Matayo 8
8
1Ili andeoloka uroń, syamu shiingi ikansoṛa. 2Kasha na-wo nndu eeworwaa ni ivave. Kawwoya eemwiaa: Nndumi, kwakunda kumakii ishaaṛua vve nsha. 3Yesu kasaaṛa uko lwamwi kambaana kamwia: Nkundye, kuve nsha! Lia eni ndwaṛi ilya ya ivave ikamwuka. 4Yesu kamwia: Manya kutaie nndu, kake enda kundekworusa nkohani ulya na yuta nsimbika sheeli Mose andevavasa, amu ive mirambuye kwawo.
5Ili andefika muṛiń wa Kaperinaumu, nshili wa fira kanshea kantereva eemwiaa: 6Wui Nndumi, noore iketi lyakwa liroyo kulya kyeń kwakwa liworwa nsaka ya meengo, likee ivavyo nnu. 7Yesu kamwia: Nshaa nshenkiṛa. 8Nshili ulya kamwaṛua kanumbua: Nndumi, niń nkee mwaangu, kivaa kufike kyeń kwakwa ndi. Kurerie kirero kimwi nsi na iketi lyakwa livaa isha. 9Amu nań noore vanini vakwa, noore na vaseṛo vakee kwa si yakwa. Kwakooya nkee iia umwi: Enda, aendaa. Naia ungi: Oṛesho, ashaa. Naia iketi lia lyakwa: Tana kindo ki kilive, litanaa. 10Ili Yesu andeita kuro, kaṛiika kaia vandu valya eeryanii nawo: Namuia kya dede: Kunu kwa Vaisiraeli woose nallolya nndu ashikusurye sha uu ndi. 11Nań namuia: Vandu veengi vaukaa na taari ya ngama na taari ya ukwawuń vakaa rembo na ilya shoonga andu emwi na Abraamu na Isaki na Yakobo ifo umangiń lwa Iṛuva. 12Na vana va umangi wo vaumbutyoo wooṛo ifo llemiń. Neefo kivaa-fo kiiyo na ifina kitaku. 13Na Yesu kaia nshili ulya wa fira: Kwendye kyeń, kikuvie kuro sheeli kwanshikusura. Na iketi lyamwi likava isha kyeeri kilya kyeni.
14Neeli Yesu andefika numbeń kwa Petiro, kalolya mae wa nka wa Petiro alele kiraań kiimba kya mukunguru. 15Kambaana uko lwamwi mukunguru ulya ukamuuka. Nae kakwimboo kavaṛundya. 16Ili kundeva ukwawuń, vakamwendee veengi vaworwa mmimuyo mikasha. Nae kaumbuta mimuyo ilya mikasha na kirero kyamwi kakiṛa na woose veelolee. 17Naamu kifike kirero kilya kyeenrerwaa mmwauya kisuku Yesaya eenumbuaa: Yye aimboo saka teru ka-kwekeṛya na mavaviswa eru.
18Ili Yesu andelolya isyamu iingi liillengetyaa, kavavasa kiṛu-kwa kwa kulya. 19Ndango umwi wa mitisiṛie kanshea kamwia: Llosha, nkulatyaa kundo koose kwendaa. 20Yesu kamwia: Mabaaṛwe awore mbanga na ndee ta iṛuvewu toore fifuri, kake Mwana wa nndu awore andu a yaṛa nrwe wamwi ndi. 21Ungi kari ka vanalosho vamwi kamwia: Nndumi, shiniinga mbele muumu neende nndeṛika vaava wakwa. 22Yesu kamwia: Shisoṛa, tia iwo vafu vaṛike vafu vawo.
23Kyasia Yesu kasaama ngalaveń na vaseṛo vamwi vakansoṛa. 24Ili veekee karikari ka nruva, mburaato nini ikasha. Ngalava ikasikyo̱ mmavia a nruva. Nae Yesu eerekyee ruoń. 25Vaseṛo vamwi vakanserikya vakamwanta veenumbuaa: Wui Nndumi tikiṛe, tikee isia deń. 26Nae kavaia: Nkiki ili mukee veeṛei kuri? A baa vandu va ikusura yaangu! Kakwimboo kanaya mburaato na nruva. Lia eni fikasia do do. 27Vandu valya vakariika veenumbuaa: A nndu uu wwa mikae ingai, mburaato imwirikye na nruva?
28Ili andefika kwa kulya urukeń lwa Vagerigesa, kakwanya na vandu vavili vaworwa mmimuyo mikasha vauka neefo mbangeń ta vafu. Nawo wavaave nnu, nta nndu eekee imakii iira shia ilya. 29Lia eni vakaṛoṛongya nnu veenumbuaa: Nkiki toore nawe, Yesu Mwana wa Iṛuva? Naare? Kwansha ishetivavisa kitaare kyeeri kyamfika? 30Kwaasha na io vakai iiyoo shoo ya nguve ikee iiswa. 31Mimuyo ilya mikasha ikantereva iinumbuaa: Kwantuumbuta, tiie teende shooń ilya ya nguve. 32Yesu kaiia: Kwendyeń! Nayo ikasomuka-fo ikandeaka ifo nguveń. Kwibari shoo ilya ya nguve ikatembeṛuke ikakweeṛa wangeń ikasia nruveń ikafiya-fo. 33Kyasia veesi vakarisha vakaenda kumande muṛiń vakakwanisa mboni toose na akwaa n ta valya veewarwaa mmimuyo mikasha. 34Llyo vandu va muṛi woose vakwimboo vandekwanya na Yesu. Neeli vandellolya, vakantereva akwimboo miyanuń yawo.
Kasalukuyang Napili:
Matayo 8: RWK72
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
