Litanga 6
6
1Na ga duka, lwa vandu va tanga kumedeka ku lirova, na vakana vivulwa kuvo, 2avanava Nyasaye va lola avakana va vandu va veye avalahi; na vevugulira kuvo avakali ava va tovola. 3Na Yahova ya vola, Roho wange si a la hing'ana nomundu, mihiga nemihiga, kigira a veye inyama kandi: navutswa madiku gege ga la va mihiga mia na makumi gaviri. 4Na mindu gya li mu lirova mmadiku yago, Kandi inyima wa yago, avana va Nyasaye lwa va li halala navakana va avandu, na vivula avana kuvo: va zana va li avetsingulu ava li va kale, avasatsa velidzominywa.
5Kandi Yahova ya lola ubudamano bwa avandu bwa li bunene ku lirova, kandi lisaavira lyosi na tsinganagani tsyomwoyo gwavo tsya li ubudamano bwere kazozo. 6Na Yahova yeganira ku lilomba mundu ku lirova, na a vereridzwa mmowyo gwigwe. 7Na Yahova ya vola, Nda gotidza avandu ava nda lomba, va twule ku lirova; vyombi avandu na tsinyama, na vimolanga, na manyonyi gegulu; kigira ndeganira ku lilomba lyavyo. 8Navutswa Nuhu ya verwa tsimbabasi imbiri wa Yahova.
9Yivi ni visukululwi vya Nuhu. Nuhu ya li mundu mulungi, nomudukiru mu likula lilye: Nuhu ya genda halala na Nyasaye. 10Na Nuhu yivula avana vabaka avayai, Shem, na Ham, na Jafethu. 11Na lirova lya li ni lyoneki imbiri wa Nyasaye, na lirova lya li ni lizuye kirage. 12Kandi Nyasaye ya lola lirova, na, henza, lya li ni lyoneki; kigira vyemibiri vyosi vyononya inzira yavyo ku lirova.
13Kandi Nyasaye ya volera Nuhu, Kiheri kya vyembiri vyosi ki duki imbiri wange; kigira lirova lizuye kirage kigira yivyo; kunangwa, henza, nda vi dividza halala nelirova. 14Welombere liatu lyemisala gyomvinde; kandi u lombe mulyo vigodola, na u vake na irangi mugati na kyova. 15Kandi u la li lomba ku lugano yilu: ubutambi bweliatu bu la va vigero vya makono tsimia tsivaka, na bugalamu bwalyo vigero vyamakono makumi gatano, na budiguluku bwalyo vigero vyamakono makumi gavaka. 16Kandi u la vika ubwiyangu bwobulavu mu, ku ligera lyo mukono mulala u la li malilidza ha lugulu; na kiliango u la vika mmbalu mwalyo; kandi u la lomba lya hasi na lya hagati, na lya igulu mulyo. 17Kandi inze, henza, inze ndesanga amadzi manene ku lirova kudividza vyemibiri vyosi vi veye nomwika gwelivamwoyo muvyo vi twule isi weligulu; vyosi vi veye ku lirova vi la kudza. 18Navutswa nda singeridza lilagana lyange halala nive; nive u lingira mu liatu, ive, na avana vovo, na mukali wowo, na vakali va vana vovo halala nive. 19Kandi ku vyosi vi veye mwoyo vyetsinyama tsyosi, siviviri ku tsing'ano tsyosi u la vi leta mu liatu, kuvilinda vi ve mwoyo halala nive, vi la va kisatsa na kikali. 20Ku manyonyi ku lugano lwago, noku mitugu ku lugano lwagyo, noku vi molanga vye lirova ku lugano lwavyo, siviviri ku tsing'ano tsyosi viladza ku ive, vi lindwe kuva mwoyo. 21Kandi u vugule nokuvungidza ku vyokulia vyosi vi libangwa, navyo vi la va vyokulia vivyo, na vya yivyo. 22Nuhu ya kola ndiyo; kuli gosi ga Nyasaye ya mu laga, ya kola ndiyo.
Kasalukuyang Napili:
Litanga 6: MBE
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
©Bible Society of Kenya, 1967