LUKA 2

Liivulwa lia Yeso

(Mat. 1:18-25)

1Mumadiku yago lilago liatura ku Kaisaria Agosto ndi avandu vosi vang'odwi amita mu kivala choosi chamiifa na Varumi. 2Yili liali livalizwa liu kutanga lwa Kwirinio yaali mwami wa Siria. 3Kunangwa avandu vosi vazia kong'odwa sa mulala mu lidaala lilie liene.

4Josefu yalomba logendo kandi kutura Galilaya mu lidaala lia Nazareti. Yazia mu lidaala lia Bezelehemu lie Vuyuda. Kigira yaali uwinyumba kandi viko va Daudi. 5Yazia kuvalizwa harara na Maria, mukaana wa yaali niyaakwa, uwaali naveeye ni inda. 6Lwa vaali ni vaveeye yo, ing'inga yu mwana kwivulwa yaduuka. 7Maria yivula mwana weve muyaayi wimbiri naamulingira mu zinguvu ziu mwana, namwaliriza ku mulinga gwi zing'ombe ziliiraa ku, kigira sivanyoola ovogono munyumba yavageni mba.

Avayi ni engelosi

8Mu kivala zana yicho, vaali ho avayi nivalinda ichayo cha magondi gaavo mu chayiru vudiku. 9Engelosi wu Mwami yaloleka kuvo kandi uvukumi vwu Mwami vwa ng'ereng'ana kuvo zimbega ziosi. Vaatia ligali, 10navuzwa engelosi yavavolera, “Mutatia mba! Henza muleeteraa amakuva amalahi ligali guvuyaanzi vonene uvuliduuka ku avandu vosi. 11Ku lidiku liene yili mu lidaala lia Daudi, Muhonyi winyu wivuliiywi naye ni Kristo Mwami. 12Yiki kilava kelolero ku munyi: mulanyola akaana nikalingiywi mu zinguvu ziu mwana, ni kaliriziywi mu mulinga gwi zing'ombe ziliiraa ku.”

13Nonoho, vaaloreka harara ne engelosi kiduma kenene chi zingelosi vu mwigulu nivizominya Nyasaye nivavoora,

14“Uvukumi voveeye igulu mwigulu ku Nyasaye,

ni mirembe mu kivala ku avandu ava ya yaanza!”

15Lwi zingelosi vaatura kuvo kwirana mwigulu, avayi vavolerana, “Gendi kuzie kuduuka Bezelehemu kolole likuva liekoleki yili, liu Mwami amali kokovoolera.”

16Maku vazia vwangu, nivanyoora Maria na Josefu, kandi nivalora akaana ni kagoni mu mulinga. 17Lwa valora akaana, vavoolera amakuva ga vaali nivahuliyi kigira kaana yaka. 18Avandu vosi avagahuliraa vagenya ku amakuva ga avayi vavoola. 19Navuzwa Maria yizuliza vindu yivi viosi, naganagana amakuva yaga goosi mu mwoyo gwigwe. 20Avayi virana wavo ni vakuminya kandi ni vizominyaa Nyasaye ku goosi aga vaali ni vaahuliyi kandi nivaloli, goosi gaali kuli vaali ni vavooleywi.

Yeso Yagulikwa lieta

21Inyima wa madiku munane, ing'inga yokokevwa kwu mwana yaduuka, yagulikwa Yeso kuli engelosi yamugulika lieta nakiri koverekwa.

Yeso Yahilwa mu Litembeli

22Lwa amadiku gaduukaa agi lietakasa lia Josefu na Maria, kuli lilaga lia Musa lienya, aviivuli yavo vaavugura mwana nivazia Jerusalemi nivamuviika imbiri wu Mwami. 23Kuli gang'odwa mulilaga liu Mwami; “Wikisaza woosi wigula inda ya mama weve alalaangwa Mutakatifu wu Mwami.” 24Vazia vaduuki kuhaana kihanwa chukusaalisa: amakuulu gaviri gumbulimu, anoho vidudi viviri kolondekana ni lilago liu Mwami.

25Kunangwa yaali ho mundu mu Jerusalemi walangwa Simioni; yaali mundu mulungi kandi uwatia Nyasaye niliehozeliza. Mundu uyu yalindilira vohonyi vwa Isiraeli kandi Roho Mutakatifu yaali kuye. 26Roho Mutakatifu yamuvuulira ndi sialakuza nakikiri kolola Kristo wu Mwami. 27Kunangwa Simioni yimilirwa na Roho Mutakatifu, nazia mu Litembeli. Aviivuli valeta mu mwana wavo Yeso vaduuki kumukolera kuli mwima gwi Lilaga, 28Simioni yavugula mwana Yeso mu makono geege niyizominya Nyasaye navoora:

29“Kalunu, Mwami, umali kuduukiza lilagana liilio,

unyala kuvugilira mutumikiri woovo azie ni mirembe.

30Kigira zimoni ziange zimali kolola vohonyi vuvwo,

31uvwa umali kolomba,

32imbiri wa avandu vosi,

uvulavu kuvuula uvulariri vuvwo ku avandu vi zihiiri

kandi koleta uvukumi ku avandu vovo Isiraeli.”

33Josefu, baba na Maria mama wu mwana, vagenya ku amakuva ga Simioni yavoola ku mwana wavo. 34Simioni yavagasiza navolera Maria, mama weve, “Henza mwana uyu otovoleywi na Nyasaye, kigira lidivizwa kandi lihonywa lia vandu avanyingi mu Isiraeli. Naye alava kilolero kutura ku Nyasaye, cha vandu valakasuuli, 35kuvuula zing'anagani ziavo ziaviswa, kandi vovereri vonene, kuli kivavi chugi, vulatumita mwoyo gugwo ivi mwene.”

36Haali ho nu muporofeti mukali mulala, uwalangwa Hana, mukaana wa Fanueli, wihiiri ya Asheri. Yaali mukeere ligali. Yamenya numusaza weve mihiga saba kutura naleetwa. 37Yaali mukunzakali ku ing'inga yi mihiga samanini na ine. Ing'inga yeyo yoosi yaali niyamenya mulihonga lilia kandi kusaala mu Litembeli vudiku numbasu. 38Ing'inga yene yeyo, yingira mu Litembeli nasandiza Nyasaye, navoora agu mwana oyo ku avandu vosi, avaari nivalindilira ovohonyi vwa Jerusalemi.

Lirana Nazareti

39Lwa Josefu na Maria vamala kokora vindu viosi ivialagwa kolondekana ni Lilaga liu Mwami, virana Galilaya mu lidaala liavo, Nazareti. 40Mwana yaviruka nameeda konyoora zinguru, niyizula ovogeri, kandi vugasu vwa Nyasaye vwali harara naye.

Mwana Yeso mu Litembeli

41Aviivuli veve vazizaa Jerusalemi mu lisavo lie Lipasaka vuli muhiga. 42Lwa Yeso yaduuka mihiga likomi naviviri vazia mu lisavo lie Lipasaka yilio kuli kazozo. 43Lwa vamala madiku gi lisavo, vatanga logendo kwirana yengo, navuzwa muyaayi Yeso yaatigara Jerusalemi. Aviivuli veve sivamanya yaga mba.

44Vaganagana ndi hawundi aveeye mu muganda. Lwa vaali nivakazia logendo lwi lidiku lilala, vatanga kumwenya hagati ha aviiko na valina vaavo. 45Lwa vavura kumunyoola virana Jerusalemi nivamwenyaa. 46Inyima wa madiku gavaga vamunyoola mu Litembeli, niyikaye hagati ha avigizi va Vayuda, navahulirizaa nukuvateeva mateeva. 47Vosi avahulira amakuva geege vagenya ku vogeri vwivwe kandi amativuli geege. 48Lwa aviivuli vamulola vagenya ligali. Maria mama weve yamuteeva, “Mwana wange, kigira ki okokoli kuli ndi? Baba woovo ninzi kukwenyi ni mioyo gietu giosi.”

49Naye yavativulira, “Kigira ki ni munyenya? Simumanyi ndi gaduukanaa inzi mbe munyumba ya Baba wange?” 50Navuzwa aviivuli veve sivahulira ilivoola lia amakuva gayavavoolera mba.

51Kunangwa yirana harara naviivuli kuduuka Nazareti, ni yegehiza kuvo. Mama weve yavika amakuva yaga goosi mu mwoyo gwigwe. 52Yeso yameda kuviruka mu vogeri kandi mu muviri; nameeda kuyanzwa na Nyasaye kandi na avandu.

Kasalukuyang Napili:

LUKA 2: LOGOOLI

Haylayt

Ibahagi

Kopyahin