Yohanes 3
3
Gusti Yésus lan Nikodémus
3:1-21
1Ana wong Farisi sing jenengé Nikodémus, pengarepé wong Ju, 2nemoni Yésus ing wantyi mbengi lan ngomong: “Rabbi, kula ngerti yèn teka Panjenengan dadi guru kuwi diutus karo Gusti Allah, awit ora ana wong sing bisa nindakké tanda kaya sing Panjenengan tandangi kuwi, yèn Gusti Allah ora nunggal.” 3Yésus nyauri, tembungé: “Sak temené Aku ngomong marang kowé: yèn wong ora dilairké menèh, kuwi ora bisa weruh Kratoné Gusti Allah.” 4Semauré Nikodémus: “Kepriyé bisané wong dilairké, yèn wis tuwa? Apa bisa mlebu menèh nang wetengé ibuné, terus dilairké menèh?” 5Yésus nyauri, tembungé: “Sak temené Aku ngomong marang kowé: yèn wong ora dilairké sangka banyu lan Roh, kuwi ora bisa mlebu ing Kratoné Gusti Allah. 6Apa sing lair sangka daging, kuwi sipaté daging lan apa sing lair sangka Roh, kuwi sipaté roh. 7Aja nggumun, nanging Aku ngomong marang kowé: Kowé kudu dilairké menèh. 8Angin#3:8 Angin Tembung Yunani uga tegesé: roh. kuwi tekané miturut sak karepé, lan kowé krungu uniné, nanging ora mengertèni tekané lan parané. Kaya mengkono kuwi kahanané saben wong sing dilairké sangka Roh!” 9Nikodémus ngomong, tembungé: “Perkara kuwi bisané kedadian kepriyé?” 10Yésus nyauri, tembungé: “Kowé kuwi guruné wong Israèl, kok ora mengertèni perkara kuwi? 11Sak temené Aku ngomong marang kowé: Sing pada Kita rembuk kuwi, ya sing pada Kita mengertèni, lan sing pada Kita seksèkké ya sing pada Kita weruh, nanging kowé ora pada nampani paseksi Kita. 12Yèn nalika kowé Tak pituturi bab kadonyan pada ora ngandel, kepriyé bisamu pada ngandel yèn Tak tuturi bab swarga? 13Ora ana wong siji-sijia sing wis tekan menyang swarga, kejaba mung Panjenengané sing wis mudun sangka swarga, ya kuwi Putrané Manungsa.
14 #
It 21:9
Kayadéné Moses enggoné manjer ula-ulaan ing ara-ara samun, ya mengkono uga Putrané Manungsa enggoné pestiné dipanjer, 15supaya saben wong sing pertyaya marang Panjenengané pada nduwèni urip langgeng. 16Awit Gusti Allah enggoné trésna marang jagat kuwi nganti masrahké Putrané sing ora ana tunggalé, supaya saben wong sing pertyaya marang Panjenengané aja nganti nemu karusakan, nanging nduwèni urip langgeng. 17Awit Gusti Allah enggoné ngutus Putrané nekani jagat kuwi ora supaya ngadili jagat, nanging supaya jagat ditulungi rahayu karo Panjenengané. 18Sapa sing pertyaya marang Panjenengané, kuwi ora bakal diukum; nanging sapa sing ora pertyaya, kuwi wis ditibani paukuman, awit ora pertyaya ing asmané Putrané Gusti Allah sing ora ana tunggalé. 19Lan paukuman kuwi ngéné: Pepadang kuwi wis tekan ing jagat, nanging manungsa pada luwih rumaket marang pepeteng, tenimbang karo pepadang, awit penggawé-penggawéné ala. 20Awit sapa waé sing nindakké sing ala mesti sengit marang pepadang lan nyingkur pepadang, supaya aja nganti kétok penggawéané sing ala kuwi. 21Nanging sapa sing nandangi bener kuwi marani pepadang, supaya ketara yèn penggawéané kuwi ditindakké ing njeruhné Gusti Allah.”
Paseksiné Yohanes bab Gusti Yésus
3:22-36
22Sakwisé mengkono Yésus lunga menyang Yudéa ditutké karo para muridé; terus mandek ing kono lan mbaptis. 23Yohanes uga enggoné mbaptis ing Enon, sak tyedaké Salim, awit ing kono okèh banyuné. Wong-wong terus pada teka mrana supaya dibaptis, 24#Mat 14:3; Mrk 6:17; Luk 3:19, 20awit nalika semono Yohanes durung dilebokké ing pakunjara.
25Nalika semono ana bantahan para muridé Yohanes karo wong Ju bab nyutyèkké urip. 26Para murid mau terus pada nemoni Yohanes lan ngomong: “Rabbi, wong sing bareng karo panjenengan ing sabrangé laut Yordan lan sing wis panjenengan kèki paseksi kuwi ya mbaptis lan wong okèh pada nemoni mrana.” 27Yohanes nyauri, tembungé: “Wong ora bisa nduwèni apa-apa yèn ora dikèki sangka swarga. 28#Yoh 1:20Kowé déwé pada bisa gawé paseksi yèn aku wis ngomong: Aku iki duduk Kristus, nanging aku diutus mlaku ndisiki Panjenengané. 29Sing pada nduwèni pengantèn wadon kuwi pengantèn lanang; nanging kantyané pengantèn lanang sing ngadek ing sak tyedaké lan ngrungokké, kuwi bungah banget ngrungokké swarané pengantèn lanang kuwi. Ya kuwi kabungahanku lan saiki kabungahanku wis katekan. 30Panjenengané kuwi pestiné saya mundak, nanging aku iki saya suda.
31Sing tekané sangka nduwur kuwi ngungkuli sak kabèhé, sing tekané sangka bumi kuwi ya sangka bumi, lan rembuké ya kanggo perkara-perkara ing bumi. Sing tekané sangka swarga kuwi ngungkuli sak kabèhé. 32Panjenengané ngekèki paseksi bab apa sing wis didelok lan apa sing wis dirungokké, nanging ora ana wong siji-sijia sing nampani paseksiné. 33Sapa sing nampani paseksiné kuwi, ngakoni yèn Gusti Allah kuwi bener. 34Awit sing diutus karo Gusti Allah kuwi sing ngomongké tembungé Gusti Allah, awit Gusti Allah enggoné ngekèkké Rohé tanpa wates. 35#Mat 11:27; Luk 10:22Sang Bapak trésna marang Putra, lan wis masrahké samubarang kabèh marang Panjenengané. 36Sapa sing pertyaya marang Putra, kuwi pada nduwèni urip langgeng, nanging sapa sing ora manut marang Putra, kuwi bakal ora ngalami urip, nanging malah langgeng enggoné nampani bebenduné Gusti Allah.”
Kasalukuyang Napili:
Yohanes 3: KJS17
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Tèks © Surinaams Bijbelgenootschap 2018
