Kub 11
11
1Omu biro ebi, ensi yoona yabazaaga engambo emu, enyakurumu ebigambo bike. 2Abantu obu baafurukiire Buturukaizooba, baasanga ekyeya ekinyakuli omunsi ya Sinali. 3Baagambirangana bati: “Tubumbe amatafaali tugokye kurungi.” Baakoza amatafaali omu kiikaro ky'amabaale, n'orweju omu kiikaro ky'obudongo. 4Hanyuma, baagamba bati: “Tweyombekere orubuga orunyakwina omunaara ogurukuhika omwiguru, nukwo turanganwe, tutaikara kurarangibwa tukagya hara.” 5Nubwo, MUKAMA yasirimuka, yaija kurora orubuga n'omunaara ogwayombekerwe abaana b'abantu. 6MUKAMA yagamba ati: “Murole, abantu banu, bantu bamu, kandi boona, nibabaza engambo emu, kandi kinu nikyo kinu eky'okubanza ha bintu ebi barukwija kukora, kandi busaho eki baraateekereza kukora kikabalema. 7Mwije tusirimuke, tutabatabule engambo yaabo, baleke kwetegerezangana.” 8Aho, MUKAMA yabaiha omu kiikaro eki, yabararangya omunsi yoona, baalekera aho kwombeka orubuga. 9Nikyo orubuga oru, rwayetiirwe ibara Bbabbeeri, habwokuba aho, nuho MUKAMA yatabatabuliire engambo eyabazibwaga omunsi yoona, kuruga aho Ruhanga yabararangya omunsi yoona.
Oruzaaro rwa Seemu
10Ganu nugo mabara g'abaijukuru ba Seemu. Seemu obu yahikize emyaka kikumi ey'obukuru, yazaara Aripakisaadi, obu hakaba hahingwireho emyaka ebiri, okusandaara kw'amaizi kuhoire omunsi; 11Seemu obu yamazire kuzaara Aripakisaadi, akongera yayomeera emyaka endi bikumi bitaano, yazaara abaana abandi aboojo n'abaisiki.
12Aripakisaadi obu yahikize emyaka asatu n'etaano, yazaara Seera, 13Aripakisaadi obu yamazire kuzaara Seera, akongera yayomeera emyaka endi bikumi bbina n'esatu, yazaara abaana abandi aboojo n'abaisiki.
14Seera obu yahikize emyaka asatu, yazaara Ebberi, 15Seera obu yamazire kuzaara Ebberi, akongera yayomeera emyaka endi bikumi bbina n'esatu, yazaara abaana abandi, aboojo n'abaisiki.
16Ebberi obu yahikize emyaka asatu n'ena, yazaara Peregi, 17Ebberi obu yamazire kuzaara Peregi, akongera yayomeera emyaka endi bikumi bbina n'asatu, yazaara abaana bandi aboojo n'abaisiki. 18Peregi obu yahikize emyaka asatu, yazaara Lehu, 19Peregi obu yamazire kuzaara Lehu, akongera yayomeera emyaka endi bikumi bibiri na mwenda yazaara abaana abandi aboojo n'abaisiki.
20Lehu obu yahikize emyaka asatu n'ebiri, yazaara Serugi, 21Lehu obu yamazire kuzaara Serugi, akongera yayomeera emyaka endi bikumi bibiri na musanju, yazaara abaana abandi aboojo n'abaisiki.
22Serugi obu yahikize emyaka asatu, yazaara Nahora, 23Serugi obuyamazire kuzaara Nahora, akongera yayomeera emyaka endi bikumi bibiri, yazaara abaana abandi aboojo n'abaisiki.
24Nahora obu yahikize emyaka abiri na mwenda, yazaara Teera, 25Nahora obu yamazire kuzaara Teera, akongera yayomeera emyaka endi kikumi mu ikumi na mwenda, yazaara abaana abandi aboojo n'abaisiki.
26Teera obu yahikize emyaka nsanju, yazaara Abburamu, Nahora na Harani.
27Ganu nugo mabara g'abaijukuru ba Teera: Teera akazaara: Abburamu, Nahora na Harani, Harani akazaara Looti 28Haraani akafeera omunsi ei yazaalirwemu, Teera ise, atakafiire. 29Abburamu na Nahora, bakaswera abakazi, ibara erya muka Abburamu nuwe Sarai, kandi erya muka Nahora, nuwe Mirika muhara wa Haraani, ise Mirika na Isika. 30Sarai akaba ali ngumba, atazaire mwana.
31Teera yatwara omutabani Abburamu n'omwijukuru Looti, omwana wa Harani, na Sarai mukamwana we, mukazi w'Abburamu, baagenda hamu, baaruga omunsi Uli ey'Abakarudeya, baagenda omunsi eya Kanaani, baitu obu baahikire Harani, nuho baikara. 32Teera akoomeera emyaka bikumi bibiri n'etaano, yagwa omunsi Harani.
Kasalukuyang Napili:
Kub 11: BRR2008
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Bible in Runyoro/Rutooro Interconfessional Translation © Bible Society of Uganda, 2008.