Luka 9
9
Ũtũme wa atũmwa ĩkũmi na elĩ
(MATHAYO 10.5–15; MALIKO 6.7–13)
1Nake ameta ala ĩkũmi na elĩ, amanenga vinya na ũkũmũ ĩũlũ wa ndaimoni syonthe, na wa kũvosya mowau. 2Na amatũma kũtavan’ya ũvoo wa ũsumbĩ wa Ngai, na kũvosya awau. 3Nake amea, Manyai ũkua kĩndũ kya nzĩanĩ, ndata, kana mũvuko, kana kĩmũtũ, kana mbesa; na mũndũ ndakethĩwe na itonyeo ilĩ. 4#Lk 10.5–7.Na nyũmba o na yĩva ĩla mwĩvota, mwĩĩkala vo, mwĩuma o vo mũkĩthi. 5#Lk 10.11.Na ala mateũmũthokya, mũkyuma ndũanĩ ĩsu, tuangai kĩtoo maũũnĩ menyu nĩ kana wĩthĩwe ũkũsĩ kwoo. 6Nao mathi, na manganga mĩsyĩ, makĩtavan’ya ũla ũvoo mũseo, na makĩvosya awau kũndũ kw’onthe.
Kũsaanĩw’a kwa Elote
(MATHAYO 14.1–2; MALIKO 6.14–16)
7Na mũsumbĩ Elote eew’a maũndũ asu onthe ala meekiwe: nake asũanĩwa mũno, nĩkwĩthĩwa amwe nĩmaneenie kana Yoana nũthayũũkĩte kuma akw’ũnĩ; 8na angĩ, kana Eliya nĩwumĩlĩte; na angĩ, kana ũmwe wa athani ma tene nũthayũũkĩte. 9#Lk 23.8.Ĩndĩ Elote asya, Yoana nĩnamũtilile mũtwe: ĩndĩ ũsu nũũ, ũla ngwĩw’a maũndũ asu ũndũ wake? Nake nĩwendaa kũmwona.
Kũvũnĩthw’a kwa andũ ngili itano
(MATHAYO 14.13–21; MALIKO 6.30–44; YOANA 6.1–13)
10Na atũmwa yĩla masyokie mamũtavya maũndũ onthe ala meekie. Nake athi nao nzama, vakuvĩ na ndũa ĩla yĩtawa Vethisaita. 11Na andũ ma makomano mamanya, ũu, mamũvikĩla kw’o: nake amosa na mũyo, na amatavya ũvoo wa ũsumbĩ wa Ngai, na amavosya ala maĩ na vata wa kũvow’a. 12Na syũa yambĩlĩlya ũthũa; na ala ĩkũmi na elĩ mooka, na mamwĩa, Ũmbũũkya ĩkomano, nĩ kana yĩnyaĩĩkĩe mĩsyĩ na nthĩ ila syĩ ndee, mamanthe vandũ va ũkoma na lĩu; nũndũ vaa tũĩ, nĩ weũnĩ. 13Ĩndĩ amea, Manengei lĩu e inyw’ĩ. Na masya, Twĩ na imũtũ itano na makũyũ elĩ ki; ate o tũithi kũthooa lĩu wa andũ aa onthe. 14Nũndũ maĩ andũ aũme ta ngili itano. Nake amea amanyĩw’a make, Mekalyei nthĩ nguthu na nguthu, kĩla nguthu yĩ na andũ ta mĩongo ĩtano. 15Nao meeka ũu, na mamekalya onthe nthĩ. 16Nake oosa ila imũtũ itano na makũyũ elĩ, na ang’elela ĩtunĩ, aiathima na aitilanga; na anenga amanyĩw’a matwaĩe ĩkomano. 17#2 Asu 4.44.Na maya, na onthe mavũna: na kwooswa ikavũ ĩkũmi na ilĩ sya ilungu isu ndile ila syamatialĩle.
Yesũ aikũsĩĩa atĩ nĩwe Klĩsto
(MATHAYO 16.13–19; MALIKO 8.27–29)
18Na kweethĩwa, akĩvoya e weka, amanyĩw’a maĩ vamwe nake: na amakũlya, akyasya, Makomano measya nyie nĩ ũũ? 19#Lk 9.7.Mamũsũngĩa, makyasya, Amwe measya, Yoana ũla Mũvatisi; ĩndĩ angĩ measya, Eliya; na angĩ kana wĩ ũmwe wa athani ma tene ũthayũũkĩte. 20#Yoa 6.69.Nake amea, Ĩndĩ inyw’ĩ mwĩasya nyie nĩ ũũ? Vetelo asũngĩa, asya, We nue Klĩsto wa Ngai.
Yesũ akyathana kũkw’a na kũthayũũka kwake
(MATHAYO 16.20–21; MALIKO 8.30–31)
21Ĩndĩ amatavya, ameaĩa matikatavye mũndũ ũndũ ũsu; 22#Lk 9.44; 18.32,33.akyasya, Mwana wa mũndũ ndatĩa kũthĩnw’a na mathĩna maingĩ, na kũlewa nĩ atumĩa na athembi anene na aandĩki, na kũawa, na kũthayũũkw’a mũthenya wa katatũ.
Wĩtano wa kwĩlea mwene
(MATHAYO 16.24–28; MALIKO 8.34—9.1)
23Na ĩndĩ amea onthe, Ethĩwa mũndũ o na wĩva nũnũkwenda kũmbikĩla, nĩelee mwene, na kwĩyaĩkya ngelan’yo yake kĩla mũthenya, na akĩmbikĩla. 24#Mt 10.39; Lk 17.33; Yoa 12.25.Nĩkwĩthĩwa o ũla ũnũkwenda kũvĩtya thayũ wake akawasya; na o ũla ũkwasya thayũ wake kwondũ wakwa, ũsu akoovĩtya. 25Nũndũ mũndũ aunwa nĩ kyaũ, o na akosa nthĩ nima, akĩyananga, kana akĩyasya mwene? 26#Mt 10.33.Nũndũ o ũla ũkambĩw’ĩa nthoni nyie na ndeto syakwa, nũkew’ĩwa nthoni nĩ Mwana wa mũndũ, yĩla ũkoka ũtheunĩ wake mũtisu, na wa Ĩthe, na wa alaĩka atheu. 27Ĩndĩ nĩngũmũtavya w’o, Katĩ wa aa maũngeme vaa, ve amwe matakasama kĩkw’ũ nongi, matanamba kwona ũsumbĩ wa Ngai.
Kũalyũka kwa mũvw’ano wake
(MATHAYO 17.1–8; MALIKO 9.2–8)
28Na kweethĩwa ĩtina wa ndeto isu o ta vandũ va mĩthenya nyanya, oosa Vetelo na Yoana na Yakovo, ambata kĩĩmanĩ kũvoya. 29Na akĩvoya, mũvw’ano wa ũthyũ wake waalyũka, na ngũa syake syeeũva kw’ũ, na syakaka. 30Na sisya, andũ elĩ meethĩwa makĩneenan’ya nake, nao nĩ Mose na Eliya; 31#Lk 9.22.ala mamaumĩlĩle na ũtheu mũtisu, makĩneenan’ya ũvoo wa kĩkw’ũ kyake kĩla ũkilĩlye kwĩanĩĩsya ku Yelusaleme. 32#Yoa 1.14; 2 Vet 1.16–18.Ĩndĩ Vetelo na ala maĩ nake makwatwa nĩ too mũnene: na mavindũka, moona ũtheu wake mũtisu, na ala aũme elĩ maũngeme nake. 33Na kweethĩwa yĩla mataanĩsye nake, Vetelo amwĩa Yesũ, Mwĩaĩi, nĩ ũseo kwitũ kwĩthĩwa vaa: twake malwanda atatũ; yĩmwe yaku, na yĩngĩ ya Mose, na yĩngĩ ya Eliya: nake ndaamanya ũndũ ũnũkwasya. 34Na akĩneena ũu, kwooka ĩthweo, yamekĩa muunyĩ: na meew’a w’ĩa nũndũ wa ũlika ĩthweonĩ. 35#Lk 3.22.Na wasya wauma ĩthweonĩ, ũkyasya, Ũũ nĩwe Mwana wakwa, mũnyuve wakwa: mwĩw’ei. 36Na wasya waneena ũu, Yesũ ooneka e weka. Nao mavindya, na matukũ asu maiaatavya mũndũ maũndũ ala manoonie.
Kũvow’a kwa mwana waĩ na ndaimoni
(MATHAYO 17.14–18; MALIKO 9.14–27)
37Na kweethĩwa ũnĩ ũsu, mauma kĩĩmanĩ matheea, ĩkomano ĩnene yamũthaũa. 38Na ĩndĩ, mũndũ ũmwe wa ĩkomano aneena na wasya mũnene, akyasya, Mũmanyĩsya, nĩngũkwĩsũva ũkasisye mwana wakwa; nũndũ nowe wakwa e ũmwe: 39nake nũkwatawa nĩ veva, na mĩtũkĩ nũnũũkaya; na nũnũũthingithangw’a ĩvũyũ yĩkauma, na ũimuma na vinya ũkĩmũvinyĩthya mũno. 40Nakwa namesũva amanyĩw’a maku mawumye; na maemwa nĩw’o. 41Yesũ asũngĩa na asya, Ũsyao ũũ ũte na mũĩkĩĩo na mũemu, ngeethĩwa nenyu na nĩmũmĩĩsya ĩvinda yĩana ata? Mũete mwana waku vaa. 42#Lk 7.15.Na kĩmwana kyũkĩte, kyavalũkw’a nĩ ĩla ndaimoni, kyathingithangw’a nĩyo. Ĩndĩ Yesũ akan’ya veva ũsu mũvuku, na akĩvosya kĩla kĩmwana, akĩnenga ĩthe. 43Na onthe maseng’a ũndũ wa ũnene wa Ngai.
Yesũ akyathana kĩkw’ũ kyake ya kelĩ
(MATHAYO 17.22–23; MALIKO 9.30–32)
Na yĩla onthe maseng’ete nũndũ wa maũndũ onthe ala meekiwe nĩ Yesũ, amea amanyĩw’a make atĩĩ, 44#Lk 9.22.Ndeto ii ilike matũni menyu: nũndũ Mwana wa mũndũ nũkanenganwe mokonĩ ma andũ. 45#Mko 9.32; Lk 18.34.Ĩndĩ maiaamanya ndeto isu, nũndũ syavithĩtwe kwoo, matikaimanye; nao makĩa kũmũkũlya ũndũ wasyo.
Ũmanyĩsyo wa wĩnyivyo
(MATHAYO 18.1–4; MALIKO 9.33–37)
46Na ngananĩo yookĩla katĩ woo, ũndũ wa ũla wĩthĩwa mũnene. 47Ĩndĩ Yesũ amanya mosũanĩo ma ngoo syoo, oosa kana kanini, akaũngamya ĩvavanĩ yake, 48#Mt 10.40.na amea, O ũla ũkosa kana kaa kanini syĩtwanĩ yakwa embosa nyie: na o ũla ũkambosa nyie eosa ũla wandũmie: nũndũ ũla mũnini katĩ wenyu, ũsu nĩwe mũnene.
Ũmanyĩsyo ũndũ wa kũmĩanĩsya na andũ angĩ
(MALIKO 9.38–40)
49Na Yoana asũngĩa na asya, Mwĩaĩi, nĩtũnoonie mũndũ akyumya ndaimoni na syĩtwa yaku; na twamũvata, nũndũ ndaatĩanĩe naitũ. 50#Lk 11.23; Avi 1.18.Ĩndĩ Yesũ amwĩa, Mũikamũvate: nũndũ ũla ũte na ũndũ nenyu e ngalĩ ĩ yenyu.
Yesũ akyelekela kũthi Yelusaleme: Asamalia mate athokan’ya
51 #
Mko 10.32; Yoa 7.1. Na kweethĩwa, mĩthenya yathengeea ambatw’e, alũlũmĩlya ũthyũ wake elekelye kũthi Yelusaleme, 52#Yoa 4.4.na atũma andũ mathi mbee wake: nao mathi, na mavota mũsyĩ ũmwe wa Asamalia, mamũseũvĩsye vandũ. 53#Yoa 4.9.Nao matyaamũthokya, nũndũ ũthyũ wake weelekele ta ũnũũthi Yelusaleme. 54#2 Asu 1.10,12.Na amanyĩw’a make, Yakovo na Yoana, moona ũu, masya, Mwĩaĩi, nũkwenda tũwĩe mwaki wume ĩtunĩ, ũmavĩvye? 55Ĩndĩ eethyũũa, amakan’ya. 56Na mathi mũsyĩ ũngĩ.
Motato kwa ala mekwenda ũtw’ĩka amanyĩw’a
(MATHAYO 8.19–22)
57Na makĩthi nzĩanĩ, mũndũ ũmwe amwĩa, Ngakũvikĩla o kũla wĩthi. 58Na Yesũ amwĩa, Mbĩwa syĩ na maima, na nyũnyi sya yayaya syĩ na ndala; ĩndĩ Mwana wa mũndũ nde na vandũ va ũkomya mũtwe wake. 59Na amwĩa ũngĩ, Mbikĩla. Ĩndĩ nake asya, Mwĩaĩi, nenga ũthei nambe ũthi kũmũthika asa wakwa. 60Ĩndĩ amwĩa, Eka akw’ũ mathike akw’ũ moo; ĩndĩ we enda ũkatavan’ye ũsumbĩ wa Ngai. 61#1 Asu 19.20.Na ũngĩ asya, Ngakũvikĩla, Mwĩaĩi; ĩndĩ nenga ũthei nambe ũthi kwatiĩa ũvoo ala ma nyũmba yakwa. 62Ĩndĩ Yesũ amwĩa, Mũndũ akwata mĩtĩ ya ĩembe ya ng’ombe, aisisya na ĩtina, ndeanĩwe nĩ ũsumbĩ wa Ngai.
Kasalukuyang Napili:
Luka 9: Mbivlia
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
