बुतोंग 6
6
सात सेवक लोकुरकुन आचाना
1अव दियाते चेलालोकुरा संख्या पकाय आसोर मता, असके जरुरि लोकुरक साटि दरोज जेवन तुसाना आपुना युनानि बोलि वळकवाल यहुदि रान्डिह आसकुन बराबर पुटोंग आन्दुंग इन्जोर युनानि बोलि वळकवालोर इब्रानि बोलि वळकवालोर यहुदि लोकुरा विरोदते बळबळ कियाला लागतुरक। 2असके येसुनोर बारा खास चेलाल लोकुरक सबोय विस्वासि लोकुरकुन आपुना हेरे केयस उन्दि जागा मिले कितुरक, “माक परमेस्वरना पोल्लोता बुतो तासिस जेवन तिहाना सेवातिगा मनिर इन्जोर इद बेस आयो। 3इन्जोर हे बायि-दादालोर, निमाट आपुनिगाडाल पवित्र आत्मातुन सबोय रितिते मानेमास मन्तोर पकाय ग्यानि आस सबोय लोकुरक मानेमातोर सात मानेयकुन आचकाट। अनि माक इद बुतो साटि ओरकुन ठहरे कियाकाट। 4माक ते प्रार्थना अनि परमेस्वरना पोल्लोता सेवातिगा बुतो किसोर मनकोम” इन्जोर इतुरक। 5इद पोल्लो सबोय विस्वासि लोकुरकुन सोबाय लागतु इन्जोर ओरक विस्वासते पका अनि पवित्र आत्मातुन पकाय मानेमान्तोर स्तिफानुस, फिलिप्पुस, प्रुखुरुस, निकानोर, तीमोन, परमिनास, यहुदि दरम स्विकार किस मतोर अन्ताकियातोर नीकुलावुस इचोन लोकुरकुन आचतुरक। 6येसुना खास चेला लोकुरा मुने निपिहतुरक अनि ओरक प्रार्थना किस ओरा तला पोरो कय इरस ओरकुन निवळे कितुरक।
7परमेस्वरना पोल्लो फयलेमासोर हतु अनि येरुसलेमतिगा मसिना चेलालोकुरा संख्या विळसोर हतु अनि यहुदि याजक लोकुरा उन्दि हजोर दल येसुना बारेता सोबाता पोल्लो येतितुरक।
स्तिफानुसिन बन्दि बनेहकियाना
8स्तिफानुस परमेस्वरना दयाते पकाय लावदे लोकुरकनिगा हजो-हजोह चमत्कारता बुतो अनि चिन्हाकुन कितोर। 9असके यहुदिलोकुरकनिकेडाल हुचुलोर लोकुरक वासुन स्तिफानुसनासंग वाद कियाला लागतुरक। ओर लोकुरक कुरेनि अनि सिकन्दरिया प्रदेशता लोकुरक साटि मता “स्वतन्त्र आतोर लोकुरा” पोरोयतोर यहुदि सभातोर मतोरक। किलिकिया अनि आसिया प्रदेशताल वातोर लोकुरक वने ओरासंग मतोरक। ओर सबोयि लोकुर वासुन स्तिफानुसिनासंग वाद-विवाद कितुरक। 10मति पकायि ग्यानते वळकान साटि पवित्र आत्मा ओन मदत कितुर अनि ओना विरोदते ओरक वाद-विवाद कियाला परोर इचोन सामर्थते ओन वळकतुर। 11पजा “माक मूसाल अनि परमेस्वरना विरुद येर अपमानता पोल्लोंग वळकानपा केन्जतोम” इदाम इन्दिला साटि ओरक हुचुक लोकुरकुन डबुंगना लालुच हिस तयार कितुरक। 12ओरक अदाम किसुन लोकुरकुन अनि यहुदि अदिकारिलोकुरकुन अनि मूसाना नियमतुन करिहवालोरकुन भळकेह कितुरक। पजा ओरक वास स्तिफानुसतुन पयतुरक अनि यहुदि लोकुरा हजोर सभाता मुने ततुरक। 13अनि अगा ओना विरोद खोटाल गवाह निपिहतुरक, ओरक खोटाल गवाह इतुरक, “येर मानेय मावोर पवित्र प्रार्थना लोतुन अनि मूसान नियमता विरुद वळकसोर मन्तोर। 14ओर येसु नासरि इद प्रार्थना लोतुन नाश किस मूसाल हिता नियमतुन बदलेह कियानुर” इदाम ओर इन्दानपा माक केन्जतोम इन्जोर ओरकुन वळकिहतुरक। 15असके यहुदि लोकुरा हजोर सभातिगा उदितोर सबोय लोकुरक ओनाके बेस हुळतुरक ते ओना चेहरा स्वरगदूतना लेहका हुळतुरक।
Kasalukuyang Napili:
बुतोंग 6: fmu
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© (Active) Wycliffe Bible Translators, Inc. All rights reserved.