बुतोंग 4
4
हजोर सभाता मुने पतरस अनि युहन्ना
1पतरस अनि युहन्ना लोकुरासंग वळकसोर मतोरक असके याचक लोकुरक अनि मन्दिरतुन केपवालोर सयनिक लोकुरा अदिकारि अनि सदुकि#४:१ सदुकि लोकुरक हातोर लोकुरा असा जिवेमायाना विस्वास केवोर मतोरक। लोकुरक ओरा हेरे वातुरक। 2पतरस अनि युहन्नाल लोकुरकुन करिहन्दुर अनि येसुना उदाहरण हिस हातोरिगाडाल असा जिवेमायानाता बारेते वेहन्दुर इन्जोर ओरक पकाय होंग आतुरक। 3ओरक पतरस अनि युहन्नानतुन पयतुरक अनि पोळद मुलस मता#४:३ यहुदि नियमता अनुसार बोरे मानेयतुन न्याय किया परो इन्जोर दुसरो दियावनाह जेहलदिगा इरतुर। 4मति ओरक वेहता पोल्लोतुन केन्जवालोरक निगाडाल पकाय लोकुरक विस्वास कितुर, अनि विस्वास केवालोरक सेयुंग हजारता हेरे मानेयक मतोरक।
5दुसरो दिया यहुदि अदिकारि अनि यहुदि दरमता नेता लोकुरक अनि यहुदि नियमतुन करिहवालोरक सबोय लोकुरक येरुसलेमतिगा जमा आतुरक। 6अनि हजोर याजक हन्ना अनि कयफा, अनि युहन्ना अनि सिकन्दर अनि हजोर याजकना परिवारतोर दुसरो सबोय याजक लोकुरक अगा मतोरक। 7“निमाट इद बुतो कियान साटि बोर मिकुन अदिकार हितोरिट?” इन्जोर ओरक पतरास अनि युहन्नानिन केयस ओरा नडुम निपिहच पुच्चेमायिला लागतुरक। 8असके पतरस पवित्र आत्माते परिपूर्ण नियन्त्रन आस ओरकुन इतुर, “हे अदिकारिलोरक अनि यहुदि दरमता नेता लोकुरक, 9येर कमजोर मानेयतुन किता भलायिता कारण अनि ओर बदाम बेस आतुर इन्जोर नेन्ड माकुन ओना बारेते पुच्चेमायिला आतोरिट, 10निमाट कुरुस पोरो अन्जिहच हव्कतिट अनि परमेस्वर हातोरिगाडाल असा जिवेहकितुर ओर नासरितोर येसु मसिना पोरोयतेय येर मानेय बेस आस मिया मुने नितितोर इन्जोर निमाट सबोय लोकुरक अनि सबोय इस्रायेल लोकुरक पुन्ट। 11‘ओर निमाट मिस्रि बुतो केवालोरक बेकार समजेमास हरचिता ओदे कल मन्तोर अनि ओदे लोता पयवाता विशेषाल कल आतु।’ 12दुसरो बोरे मिकुन पिसिहला परोर, माक पिसान साटि स्वरगता अडिय मानेयनिगा दुसरो बोदेय पोरोय परमेस्वर हेवोर आतुर।”
13यहुदि लोकुरा हजोर सभाता अदिकारि लोकुरक पतरस अनि युहन्नाना हिमत हुळतुरक, अनि येरक अनाळि अनि सादो मानेय मन्तोरक इन्जोर पुतुरक असके आश्चरय कितुरक, अनि येरक येसुनासंग मतोर इन्जोर ओरकुन पुतुरक। 14मति बेस आस मतोर ओर मानेयतुन पतरस अनि युहन्नानासंग नितितोर हुळतुरक इन्जोर ओरा विरोदते ओरक बाराय इन्दिला परोर आतुरक। 15इन्जोर ओरकुन सभाता बाहरो हन्दाना आग्या हिस ओरक आपसते विचार किया लागतुरक, 16“माक येर मानेयकुन बाताल कियाकाट? बाक्याकि येरा द्वारा उन्दि हजोर चिन्ह तोहता मन्ता इन्जोर येरुसलेमतिगा मन्वालोर सबोय लोकुरकनिगा प्रगट मन्ता अनि माक अदेन आयो इन परोम। 17मति इद पोल्लो लोकुरकनिगा असा वेहमाकि इन्जोरक ओरक येसुना पोरोयते असा बोरे मानेयसंग वळकमाकिर इन्जोर माक ओरकुन धमकि हियाकाट” इन्जोर इतुरक।
18अनि पजा ओरक पतरस अनि युहन्नान असो केयतुरक “येसुना पोरोयते बाताले वळकमाट अनि बाताले करिहमाट” इन्जोर चेतावनि हिस इतुर। 19मति पतरस अनि युहन्नाल ओरकुन उत्तर हितुर, “माक परमेस्वरना पोल्लोताल विळस मिया पोल्लोनुंग मानेमायकाट इन्जोर परमेस्वरना मुने भला मन्ता इन्जोर निमाटे न्याय किम्ट। 20माक मिया पोल्लो मानेमाय परोम मति बोद माक हुळतोम अनि केन्जतोम ओद पोल्लो माक वळकसोर मनकोम।” 21-22चमत्कारता बुतोते बेस आतोर ओर मानेय च्याळिस वरसाताल पकाय मतोर। घळेमास मता ओद घटनाता बारेते सबोय लोकुरक परमेस्वरना महिमा किन्दुरक। ओर लोकुरा मारे पतरस अनि युहन्नाना दन्ड कियाना पोल्लो हुळोर आस यहुदि नेतालोरक ओरकुन असा धमकि हिस तासितुरक।
हिमत साटि विस्वासि लोकुरा प्रार्थना
23पतरस अनि युहन्नान सुटेमास पजा आपुना विस्वासि लोकुरा हेरे मलस वातुरक अनि मुक्याल याजक अनि यहुदि दरमता नेता लोकुरक ओरकुन इन्ज मतोर ओद सबोय ओरकुन वेहतुर। 24इद केन्जचुन सबोय विस्वासि लोकुरक उन्दि मन आस जोरदे परमेस्वरिन इतुर, “स्वरग अनि दरति अनि समुद्र अनि अगा मन्ता ओद सबोय चिज अनि सबोय पोल्लोंग बनेह केवाल हे सबोयोतोर हजोर प्रबु#निर २०:११; नहे ९:६; भज १४६:६,
25‘दुसरो जातितोर लोकुरक बाक्या पकाय होंग किन्तोरक? अनि देश देशतोर लोकुरक बाक्या बेकार पोल्लोता योजना किन्तोरक#भज २:१-२?
26दरतितोर राजालोरक लळायि साटि नितिन्तोरक अनि प्रबु अनि ओनोर मसिना विरोदते अदिकारिलोरक उन्दि आस जमा आतुरक’
इन्जोर निमा पवित्र आत्माता द्वारा आपुनोर सेवक मावोर बाबो दावुदना टोडिते इतुर।
27निमा अभिषेक किति ओर नियोर पवित्र सेवक येसुना विरुद हेरोदेस अनि पुन्तियुस पिलातुस यहुदि आयोर लोकुरक अनि इस्रायेल लोकुरासंग खरोय इद सहेरतिगा उन्दि आतुरक#लूका २३:७-११; मत्ति २७:१,२; मर १५:१; लूका २३:१; युह १८:२८,२९ । 28निया लाव अनि इच्चाता अनुसार बारायि पहलेटाल निश्चित आस मता, ओद पुरा आयि इन्जोर ओरक अदाम कितुरक। 29अनि इदेक हे प्रबु, ओरा धमकितुन ध्यान किम अनि, 30नियोर पवित्र सेवक येसुना पोरोयते चमत्कारता बुतो अनि चिन्ह आयिंग इन्जोर सुदरे कियान साटि निमा आपुना कय मुने किम। निया पोल्लो हजोर हिमतते केन्जिहविर इन्जोर आपुनोर दासकुन दया किम।” 31ओरक इदाम प्रार्थना किस मारिहतुर असके ओरक जमा आस मतोर ओद जागा होले मातु। अनि ओरक सबोय पवित्र आत्माता परिपूर्ण नियत्रणते आतुर अनि परमेस्वरना पोल्लो हिमतते केन्जिहसोर मतोर।
विस्वासिलोरा सामुहिक जिवन
32प्रबु येसुनिगा विस्वास कितोरक उन्दि मन अनि उन्दि जिवाते मतोरक; ओरक आपुना धन संपतितुन नावा संपति इनोर आन्दुरक इन्जोर ओरा हेरे मता सबोय चिज आपसते तुसिन्दुरक#बुतोंग २:४४,४५। 33येसुना खास चेला लोकुरक पकाय लावते प्रबु येसुना असा जिवे मायाना गवाहि हिसोर मतोरक अनि ओरक सबोयकुन परमेस्वरना दया पकाय पुटसोर मता। 34डन्ड या लोन बोना हेरे मता ते ओरक अदेन मोमस-मोमस अदेनते पुटता डबुंग तन्दुरक अनि येसुना खास चेला लोकुरा काल्क अडिय इरिन्दुरक, 35अनि वरोर वरोन बदाम जरुरि मता अदेना अनुसार सबोय लोकुरकुन ओरक तुसिन्दुरक। इन्जोर ओरागा बोरे लोकुरकुन बाताले चिजता कमिघटि हिले आसि।
36यूसुफ पोरोयतोर सयिप्रसतिगा जनमे मातोर वरोर लेवि मतोर, येसुना खास चेला लोकुरक ओना पोरोय बरनबास (अर्थ हिमोतोर मरि) इरस मतोर। 37ओना हुडुक डन्ड मता, अदेन ओर मोमतुर अनि अव डबुंग तचुन येसुना खास चेलालोरा काल्क अडिय इरसितुर।
Kasalukuyang Napili:
बुतोंग 4: fmu
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
© (Active) Wycliffe Bible Translators, Inc. All rights reserved.