LUKA 23

Yeso yahilwa imbiri wa Pilato

(Mat. 27:1-2,11-14; Mar. 15:1-5; Yoh. 18:28-38)

1Kiduma choosi chasingira nivahira Yeso imbiri wa Pilato. 2Vatanga kumuyaara nivavoora, “Kwanyoora mundu uyu nagirung'anyia ihiiri yitu. Yagaya avandu vavuli kutunga uvusuru ku Mwami Munene wa Rumi kandi umwene yevoola ndi aveeye Kristo, umwami.”

3Pilato yateeva Yeso “Ivi niyie Mwami wa Vayuda?”

Yeso yativura, “Ivi ovooye!”

4Pilato yavolera avasaalisi vanene nividuma via vandu, “Sindora kindu kidamanu ku mundu uyu mba.”

5Navuzwa vanigiliza ligali nivavoora, “Mundu uyu agemehizaa avandu na amigizu geege mu Vuyuda mwosi. Yatangila Galilaya na kalunu uduuki hano.”

Yeso yahilwa ku Herodi

6Lwa Pilato yahulira ndio, yateeva, “Mundu uyu aveeye Mugalilaya?” 7Lwa Pilato yamanya ndi, Yeso yatura mu kivala chamifwa na Herodi, yamutuma ku Herodi, uwaali naveeye mu Jerusalemi ing'inga yene yeyo.

8Herodi yayanza ligali lwa yalora Yeso, kigira yaali niyahulira amakuva geege kandi yegomba kolola Yeso kutura kale. Kolondekana na agayaali ni yahulira ku Yeso, Herodi yasuuviraa alalola Yeso nakora kelolekizu. 9Kunangwa yateeva Yeso mateeva manyingi ligali navuzwa Yeso siyamutivulira kindu mba. 10Avasaalisi vanene na avigizi vi Lilaga vasingira, nivamuyaala nu vululu. 11Herodi harara navasikari veve vachaya ni vaviika Yeso mu zisoni, nivamukolera kehenyahenye. Vaviika Yeso iganza indahi yuluyali ma nivamwiranyia wa Pilato. 12Ku lidiku liene yilio, Herodi na Pilato vahambana uvulina, kigira kutura hanyima vaali vasigu.

Yeso yakalagirwa likuza

(Mat. 27:15-26; Mar. 15:6-15; Yoh. 18:39—19:16)

13Pilato yalanga harara avasaalisi vanene, na aviimiliri vosi va avandu. 14Yavavolera, “Muleeti mundu uyu ku inzi nimuvooraa ndi agotizaa avandu, inzi mali kumuteeveleriza mateeva imbiri winyu, na sindora kindu kuye kali kilala ku aga mumuyaaliraa, ikiduukanaa ni likuza mba. 15Anoho Herodi, siamunyooye nilihiolo, kigira umali kumwiranyia ku kunyi mba. 16Kulwayago, ndaleka akuywi ma muvoholore.” [ 17Kunangwa vuli lidiku linene lie Lipasaka, Pilato yanigwa kovohololera avandu va Jerusalemi, muhambe mulala.]

18Navuzwa avandu yavo vosi vahanzuka nu mwoyo mulala nivavoora, “Yita mundu uyu, okovohololere Baraba!” 19Baraba yaali ni yavofwa kigira ligemehiza liakolwa mu lidaala kandi liita.

20Pilato yenya kuvoholola Yeso, kunangwa yagoonya kiduma cha vandu kandi. 21Navuzwa vahanzuka numwoyo munene nivavoora, “Muvambe! Muvambe!”

22Pilato yavavolera lwa kavaga, “Kigira ki? Mundu uyu akoli vudamanu ki? Inzi sindoli uvudamanu muye uvuduukanaa nilikuza mba. Kigira yaga, ndaleka akuywi ma muvoholore.”

23Navuzwa vazizagilira kuhanzuka vudinyu numwoyo gwosi nivenya kuzinguru, Yeso avambwe. Mu limalirika, lihanzuka liavo liaguuta.

24Kunangwa Pilato yakalaga ndi Lienya liavo livugiriywi. 25Yavoholora Baraba uwavofwa muvuhambe kigira ligemehiza vulwani nu vwiti. Uyu niyie wa yenya kuzinguru. Navuzwa yahaana Yeso kuvo vamukolere kuli venya.

Yeso yavambwa

(Mat. 27:32-44; Mar. 15:21-32; Yoh. 19:17-25)

26Lwa avasikari vaali nivahira Yeso, vaagana nu mundu mulala, uwalangwa Simoni kutura mu lidaala lia Kurene, uwaali natura mu mulimi. Avasikari yavo vamugumira nivamudwika musalaba. Vamuniga agugingi alonde Yeso inyima.

27Kiduma kenene cha vandu, vamulonda, vaali mu avakali valala vamusiomera nukumulilira ligali. 28Yeso yagirung'ana navavoolera, “Avakaana va Jerusalemi! Mutandilira mba, navuzwa mwiliriri aveene harara na avana vinyu. 29Kigira ing'inga yiza ya avandu valivoola, ‘Vaveeye nu vugasu avakali vagumba, kandi zinda ziavula kwivura avana, ni izimbeere ziavula kunyunyia.’ 30Ing'inga yeyo niyio ya avandu valitanga kovoolera vigulu, ‘Mukugwiri!’ Na ku tugulu, ‘Mukukuniki!’ 31Ligali, niiva avandu vakora vindu yivi ku musaala muvisi, na galava ki ku musaala mwumu?”

32Avandu vandi vaviri, avaakoraa vudamanu, vaahirwa, vazie kwitwa harara na Yeso. 33Lwa vaduuka ahalangwa “Gologoza” - iliveeye kovora “Ha Kihaanga”, vavaambira Yeso ahene yaho, kandi vaviika vandu vaali vakoli vudamanu yavo, mulala ku mukono mulungi nu wundi ku mukono mumosi.

34Kandi Yeso yavoola, “Baba, uvasamihi, kigira sivamanyi icha vakora mba.” Vagavulana zinguvu zizie ku likuba ikura.

35Avandu vasingira ho nivahenza, lwa aviimiliri va Vayuda vamukolera kehenyahenye. Vavoola, “Yahonyia avandi, leki yehonyie umwene niiva aveeye Kristo wa Nyasaye amali kotovola.”

36Avasikari kandi navo vamukolera kehenyahenye. Vaza ku Yeso nivamuha isiki induru anwi. 37Nivavoora, “Ivi niiva oveeye mwami wa Vayuda, wehonyie umwene.”

38Amang'oda yaga gaali higulu: “UYU NI YIE MWAMI WAVAYUDA.”

39Mulala ku vandu vaali vakoli vudamanu waali navambiywi naye yaamunyega navoora, “Ivi sioveeye Kristo? Wehonyie mwene harara ni kunyi.”

40Navuzwa wundi yamugondokera, navoora, “Ivi siunyala kutia Nyasaye kali hakuzu? Kigira, ivi oveeye mu likalagirwa lilala liere kuli uyu. 41Kunyi ligali koheveeywe amaduywa gaduukanaa ni kunyi; kigira kunyi konyoora amadanyi gi miyinzi jietu midamanu. Navuzwa mundu uyu si yakola kindu kidamanu mba.” 42Yavoola, “Yeso! Unzizulizi lwu uduuka mu Vwami vuvwo.”

43Yeso yamuvolera, “Ligali ligali ngovolera, kalunu ulava ninzi mu Paradiso.”

Likuza lia Yeso

(Mat. 27:45-56; Mar. 15:33-41; Yoh. 19:28-30)

44Yaali ahimbi saa sita zia mbasu, kisundi kenene chaduuka mu kivala choosi, kuduuka saa tisa. 45Inguvu yikitambaya iyakunikaa hatakatifu hu vutakatifu mu Litembeli yatandulwa mu kaviri. 46Yeso yalira nu mwoyo munene, navoora, “Baba, mbikaa mwoyo gwange mu makono googo.” Lwa yamala kovora yaga, yakuza.

47Ahene yaho, lwu munene wa vasikari mia yalora gaali nigekoleki, yizominya Nyasaye navoora, “Ligali uyu yaali mundu mulungi.”

48Lwi viduma via avandu vosi, avaari nivavungi ukwelolera agekolekaa valora vindu yivi, vosi virana yengo nividuyaa viritu viavo mu vovereri.

49Avandu vosi avaari nivamanya Yeso, kandi kiduma cha vakali avamulonda kutura Galilaya, vasingira hahale, nivelolera ivindu yivi.

Liyavirwa lia Yeso

(Mat. 27:57-61; Mar. 15:42-47; Yoh. 19:38-42)

50Yaali ho mundu mulala uwalangwa Josefu, kutura mu lidaala lie Vuyuda ilialangwa Arimazia. Yaali mundu mulahi kandi umulungi, yaali mulala ku vanene vi kiyaalo cha Vayuda. 51Siyavugilira amakuva gaavo ni minyinzi jaavo mba, kandi yalindiliraa Uvwami vwa Nyasaye.

52Kunangwa Josefu yazia ku Pilato naamusava muviri gwa Yeso. 53Yaagwikiza hasi kutura ku musalaba, na agulingira mu inguvu yikatani. Yaaguviika mu kilindwa ichavakwa mu ligina ichu mundu akikiri kuvikwa mu. 54Liali lidiku liu mulwa katano, lidiku lie Lietegekera. Lisabato.

55Avakali avalonda Yeso kutura Galilaya, vazia na Josefu, ni valora kilindwa kandi kuli muviri gwigwe gwaviikwa mu. 56Kunangwa virana yengo, nivalomba vindu viafunya umwayu kandi maguta gu mwayu kigira muviri gwa Yeso.

Ku lidiku lie Lisabato, vahonga kuli Lilaga lialaga.

Kasalukuyang Napili:

LUKA 23: LOGOOLI

Haylayt

Ibahagi

Kopyahin