LUKA 18
18
1Maku, Yeso yavolera vigi veve lugano kuvamanyia ndi, gavadukiraa vasaale kazozo vugira kuluha. 2Yavoola, “Mu lidaala lilala, yaali ho mukalagi uwavula kutia Nyasaye kandi uwavula kuhaana luyali ku avandu. 3Mu lidaala liene yilio, haali ho kandi nu mukunzakali mulala, uwahongera kuzia ku mukalagi oyo haali kanyingi namugoonya aduuki kumukolera kuli yenya, navoora, ‘Ongonye nyoore likalaga lirungi kigira musigu wange.’ 4Ku ing'inga indambi, mukalagi oyo yasura makuva gumukunzakali oyo, navuzwa lwinyima, yavoola mumwoyo gwigwe mwene, ‘Kali nindatizaa Nyasaye, kandi nindahaanaa luyali kuvandu, 5navuzwa kigira mukunzakali uyu umbuhi, ndamukolera kuli yenya gase alanduhiza nilihongera kuuza hano!’ ”
6Kunangwa, mwami yaazizagilira kovora, “Huliri kuli mukalagi mudamanu uyu avoora. 7Kalunu, Nyasaye sialakalagira avandu avatovole veve uvulungi, avamwanira mbasu nuvudiku? Alalindagilira ko lohono kuvativulira lianira liavo? 8Inzi muvooleraa, alayaanza kuvakalagira uvulungi vwangu. Navuzwa lwa Mwana wa Adamu aliiza alakanyoole avandu ni vaveeye ni lisuuvira mu lirovai”
Lugano lwu Mufarisayo nu musololi wu vusuuru
9Yeso yavoola lugano yilu kandi ku avandu valala avelolaa aveene kuva nuvulungi na nivalegeliza avandi vosi 10“Avandu vaviri vaanigira kuzia mu Litembeli kusaala; Mulala yaali Mufarisayo, nu wundi naava musololi wu vusuuru.
11“Mufarisayo oyo yasingira, niyisaalira mwene, ‘Nyasaye, ngusandizaa kigira simbeeye kuli avandu vandi mba: avanuuri, avagaanga, avaheyi, anoho kali kuli musololi wu vusuuru uyu mba. 12Inzi mbonga vugira lilia haali kaviri ku lisiza, ndungaa kegero chi likomi ku vindu viosi via inzi nyooraa.’
13“Navuzwa musololi wu vusuuru uyu, yasingira ihale. Siyaali anyala kali kuginga vweni vwivwe aheenze mwigulu mba, nitali yiduya ku kiritu chiche navoora, ‘O, Nyasaye, inzi mbeeye mwoni. Ombere zimbavasi!’ 14Muvooleraa, musololi wu vusuuru uyu yirana yengo weve nakoleywi mulungi na Nyasaye kuvita Mufarisayo oyo. Kigira ku vosi wenenehizaa umwene, alagehizwa; na ku vosi uwegehizaa alanenehizwa.”
Yeso agasizaa avana vakekeeke
(Mat. 19:13-15; Mar. 10:13-16)
15Avandu valala valeta avana vaavo ku Yeso aviiki makono geege kuvo. Lwa aviigi veve vaavalola, vavagondokera nivavagaya. 16Navuzwa Yeso yalanga avana nivaaza kuye navoora, “Leki avana vakekeeke vaze ku inzi, kandi mutavagayi kuuza ku inzi mba kigira uvwami vwa Nyasaye voveeye vwa avandu vaveeye kuli yava. 17Muvooleraa agiligali, mundu ku vosi utavugilira uvwami vwa Nyasaye kuli avana vakekeeke, sialingira mu Vwami yivwo kali hakuzu mba.”
Mundu Mutugi
(Mat. 19:16-30; Mar. 10:17-31)
18Mwimiliri mulala Muyuda yateeva Yeso, “Mwigizi Mulahi, gandukira ngole ki nduuki konyoora livamwoyo litahera mba?”
19Yeso yamutivulira, “Kigira ki unanga mulahi? Sihali numulahi natali Nyasaye yenyine. 20Ivi wamanya malago: ‘Utaheya mba; utiita mba; utiva mba, kandi utagina mba, uhaane luyali ku baba woovo na mama woovo.’ ”
21Naye yavoola, “Yago goosi ndagagumira kutura vwana vwange.”
22Lwa Yeso yahulira yaga, yamuvolera, “Wenyekaa okole kindu kilala kandi. Gulizaa viosi via oveeye navio, ugavuliri avadaka, na ulava nilivikiru liilio mwigulu; maku, uzi ononde.” 23Navuzwa lwu mundu uyu yahulira yaga, yavelera ligali kigira yaali mutugi ligali.
24Lwa Yeso yalora yaga yavoola, “Voveeye vudinyu ku avatugi kwingira mu Vwami vwa Nyasaye!” 25Yee, voveeye vudinyu ligali kuvita mundu mutugi kwingira mu Vwami vwa Nyasaye, kuvita ing'amia kuvitira mu muluhu gwi isindani.
26Lwa avandu vahulira yaga, vamuteeva, “Ku nivwaha unyala kohonywa?”
27Yeso yamutivulira, “Agatanyalika ku avandu, ganyalika ku Nyasaye.”
28Petero yamuvolera, “Kunyi kwaleka viosi via kwaali navio, ma kwakolonda!”
29Yeso yavavolera, “Agiligali muvooleraa, sihali nu mundu uwaleka inyumba yeeye, anoho mukali, anoho amwavo weve anoho aviivuli veve, anoho avana kigira Vwami vwa Nyasaye, 30ulivula konyoora vinyingi ligali mu ing'inga ya kalunu, kandi konyoora livamwoyo litahera mba mu ing'inga yiza.”
Yeso yamoloma lwa kavaga kigira likuza lilie
(Mat. 20:17-19; Mar. 10:32-34)
31Yeso yasunda halovega avaari likomi na vaviri navavoolera, “Huliri! Kuziiza Jerusalemi uwi vindu viosi viang'odwa na avaporofeti ku Mwana wa Adamu vilatwekizwa. 32Kigira alahaanwa ku avandu vizihiiri, navo valamukolera kehenyahenye, kandi vamunyege nu kumutuzira amate; valamukuya nizingova, kandi valamwita. 33Navuzwa ku lidiku lia kavaga, alasimuguka.”
34Navuzwa aviigi sivahulira kali kindu kilala ku vindu yivi mba; vaali nivavisiywi kivuni cha amakuva yaga, na sivamanyiriza niki cha Yeso yavoola mba.
Yeso ahonyia muvoku musavasavi
(Mat. 20:29-34; Mar. 10:46-52)
35Lwa Yeso yaali ahimbi kuduuka Jeriko, yaali ho mundu mulala mboku uwaali ni yikaye kundulu kwinzira naasavasavaa. 36Lwa yahulira kiduma cha avandu nikivitaa, yateeva, “Nikindiki chekoleka?”
37Vaamuvolera, “Yeso wa Nazareti avitira hano.” 38Naye yahanzuka naalanga, “Yeso, Mwana wa Daudi omberere!”
39Avandu vaali imbiri vamugondokera nivamuvoolera akiring'ane; navuzwa yaazizagilira kuhanzuka, “Mwana wa Daudi, Omberere.”
40Yeso yasingira, navoora vamuleete kuye. Lwu mboku oyo yaza ahimbi, Yeso yamuteeva, 41“Wenyaa ngokolere ki?”
Naye yamutivulira, “Mwami, ngogonya nduuki kolola kandi.”
42Yeso yamuvolera, “Nyora lilola! Lisuuvira liilio likohonyi.”
43Nonoho uwaali mboku yalora lilie, ma nalonda Yeso, niyizominya Nyasaye. Lwa avandu vosi valora yaga, vizominya Nyasaye.
Yeso na Zakayo
Kasalukuyang Napili:
LUKA 18: LOGOOLI
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
©Bible Society of Kenya, 2019
