YOHANA 6
6
Yeso Yalihiza avandu zielefu zitano
(Mat. 14:13-21; Mar. 6:30-44; Luk. 9:10-17)
1Inyima wa yaga, Yeso yambuka inyanza ya Galilaya eveeye ni lieta lindi Inyanza ya Tiberia. 2Kiduma kenene cha avandu cha mulonda kigira vaali nivaloli vilolekizu via yaali naakori ku avaari valwaye. 3Yeso yanigira ku kiguru, niyikara harara na aviigi veve. 4Lisavo lia Avayuda lilangwa Lipasaka liali ahimbi. 5Kunangwa, lwa Yeso yalora kiduma cha avandu nikizaa kuye, yavolera Filipo “Kugura hayi migadi avandu yava vaduuki kulia?” 6Yavoola yaga kogeriza Filipo, kigira yaali namanyi ichokokola.
7Filipo yamutivulira, “Migadi ji zidinari#6:7 Zidinari: Idinari ndala eveeye mutungu gwu muyinziri wa hango ku lidiku lilala. zimia ziviri sijinyala kuduuka avandu yava mba, kali niiva samulala anyoora kedonye kekekeeke vuzwa!”
8Mulala ku aviigi veve ulangwa Andereya, amwavo Simoni Petero, yamuvolera, 9“Aveeye hano muyaayi mulala oveeye ni migadi jitano ji shairi#6:9 Shairi: Uvuswage vufananaa ni ingano navuzwa vuguli vwayo voveeye ovokekeeke ku ingano. ni zisuzi ziviri; navuzwa yivi sivinyala kuduuka avandu vanyingi kuli yava mba.”
10Yeso yavolera aviigi veve, “Voleli avandu viikare hasi.” Vwali ho uvunyasi vunyingi ha zana yaho. Avandu viikara avaduuka avasaza zielefu zitano. 11Yeso yavugula migadi yijo, nasandiza Nyasaye, najihaana jigavulirwi avandu vaali nivikaye; yakola ndio kandi ni zisuzi, vuli mundu yanyoora kuli yenya. 12Lwa avandu vaali nivakiguta, Yeso yavolera aviigi veve, “Vungizi amadonye gatigaye gavuli kwoneka.” 13Kunangwa, vavungiza amadonye gi migadi ji ishairi agatigala ku aga avandu valiza. Vizuliza vihinda likomi na viviri.
14Lwa avandu valora kelolekizu yiki icha Yeso yakola, vavoola, “Ligali uyu niyie muporofeti zana uzaa mu lirova.” 15Lwa Yeso yamanya avandu vetegeka kuuza kumuvugula kuzingulu vamukole Mwami Munene, yatura kandi, nazia mu Kiguru yenyine.
Yeso Yagenda ku amazi
(Mat. 14:22-33; Mar. 6:45-52)
16Lwu mugolova gwaduuka, aviigi va Yeso vasulunguta kuzia ku inyanza, 17nivanina mu liato, kandi nivambuka kuzia Kaperinaumi. Ing'inga yaali ni yakamwama, na Yeso yaali nakiri kuduuka kuvo. 18Inyanza yaatanga kokora viguvuli kigira imbuza enene yaali nihuzaa. 19Lwa aviigi vaali nivakazia ahimbi zikilomita zitano anoho sita, valora Yeso nagenda ku mazi, ni yaazaa ahimbi ku liato. Vaatia ligali. 20Yeso yavavolera, “Ninzi, mutatia mba!” 21Maku vaali nuvuyanzi kuvugura Yeso nukumuviika mu liato; nonoho, liato liaduuka ku lujinga lwi kivala cha vazizaa mu.
Avandu venya Yeso
22Lidiku lialonda ku, kiduma kenene cha avandu avaari nivatigaye kolovega lundi lwinyanza vamanya ndi liali ho liato lilala vuzwa. Yeso yaali nakiri kwingira mu liato harara na aviigi veve, nitali aviigi yavo vazia veng'ine nivamuleka. 23Amato gandi kutura Tiberia gaduukaa havundu yaho ha avandu vaali nivaliriyange migadi yijo, inyima wu Mwami yaali niyakasandiza Nyasaye. 24Lwa avandu yavo vamanya ndi Yeso harara na aviigi veve sivaveeyeho, vanina aveene mu maato nivazia Kaperinaumi, kwenya Yeso.
Yeso aveeye mugadi gwi livamwoyo
25Lwa avandu yavo vanyoola Yeso kolovega lundi lwi inyanza vamuteeva, “Mwigizi, uduuki hano ng'inga ki?”
26Yeso yavativulira, “Muvooleraa agiligali, simunyenyaa kigira muloli vilolekizu, navuzwa kigira muliiyi migadi nimwiguta. 27Mutayinziliri viukulia vioneka; navuzwa muyinziliri viukulia vimenya kuduuka ku livamwoyo litahera mba. Yivi nivio viukulia viu Mwana wa Adamu alimuha; kigira Baba Nyasaye umali kuviika muhuri gwi livugilirwa kuye.”
28Kunangwa vamuteeva, “Gakuduukiraa kokole ki kunangwa kove nikokola miyinzi ja Nyasaye?”
29Yeso yavativulira, “Yigu nigwo muyinzi gwa Nyasaye yenya mukore, musuuviri mu uyu uwa yatuma.”
30Vamuvolera, “Ulakola kelolekizu ki kolole, ku kuduuki kusuuvira ivi? Ulakola ki? 31Avaguuga viitu valia amaana mwigendanyama, kuli Amang'oda Matakatifu gavoora ‘Yavaha mugadi kutura mwigulu valie.’ ”
32Yeso yavavolera, “Muvooleraa Agiligali, si yaali Musa uwamuha mugadi kutura mwigulu mba navuzwa; ni Baba wange niyie umuheezaa mugadi gwa agiligali kutura mwigulu. 33Kigira mugadi gwa Nyasaye ahaanaa goveeye uyu uturaa mwigulu kandi uhaana livamwoyo ku avumukivala.”
34Kunangwa, vamuvolera, “Mwami, haana mugadi yigu ku kunyi kazozo.”
35Yeso yavavolera, “Inzi niye mugadi gwi livamwoyo. Uyu uza ku inzi sialiva ninzara mba. Uyu usuviraa inzi sialiva nu vuluhu mba. 36Navuzwa kuli ndaamuvolera ndi mumali kondola, navuzwa mukiri kusuuvira inzi. 37Vosi ava Baba ambezaa valaza ku inzi; nainzi sindakunga mundu woosi uza ku inzi mba. 38Kigira inzi sindaaza kutura mwigulu kokora uvulariri vwange, navuzwa kokora uvulariri vwa oyo uwanduma. 39Voveeye uvulariri vwa oyo uwanduma ndi mburi kogotiza mundu kali mulala ku yavo ava yamba, navuzwa mbasimugukizi vosi ku lidiku liu kumaliriza. 40Icha Baba wange yenya keveeye ndi, vosi avalolaa Mwana na vaduuki kumusuuvira valava ni livamwoyo litahera mba. Kandi inzi ndavasimugukiza kandi ku lidiku liu kumaliriza.”
41Avandu vatanga kwigana kigira yavoola ndi, “Inzi nigwo mugadi gwatura mwigulu,” 42kunangwa vavoola, “Uyu siaveeye Yeso mwana wa Josefu, wa baba na mama weve va kunyi kumanyi? Anyala ndi kovora, ‘Mali kwika kutura mwigulu?’ ”
43Yeso yavavolera, “Leki kwigana aveene. 44Sihaveeye ho nu mundu unyala kuuza ku inzi, uwa Baba wanduma akikiri koleta ku inzi. Inzi ndasimugukiza mundu oyo ku lidiku lie keheri. 45Gang'odwa mu vitabu via avaporofeti, ‘Nyasaye aligiza avandu vosi.’ Vuli mundu uhulira Baba na ukwiga kutura kuye, yaazaa ku inzi. 46Sihaveeye ho nu mundu uwalola Baba, natali uyu uturaa ku Nyasaye; uyu yenyine yalora Baba. 47Muvooleraa agiligali, uyu usuviraa, aveeye ni livamwoyo litahera mba. 48Inzi mbeeye mugadi gwi livamwoyo. 49Avaguuga vinyu valia imaana mwigendanyama, navuzwa vaakuza. 50Yigu nigwo mugadi gutulaa mwigulu, mundu nalia kugwo, sialikuza mba. 51Inzi mbeeye mugadi goveeye mwoyo, ugwatula mwigulu. Mundu ku vosi nalia mugadi yigu, alava ni livamwoyo litahera mba. Mugadi gwa ndihaana kigira livamwoyo lia avumukivala goveeye muviri gwange, ugwa mbana kigira livamwoyo lia avumukivala.”
52Maku Avayuda vatanga kuhangalizana aveene naveene nivavoora, “ Mundu uyu anyala ndi kukuha inyama yu muviri gwigwe kulie?”
53Yeso yavavolera, “Muvooleraa agiligali, nimutalia muviri gwu Mwana wa Adamu kandi munwi amasahi geege, si muveeye ni livamwoyo mba. 54Uyu uliizaa muviri gwange nukunwa amasahi gange aveeye ni livamwoyo litahera mba, ninzi ndamusimugukiza ku lidiku lie keheri. 55Kigira muviri gwange goveeye chukulia chi ligali, na amasahi gange gaveeye chukunwa chi ligali. 56Uyu ulia muviri gwange nukunwa amasahi gange, amenyaa mu inzi nainzi menyaa muye. 57Baba oveeye mwoyo yanduma, kandi kigira ye; inzi mbeeye mwoyo. Munzira ndala nzere ku vosi ulia inzi amenyaa kigira inzi. 58Maku, yigu nigwo mugadi gwatura mwigulu; sigoveeye mugadi gwa avaguuga vinyu valia nivakuza mba. Uyu ulia mugadi yigu alava ni livamwoyo litahera mba.”
59Yeso yavoola agene yago lwa yaali ni yigizaa mu lisinagogi lia Kaperinaumi.
Amakuva galetaa livamwoyo litahera mba
60Lwa avanyingi ku aviigi veve vahulira yaga, vavoola, “Yaga na amigizu amadinyu! Nivwaha unyala ku gahuliriza?”
61Navuzwa Yeso vugira kovolerwa nu mundu woosi, yamanya mwene ndi aviigi veve vigaana kigira yaga, kunangwa yavateva, “Livoora yili limulomba kwikigatira? 62Galakave ndi, niiva mulilora Mwana wa Adamu ni yanigira kuzia uwa yaali maziambiri? 63Roho wa Nyasaye niyie uhaanaa livamwoyo, zinguru ziu mundu si zinyala kindu mba. Amakuva ga inzi mali kumuvolera nigo galetaa Roho wa Nyasaye galetaa Roho wa Nyasaye uhaanaa livamwoyo. 64Navuzwa vaveeye ho valala ku munyi avatasuuvira.” Yeso yamanya kutura mu litanga ni vanga vwaha avatasuuvira, kandi nivwaha ulimuzaama. 65Yameda kovora, “Yiki nicho kivuni ichagira nimuvoolera, ndi avula ho mundu unyala kuuza ku inzi Baba wange natamutovoye.”
66Kigira yaga, avanyingi ku aviigi va Yeso viirana inyima ni vavura kogenda naye kandi. 67Kunangwa, Yeso yateeva avaari likomi na vaviri, “Munyi kandi mwenya kuzia?”
68Simoni Petero yativura, “Mwami, kuzie ku vwaha? Ivi oveeye na makuva gahaanaa livamwoyo litahera mba. 69Kunyi kwasuuvira, kandi kwamanya ndi ivi niyie Mutakatifu wa Nyasaye.”
70Yeso yavavolera, “Sindaatovora munyi likomi na vaviri? Navuzwa mulala ku munyi ni Setani!” 71Yeso yavoola ageene yago ku Yuda mwana wa Simoni wa Esikarioti. Kigira Yuda, kali ni yaali mulala ku aviigi likomi na vaviri, niyie ulakamuzaame.
Yeso na avamwavo veve
Kasalukuyang Napili:
YOHANA 6: LOGOOLI
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
©Bible Society of Kenya, 2019
