियान साटि बनेकिता मूरतिंग मतांग मोलेक पोरोयता पेनता तम्बु
अनि आपुना रिफान पोरोयता पेनता हुकोतुन वने निमाट संगे ओस मन्दिट।
इन्जोर आकरिते नना मिकुन बाबिलोनता होदपाकाळ ओस परदेशि कियाका#आमो ५:२५-२७’
इन्जोर परमेस्वरना पोल्लो वेहवालोरा पुस्तकतिगा कोटता मन्ता।”
44स्तिफानुस असा इतुर, “वारु पल्लातिगा मावोर आजि-दादिलोरक परमेस्वर ओरासंग मन्ता इदाम तोहान साटि उन्दि पवित्र तम्बु मता, मूसा हुळता ओदे आकारते इदेन बनेकियाला पहाजे इन्जोर परमेस्वर मूसान आग्या हितोर अदेना अनुसार बनेकिता पवित्र तम्बु#निर २५:९,४०। 45मावोर आजि-दादालोर ओद पवित्र तम्बुन येचुन आपुना मुनेटाल परमेस्वर पसिहसितुर ओर यहुदि आयोर लोकुरा देशतिगा यहोशुनासंग ओरक हन्दाना बेरा ओद पवित्र तम्बु वने मावोर आजि-दादालोर अगावनाह आपुनासंगे ओतुरक, अनि ओद तम्बु दावुद राजाना काळवनाह मता#यहेशु ३:१४-१७। 46परमेस्वर दावुद राजानिगा गिरिदा आतुर अनि ओर याकुबना परमेस्वरिन दरोज मन्दाना साटि उन्दि मन्दिर बनेहकियान साटि विनन्ति कितुर#२ शाम ७:१-१६; १ इति १७:१-१४। 47मति दावुदनोर मरि सुलेयमान राजा परमेस्वर साटि मन्दिर बनेहकितुर#१ राजा ६:१-३८; २ इति ३:१-१७। 48मति बाबो परमेस्वर मानेय आपुना कयदे बनेहकिता मन्दिरतिगा मनोर,
49‘स्वरग नावा सिंहासन अनि दरति नावांग काल्क इराना जागा मन्ता,
इन्जोर नावा साटि निमाट बोद प्रकारता मन्दिर बनेहकियाकिट?
अनि नावा आराम कियानाता बोद जागा हिले!
50बाताल इव सबोय चिजक नावा कयदे बनेहकिता हिलेंग बहे इन्जोर प्रबु इन्तोर#यश ६६:१,२’ इदाम परमेस्वरना पोल्लो वेहवाल इतोर बहे। 51हे जिद्दि लोकुरक! परमेस्वरना पोल्लोसाटि मन अनि कविंग हेवोरक घमेन्ड लोकुरक मिवोर आजि-दादिलोरा लेहका निमाट दरोज पवित्र आत्माता विरोद किन्तोरिट#यश ६३:१०। 52मिवोर आजि-दादिलोरक बोद परमेस्वरना पोल्लो वेहवालिन सतेह केवोर आस मतोर? परमेस्वरना मुने येताना योग्य आयवालना वायानाता बारेते पकाय मुनेटाले वेहतुर ओर सबोयि परमेस्वरना पोल्लो वेहवालोरकुन मियोर आजि-दादिलोरक ओरकुन हव्कतुरक। 53अनि इदेक निमाट वने ओर परमेस्वरना पोल्लो वेहवालोरक वेहच मतोरक ओर परमेस्वरना मुने येताना योग्य आयवालिन पयपिहवाल अनि हव्कवाल आतिट। निमाट स्वरगदूतना द्वारा परमेस्वर मूसान हिता नियमतुन येतितिट ते वने अदेना पालन केवि आतिट।”
स्तिफानुसिन कल्कने हिन्तोरक
54यहुदि नेता लोकुरक इव पोल्लोंग केन्जुन पकाय होंग आस ओना विरोद पल्क कडरे कियाला लागतुरक। 55मति ओर पवित्र आत्माता पुराय कबजाते आस स्वरगतिगा हुळतुर अनि परमेस्वरना महिमातुन अनि येसुन परमेस्वरना तिन्दान कयबासा#७:५५ इदेन परमेस्वरना मानेमायाना जागा इन्जोर अर्थवने मन्ता। नितितोर हुळस, 56“हुळाट, नना स्वरगतुन तरियता अनि मानेयतोर मरिन मन्जे येसु मसि परमेस्वरना तिन्दान कयबासा नितितोर हुळिला आतोना” इन्जोर इतुर। 57असके सबोय यहुदि अनि यहुदि नेता लोकुरक जोरदे केयस कविनुंग बन्द किस उन्दि आस ओनागा वितस हतुरक। 58अनि ओन सहेरताल बाहरो पसहिस हव्कान साटि कल्कने हियाला लागतुरक। स्तिफानुसना विरोद केवालोर साक्षिदारक आपुनांग मुच्चाना सन्दरांग रेहच शावुल पोरोयतोर वरोर लयोरना काल्क हेरे इरसितुरक। 59“हे प्रबु येसु नावा आत्मातुन स्विकार किम” इदाम इन्ज ओर प्रार्थना किसोर मतोर असके ओरक ते स्तिफानुसतुन कल्कने हिसोर मतोरक 60स्तिफानुस मिन्डांग टेकेकिस, “हे प्रबु, इद पाप ओरागा लावे केमा” इन्जोर जोरदे इन्जुन हासुन अडिय अरतुर।
Kasalukuyang Napili:
बुतोंग 7: fmu
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© (Active) Wycliffe Bible Translators, Inc. All rights reserved.