MATIYUT 8
8
Yetut nen aap awin aaga'ne kunik obeelom eereegerak wone
(Mrk 1:40-45, Luk 5:12-16)
1At Yetut puurom paga nen wambi wage mbareegi, it aakumi ambik at mugurok nogwe iigak, 2aap ambi awin aaga'ne kunik Yetut owagam wage nagagirik, abu'me tebe yinuk, ”Ai nogoba. Kat nen obeelom ee'naburak mbake keenok, obeelom ee'naburak op o.”
3Yoge mbareegi, at Yetut eenggi nderogon pigagangge logonet, ”Obeelom eekkaburak mbakirak me, obeelom agago pagagi o,” yinuk, awo yoge kagak, at awin nogo lek aret agagerak. 4Lek aret age mbareegi, at Yetut nen, ”Aakumi abu yoraagun o. At Ala unde menggerak nogo enegen keyaawak nduk, owagam nak o. An obeelom eekkakirak me, Muta nen, Ala ake ndogop puurak o, yereegerak nogo ti, aakumi kaawak nduk, pi nak o,” yinuk, yoreegerak.
Yetut nen aap Oroma mendek yigin unde me, ayeloman obeelom eereegerak wone
(Luk 7:1-10)
5Yoge mbareegi, o Kaperenaum unggwi wagagerak wonage me, it aap yigin unde inowe ambi Yetut owagam wage nagagirik, nggino yoge logonet. 6”Ai nogoba. An nayeloman eenggi-iyok nggilik-nggelok aago oome windak logonet, andi nggwok yagan wake agaarik o.”
7Yoge mbareegi, at Yetut nen, ”An nen obeelom eeri woraagin o.”
8Yoge mbareegi, at aap yigin unde inowe nogo nen, ”Ai nogoba. An aap mbuuluk me, kat nen an name unggwi woroorak meek o. Koone mban yemenggendak keenok, nayeloman obeelom arigin o. 9An kunduk noweewi inabu'me logonet, inoone konengge, ndi, an nawuri yigin unde an nabu'me logonet, an noone konenggwi, eeko monggoorak me, an nen aap ambi, Nak o, yoge neenok ti, nage aret. Ndi, aap ambi, Mok o, yoge neenok ti, wage aret. Ndi, an nayeloman ambi, Kat yi eeru o, yoge neenok ti, eeke, eeko menggaarak aret o.”
10Yoreegerak nogo at Yetut aruk konengge nagagirik, ”Wi!” yinuk, pi wake logonet, it inom wogogwaarak nogo yorage logonet, ”It Iterali mendek inenggela'me nen aap iniki abet nombake yogop yi ambi, an kaga'lek aret agarik o, yinuk, abet aret yokkiragi. 11Aakumi ambik agi-ogu nen wogo logomenggaarik, Abarakam kunduk, Itak kunduk, Yakup kunduk, inom at mbogut paga mendek abu'me piige minggim laago larak noorak nduk, kuwak ari nagun kwe, 12it ando, Ala abu'me pinaniyak nit aret, mbakwi nogo perak, ineebe o apit me endekem time mbo nappiyamenggerak time logonet, leenggu maakwi, ineyak nggilik maakwi, eeko logogun o, yinuk, yokkiragi o,” yoragagerak. 13Yorage nagagirik, Yetut nen aap yigin unde inowe nogo yoge logonet, ”An eeriyak abet nombakendak nogo ndak-ndak eeppagagin me, kame nak o.”
Yoge mbareegi, ayeloman nogo ne ti eyom paga aret obeelom agagerak.
Yetut nen aakumi ambik obeelom eeginabeegerak wone
(Mrk 1:29-34, Luk 4:38-41)
14Obeelom age mbareegi, Yetut nogo Peterut ame unggwage nagagirik, owanggelo inikime kani pereegerak andi nen windak wonage enegen kagagerak. 15Kage nagagirik, eenggi pigagangge mbareegi, andi lek a'nuk, kwe nogo mi'nage nagagirik, at ake eeke nagagerak.
16Ti'nuk, o kiyoma age kagak, aakumi nen it kugi inikime lik yereegwaarak ambik wogoret, at owagam piya wogo mbareegwa, Yetut oone paga it kugi ineebe iigulik mendek nogo nggiginogo wumbiige, it andi kunik mendek abok aret obeelom eeginake, eereegerak. 17Ti eereegerak nogo ti, at Ala nen at oone yorage nagagerak nabi ambi Yetaya nogo yoge kagak, at Yetaya nen ari logonet, ”At nen andi-pandi ee'ninake nogo wagangge, ndi, kugi andi lombok ee'ninake nogo lek eerogo pinanege, eereegerak o,” yinuk, yereegerak nogo a'me lik yuwak nduk, aakumi obeelom aganake nagagerak.
Yetut inom nogo logorak wone
(Luk 9:57-62)
18At Yetut nen it aakumi ambik at owagam ninggirik wonogwe nogo enegen iige nagagirik, at oone waganggwi nogo yorage logonet, ”Yi yenggenak enebagan wunda nawok o,” yinuk, yorage mbareegi, wunda nawok nduk eekwi me, 19aap Ala wone liiru mbanak unde menggerak ambi Yetut owagam wage nagagirik, ”Nogoba Ngguru wae. Kat nege logorak mbake keenok, an nimbirak aret nege logokit o.”
20Yoge mbareegi, Yetut nen, ”It pagi ti, enoona wonogwe, ndi, towe mbogut paga nugu menggaarak nogo inawiina wonogwe kwe, an aap aret nda'nagagirak yi perak, nogo yege minggim abu lek aret o,” yinuk, yoreegerak.
21Yoge mbareegi, aap oone wagangge menggerak alik ambi nen Yetut yoge logonet, ”Ai nogoba. An nogoba aa'nduk nggween taambunuk, nimbirak nawok nen, E, yo'niru o.”
22Yoge mbareegi, Yetut nen, ”It aakumi kambeegwaarak mendek nen inowe-inawot kanggwi nogo nggween taambiigo logowak nduk, teppiinok, an nimbirak nugu logowok o,” yinuk, yoreegerak.
Wiya koba'le, ”Kabolok lek aru o,” yoreegerak wone
(Mrk 4:35-41, Luk 8:22-25)
23Yoge nagagirik, Yetut yiiro paga unggwi nage mbareegi, at oone waganggwi nogo inom unggwi nogo nogogwaarik, wunda nogwe me, 24o wiya koba'le nggwok yi yenggenak paga nabuninuk wage logonet, yi nogo kilaarak-mogonik eerogo yiiro nogo taaniyak eeke kagak, at Yetut nogo, nogo yege wonagagerak. 25Nogo yege wonage me, it nen nogo nogogwaarik, eenik eeppogo logonet, ”Ninogoba! Yi ndonggonninaburak eeke me, mbet-mbet ninagap ndaru o.”
26Yogo mbareegwa, Yetut nen, ”Kit kiniki liirogon abet nombaka'lek monggotak yi, nonggop nduk kinagabiti yogo ogotik?” yorage nagagirik, mi'na'nuk, o wiya inom, yi inom, mberege mbareegi, abolok lek abu puk aret agagerak.
27Puk age mbareegi, it aakumi nogo nen, ”Wi!” yinuk, pi wako logonet, ”Wologwe. O wiya inom, yi inom, at oone konengge menggerak yi, aap nano mendek mbakop?” yinuk, yereegwaarak.
Yetut nen aap mbere kugi inikime unggwagagerak me, wumbiyareegerak wone
(Mrk 5:1-20, Luk 8:26-39)
28It aakumi Nggarara mendek iname time aap mbere kugi inikime unggwagagerak inanini inagaket yogwe me, aakumi inagabiti nen tu ti paga nogolik me, Yetut yi yenggenak enebagan wunda nage nagagirik, o time unggwage mbareegi, aap mbere nogo ndoome aakumi kanggwi iinok, piigo menggam nen Yetut ka wundi wogogwaarak. 29Ka wundi wogo nogogwaarik, inoone nggwok paga yogo logonet, ”Ala aput wae. Kat nonggop ee'ninabikit nduk wagan o? Ninooriyak eyom awo kaga, aa'nduk ninoori wagandak ya?” yoreegwaarak.
30O nda time wam ambik inogobak eerit ambit me nugwi iigo nogogwaarik, 31it kugi nogo nen Yetut yogo logonet, ”Ai Yetut. Kat nen nggiginogo wumbinaniyak mbake keenok, wam ambik inikime time unggwi nawok nduk, nggiginogo nappinanu o.”
32Inoone nabek togon Yetut yogo mbareegwa, Yetut nen, ”Nanip o,” yorage mbareegi, kugi nogo aap inikime nen wundi nogo nogogwaarik, wam inikime unggwi nogo mbareegwa, wam nogo abok aret elan me nogome nen yuulu agan yiime tabu-tabu unggwit nogo mbareegwa, yi nogo nen ndonggoninabeegerak.
33Yi ndonggoninake mbareegi, it wam ndegeninako nogogwaarak nogo, kole mbaganit o tini nggwok nogome nogo nogogwaarik, it aap kugi inikime lik yereegwaarak obeelom eeginabeegerak inigen kogogwaarak nogo abok aret mbininogo yorogogwaarak. 34Yorogo mbareegwa, it aap o time menggaarak abok aret Yetut ka wogo nogogwaarik, it iname time nen wundi nawok nduk, inoone nabek togon yoreegwaarak.
Kasalukuyang Napili:
MATIYUT 8: WNO
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
