YOHANA 8
8
[ 1Navuzwa Yeso yazia mu Kiguru cha Mizeituni. 2Mugambazuri mumavwevwe, Yeso yirana mu Litembeli. Avandu vosi vazia kuye, nivamukumbiriza naye yikala hasi naavigiza. 3Kunangwa, avigizi vi Lilaga na Avafarisayo valeta mukali mulala wa vanyoola naaheyaa. Vamusingiriza hagati haavo, 4nivateeva Yeso, “Mwigizi! Mukali uyu kumunyooye naaheyaa. 5Mu Lilaga lietu, Musa yalaga mukali kuli uyu alaswe namagina, navuzwa, ivi ovola ki kuye?” 6Vavoola ndio kumugeriza, kunangwa vaduuki konyoora kindu chu kumuyalira ku. Navuzwa Yeso yinama hasi, na ng'oda mu marova ne kedete chiche.
7Lwa vazizagilira kumuteeva, Yeso yasingira, navavoolera, “Mundu utaveeye ku nuvwoni ku munyi ave wukutanga ku mulasa ligina.” 8Yirana kwinama hasi kandi nang'oda mu marova ne kedete chiche. 9Navuzwa lwa vahulira yaga, vatanga kuzia mulala sa mulala kutangilira na vakulundu kuvo vosi. Yeso yaatigara yenyine, nu mukali oyo naakisingiyi imbiri weve. 10Lwa Yeso yasingira yahenza navolera mukali oyo, “Mukali, vaveeye hayi avandu avakukuyaalaa? Avuli ho kali mulala ukukalagiyi?”
11Mukali oyo yamutivulira, “Mwami, sihaveeyeho nu mundu kali mulala!” Yeso yamuvolera kandi, “Inzi kandi singukalagira mba. Zia, na kutura kalunu uta kola vwoni kandi mba.”]#8:11 Kutura 7:53—8:11 vitabu via kale muno siviveeye ni zimbaso yizi mba.
Yeso nuvulavu vwi lirova
12Yeso yavavolera kandi, “Inzi niyie uvulavu vwa avumukivala. Uyu onondaa sialagenda mu kisundi mba, navuzwa alava nu vulavu vuhaana livamwoyo.”
13Kunangwa, Avafarisayo vamuvolera, “lvi welolekiza mwene. Lilolekiza liilio si liveeye liagiligali mba.”
14Yeso yavativulira, “Kali niiva nzelolekiza inzi mwene, lilolekiza liange liveeye lia agiligali kigira inzi manyi wandatula nu wanzizaa. Navuzwa munyi simumanyi wandatula kandi wanzizaa mba. 15Munyi mukalagaaku zing'anagani zia avandu, navuzwa inzi singalagiraa mundu kali mulala. 16Kali ningalaga, likalaga liange liveeye liagiligali kigira siaveeye inzi weng'ine ukalaga mba. Navuzwa Baba wanduma aveeye ha lala nainzi. 17Gang'odwa mu lilaga lienyu ndi lilolekiza lia avandu vaviri liveeye liagiligali. 18Inzi nzelolekiza mwene, naye Baba wanduma andolekizaa kandi.”
19Kunangwa vamuteeva, “Baba woovo aveeye hayi?”
Yeso yavativulira, “Munyi si mu mananyi inzi, kandi simumanyi anoho Baba wange mba. Mulava ni mwamanya ngano mwamanya Baba wange kandi.”
20Yeso yamoloma amakuva yaga ahimbi na havundu ha masandugu ga mabese gaviikwa lwa yaali niyigizaa mu Litembeli. Na sihaaliho nu mundu wamugumira mba, kigira ing'inga yeeye yaali nikikiri kuduuka.
Wa nziza, si munyala kuzia yo mba
21Yeso yavolera Avafarisayo kandi, “Inzi nziza ihale na munyi mulakanyenye, navuzwa mulakakuziri mu vwoni vwinyu. Wanzinzia simunyala kuuza yo mba.”
22Kunangwa, avanene va Avayuda veteeva, “Aliyiita mwene? Kigira ki avoora, ‘Wanzizaa munyi simunyala kuduuka yo mba?’ ”
23Yeso yavativulira, “Munyi muveeye avandu va hasi mu kivala yiki, navuzwa inzi nduraa igulu mwigulu. Munyi muturaa mu kivala yiki, navuzwa inzi sindulaa mu kivala yiki mba. 24Yiki nicho kivuni chagira nimuvoolera ndi, mulakakuziri mu vwoni vwinyu. Mulakakuziri mu vwoni vwinyu niiva si musuuviraa ndi ‘Inzi mbeeye wa inzi mbeeye.’ ”
25Navo vamuteeva, “Ivi nivwaha?”
Yeso yavativulira, “Inzi mbeeye kuli wa ndamuvolera kutura mulitanga! 26Mbeeye na amanyingi kovora ku munyi kandi amanyingi agukukalagira munyi. Navuzwa Oyo uwanduma aveeye uwiligali, kandi inzi mbolera kivala aga ndahulira kutura kuye vuzwa.”
27Si vamanyiriza ndi Yeso yamoloma kuvo kigira Baba weve mba. 28Kunangwa Yeso yavavolera, “Lwa muliiva nimwakaginga Mwana wa Adamu igulu ku musalaba, ulwene yilwo nilwo lwa mulimanya ndi, ‘Inzi niyie,’ kunangwa mulakamanye ndi inzi sinyala kokora kindu choosi ku vunyali vwange mwene, navuzwa mboraa vuzwa aga Baba yanzigiza geng'ine. 29Oyo wanduma aveeye harara nainzi kandi; kigira akikiri kondeka nzieng'ine, kigira ngolaa kazozo aga muyaanzizaa.”
30Lwa yavoola yaga, avandu vanyingi vamusuuvira.
Agiligali galamuha ovovoholore
31Kunangwa, Yeso yavolera Avayuda yavo avaari nivamusuuviyi, “Niiva mulagumira amigizu gange mulava ligali aviigi vange; 32mulamanya agiligali, na agiligali zana galamukola muve avavoholore.”
33Navo vativura, “Kunyi koveeye visukululwi via Aburahamu, kandi kunyi kukiri kuva avatugwa vu mundu woosi mba. Gaveeye ndi ivi ovola, ‘Mulava no vovoholore?’ ”
34Yeso yavativulira, “Agiligali muvooleraa, mundu ku vosi okola uvwoni aveeye mutugwa wu vwoni. 35Mutugwa siaveeye novomenyo vwu kuhindira munyumba mba, navuzwa mwana aveeye novomenyo vwi mihiga ni mihiga. 36Kunangwa, niiva Mwana wa Nyasaye alamuha vovoholore, mulava avavoholore ligali. 37Manyi vulahi ndi muveeye visukululwi via Aburahamu. Kali ndio, mwenya kunzita kigira simuvugiliraa amigizu gange komenya mu munyi mba. 38Inzi mboraa aga Baba amali kumanyia, navuzwa munyi mukoraa aga vaguuga vinyu vamuvolera.”
39Vaamutivulira, “Baba wiitu ni Aburahamu!”
Yeso yavavolera, “Munyi mulava avana va Aburahamu ngano mwakakoli kuli Aburahamu yakola. 40Navuzwa munyi mwenya kunzita, kigira muvooleraa agiligali ga ndahulira ku Nyasaye; yaga sigaveeye aga Aburahamu yakola mba. 41Munyi mukoraa aga avaguuga vinyu vaakora.”
Navo vamuvolera, “Kunyi sikoveeye avana vindasimba mba! Koveeye na Baba mulala, naye ni Nyasaye.”
42Yeso yavavolera, “ Nyasaye alava Baba winyu, ngano mwayinyanza, kigira ndaatula ku Nyasaye na kalunu mbeeye hano. Sindaaza ku vunyali vwange mwene, navuzwa Nyasaye yanduma. 43Kigira ki simuhuliraa agambooraa? Kigira ki munyi si munyala kuhulira likuva liange? 44Munyi muveeye avana vababa winyu Setani, nu uvulariri vwinyu ni okokora likayirwa lia baba winyu. Oyo yaali mulumindi kutura mulitanga kandi sianyala kusingira kolovega lwa agiligali mba, kigira agiligali sigaveeye muye mba. Choosi ichavoolaa cho vovehi avoora kuturana ni liiva lilie lia yalombwa nalio, kigira aveeye muvehi kandi ni baba wovovehi. 45Inzi mboraa agiligali, na nicho kivuni kigira munyi muvura kusuuvira. 46Nivwaha ku munyi unyala kundolekiza ndi mbeeye nuvwoni? Kunangwa, niiva mboraa agiligali, kigira ki musuraa kusuuvira? 47Uyu oveeye wa Nyasaye ahuliraa amakuva ga Nyasaye. Navuzwa munyi muvura kugahulira kigira munyi simuveeye avandu va Nyasaye mba.”
Yeso yaali ho imbiri wa Aburahamu nakikiri kotovolwa
48Avayuda vateva Yeso, “Si koveeye vulungi lwa kovora ndi ivi oveeye Musamaria, kandi oveeye nilidemoni?”
49Yeso yativura, “Inzi simbeeye nilidemoni mba, navuzwa nguminyaa Baba wange, navuzwa munyi si munguminyaa. 50Inzi si nzeyenyeraa uvukumi vwa nge mwene mba. Navuzwa mulala aveeye ho mulala we nyererizaa kandi akalagaa. 51Agiligali muvooleraa, ugumira amigizu gange sialakuza mba.”
52Avayuda vamuvolera, “Kalunu kumanyi agiligali ndi ivi oveeye ni lidemoni! Aburahamu yakuza, kandi avaporofeti vaakuza, navuzwa ivi ovola, ‘Ku vosi ugumira amigizu gange sialakuza mba!’ 53Ivi wekolaa kuva munene ligali kuvita baba wiitu Aburahamu? Oyo yakuza kandi avaporofeti vaakuza. Wekolaa ivi mwene kuva vwaha?”
54Yeso yavativulira, “Niiva inzi nzikuminyaa mwene, uvukumi vwange sivoveeye kindu. Baba wange wa munyi muvooraa ni Nyasaye winyu, niyie unguminya. 55Munyi mukiri kumumanya, navuzwa inzi mumanyi vulahi. Niiva ndakavooye si mumanyi vulahi ndakaveeye muvehi kuli munyi. Navuzwa inzi mumanyi vulahi kandi ngumira likuva lilie. 56Aburahamu baba winyu yasangala kolola lidiku lie liza liange; yalilola kandi yayanza.”
57Kunangwa, Avayuda vamuvolera, “Ivi ukikiri kuduuka mihiga amusini, na ovola walola Aburahamu?”
58Yeso yavavolera, “Agiligali muvooleraa, imbiri wa Aburahamu akikiri kwivulwa, inzi ndaali ho.”
59Kunangwa vadoola amagina nivenya vamulase, navuzwa Yeso yiivisa, natura mu Litembeli.
Yeso Yahonyia mundu wivulwa mboku
Kasalukuyang Napili:
YOHANA 8: LOGOOLI
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
©Bible Society of Kenya, 2019
